1 Mbá miꞌtsú xtáa Jesús naꞌthán-jáñuu Ana̱ꞌlóꞌ ná awúun mbá mbaa. Ído̱ wámbo̱o̱, a̱ꞌkhue̱n waꞌtháa̱n neꞌne mbáa tsí naꞌsngóo̱:

—Táta̱, arasngáxo̱ꞌ mu̱tha̱n-jáñíí Ana̱ꞌlóꞌ, xómá rí Juáán niꞌsngúún tsí nigóó tsu̱du̱u̱.

2 A̱ꞌkhue̱n Jesús niꞌthúún tsí naꞌsngúún:

—Ído̱ gútha̱n-jáñíílaꞌ Ana̱ꞌlóꞌ, xáꞌnii gútha̱nlaꞌ:

"Tátiáxo̱ꞌ, tsáánꞌ xtaa mikhuíí,*

a̱gu̱ma-mba̱ánꞌ i̱ndo̱ó máꞌ ikháánꞌ gúne̱ xa̱bo̱.

A̱ga̱nú mbiꞌi rí ikháánꞌ ma̱ra̱tha̱n-ñájúún xa̱bo̱.

Xómá nambánuu rí naꞌne a̱kia̱anꞌ ná mikhuíí,

xkuaꞌnii máꞌ gámbánuu ná numbaa ríge̱ꞌ mangaa.*

3 Araxnáxo̱ꞌ guma rí jayá mbiꞌyaxo̱ꞌ mbámbá mbiꞌi.

4 Athane̱ mba̱a̱ a̱kia̱anꞌ xtayáá aꞌkhánxo̱ꞌ,

numuu rí xkuaꞌnii máꞌ nu̱ne̱ mba̱a̱ a̱kia̱nꞌxo̱ꞌ ju̱ñu̱ú mbá xúgíin tsí gíꞌmii aꞌkhán inaxo̱ꞌ.

Ma̱xáta̱tsi̱ꞌñáxo̱ꞌ rí ma̱gu̱ma-rájáanꞌxo̱ꞌ mu̱ne̱xo̱ꞌ aꞌkhán,

rí athane̱-jríñáaꞌxo̱ꞌ inuu rí ra̱máján".*

5 Jesús niꞌthúu̱n ajngáa ríge̱ꞌ mangaa: «Á xtáa mbáa xa̱bo̱ tsí gíꞌdaa mbáa iyanga̱jwe̱e, tsí na̱ka̱ tikhu mbroꞌon ná guꞌwóo̱ rí maꞌthúu̱n xáꞌnii dxe̱ꞌ: "Araxná-riꞌkhuꞌ tháan mbá atsú gaꞌwaanꞌ. 6 Numuu rí mbáa iyanga̱jwe̱ꞌ ni̱ga̱nú guꞌwóꞌ, ni̱ꞌkhe̱e̱ gáꞌyeꞌ, jamí nda̱a̱ nitháan rí gúꞌdo̱ꞌ ma̱xnu̱u̱ mi̱khui̱i̱". 7 Xómáꞌ xa̱bo̱ tsí waxkaxi̱i, á xáꞌnii gáriꞌñee̱ i̱ju̱ma̱ꞌlaꞌ rá: "Ma̱xátra̱jmúú. Ni̱rugua̱a máꞌ guꞌwóꞌ, jamí nibúún máꞌ i̱ji̱nꞌ ga̱jma̱á nindxu̱ꞌ. Tsíyaphúún ma̱gúxo̱n ma̱xna̱a̱ꞌ rí nandaaꞌ". 8 Na̱tha̱nꞌ-jmbalaꞌ rí maske máꞌ tsíyoo̱ gátu̱xu̱u̱ maxnúu̱ rí ndaꞌyóo xa̱bo̱ numuu rí iyanga̱jwa̱ ñajuu̱n, i̱ndo̱ó máꞌ numuu rí ma̱tu̱xu̱u̱ꞌ tsiakhe̱ maxnúu̱ asndo wátha̱ rí ndaꞌyóo tsúꞌkhue̱n numuu rí tsíti̱yu̱u̱ꞌ rí ma̱ꞌne-gajmúu̱.

