1 Nákhí rí ikháanꞌlaꞌ nijuwalaꞌ ná awúun aꞌkhánlaꞌ, asndo xó rí nijáñalaꞌ máꞌ jaꞌnii, numuu rí nijuwalaꞌ tsíngua̱ꞌ ná inuu Ana̱ꞌlóꞌ. 2 Nákhí wajyúú ne̱ne̱ mangáanꞌlaꞌ rí xkawe̱ꞌ nune̱ xa̱bo̱ tsí júwa̱ꞌ ná numbaa ríge̱ꞌ. Ne̱ne̱laꞌ rí nandoo tsiakhe̱ ꞌguéen tsí naꞌthán-ñájúún i̱ꞌwíin gíñá ꞌguéen ná inuu gíñá ri̱jma̱á. Ikhaa máꞌ tsiakhe̱ ꞌguéen rúꞌkhue̱n naꞌthán-ñájúún xa̱bo̱ tsí najñaguun ná inuu Ana̱ꞌlóꞌ. 3 Mbá xúgiáanꞌ ikháánꞌlóꞌ, xkuaꞌnii nijuwalóꞌ nákhí wajyúú. Ningriga̱ꞌlóꞌ nu̱ꞌne̱ rí na̱ni̱gua̱ꞌlóꞌ, ne̱ꞌne̱lóꞌ aꞌkhán rí nandoo xuyalóꞌ jamí mbá xúgíí rí xkawe̱ꞌ ni̱ju̱ma̱ꞌlóꞌ. Ga̱jma̱á numuu rúꞌkhue̱n, phú jaꞌyoo rí mu̱drígúlóꞌ jamínu̱ꞌ gáꞌne Ana̱ꞌlóꞌ, xómá jaꞌyoo rí mu̱dri̱gú ne̱ tsí i̱ꞌwíin. 4 Xómáꞌ Ana̱ꞌlóꞌ, maphú mba̱a̱ niñáwíin a̱kuii̱n jaꞌyalóꞌ, numuu rí phú nandoo̱ jaꞌyalóꞌ. 5 Niꞌnii̱ rí mbu̱ꞌyáa mbiꞌyalóꞌ ga̱jma̱á nindxu̱u̱ Krísto̱, maske máꞌ asndo xó rí juwa nijáñalóꞌ inuu̱ ga̱jma̱á numuu aꞌkhánlóꞌ. ¡Nijríñáaꞌlaꞌ ga̱jma̱á numuu rí Ana̱ꞌlóꞌ nixnálaꞌ rí máján rí ra̱jáꞌyalaꞌ! 6 Nákhí rí Ana̱ꞌlóꞌ neꞌne rí mbayáa mbiꞌyuu Krísto̱ Jesús, niꞌnii̱ rí mbu̱ꞌyáa mbiꞌyalóꞌ mangáanꞌlóꞌ jamí rí ma̱trigáanꞌlóꞌ ga̱jma̱á nindxu̱u̱ ná mikhuíí. 7 Xkuaꞌnii neꞌne Ana̱ꞌlóꞌ kajngó masngájmee̱ ná mbiꞌi rí ni̱kú ma̱ꞌkha̱, rí ra̱ꞌkhá tháán mba̱a̱ rí máján rí ra̱jáꞌyalóꞌ nixnálóꞌ, jamí ra̱ꞌkhá tháán nandoo̱ jaꞌyalóꞌ ga̱jma̱á majñu̱u̱ Krísto̱ Jesús. 8 Ikháanꞌ nijríñáaꞌlaꞌ numuu rí nijanálaꞌ rí máján rí ra̱jáꞌyalaꞌ ga̱jma̱á majñu̱u̱ rí wéje̱ a̱kia̱nꞌlaꞌ ná inuu Jesús. Ra̱ꞌkhá ikháanꞌlaꞌ ni̱ꞌnga̱ꞌlaꞌ ne̱ne̱-jríya̱ꞌ-mijnálaꞌ, rí Ana̱ꞌlóꞌ neꞌne-jríñáaꞌlaꞌ. 9 Tájríñáaꞌlaꞌ ga̱jma̱á numuu rí nu̱ne̱laꞌ rí máján, kajngó nimbáa ma̱xákúxe̱-mina̱ꞌ inuu Ana̱ꞌlóꞌ. 10 Numuu rí Ana̱ꞌlóꞌ neꞌne-ku̱máaꞌlóꞌ ga̱jma̱á majñu̱u̱ Krísto̱ Jesús, kajngó mu̱ꞌne̱lóꞌ rí máján, ikhaa rí wapha máꞌ ni̱ru̱thuun Ana̱ꞌlóꞌ rí mu̱ꞌne̱lóꞌ.

