1 Nixtáa̱ mbáa xa̱bo̱ fariséo̱ mbiꞌyuu Nikodémo̱. Jamí mbáa máꞌ tsí jayá idxu̱ún xa̱bo̱ judío̱ ñajuu̱n. 2 Mbá mbroꞌon Nikodémo̱ ni̱ꞌkha̱ gáꞌyoo̱ Jesús, jamí niꞌthúu̱n:

—Táta̱ naꞌsngáá, ikháanꞌxo̱ꞌ ndu̱ya̱áxo̱ꞌ rí Ana̱ꞌlóꞌ nixúngua̱ánꞌ kajngó ma̱ra̱sngáxo̱ꞌ, numuu rí nimbáa xa̱bo̱ ma̱xáꞌngo̱o̱ gáꞌne rí phú wáá xómá rí nathane̱ ikháánꞌ, xí ra̱ꞌkhá Ana̱ꞌlóꞌ xtáa ga̱jma̱á nindxu̱u̱.

3 A̱ꞌkhue̱n niriꞌña Jesús:

—Na̱tha̱n-jmbaaꞌ rí asndo nimbáa tsí tsígu̱maa mbu̱júꞌ, ma̱xáxóo ma̱nindxu̱u̱ xa̱bo̱ tsí nithán-ñájwíín eꞌne Ana̱ꞌlóꞌ.

4 —Xáne gágoo ma̱gu̱maa mbu̱júꞌ mbáa xa̱bo̱ tsí nikhi̱i̱ máꞌ róꞌ, —niraxe̱ Nikodémo̱. —Á ma̱goo ma̱ta̱ꞌaa̱ mbu̱júu̱ ná awúun nánée̱ kajngó ma̱gu̱maa̱ mbu̱júu̱ rá dxe̱ꞌ.

5 A̱ꞌkhue̱n Jesús niriꞌñuu̱:

—Na̱tha̱n-jmbaaꞌ, xí mbáa tsígu̱maa ga̱jma̱á iya jamí ga̱jma̱á Xu̱u̱ꞌ Ana̱ꞌlóꞌ, ma̱xáxóo ma̱nindxu̱u̱ xa̱bo̱ tsí nithán-ñájwíín eꞌne Ana̱ꞌlóꞌ. 6 Tsí xa̱bo̱ numbaa naꞌnii̱ rí ma̱gu̱mii xa̱bo̱ numbaa máꞌ. Xómáꞌ tsí Xu̱u̱ꞌ Ana̱ꞌlóꞌ rá, naꞌnii̱ rí ma̱gu̱mii i̱ji̱in Ana̱ꞌlóꞌ. 7 Xámakuaaꞌ lá rí ni̱tha̱a̱nꞌ: "Ikháanꞌlaꞌ ndaꞌyóo rí ma̱gu̱máaꞌlaꞌ mbu̱júꞌ". 8 Xómá eꞌne gíñá ído̱ rí naxnúu, naxnúu ne̱ ná naꞌne a̱kui̱in ne̱ ikhaa, jamí maske asndo natadxawíín a̱ꞌwóo ne̱, tsíthayáá náá i̱ꞌkha̱ ne̱ jamí náá i̱ka̱ ne̱. Xkuaꞌnii máꞌ eꞌne ga̱jma̱á nindxu̱u̱ jámba̱a̱ tsí na̱gu̱maa eꞌne Xu̱u̱ꞌ Ana̱ꞌlóꞌ mangaa.

9 A̱ꞌkhue̱n niraxe̱ mbu̱júu Nikodémo̱:

—Xáne lá gágoo ma̱ꞌne rúꞌkhue̱n rá.

