1 Ikhúúnꞌ ñajunꞌ Páblo̱, xa̱bo̱ tsí waxúngua̱a̱ꞌ neꞌne Jesukrísto̱ numuu rí xkuaꞌnii ndiyoo Ana̱ꞌlóꞌ.

Na̱xu̱ꞌmá i̱yi̱i̱ꞌ ríge̱ꞌ ma̱ꞌga inúú xa̱bi̱i Ana̱ꞌlóꞌ tsí mbá jañii a̱kui̱ín nanimbu̱únꞌ juyáá Krísto̱ Jesús, tsí júwa̱ꞌ ná xuajen Éfe̱so̱.

2 Ana̱ꞌlóꞌ Mikhuíí jamí Táta̱ Jesukrísto̱ gúne̱-tsakun-rámáaꞌlaꞌ jamí ikhii̱n máꞌ gúni̱i̱ rí ma̱juwalaꞌ tsímáá.

3 A̱gu̱ma-mba̱a̱ Ana̱ꞌlóꞌ, Anu̱u̱ Tátiálóꞌ Jesukrísto̱, numuu rí phú mbaꞌa inii rí máján na̱ꞌkha̱ mikhuíí nixnálóꞌ ga̱jma̱á majñu̱u̱ Krísto̱. 4 Ana̱ꞌlóꞌ niraꞌwáanꞌlóꞌ ga̱jma̱á majñu̱u̱ Krísto̱ asndo nákhí máꞌ xóó táꞌne-ku̱maa̱ numbaa, kajngó ma̱nindxa̱ꞌlóꞌ tsí jaꞌwuun jamí tsí nda̱a̱ aꞌkhúún ná inuu̱. Numuu rí phú nandoo̱ jaꞌyalóꞌ,* 5 kajngó wapha máꞌ niꞌgí-mine̱e̱ꞌ rí ma̱ga̱nú mbiꞌi rí ma̱nindxa̱ꞌlóꞌ i̱jii̱n tsí niguu̱n ga̱jma̱á majñu̱u̱ Jesukrísto̱, i̱ndo̱ó máꞌ ga̱jma̱á numuu rí xkuaꞌnii ndiyoo̱ ikhaa̱. 6 Xkuaꞌnii neꞌne Ana̱ꞌlóꞌ, kajngó ma̱goo mi̱ꞌthán rí phú mba̱a̱ rí májáan a̱kuii̱n jaꞌyalóꞌ ga̱jma̱á majñu̱u̱ A̱dée̱ tsí phú nandoo̱ jaꞌyoo̱. 7 Ga̱jma̱á numuu rí nijáñuu Krísto̱ ná ixe̱ krúsi̱, waꞌtse̱-ri̱ñáaꞌlóꞌ ná awúun jamínu̱ꞌ rí jaꞌyoo mu̱drígúlóꞌ jamí neꞌne mba̱a̱ a̱kui̱in Ana̱ꞌlóꞌ jaꞌyoo aꞌkhánlóꞌ. Xkuaꞌnii neꞌne Ana̱ꞌlóꞌ ga̱jma̱á nindxa̱ꞌlóꞌ numuu rí ra̱ꞌkhá tháán májáan a̱kuii̱n jaꞌyalóꞌ. 8 Ninújngoo-rámuu rí májáan a̱kui̱in Ana̱ꞌlóꞌ jaꞌyaló numuu rí phú na̱ma̱ñuu̱ jamí ndaꞌyoo̱ mújúu̱n rí naꞌnii̱. 9 Ikhaa̱ niꞌnii̱ rí mu̱ꞌne̱-nuwiinlóꞌ awan drígo̱o̱ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú, rí niꞌgí-mine̱e̱ꞌ rí ma̱ꞌne-mbánuu̱ ga̱jma̱á majñu̱u̱ Krísto̱. 10 Ído̱ ága̱nú mbiꞌi rí ma̱ꞌne-mbánuu Ana̱ꞌlóꞌ awan drígo̱o̱, maꞌgíi̱ Krísto̱ maꞌthán-ñájuun mbá xúgíí rí ríga̱ mikhuíí jamí rí ríga̱ ná numbaa.

11 Xúꞌkhue̱n máꞌ mangaa, wapha máꞌ niraꞌwáanꞌlóꞌ Ana̱ꞌlóꞌ ga̱jma̱á majñu̱u̱ Krísto̱ rí mu̱drígúlóꞌ rí gíꞌdoo̱ maxnálóꞌ, numuu rí ikhaa̱ naꞌnii̱ rí ma̱mba̱núu mbá xúgíí xómá rí niꞌgí-mine̱e̱ꞌ ikhaa̱. 12 Ana̱ꞌlóꞌ ndiyoo rí ikháanꞌ gináaꞌxo̱ꞌ ma̱ꞌne jañii a̱kia̱nꞌxo̱ꞌ ju̱ya̱á Krísto̱, kajngó mu̱tha̱nxo̱ꞌ rí máján ga̱jma̱á numuu̱, numuu rí maphú mba̱a̱ ski̱yu̱u̱ꞌ.

