1 Nákhí rí Ana̱ꞌlóꞌ neꞌne awan rí ginii, nixnée̱ xtángoo xáne ma̱gu̱ma guꞌwá ná ma̱gu̱ma-mba̱a̱ mbayíí ge̱jyoꞌ. 2 Xáꞌnii niwiꞌtháa guꞌwá dxákuun xtíin rúꞌkhue̱n nákhí ni̱gu̱ma: awúun ne̱ rí ginii jayu mbiꞌyuu Ná rí Tsúꞌkhaa. Ikhín ni̱we̱je̱ ajwa̱nꞌ ná na̱rigu agu ma̱ꞌne mbiꞌi, jamí ni̱we̱je̱ mbá xapa nakhú ná nitráma guma rí kixnáxe̱ ná inuu Ana̱ꞌlóꞌ. 3 Ná tsu̱du̱u̱ xtíin rí riajma̱ kra̱jngaa, ikhín neꞌne mbiꞌyuu Ná rí I̱tha̱án Tsúꞌkhaa. 4 Ikhín ni̱gi̱ꞌda̱ꞌ ixe̱ rí nigu̱u̱ ajwa̱nꞌ mo̱jmo̱ꞌ tsu̱du̱u̱ ná na̱gu̱ma gúní wájya jamí mangaa máꞌ ni̱gi̱da̱ꞌ e̱jnu̱u̱ awan rí nixuda-mina̱ꞌ Ana̱ꞌlóꞌ, rí nigu̱u̱ ajwa̱nꞌ mo̱jmo̱ꞌ tsu̱du̱u̱ jamí awúun. Ná e̱jna̱ ni̱gi̱wa̱nꞌ mbá raya ajwa̱nꞌ mo̱jmo̱ꞌ rí gati ganitsu rí mbiꞌyuu maná. Ikhín máꞌ gíwa̱nꞌ ixe̱ rí ni̱gi̱da̱ꞌ ñawúun Aarón rí nirudu-ráma̱a, jamí xapa itsí ná ka̱ma xtángoo awan rí neꞌne Ana̱ꞌlóꞌ. 5 Ná tsu̱du̱u̱ e̱jna̱ rúꞌkhue̱n nitráma xtiꞌkhúún ánje̱l tsí mbiꞌñúú kerubíín, tsí nu̱snga̱jma rí ikhín xtáa Ana̱ꞌlóꞌ, jamí nu̱rugua-rámáa̱ ga̱jma̱á xpípíi̱n rawuun e̱jna̱ ná naꞌne mba̱a̱ a̱kui̱in Ana̱ꞌlóꞌ jaꞌyoo aꞌkhán. I̱ndo̱ó máꞌ numuu rí ma̱xáxóo mu̱ꞌthán-makalóꞌ ga̱jma̱á numuu rúꞌkhue̱n rí xúge̱ꞌ.

6 Xkuaꞌnii jaꞌnii nitriga̱ mbá xúgíí rúꞌkhue̱n ná awúun guꞌwá dxákuun xtíin wajyúú. Ná rí Tsúꞌkhaa na̱tu̱ꞌu̱ún dxakuun tsitsíí rí mune̱-mba̱a̱ Ana̱ꞌlóꞌ. 7 Xómáꞌ Ná rí I̱tha̱án Tsúꞌkhaa rá, i̱ndo̱ó máꞌ tsí jayá idxu̱ún dxakuun na̱to̱ꞌo̱o̱ ikhín mbóó miꞌtsú mbá tsigu. Gíꞌmaa rí mbayée̱ iꞌdiúún xu̱kú maxnáxi̱i̱ ná inuu Ana̱ꞌlóꞌ kajngó marngudi̱i aꞌkhúu̱n jamí aꞌkhúún xa̱bo̱ xuajen rí túyáa̱ nini̱i̱. 8 Ga̱jma̱á majñu̱u̱ ríge̱ꞌ naꞌsngálóꞌ Xu̱u̱ꞌ Ana̱ꞌlóꞌ awúun máꞌ rí xóó ꞌgí Ná rí Tsúꞌkhaa awúun guꞌwá dxákuun xtíin, xóó máꞌ táma̱ꞌthoo jamba̱a̱ Ná rí I̱tha̱án Tsúꞌkhaa. 9 Mbá xúgíí rúꞌkhue̱n naꞌsngálóꞌ rí mbiꞌi xúge̱ꞌ, rí tsi̱gi̱jña̱ꞌ jamí xuñúú xu̱kú tsí nijáñúú rí kixnáxe̱ ikhín, na̱nguá gíꞌdoo ne̱ tsiakhe̱ rí ma̱ꞌne káxe̱ ne̱ a̱kui̱ín xa̱bo̱ tsí nune̱-mba̱a̱ Ana̱ꞌlóꞌ xkuaꞌnii. 10 Numuu rí xúgíí rúꞌkhue̱n naꞌthán i̱ndo̱ó máꞌ numuu ganitsu, numuu iya, jamí numuu mbaꞌa inii xómá rí ma̱ꞌne-jaꞌwu-mina̱aꞌ xa̱bo̱. Xtángoo rúꞌkhue̱n gíꞌdoo numuu ne̱ asndo mbiꞌi rí Ana̱ꞌlóꞌ mariꞌkhu̱u ne̱.