10 Xómáꞌ Jesús niriꞌñuu̱:

—Ikháánꞌ ñajwaanꞌ tsí naꞌsngúún xa̱bo̱ Israél, jamí tsífraꞌa̱a̱ꞌ ríge̱ꞌ ráanꞌ. 11 Na̱tha̱n-jmbaaꞌ rí nu̱tha̱nxo̱ꞌ rí na̱ma̱ñaxo̱ꞌ, jamí nu̱tha̱nxo̱ꞌ rí ndi̱ya̱áxo̱ꞌ ga̱jma̱á idaxo̱ꞌ, xómáꞌ ikháanꞌlaꞌ tsíyalaꞌ gánimba̱ꞌlaꞌ rí nu̱tha̱nxo̱ꞌ. 12 Xí tsínimba̱ꞌlaꞌ ído̱ rí na̱tha̱nꞌlaꞌ ga̱jma̱á numuu rí ríga̱ ná numbaa ríge̱ꞌ, xáne lá gánimba̱ꞌlaꞌ xí ma̱tha̱nꞌlaꞌ ga̱jma̱á numuu rí ríga̱ ná mikhuíí rá. 13 Asndo nimbáa tátsimuu mikhuíí, rí i̱ndo̱ó máꞌ tsí ni̱ga̱taa mikhuíí. Ikhaa tsúꞌkhue̱n ñajuun A̱dée Xa̱bo̱ Numbaa, tsí xtáa̱ mikhuíí.* 14 Xómá rí Moisés nixúxi̱i̱ a̱bo̱ꞌ ajwa̱nꞌ ná mbaa niníí nákhí wajyúú, xkuaꞌnii máꞌ jaꞌyoo rí mi̱drákamaa ná ixe̱ A̱dée Xa̱bo̱ Numbaa mangaa. 15 Kajngó jámba̱a̱ tsí nanimbo̱o̱ꞌ jaꞌyoo̱ ma̱xándáti̱ga̱a̱, rí* ma̱xtáa̱ jámuu.

16 »Numuu rí maphú nandoo Ana̱ꞌlóꞌ jaꞌñúú xa̱bo̱ numbaa rí asndo nixnáa̱ A̱dée̱ tsí mbáwíi, kajngó jámba̱a̱ tsí nanimbo̱o̱ꞌ jaꞌyoo A̱dée̱ ma̱xándáti̱ga̱a̱, rí ma̱xtáa̱ jámuu. 17 Numuu rí Ana̱ꞌlóꞌ táxuꞌmaa̱ A̱dée̱ ná numbaa kajngó maxnáxii̱n xa̱bo̱ numbaa rí mbuyamíni̱í jámuu, rí nixuꞌmaa̱ A̱dée̱ kajngó ma̱ꞌne-jáwíi̱n.

18 »Tsí nanimbo̱o̱ꞌ jaꞌyoo A̱dée Ana̱ꞌlóꞌ mi̱xáxnáxi̱i̱ rí mamínu̱u̱ꞌ jámuu. Xómáꞌ tsí tsínimbo̱o̱ꞌ rá, waxnáxi̱i̱ máꞌ rí mamínu̱u̱ꞌ jámuu numuu rí tsínimbo̱o̱ꞌ jaꞌyoo̱ A̱dée Ana̱ꞌlóꞌ tsí mbáwíi. 19 Jamí ikhaa numuu ríge̱ꞌ rí mi̱xnáxi̱in xa̱bo̱ mbuyamíni̱í jámuu: ni̱ꞌkha̱ agu rí nambiꞌñúú xa̱bo̱ ná numbaa, xómáꞌ xa̱bo̱ i̱tha̱án máꞌ ni̱ni̱gúu̱n neꞌne rí mijína xó rí agu, numuu rí ra̱máján rí nuni̱i̱. 20 Numuu rí jámba̱a̱ tsí naꞌne rí xkawe̱ꞌ tsíyoo̱ gáꞌyoo̱ agu, jamí tsíxuꞌma-mine̱e̱ꞌ ná ríga̱ agu, kajngó ma̱xákujma rí ra̱máján rí naꞌnii̱. 21 Xómáꞌ tsí xtáa naꞌne rí máján rá, naxuꞌma-mine̱e̱ꞌ ná ríga̱ agu kajngó ma̱kujma rí naꞌnii̱ rí nandoo Ana̱ꞌlóꞌ.

22 Nda̱wa̱á a̱ꞌkhue̱n Jesús ni̱ka̱ gajmíí tsí naꞌsngúún ná numbaa Judéa̱, ikhín nixtáa̱ gajmíi̱ mbá wátha̱ wáa mbiꞌi, jamí nixúꞌdu-maꞌíi̱n xa̱bo̱ ná awúun iya. 23 Xúꞌkhue̱n máꞌ Juáán mangaa, naxúꞌdu-maꞌíin xa̱bo̱ awúun iya ná Enón, ná mijngi Salím, numuu rí ikhín ríga̱ mba̱je̱ꞌ iya. Ikhín igóó xa̱bo̱ rí mi̱xúꞌdu-maꞌíin ná awúun iya gáꞌnii̱. 24 Numuu rí xóó máꞌ táꞌga géjwa̱nꞌ Juáán mbiꞌi rúꞌkhue̱n.

