1 Ikhaa numuu rúꞌkhue̱n, ikhúúnꞌ Páblo̱, kru̱ꞌúún géjwa̱nꞌ ga̱jma̱á numuu rí na̱ne̱lo̱ꞌ ñajuun Krísto̱ Jesús ga̱jma̱á numa ikháanꞌlaꞌ, tsáanꞌ ra̱ꞌkháa xa̱bo̱ judío̱ ñajwanlaꞌ. 2 Na̱ju̱mu̱ꞌ rí gída̱ꞌ máꞌ idxa̱ꞌlaꞌ rí phú májáan a̱kui̱in Ana̱ꞌlóꞌ, ikhaa jngó nixnángaweꞌ rí ma̱mbáyálaꞌ rí mu̱ne̱-nuwiinlaꞌ rí phú májáan a̱kuii̱n. 3 Ana̱ꞌlóꞌ neꞌne rí ma̱ne̱-núwíinlo̱ꞌ awan drígo̱o̱ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. Ikhaa ñajuun rí inu máꞌ wámbo̱ꞌ ni̱tháán mbá lájwíin ná inuu i̱yi̱i̱ꞌ ríge̱ꞌ. 4 Ído̱ gúraxnuulaꞌ ne̱, a̱ꞌkhue̱n mbu̱ya̱álaꞌ rí nafroꞌo̱ꞌ awan drígo̱o̱ Krísto̱ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. 5 Awan ríge̱ꞌ, rí i̱ndo̱ó máꞌ Ana̱ꞌlóꞌ ni̱gi̱da̱ꞌ idxu̱u̱ nákhí wajyúú, tájanúú xa̱bo̱ tsí nijúwa̱ꞌ wajyúú mbiꞌi rí mune̱-nuwiin ne̱. Xómáꞌ xúge̱ꞌ rá, Ana̱ꞌlóꞌ naꞌne rí ga̱jma̱á majñu̱u̱ Xu̱u̱ꞌ mune̱-nuwiin ne̱ xa̱bii̱ tsí jaꞌwuun, ikhiin tsí waxúngui̱inꞌ jamí tsí nu̱rawíjnga̱a ajngóo̱. 6 Ríge̱ꞌ ñajuun awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱: Mbá xúgíin xa̱bo̱ tsí ra̱ꞌkháa judío̱ ñajúún mu̱dri̱guíi̱ mangii̱n rí nixuda-mina̱ꞌ Ana̱ꞌlóꞌ ga̱jma̱á majñu̱u̱ Krísto̱ Jesús, rí ma̱nindxúu̱n mbóó xuajen, asndo xó rí mbáwíi xa̱bo̱ gajmíi̱ xuajen Israél ga̱jma̱á majñu̱u̱ ajngáa máján.

7 Ga̱jma̱á numuu rí phú májáan a̱kui̱in Ana̱ꞌlóꞌ jaꞌyeꞌ, nijanúꞌ rí ma̱nindxu̱ꞌ yumbáá tsí naꞌthán-ráꞌa ajngáa máján ríge̱ꞌ, ga̱jma̱á numuu ski̱yu̱u̱ꞌ Ana̱ꞌlóꞌ rí ni̱gruígúlo̱ꞌ. 8 Ikhúúnꞌ ñajunꞌ xa̱bo̱ tsí phú i̱tha̱án na̱nguá gíꞌdoo numuu inúú mbá xúgíin xa̱bi̱i Ana̱ꞌlóꞌ, xómáꞌ Ana̱ꞌlóꞌ phú nga̱ju̱ún niꞌnii̱ rí nixnángaweꞌ rí ma̱thu̱ún ajngáa máján xa̱bo̱ tsí ra̱ꞌkháa judío̱ ñajúún. Ná ajngáa máján rúꞌkhue̱n nakujma rí ninújngoo gíꞌdoo numuu Krísto̱. 9 Xúꞌkhue̱n máꞌ mangaa, waꞌxnángawoꞌ ma̱ne̱ rí ma̱ma̱ñúú mbá xúgíin xa̱bo̱ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú. Ana̱ꞌlóꞌ neꞌne-ku̱maa mbá xúgíí rí ríga̱, jamí asndo nákhí máꞌ wajyúú mbiꞌi niꞌnii̱ awan rúꞌkhue̱n. 10 Xkuaꞌnii kajngó rí xúge̱ꞌ rá, mbá xúgíin gíñá ꞌguéen jamí xúgíí tsiakhe̱ rí ríga̱ ná mikhuíí, mune̱-nuwii̱n mbá xúgíí inii xó rí na̱ma̱ñuu Ana̱ꞌlóꞌ, ga̱jma̱á majñu̱ú tsí nanimbu̱únꞌ juyáá Jesús. 11 Xómá niꞌgí-mina̱ꞌ Ana̱ꞌlóꞌ rí ma̱ꞌne asndo nákhí wajyúú mbiꞌi ga̱jma̱á majñu̱u̱ Tátiálóꞌ Krísto̱ Jesús, xkuaꞌnii máꞌ neꞌne-mbánuu̱. 12 Ga̱jma̱á numuu rí wéje̱ a̱kia̱nꞌlóꞌ ná inuu Krísto̱, ja̱ma̱ꞌtha rí mu̱xu̱ꞌmá-mijnálóꞌ ga̱jma̱á mbá jañii a̱kia̱nꞌlóꞌ ná inuu Ana̱ꞌlóꞌ. 13 Ikhaa jngó na̱nda̱ꞌa̱ꞌlaꞌ rí mu̱xúne̱-waba-mijnálaꞌ xí ndu̱ya̱álaꞌ rí na̱mínu̱u̱ꞌ ga̱jma̱á numalaꞌ, numuu rí ikhaa rúꞌkhue̱n ñajuun rí nambáyálaꞌ.