11 Ikhaa numuu rúꞌkhue̱n, ga̱rmáꞌáan a̱kia̱nꞌlaꞌ rí nákhí wajyúú, tsáanꞌ ra̱ꞌkháa xa̱bo̱ judío̱ ñajwanlaꞌ, neꞌne mbiꞌyalaꞌ «tsí ra̱júda tsina jndi» nene̱ xa̱bo̱ judío̱. Xómáꞌ ikhii̱n nixna-mbiꞌi-mijnée̱ «tsí juda tsina jndi», tsina rí na̱gu̱ma ga̱jma̱á ñawúún xa̱bo̱ numbaa. 12 Ga̱rmáꞌáan a̱kia̱nꞌlaꞌ rí nákhí wajyúú, tájuwalaꞌ ga̱jma̱á nindxu̱u̱ Krísto̱, ni máꞌ na̱nguá jiꞌyá mbiꞌyalaꞌ ga̱jma̱á nindxu̱ún xa̱bo̱ numbaa Israél, ni máꞌ na̱nguá jaꞌyalaꞌ rí nixuda-mina̱ꞌ Ana̱ꞌlóꞌ ga̱jma̱á nindxúu̱n ikhii̱n. Mingíná nijuwalaꞌ ná numbaa ríge̱ꞌ: tájuwalaꞌ ga̱jma̱á nindxu̱u̱ Ana̱ꞌlóꞌ ni máꞌ nda̱a̱ rí ga̱jma̱á mbá jañii a̱kia̱nꞌlaꞌ guáꞌthi̱ínlaꞌ rí ma̱janálaꞌ. 13 Xómáꞌ xúge̱ꞌ juwalaꞌ ga̱jma̱á nindxu̱u̱ Krísto̱ Jesús. Ikháanꞌlaꞌ tsáanꞌ nijuwalaꞌ tsíngua̱ꞌ inuu Ana̱ꞌlóꞌ nákhí wajyúú, ni̱ꞌkha̱ jiꞌdáanꞌlaꞌ mijngi ga̱jma̱á numuu rí nijáñuu Krísto̱.

14 Krísto̱ neꞌne rí ma̱mba̱xíiꞌlóꞌ jamí ni̱ru̱wáanꞌlóꞌ kajngó ma̱ꞌni̱i i̱mbo̱ó xuajen ñajwanlóꞌ. Nákhí rí wajyúú tsí xa̱bo̱ judío̱ jamí tsí ra̱ꞌkháa judío̱ ñajúún, tsíyoo gúya-mijnée̱, asndo xó rí mbá xu̱nꞌ neꞌne-wájíi̱n jaꞌnii. Xómáꞌ Krísto̱, nákhí rí nijáñuu̱, nirngáxi̱i̱ xu̱nꞌ sia̱nꞌ rúꞌkhue̱n. 15 Ikhaa̱ niꞌnii̱ rí náxági̱ꞌdoo tsiakhe̱ rí naꞌthán xtángoo, kajngó ma̱ru̱waa̱ nájma̱ xuajen, ma̱ꞌni̱i i̱mbo̱ó xuajen nuxe̱ꞌ ga̱jma̱á nindxu̱u̱ ikhaa̱. Xkuaꞌnii niꞌnii̱ kajngó náxátsa̱ña̱ꞌlóꞌ. 16 Nákhí rí Jesukrísto̱ nijáñuu ná ixe̱ krúsi̱, neꞌne-gámbo̱o̱ sia̱nꞌ, niꞌnii̱ rí nájma̱ inúú xa̱bo̱ ma̱mba̱xíin ga̱jma̱á nindxu̱u̱ Ana̱ꞌlóꞌ, kajngó ma̱ꞌni̱i i̱mba̱wíi xa̱bo̱ ñajúu̱n. 17 Ikhaa̱ ni̱ꞌkhe̱e̱ gáꞌthán-raꞌee̱ ajngáa máján rí naꞌne rí ma̱ju̱wá tsímáá xa̱bo̱, ikháanꞌlaꞌ tsáanꞌ nijuwalaꞌ tsíngua̱ꞌ inuu Ana̱ꞌlóꞌ, jamí ikháanꞌxo̱ꞌ tsáanꞌ nijuwaxo̱ꞌ mijngi inuu̱. 18 Ga̱jma̱á numuu rí neꞌne Krísto̱, mbá xúgiáanꞌlóꞌ ma̱goo mu̱xu̱ꞌmá-mijnálóꞌ inuu Ana̱ꞌlóꞌ ga̱jma̱á majñu̱u̱ mbóó ikhaa máꞌ Xu̱u̱ꞌ Ana̱ꞌlóꞌ.

19 Ikhaa jngó, nákha máꞌ xa̱bo̱ tsí naguwá tsíngua̱ꞌ ni máꞌ tsí tsígu̱ma-nuwiin ñajwanlaꞌ rí xúge̱ꞌ rá, rí xa̱bo̱ xuajñuu jamí xa̱bo̱ guꞌwóo Ana̱ꞌlóꞌ ñajwanlaꞌ. 20 Ikháanꞌ ñajwanlaꞌ xómá mbá guꞌwá rí na̱tu̱xu̱u̱ ná tsu̱du̱ún tsí waxúngui̱inꞌ jamí tsí ni̱rawíjnga̱a ajngóo Ana̱ꞌlóꞌ. Jamí jmína̱a̱ꞌ máꞌ Jesukrísto̱ ñajuun xómá itsí mba̱a̱ rí na̱ge̱ꞌe̱ ná nakhúu guꞌwá. 21 Ga̱jma̱á ski̱yu̱u̱ꞌ ikhaa̱ naxtoꞌwóo mújúun jamí na̱tu̱xu̱u̱ asndo ndáxe̱ mbá xúgíí guꞌwá, kajngó ma̱nindxu̱u̱ ne̱ guꞌwá kiajuun drígo̱o̱ Táta̱. 22 Ga̱jma̱á máꞌ ski̱yu̱u̱ꞌ ikhaa̱ ikháanꞌlaꞌ nawáanꞌlaꞌ gajmiálaꞌ xa̱bo̱ judío̱ mangaa, xómá mbá guꞌwá, kajngó ma̱nindxa̱ꞌlaꞌ xómá mbá guꞌwá ná xtáa Ana̱ꞌlóꞌ ga̱jma̱á majñu̱u̱ Xu̱u̱ꞌ.