25 A̱ꞌkhue̱n tsí naꞌsngúún Juáán nithan-mijnée̱ gakhe̱ gajmíi̱ xa̱bo̱ judío̱* ga̱jma̱á numuu xó rí nune̱-jaꞌwu-mijnáa xa̱bo̱ judío̱ ná inuu Ana̱ꞌlóꞌ. 26 A̱ꞌkhue̱n nigóo̱ gútháa̱n Juáán:

—Táta̱ naꞌsngáá, ikhaa tsí wéje̱ ga̱jma̱á nindxa̱a̱ꞌ ná i̱mba̱ kri̱doo matha Jordán, tsí nirathán ga̱jma̱á numuu, ikhaa tsúꞌkhue̱n naxúꞌdu-maꞌíin xa̱bo̱ ná awúun iya mangaa, jamí mbá xúgíin xa̱bo̱ nagóó ná inuu̱.

27 A̱ꞌkhue̱n niriꞌñúu̱ Juáán:

—Nimbáa nda̱a̱ rí ma̱goo ma̱gi̱ꞌdoo xí ra̱ꞌkhá Ana̱ꞌlóꞌ naxnúu̱ ne̱. 28 Jmína̱áꞌ máꞌ ikháanꞌlaꞌ ni̱dxawunꞌlaꞌ nákhí rí ni̱tha̱nlo̱ꞌ: "Ra̱ꞌkhá ikhúúnꞌ ñajunꞌlo̱ꞌ Krísto̱, rí mbáa tsí waxúngua̱a̱ꞌ ma̱ꞌkha̱ inuu̱ ñajunꞌlo̱ꞌ". 29 Ná ndxa̱a̱ tsigúún, tsí ndayáa dxáꞌgú ñajuun tsí nanigúún. Xómáꞌ iyanga̱jwe̱e tsí nanigúún, tsí ꞌgí ga̱jma̱á nindxu̱u̱, maphú nadxu a̱kuii̱n ído̱ rí nadxawuu̱n a̱ꞌwóo tsí nanigúún. Xkuaꞌnii maphú nadxu a̱kui̱nꞌ ikhúúnꞌ rí xúge̱ꞌ. 30 Ikhaa̱ ñajuu̱n tsí jaꞌyoo rí ma̱ꞌga-ragaja̱a̱ rí gíꞌdoo numuu̱, jamí ikhúúnꞌ ma̱ꞌga-ragata̱a rí gíꞌdoo numuꞌlo̱ꞌ.

31 »Tsí na̱ꞌkha̱ ri̱jma̱á i̱tha̱án gíꞌdoo numuu inúú mbá xúgíin xa̱bo̱. Tsí na̱ꞌkha̱ mbayíí, ikhaa̱ ñajuu̱n xa̱bi̱i ju̱ba̱ꞌ, jamí naꞌthée̱n ga̱jma̱á numuu rí ríga̱ ná tsu̱du̱u̱ ju̱ba̱ꞌ. Tsí na̱ꞌkha̱ mikhuíí i̱tha̱án gíꞌdoo numuu inúú mbá xúgíin xa̱bo̱, 32 jamí naꞌthée̱n ga̱jma̱á numuu rí ndiꞌyoo̱ jamí nidxawuu̱n. I̱ndo̱ó máꞌ numuu rí nimbáa tsíyoo gánimbo̱o̱ꞌ rí naꞌthée̱n. 33 Xí mbáa xa̱bo̱ nanimbo̱o̱ꞌ rí naꞌthée̱n, ikhaa xa̱bo̱ tsúꞌkhue̱n naꞌthán rí kuwiin Ana̱ꞌlóꞌ. 34 Tsí waxúngua̱a̱ꞌ neꞌne Ana̱ꞌlóꞌ, ajngáa rawuun Ana̱ꞌlóꞌ iꞌthée̱n, numuu rí jmína̱a̱ꞌ máꞌ Ana̱ꞌlóꞌ nixnúu̱ mbá jañii Xu̱u̱ꞌ. 35 Ana̱ꞌlóꞌ Mikhuíí nandoo jaꞌyoo A̱dée, ikhaa jngó mbá xúgíí rí ríga̱ nirakhuáa̱ ná ñawúun A̱dée̱. 36 Tsí nanimbo̱o̱ꞌ jaꞌyoo A̱dée Ana̱ꞌlóꞌ, ndaꞌyee̱ jámuu. Xómáꞌ tsí tsíyoo gánimbo̱o̱ꞌ jaꞌyoo A̱dée Ana̱ꞌlóꞌ, ma̱xáꞌne-nuwiin xáne jaꞌnii rí mba̱ꞌyee̱ jámuu, rí mamínu̱u̱ꞌ jámuu gáꞌne Ana̱ꞌlóꞌ.