11 Xómáꞌ Krísto̱ ni̱ꞌkhe̱e̱ máꞌ, jamí ikhaa̱ ñajuu̱n tsí jayá idxu̱ún dxakuun ga̱jma̱á numuu mbá xúgíí rí máján guáꞌdáálóꞌ xúge̱ꞌ. Ikhaa̱ ni̱to̱ꞌo̱o̱ ná awúun guꞌwá dxákuun rí i̱tha̱án máján jamí i̱tha̱án káxe̱, rí túne̱-ku̱maa xa̱bo̱ numbaa. Rúꞌkhue̱n iꞌthán rí ra̱ꞌkhá ná numbaa ríge̱ꞌ ríga̱ ne̱. 12 Krísto̱ ni̱to̱ꞌo̱o̱ mbóó miꞌtsú Ná rí I̱tha̱án Tsúꞌkhaa, jamí jámuu gíꞌdoo numuu rí nixnáxi̱i̱ ikhín. Ni̱to̱ꞌo̱o̱ gáxnáxi̱i̱ iꞌdiuu̱ máꞌ ikhaa̱, ra̱ꞌkhá iꞌdiúún tso̱toon jamí iꞌdiúún i̱jín-xédé. Xkuaꞌnii neꞌtse̱-ri̱ñáa̱ꞌlóꞌ jámuu. 13 Gakon máꞌ rí iꞌdiúún xede̱, tso̱toon, jamí idiuu a̱ꞌdá-xédé gu̱mba tsí nakha-rámaa, ído̱ rí na̱díngaa ne̱ ná tsu̱du̱ún xa̱bo̱ tsí ra̱jáꞌwuun, gíꞌdoo ne̱ tsiakhe̱ rí ma̱ꞌne-jaꞌwu̱u xuñúu̱. 14 I̱ndo̱ó máꞌ numuu rí i̱tha̱án máꞌ gíꞌdoo tsiakhe̱ iꞌdiuu Krísto̱, tsí nda̱a̱ nitháan aꞌkhúun, jamí nixnáxe̱-mina̱ꞌ ná inuu Ana̱ꞌlóꞌ ga̱jma̱á majñu̱u̱ Xu̱u̱ꞌ Ana̱ꞌlóꞌ, tsí ndaꞌya jámuu. Ga̱jma̱á majñu̱u̱ iꞌdiuu Krísto̱ na̱gu̱ma-jaꞌwu̱u a̱kia̱nꞌlóꞌ ná inuu aꞌkhánlóꞌ rí na̱ka̱ jaguáanꞌlóꞌ ná ma̱ja̱ñálóꞌ, kajngó ma̱goo mu̱ꞌne̱-mba̱a̱lóꞌ Ana̱ꞌlóꞌ tsí xtáa ndaꞌya jámuu.

15 Ikhaa jngó, Krísto̱ ñajuun tsí naꞌthán-mbáá numalóꞌ ná inuu Ana̱ꞌlóꞌ ga̱jma̱á majñu̱u̱ mbá awan nuxe̱ꞌ. Jamí ga̱jma̱á majñu̱u̱ rí nijáñuu̱, naꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlóꞌ rí ni̱xu̱ꞌdá-mijnálóꞌ ga̱jma̱á numuu awan rí ginii, kajngó tsáanꞌ watraꞌwiáanꞌlóꞌ mu̱drígúlóꞌ jámuu rí nixuda-mina̱ꞌ Ana̱ꞌlóꞌ.

16 Ído̱ rí ríga̱ mbá i̱yi̱i̱ꞌ rí naꞌthán xáne ma̱wiꞌtháa drígo̱o̱ mbáa xa̱bo̱, ndaꞌyóo rí ma̱ja̱ñúu̱ ginii kajngó ma̱gi̱ꞌdoo numuu i̱yi̱i̱ꞌ rúꞌkhue̱n. 17 Numuu rí i̱yi̱i̱ꞌ rí naꞌthán xáne ma̱wiꞌtháa drígo̱o̱ mbáa xa̱bo̱, gíꞌdoo numuu ne̱ xí nijáñuu̱ máꞌ. Jamí ra̱gíꞌdoo numuu ne̱ xí xóó xtáa̱ ndaꞌyee̱. 18 Ikhaa numuu rúꞌkhue̱n, nákhí rí ni̱gi̱ꞌdu̱u̱n ni̱gi̱ꞌdoo numuu awan rí ginii, ni̱ga̱dí-rámuu iꞌdi mangaa. 19 Ído̱ wámbo̱o̱ Moisés niꞌthán-rúꞌúún xa̱bo̱ Israél mbá xúgíí rí naꞌthán xtángoo, a̱ꞌkhue̱n nigánda̱wo̱o̱ꞌ iꞌdiúún xede̱ jamí iꞌdiúún tso̱toon ga̱jma̱á yaꞌsi. A̱ꞌkhue̱n nijmuu̱ mogo̱ maña̱ꞌ jamí xkuíyo̱o̱ iná isópo̱ rí mastíngaa̱ ne̱ ná tsu̱du̱u̱ i̱yi̱i̱ꞌ xtángoo jamí ná tsu̱du̱ún mbá xúgíin xa̱bo̱ xuajen. 20 Jamí niꞌthúu̱n xa̱bo̱: «Ríge̱ꞌ ñajuun iꞌdiuu awan rí nandoo Ana̱ꞌlóꞌ rí mu̱ne̱-mbáníílaꞌ».* 21 Xúꞌkhue̱n máꞌ mangaa, ni̱rmu̱juu̱n ga̱jma̱á iꞌdi guꞌwá dxákuun xtíin jamí mbá xúgíí rí najmaa ná awúun ne̱. 22 Ná awúun xtángoo naꞌthán rí asndo xómá rí mbá xúgíí jayu ndaꞌyóo rí ma̱gu̱ma-jaꞌwu̱u ga̱jma̱á iꞌdi. Ikhaa jngó xí tsíga̱dí-rámuu iꞌdi, tsíꞌne mba̱a̱ a̱kui̱in Ana̱ꞌlóꞌ jaꞌyoo aꞌkhán.

23 Ikhaa jngó ndiꞌyóo rí xkuaꞌnii gágu̱ma-jaꞌwu̱u guꞌwá-xtíin ná ni̱gu̱ma-mba̱a̱ Ana̱ꞌlóꞌ, numuu rí mbá xúgíí rúꞌkhue̱n ñajuun xtiꞌkhuu rí ríga̱ ná mikhuíí. Xómáꞌ rí ríga̱ ná mikhuíí rá, i̱tha̱án máꞌ máján tsi̱gi̱jña̱ꞌ ndaꞌyóo rí ma̱gu̱ma-jaꞌwu̱u ga̱jma̱á ne̱ ikhaa. 24 Numuu rí táto̱ꞌo̱o̱ Krísto̱ ná awúun guꞌwá-xtíin ná na̱gu̱ma-mba̱a̱ Ana̱ꞌlóꞌ rí nene̱ xa̱bo̱ numbaa, rí ni̱to̱ꞌo̱o̱ ná awúun rí phú gakon. Mbáko máꞌ ni̱to̱ꞌo̱o̱ Krísto̱ asndo mikhuíí kajngó maxnáxe̱-mine̱e̱ꞌ ná inuu Ana̱ꞌlóꞌ ga̱jma̱á numalóꞌ, jamí ikhín xtáa̱ xúge̱ꞌ. 25 Jamí táto̱ꞌo̱o̱ rí maxnáxe̱-mine̱e̱ꞌ mbámbá tsigu ga̱jma̱á iꞌdiuu i̱mba̱a̱ꞌ, xómá eꞌne tsí jayá idxu̱ún dxakuun Ná rí I̱tha̱án Tsúꞌkhaa rí ꞌgí ná numbaa ríge̱ꞌ. 26 Xí xkuaꞌnii máꞌ ndaꞌyóo rí ma̱ꞌne Krísto̱ mangaa, mba̱ꞌyóo rí ma̱ja̱ñúu̱ mbaꞌa nothon asndo nákhí neꞌne-ku̱maa Ana̱ꞌlóꞌ numbaa xúꞌkhue̱n rá. Xómáꞌ xúge̱ꞌ rá, awúun mbiꞌi rí inu máꞌ na̱ka̱-rayámba̱ numbaa ríge̱ꞌ, ni̱ꞌkha̱ Krísto̱ rí maxnáxe̱-mina̱ꞌ ma̱ja̱ñúu mbóó miꞌtsú asndo jámuu ga̱jma̱á numuu aꞌkhánlóꞌ. 27 Xómá rí mbóó miꞌtsú wéje̱ rí ma̱ja̱ñúu xa̱bo̱ numbaa, jamí nda̱wa̱á a̱ꞌkhue̱n ma̱to̱ꞌo̱o̱ awan ga̱jma̱á numuu̱, 28 xkuaꞌnii máꞌ mangaa mbóó miꞌtsú nixnáxe̱-mina̱ꞌ Krísto̱ rí ma̱ja̱ñúu kajngó Ana̱ꞌlóꞌ ma̱ꞌne mba̱a̱ a̱kui̱in jaꞌyoo aꞌkhúún mbaꞌiin xa̱bo̱. Jamí ma̱ꞌkhe̱e̱ mbu̱júꞌ, nákha rí ma̱ja̱ñúu̱ numuu aꞌkhánlóꞌ, rí ma̱ꞌkhe̱e̱ ma̱ꞌne-jáwíi̱n tsí guáꞌthíi̱n.