13 Xúꞌkhue̱n máꞌ mangáanꞌlaꞌ, nákhí rí ni̱dxawíínlaꞌ ajngáa rí gakon, ajngáa máján rí ni̱ꞌkha̱ gáꞌne-jríñáaꞌlaꞌ, ninimba̱ꞌlaꞌ ju̱ya̱á Krísto̱. A̱ꞌkhue̱n ni̱drígúlaꞌ tsinuu Ana̱ꞌlóꞌ tsí ñajuun Xu̱u̱ꞌ, tsí nixuda-mine̱e̱ꞌ máꞌ rí maxniálaꞌ. 14 Wapha máꞌ ni̱dríguíilóꞌ Xu̱u̱ꞌ Ana̱ꞌlóꞌ, numuu rí rúꞌkhue̱n nasngájma rí phú gakon rí mu̱drígúlóꞌ mbá xúgíí rí naxuda-mine̱e̱ꞌ maxnálóꞌ ído̱ gájríñáaꞌlóꞌ mbá jayu, kajngó ma̱kujma rí phú mba̱a̱ ski̱yu̱u̱ꞌ.

15 Ikhaa numuu rúꞌkhue̱n, ído̱ ni̱dxawuun rí nanimba̱ꞌlaꞌ ju̱ya̱á Táta̱ Jesús, jamí rí nandalaꞌ ju̱ñu̱ú mbá xúgíin tsí ñajúún xa̱bi̱i Ana̱ꞌlóꞌ, 16 tsíni̱ꞌñúu rí na̱rígu̱u gamaku inuu Ana̱ꞌlóꞌ ga̱jma̱á numalaꞌ, jamí na̱rmáꞌáan a̱kui̱nꞌ ja̱ya̱ꞌlaꞌ ído̱ rí na̱tha̱n-jáñuu Ana̱ꞌlóꞌ. 17 Na̱ndo̱ꞌo̱o̱ Anu̱u̱ Tátiálóꞌ Jesukrísto̱, Ana̱ꞌlóꞌ tsí phú mba̱a̱, rí ikhaa̱ gáꞌnii̱ rí ma̱ma̱ñalaꞌ ma̱juwalaꞌ, jamí gasngájma-mine̱e̱ꞌ inalaꞌ kajngó mu̱ne̱-nuwii̱n májánlaꞌ. 18 Na̱tha̱n-jáñuu Ana̱ꞌlóꞌ mangaa rí marmáꞌthoo̱ idalaꞌ, kajngó ma̱fraꞌa̱ꞌlaꞌ jamí mbu̱ya̱álaꞌ dí ñajuun rí ga̱jma̱á mbá jañii a̱kia̱nꞌlaꞌ mu̱waꞌthi̱ínlaꞌ rí ma̱janálaꞌ tsáanꞌ nindxaꞌwálaꞌ, jamí rí mbu̱ya̱álaꞌ wátha̱ mbaꞌa jamí mba̱a̱ gíꞌdoo numuu xúgíí rí naxnúu̱ tsí ñajúún xa̱bii̱. 19 Na̱nda̱ꞌa̱ mangaa rí ma̱goo mbu̱ya̱álaꞌ rí ninújngoo mba̱a̱ jamí phú gakhi̱i̱ ski̱yu̱u̱ꞌ Ana̱ꞌlóꞌ, rí nambáyálóꞌ ga̱jma̱á ikháánꞌlóꞌ tsáanꞌ ninimba̱ꞌlóꞌ juꞌyáa̱. Ikhaa máꞌ tsiakhe̱ ríge̱ꞌ ñajuun rí nijmuu Ana̱ꞌlóꞌ 20 nákhí niꞌnii̱ rí mbayáa mbiꞌyuu Krísto̱ ná majñu̱ú wa̱jen jamí niꞌnii̱ rí Krísto̱ ma̱ge̱ꞌe̱ ná ñawún mújúu̱n ná mikhuíí. 21 I̱tha̱án mba̱a̱ tsiakhe̱ gíꞌdoo Krísto̱ inúú mbá xúgíin gíñá ꞌguéen jamí tsí mba̱a̱ ski̱ñu̱ú, inúú xúgíin thúngaa jamí xa̱bo̱ ñajun. I̱tha̱án mba̱a̱ ski̱yu̱u̱ꞌ Krísto̱ inuu mbá xúgíí rí gíꞌdoo tsiakhe̱ ná numbaa ríge̱ꞌ jamí ná numbaa rí ni̱kú ma̱ꞌkha̱. 22 Ana̱ꞌlóꞌ nixúdaa mbá xúgíí ná ñawúun Krísto̱ kajngó maꞌthán-ñájuu̱n ne̱, jamí niꞌgíi̱ rí ma̱nindxu̱u̱ xa̱bo̱ idxu̱ún tsí nanimbu̱únꞌ juyáa̱, 23 tsí ñajúún xómá xuyuu̱. Ga̱jma̱á majñu̱u̱ Krísto̱ naꞌne-káxi̱in mbá xúgíin tsí nanimbu̱únꞌ juyáa̱, xúꞌkhue̱n máꞌ mbá xúgíí rí ríga̱.