9 »Ikhaa jngó ikhúúnꞌ na̱tha̱nꞌlaꞌ: Gu̱nda̱ꞌa̱laꞌ, kajngó ma̱janálaꞌ. Gu̱ꞌyálaꞌ, kajngó mu̱xkamaalaꞌ. Gu̱tha̱n-ráꞌalaꞌ, kajngó ma̱ma̱ꞌthoo xkrugua ma̱ta̱ꞌa̱ꞌlaꞌ. 10 Numuu rí jámba̱a̱ tsí na̱nda̱ꞌa̱, najanáá. Tsí ndaꞌyá, naxkamaa. Jamí tsí naꞌthán-raꞌa, na̱ma̱ꞌthoo xkrugua ma̱to̱ꞌo̱o̱.

11 »Á xtáa mbáa tsí ikháanꞌlaꞌ tsí ma̱ꞌngo̱o̱ a̱kui̱in rí maxnúu mbá itsí a̱dée, xí na̱nda̱ꞌa̱ guma me̱kho̱ dxe̱ꞌ.* O maxnúu̱ mbáa a̱bo̱ꞌ a̱dée̱, xí na̱nda̱ꞌa̱a̱ mbáa i̱gi̱ꞌ mi̱khu̱u̱ dxe̱ꞌ. 12 O maxnúu̱ mbáa xi̱yú, xí na̱nda̱ꞌa̱ mbá xndúu xtíla̱ dxe̱ꞌ. 13 Xí ikháanꞌlaꞌ, tsáanꞌ xa̱bo̱ tsí xkawi̱i̱ꞌ a̱kui̱ín ñajwanlaꞌ, na̱ma̱ñalaꞌ nu̱xnu̱ú i̱jña̱ꞌlaꞌ rí máján, á ra̱ꞌkhá i̱tha̱án májáan a̱kui̱in Ana̱ꞌlóꞌ Mikhuíí rí maxnúu̱ Xu̱u̱ꞌ tsí nu̱nda̱ꞌa̱a̱ ná inuu̱ kajngó ma̱xtáa̱ ga̱jma̱á nindxúu̱n rá».

14 Mbá miꞌtsú xtáa Jesús naxkriya̱a̱ꞌ ná xuyuu mbáa xa̱bo̱ mbáa gíñá ꞌguéen, tsí neꞌne rí ma̱ꞌne nda̱a̱ ajngóo xa̱bo̱. Ído̱ nigájna̱a gíñá ꞌguéen rá, núkho̱ ni̱ꞌkha̱a ajngóo xa̱bo̱ tsúꞌkhue̱n, jamí phú nimakúún xa̱bo̱ rí ndiyáá rúꞌkhue̱n. 15 I̱ndo̱ó máꞌ numuu rí mbá tikhuun xa̱bo̱ nithan: «Xa̱bo̱ tsíge̱ꞌ na̱grui̱gú ski̱yu̱u̱ꞌ gixa̱a̱,* tsí naꞌthán-ñájúún gíñá ꞌguéen, ikhaa jngó na̱ꞌngo̱o̱ naxkawíi̱n gíñá ꞌguéen ná xuñúú xa̱bo̱».

16 Jamí i̱ꞌwíin xa̱bo̱ ndiñúú gúne̱-rájáa̱ rí ma̱ꞌnii̱ mbá rí phú wáá ga̱jma̱á ski̱yu̱u̱ꞌ Ana̱ꞌlóꞌ, kajngó mbuyáa̱ dí gáꞌnii̱. 17 Xómáꞌ ikhaa̱, ndaꞌyoo̱ máꞌ rí nu̱ndxa̱ꞌwa̱-mijná xa̱bo̱ tsúꞌkhue̱n, ikhaa jngó niꞌthúu̱n: «Mbá xúgíí numbaa ná naꞌthán-ñájun mbáa thúngaa, ná na̱tsa̱ñu̱ú juya-mijná máꞌ ikhiin xa̱bo̱, ma̱mbáa numbaa rúꞌkhue̱n. Jamí mbá guꞌwíin xa̱bo̱ tsí na̱tsa̱ñu̱ú juya-mijná máꞌ ikhiin, ma̱mbíi̱n. 18 Xúꞌkhue̱n máꞌ eꞌne ga̱jma̱á nindxu̱u̱ Satanás mangaa, xí na̱tsa̱ñu̱u̱ꞌ jaꞌya-mine̱e̱ꞌ máꞌ ikhaa̱. Xí ikhaa̱ naxníꞌ tsiakhe̱ rí ma̱xkawíin gíñá ꞌguéen ná xuñúú xa̱bo̱, xómá i̱tha̱n ikháanꞌlaꞌ, xáne lá gáwe̱je̱ gúkúu ná naꞌthán-ñájwii̱n xúꞌkhue̱n rá.

19 »Xí ikhúúnꞌ na̱xkawíin gíñá ꞌguéen ná xuñúú xa̱bo̱ ga̱jma̱á ski̱yu̱u̱ꞌ gixa̱a̱, tsáa ixnúú tsiakhe̱ tsí nu̱sngúún ikháanꞌlaꞌ rí mu̱xkawíi̱n xúꞌkhue̱n rá. Ikhaa jngó, ikhiin máꞌ tsí nu̱sngúúnlaꞌ mu̱ra̱jwe̱e̱ꞌ ga̱jma̱á numalaꞌ. 20 Xómáꞌ ikhúúnꞌ na̱xkawíin gíñá ꞌguéen ná xuñúú xa̱bo̱ ga̱jma̱á ski̱yu̱u̱ꞌ Ana̱ꞌlóꞌ, jamí rúꞌkhue̱n naꞌthán rí ni̱ga̱nú máꞌ mbiꞌi rí maꞌthán-ñájwanlaꞌ Ana̱ꞌlóꞌ.

21 »Ído̱ rí mbáa xa̱bo̱ gúkuíi na̱ña̱wu̱u̱n guꞌwóo jamí gíꞌdoo̱ rí nambáyú-mine̱e̱ꞌ ga̱jma̱á, ríga̱ mújúun mbá xúgíí rí gíꞌdoo̱. 22 I̱ndo̱ó máꞌ numuu rí ído̱ na̱ꞌkha̱ i̱mba̱a̱ꞌ xa̱bo̱ tsí i̱wa̱á gúkuíi xó rí ikhaa̱, na̱ꞌngo̱o̱ inuu̱ jamí narígú-jáꞌyúu̱ mbá xúgíí rí khiamuu̱ mambáyúu̱, jamí tsúꞌkhue̱n maxpíꞌtháa mbá xúgíí rí nirígú-jáꞌyúu̱.

23 »Tsí na̱nguá xtáa ga̱jma̱á nindxu̱ꞌ, xa̱bo̱ tsí gíꞌdúún sia̱nꞌ ñajuun tsúꞌkhue̱n. Jamí tsí na̱nguá i̱gu̱xi̱i ga̱jma̱á nindxu̱ꞌ, nastróꞌoo tsúꞌkhue̱n.

24 »Ído̱ rí gíñá ꞌguéen nagájna̱a ná xuyuu xa̱bo̱, ngrigo̱o̱ꞌ ná mbaa mixoo, ndaꞌyée̱ ná mbayáa̱ xu̱u̱ꞌ. Jamí ído̱ na̱nguá ixkamaa̱ ná mbayáa̱ xu̱u̱ꞌ, a̱ꞌkhue̱n naꞌthán-mine̱e̱ꞌ: "Ma̱thangu̱únꞌlo̱ꞌ ná guꞌwóꞌ rí nigájnuꞌ". 25 Ído̱ na̱ga̱núu̱, a̱ꞌkhue̱n ndaꞌyoo̱ rí ni̱gu̱ma-jaꞌwu̱u jamí niti májáan rí ríga̱ ná awúun guꞌwá rúꞌkhue̱n. 26 A̱ꞌkhue̱n na̱ke̱e̱ gáguu̱n i̱mbá juwiin gíñá ꞌguéen tsí i̱wa̱á xkawi̱inꞌ xó rí ikhaa̱. A̱ꞌkhue̱n na̱tu̱ꞌúu̱n ná xuyuu xa̱bo̱ tsúꞌkhue̱n, ikhín najúwe̱e̱ꞌ. Nda̱wa̱á a̱ꞌkhue̱n phú i̱tha̱án na̱gu̱ma-ngínáa xa̱bo̱ tsúꞌkhue̱n xtáa xó rí ginii».

27 Awúun máꞌ rí xóó naꞌthán Jesús ajngáa rúꞌkhue̱n, a̱ꞌkhue̱n ni̱tu̱xu̱u̱ꞌ mbáa a̱ꞌgo̱ ná majñu̱ú xa̱bo̱ tsí mbaꞌiin, niꞌthúu̱n: «Phú gagi xtáa a̱ꞌgo̱ tsí niꞌníí jamí nixníxáaꞌ».

28 Xómáꞌ Jesús niꞌthán: «I̱tha̱án máꞌ gagi júwa̱ꞌ xa̱bo̱ tsí nu̱dxawíín ajngáa rawuun Ana̱ꞌlóꞌ jamí nune̱-mbáníí ne̱».

29 Xa̱ꞌ jayu ni̱gímbú-mijná xa̱bo̱ inuu Jesús, a̱ꞌkhue̱n ikhaa̱ niꞌthúu̱n: «Ra̱májíin xa̱bo̱ tsí júwa̱ꞌ mbiꞌi ríge̱ꞌ. Nu̱nda̱ꞌe̱e̱ rí ma̱ne̱ mbá rí phú wáá rí nasngájma rí Ana̱ꞌlóꞌ nixúngu̱únꞌ. I̱ndo̱ó máꞌ numuu rí ma̱xájanúu̱ i̱mba̱ rí phú wáá mbuyáa̱, rí i̱ndo̱ó máꞌ mbuyáa̱ rí phú wáá rí nigíꞌnuu Jonás wajyúú. 30 Numuu rí xómá jayu rí ninindxu̱u̱ Jonás mbá rí mbuyáá xa̱bo̱ xuajen Níni̱be̱ wajyúú, xkuaꞌnii jayu máꞌ A̱dée Xa̱bo̱ Numbaa mangaa, ma̱nindxu̱u̱ mbá rí mbuyáá xa̱bo̱ tsí júwa̱ꞌ mbiꞌi xúge̱ꞌ. 31 Ído̱ gága̱nú mbiꞌi rí ma̱gu̱ma-mbáníí ga̱jma̱á numúú mbá xúgíin xa̱bo̱, a̱ꞌgo̱ thúngaa tsí niꞌthán-ñájun wajyúú ná giaxu̱u̱ Jawáá, mbayáa̱ mbiꞌyuu̱ gajmíi̱ xa̱bo̱ tsí júwa̱ꞌ xúge̱ꞌ jamí ikhaa̱ maxná-máꞌíi̱n. Numuu rí ikhaa̱ phú tsíngua̱ꞌ numbaa ni̱ꞌkhe̱e̱ madxawuu̱n rí na̱ma̱ñuu Salomón, jamí ge̱jyoꞌ xtáa ga̱jma̱á nindxa̱ꞌlaꞌ mbáa tsí i̱tha̱án gíꞌdoo numuu xó rí Salomón. 32 Xúꞌkhue̱n máꞌ xa̱bo̱ Níni̱be̱ mangiin, ído̱ gága̱nú mbiꞌi rí ma̱gu̱ma-mbáníí ga̱jma̱á numúú mbá xúgíin xa̱bo̱, mbuyaa̱ mbiꞌñúu̱ gajmíi̱ xa̱bo̱ tsí júwa̱ꞌ xúge̱ꞌ, jamí xa̱bo̱ Níni̱be̱ muxna-maꞌíi̱n xa̱bo̱ tsí júwa̱ꞌ xúge̱ꞌ. Numuu rí xa̱bo̱ Níni̱be̱ nithanga̱a a̱kuíi̱n inuu Ana̱ꞌlóꞌ ído̱ ni̱dxawíi̱n rí niꞌthán-raꞌa Jonás inúu̱, jamí ge̱jyoꞌ xtáa ga̱jma̱á nindxa̱ꞌlaꞌ mbáa tsí i̱tha̱án gíꞌdoo numuu xó rí Jonás.

33 »Asndo nimbáa xa̱bo̱ tsískáma agu rí magída̱ꞌ ná ngu̱ꞌwa̱, ni máꞌ rí marugoo̱ ne̱ ga̱jma̱á e̱jna̱. A̱ꞌkhue̱n gakon, asndo i̱tha̱án tsída̱ꞌ iríguii̱ ne̱ kajngó ma̱mbiꞌñúú xa̱bo̱ tsí na̱tu̱ꞌu̱ún. 34 Xómá agu rí nambiꞌyuu xuyaaꞌ jaꞌnii rí idaaꞌ. Xí máján idaaꞌ, mbá xúgíín máꞌ nambiꞌyaaꞌ eꞌne agu mangaa. I̱ndo̱ó máꞌ numuu rí, xí ra̱máján idaaꞌ rá, mbá xúgíí máꞌ xuyaaꞌ mangaa naꞌne mijína. 35 A̱tia̱wa̱án lá, ra̱ꞌkhá lá mijína gáꞌne agu rí xtaꞌdáá nambiꞌyaaꞌ. 36 Ikhaa jngó, xí mbá xúgíín jayu nambiꞌyaaꞌ eꞌne agu, jamí nda̱a̱ nitháan rí mijína ná xuyaaꞌ, a̱ꞌkhue̱n rí ma̱mbiꞌi-taꞌa mbá xúgíí gátha̱ne̱, asndo xómá eꞌne ído̱ rí nambiꞌyaaꞌ gakhe̱ eꞌne mbá agu».

37 Ído̱ wámbo̱o̱ Jesús niꞌthán, a̱ꞌkhue̱n mbáa xa̱bo̱ fariséo̱ nindxaꞌwóo̱ rí ma̱ꞌgee̱ gákuiꞌtsii̱ ná guꞌwóo. Ído̱ ni̱ga̱nú Jesús, a̱ꞌkhue̱n ninújngoo̱ ni̱gi̱ꞌi̱i̱ ná napeꞌtso xa̱bo̱. 38 Xómáꞌ xa̱bo̱ fariséo̱ nimakuu̱ ído̱ ndiꞌyoo̱ rí táníxa̱aꞌ Jesús rí ma̱kueꞌtso. 39 Xómáꞌ Táta̱ niꞌthán: «Ikháanꞌlaꞌ tsáanꞌ xa̱bo̱ fariséo̱ ñajwanlaꞌ, i̱ndo̱ó máꞌ ná tsu̱du̱u̱ xu̱wa̱á ga̱jma̱á xúba̱ nu̱ne̱-jaꞌwu̱ulaꞌ, xómáꞌ ná awánlaꞌ gatíí rí tsikúwa̱ꞌ jamí rí xkawe̱ꞌ nu̱ne̱laꞌ. 40 ¡Maphú júgoo inalaꞌ! Á tsíya̱álaꞌ rí ikhaa máꞌ tsí neꞌne rí tsu̱di̱í, niꞌnii̱ rí awúún mangaa rá dxe̱ꞌ. 41 Ikhaa jngó, gu̱xnu̱úlaꞌ tsí ngíníi rí guáꞌdáálaꞌ, a̱ꞌkhue̱n rí mbá xúgíí jayu ma̱ꞌne-jaꞌwáanꞌlaꞌ.

42 »¡Maphú mingínáaꞌ ikháanꞌlaꞌ xa̱bo̱ fariséo̱!, tsáanꞌ nu̱xna̱xílaꞌ ná inuu Ana̱ꞌlóꞌ mbóó rí mbámbá gu̱wa̱ꞌ kíxnuu iná ndaa thawuun rí mbiꞌyuu ménta̱ jamí rúda̱, xúꞌkhue̱n máꞌ mbá xúgíí inii ya̱ꞌwo̱ rí najma̱a̱ ná rixa̱ꞌlaꞌ. I̱ndo̱ó máꞌ numuu rí tsíñu̱úlaꞌ rí máján xa̱bo̱ ni máꞌ tsíyalaꞌ ju̱ya̱á Ana̱ꞌlóꞌ. Rúꞌkhue̱n ndaꞌyóo rí mu̱xna̱xílaꞌ, i̱ndo̱ó máꞌ numuu rí mu̱xúni̱ꞌñáálaꞌ rí mu̱ñu̱úlaꞌ rí máján xa̱bo̱ ni máꞌ rí ma̱galaꞌ ju̱ya̱á Ana̱ꞌlóꞌ.

43 »¡Maphú mingínáaꞌ ikháanꞌlaꞌ xa̱bo̱ fariséo̱!, tsáanꞌ nandalaꞌ gátriga̱ánꞌ ná xíle̱ gamaku ná awúun mbámbá guꞌwá rí na̱gi̱mbáanꞌlóꞌ, jamí nandalaꞌ rí mu̱ra̱xáanꞌlaꞌ xa̱bo̱ ga̱jma̱á gamaku ná xuáá.

44 »¡Maphú mingínáaꞌ ikháanꞌlaꞌ xa̱bo̱ tsí nu̱sngáálaꞌ xtángoo jamí xa̱bo̱ fariséo̱, rí a̱jma̱ inalaꞌ!,* tsáanꞌ jaꞌñáaꞌlaꞌ xómá iñá ná waꞌdu̱un wa̱jen rí na̱nguá ikujma ná triga̱, jamí na̱nguá iyáá xa̱bo̱ nu̱sngu̱tigu̱ún».

45 Mbáa xa̱bo̱ tsí na̱ma̱ñuu xtángoo niꞌthán:

—Táta̱ naꞌsngáá, ído̱ narathán rúꞌkhue̱n, asndo mangáanꞌxo̱ꞌ narathánxo̱ꞌ mi̱ndaꞌkho.

46 Xómáꞌ Jesús niꞌthán:

—¡Maphú mingínáaꞌ mangáanꞌlaꞌ, tsáanꞌ xa̱bo̱ tsí na̱ma̱ñúú xtángoo ñajwanlaꞌ!, numuu rí nu̱xna̱-yáꞌdúúnlaꞌ xa̱bo̱ rí tsíꞌngu̱ún gágóó judúún, xómáꞌ ikháanꞌlaꞌ tsíne̱-maꞌba̱a̱nlaꞌ asndo nimbá a̱dée ñawánlaꞌ rí mu̱ꞌgua ju̱dalaꞌ ne̱.

47 »¡Maphú mingínáaꞌlaꞌ, tsáanꞌ nu̱xu̱xílaꞌ xu̱nꞌ ná iñá-wajñúú xa̱bo̱ tsí ni̱rawíjnga̱a ajngóo Ana̱ꞌlóꞌ wajyúú!, tsí nijáñúú nene̱ táta̱-xi̱ꞌñálaꞌ. 48 Rúꞌkhue̱n iꞌthán rí ikháanꞌlaꞌ naꞌne inalaꞌ jamí nu̱yatíílaꞌ rí nene̱ táta̱-xi̱ꞌñálaꞌ wajyúú. