Xa̱bo̱ Éfe̱so̱ 3

Rí na̱nda̱ꞌa̱ Páblo̱ ga̱jma̱á numúú tsí nanimbu̱únꞌ juyáá Jesús ná Éfe̱so̱.

14 Ikhaa numuu rúꞌkhue̱n na̱sma̱tígo̱ꞌ inuu Anu̱u̱ Tátiálóꞌ Jesukrísto̱,*3.14 Ríga̱ mbá tikhu i̱yi̱i̱ꞌ griégo̱ rí wayuu ná na̱nguá i̱ꞌkha̱ ajngáa ríge̱ꞌ: «Anu̱u̱ Tátiálóꞌ Jesukrísto̱». 15 tsí naxná mbiꞌñúú mbá xúgíin xa̱bo̱ tsí júwa̱ꞌ ná mikhuíí jamí ná numbaa. 16 Na̱ndo̱ꞌo̱o̱ Ana̱ꞌlóꞌ rí ga̱jma̱á majñu̱u̱ Xu̱u̱ꞌ jamí ga̱jma̱á majñu̱u̱ ski̱yu̱u̱ꞌ rí phú wáá mi̱ndaꞌkho, gaxnálaꞌ tsiakhe̱ rí ma̱ꞌne jañii a̱kia̱nꞌlaꞌ ju̱yáa̱. 17 Na̱ndo̱ꞌo̱o̱ Ana̱ꞌlóꞌ rí ma̱we̱je̱ a̱kia̱nꞌlaꞌ ná inuu Krísto̱ kajngó ma̱xtáa̱ mbá jayu ná awúun a̱kia̱nꞌlaꞌ. Xkuaꞌnii kajngó ma̱wajún-gúkuálaꞌ mbá jayu ga̱jma̱á numuu rí nandoo Ana̱ꞌlóꞌ jaꞌyalaꞌ. 18 Mangaa máꞌ na̱nda̱ꞌa̱ rí ma̱goo ma̱fraꞌa̱ꞌlaꞌ gajmiálaꞌ mbá xúgíin xa̱bi̱i Ana̱ꞌlóꞌ wátha̱ ma̱jña̱ꞌ, wátha̱ mba̱ꞌ, wátha̱ tsída̱ꞌ jamí wátha̱ me̱jno̱ꞌ rí nandoo Krísto̱ jaꞌyalóꞌ. 19 Na̱nda̱ꞌa̱ rí mu̱ne̱-nuwiinlaꞌ wátha̱ mba̱a̱ rí nandoo̱ jaꞌyalóꞌ, maske máꞌ ninújngoo mba̱a̱ ne̱ inuu mbá xúgíí rí nu̱ꞌne̱-nuwiinlóꞌ, kajngó ma̱nindxa̱ꞌlaꞌ xómá jayu nandoo Ana̱ꞌlóꞌ rí ma̱nindxa̱ꞌlaꞌ.