14 Ikhaa numuu rúꞌkhue̱n na̱sma̱tígo̱ꞌ inuu Anu̱u̱ Tátiálóꞌ Jesukrísto̱,* 15 tsí naxná mbiꞌñúú mbá xúgíin xa̱bo̱ tsí júwa̱ꞌ ná mikhuíí jamí ná numbaa. 16 Na̱ndo̱ꞌo̱o̱ Ana̱ꞌlóꞌ rí ga̱jma̱á majñu̱u̱ Xu̱u̱ꞌ jamí ga̱jma̱á majñu̱u̱ ski̱yu̱u̱ꞌ rí phú wáá mi̱ndaꞌkho, gaxnálaꞌ tsiakhe̱ rí ma̱ꞌne jañii a̱kia̱nꞌlaꞌ ju̱yáa̱. 17 Na̱ndo̱ꞌo̱o̱ Ana̱ꞌlóꞌ rí ma̱we̱je̱ a̱kia̱nꞌlaꞌ ná inuu Krísto̱ kajngó ma̱xtáa̱ mbá jayu ná awúun a̱kia̱nꞌlaꞌ. Xkuaꞌnii kajngó ma̱wajún-gúkuálaꞌ mbá jayu ga̱jma̱á numuu rí nandoo Ana̱ꞌlóꞌ jaꞌyalaꞌ. 18 Mangaa máꞌ na̱nda̱ꞌa̱ rí ma̱goo ma̱fraꞌa̱ꞌlaꞌ gajmiálaꞌ mbá xúgíin xa̱bi̱i Ana̱ꞌlóꞌ wátha̱ ma̱jña̱ꞌ, wátha̱ mba̱ꞌ, wátha̱ tsída̱ꞌ jamí wátha̱ me̱jno̱ꞌ rí nandoo Krísto̱ jaꞌyalóꞌ. 19 Na̱nda̱ꞌa̱ rí mu̱ne̱-nuwiinlaꞌ wátha̱ mba̱a̱ rí nandoo̱ jaꞌyalóꞌ, maske máꞌ ninújngoo mba̱a̱ ne̱ inuu mbá xúgíí rí nu̱ꞌne̱-nuwiinlóꞌ, kajngó ma̱nindxa̱ꞌlaꞌ xómá jayu nandoo Ana̱ꞌlóꞌ rí ma̱nindxa̱ꞌlaꞌ.

20 Ana̱ꞌlóꞌ gíꞌdoo̱ tsiakhe̱ rí ma̱ꞌnii̱ i̱tha̱án mba̱a̱ mbá xúgíí xó rí nu̱nda̱ꞌáa̱lóꞌ o rí na̱ju̱ma̱ꞌlóꞌ ma̱ꞌnii̱. Ikhaa̱ naꞌnii̱ rúꞌkhue̱n ga̱jma̱á majñu̱u̱ ski̱yu̱u̱ꞌ rí kua̱ꞌa̱n ná awúun a̱kia̱nꞌlóꞌ. 21 Ikhaa jngó a̱gu̱ma-mba̱a̱ Ana̱ꞌlóꞌ ga̱jma̱á majñu̱ú tsí nanimbu̱únꞌ juyáá Jesús jamí ga̱jma̱á majñu̱u̱ Krísto̱ Jesús, mbá xúgíí mbiꞌi jamí mbá jámuu jayu. Xkuaꞌnii gáꞌne.