1 Ikhaa jngó, gia̱wa̱n gúꞌne̱lóꞌ, awúun rí xóó ríga̱ mbiꞌi rí nixuda-mina̱ꞌ Ana̱ꞌlóꞌ maxnálóꞌ rí mbu̱ꞌyáa xa̱ꞌlóꞌ ga̱jma̱á nindxu̱u̱ ikhaa̱, ra̱ꞌkhá mbáa tsí ikháanꞌlaꞌ ma̱xájanáá mbayáa xu̱u̱ꞌ ga̱jma̱á nindxu̱u̱ Ana̱ꞌlóꞌ gáꞌne. 2 Numuu rí mangáánꞌlóꞌ waꞌthánlóꞌ ajngáa máján xómá ikhii̱n, i̱ndo̱ó máꞌ numuu rí ikhii̱n támbáñúu̱ ne̱, numuu rí táwe̱je̱ a̱kuíi̱n ná inuu Ana̱ꞌlóꞌ xómá nene̱ tsí ninimbu̱únꞌ ajngáa rúꞌkhue̱n. 3 Xómáꞌ ikháánꞌlóꞌ tsáanꞌ ninimba̱ꞌlóꞌ, ma̱ta̱ꞌa̱ꞌlóꞌ mbu̱ꞌyáa xa̱ꞌlóꞌ ga̱jma̱á nindxu̱u̱ Ana̱ꞌlóꞌ. Xómáꞌ tsí tánimbu̱únꞌ niꞌthúu̱n:

«Ikhaa jngó, nákhí rí najiꞌnúú ni̱xu̱ꞌdá-mina̱ꞌ ríge̱ꞌ:

"Ni miꞌtsú ma̱xátu̱ꞌúu̱n rí mbuyaa̱ xúu̱nꞌ ga̱jma̱á nindxu̱ꞌ"».*

Ana̱ꞌlóꞌ niꞌthán rúꞌkhue̱n, maske máꞌ wáxu̱u̱ mbá xúgíí ñajuu̱n asndo nákhí máꞌ neꞌne-ku̱maa̱ numbaa. 4 Numuu rí ríga̱ mbá ná naꞌthán xáꞌnii ga̱jma̱á numuu mbiꞌi tijwan ná i̱yi̱i̱ꞌ ajngóo Ana̱ꞌlóꞌ:

«Ndiyáa xu̱u̱ꞌ Ana̱ꞌlóꞌ mbiꞌi tijwan, numuu rí neꞌne-gáxu̱u̱ mbá xúgíí ñajuu̱n».*

5 Jamí naꞌthán ne̱ mbu̱júꞌ:

«Ni miꞌtsú ma̱xátu̱ꞌúu̱n rí mbuyaa̱ xúu̱nꞌ ga̱jma̱á nindxu̱ꞌ».*

6 Ikhaa jngó, ndaꞌyóo xóó rí ma̱tu̱ꞌu̱ún mbá tikhuun mbuya̱a xu̱únꞌ ga̱jma̱á nindxu̱u̱ Ana̱ꞌlóꞌ, numuu rí xa̱bo̱ tsí ginuu waꞌthúún ajngáa máján, tátu̱ꞌúu̱n ga̱jma̱á numuu rí túne̱-mbáníi̱ rí waꞌthúu̱n. 7 Ikhaa numuu rúꞌkhue̱n Ana̱ꞌlóꞌ niꞌgí i̱mba̱ mbiꞌi rí ñajuun «xúge̱ꞌ», jamí niꞌthée̱n ga̱jma̱á numuu mbiꞌi rúꞌkhue̱n nda̱wa̱á guéño ga̱jma̱á majñu̱u̱ Dabíd:

«Xí nu̱dxawíínlaꞌ a̱ꞌwóo Ana̱ꞌlóꞌ xúge̱ꞌ,

mu̱xúne̱ gúkú a̱kia̱nꞌlaꞌ».*

8 Xí numuu rí Josué nixnúu̱ ná mbuyaa̱ xúu̱nꞌ, ma̱xáꞌthán Ana̱ꞌlóꞌ nda̱wa̱á ga̱jma̱á numuu i̱mba̱ mbiꞌi. 9 Rúꞌkhue̱n iꞌthán rí xóó ríga̱ i̱mba̱ mbiꞌi rí mbuya̱a xu̱únꞌ xa̱bo̱ xuajñuu Ana̱ꞌlóꞌ. 10 Tsí ndayáa máꞌ xu̱u̱ꞌ, ndayáa̱ xu̱u̱ꞌ inuu mbá xúgíí ñajuu̱n, xómá rí Ana̱ꞌlóꞌ ndiyáa xu̱u̱ꞌ inuu mbá xúgíí ñajuun mangaa. 11 Ikhaa jngó, gu̱ꞌne̱-jáñíílóꞌ rí ma̱ta̱ꞌa̱ꞌlóꞌ mbu̱ꞌyáa xa̱ꞌlóꞌ ikhín, kajngó nimbáa ma̱xáyá-ri̱doo xkri̱dúún xa̱bo̱ tsí tánimbu̱únꞌ.

12 Rí ajngáa rawuun Ana̱ꞌlóꞌ ndaꞌya ne̱ jamí gíꞌdoo ne̱ tsiakhe̱, jamí i̱tha̱án xíni ne̱ inuu asndo nguáa máꞌ chíde̱ rí a̱jma̱ rawuun. Najngúun ne̱ asndo awúún jamí na̱ro̱thongaa ne̱ ními̱i jamí a̱kui̱in xa̱bo̱, mangaa máꞌ na̱ro̱thongaa ne̱ nítú rí na̱ru̱wa̱a itsu̱u̱ xa̱bo̱ jamí ngáñúu itsu̱u̱. Xúꞌkhue̱n máꞌ ndaꞌyoo ne̱ rí nandxaꞌwá-mina̱ꞌ jamí nandoo gáꞌne xa̱bo̱. 13 Numuu rí nda̱a̱ nitháan rí neꞌne-ku̱maa Ana̱ꞌlóꞌ rí tsíkujma ná inuu̱. Mbá xúgíí nakujma jamí ja̱ma̱ꞌtha iꞌyoo tsí wéje̱ rí mu̱guáꞌnúuꞌlóꞌ inuu kajngó mu̱ꞌtháa̱nlóꞌ rí ne̱ꞌne̱lóꞌ.

14 Kuaꞌdaalóꞌ mbáa tsí jayá idxu̱ún dxakuun tsí maphú ikhaa, Jesús, tsí ñajuun A̱dée Ana̱ꞌlóꞌ, jamí ni̱to̱ꞌo̱o̱ asndo mikhuíí. Ikhaa numuu rúꞌkhue̱n, mu̱xúni̱ꞌñáá-ranimba̱ꞌlóꞌ mbá xúgíí rí nanimba̱ꞌlóꞌ ga̱jma̱á numuu Ana̱ꞌlóꞌ. 15 Numuu rí na̱nguá guaꞌdaalóꞌ mbáa tsí jayá idxu̱ún dxakuun tsí tsíꞌngo̱o̱ gáñáwíin a̱kui̱in jaꞌyalóꞌ rí wabáánꞌlóꞌ, rí guaꞌdaalóꞌ mbáa tsí ndiyoo gixa̱a̱ gáꞌne-rájáa mbá xúgíí jayu xómá rí nugíꞌníí ikháánꞌlóꞌ, i̱ndo̱ó máꞌ numuu rí ikhaa̱ ni miꞌtsú táꞌnii̱ aꞌkhán. 16 Ikhaa jngó, a̱guáꞌnúlóꞌ ga̱jma̱á mbá jañii a̱kia̱nꞌlóꞌ ná inuu Ana̱ꞌlóꞌ, kajngó ma̱ñáwíin a̱kuii̱n jaꞌyalóꞌ jamí ma̱ni̱gu̱u̱ꞌ mambáyálóꞌ ído̱ rí phú ndaꞌyálóꞌ.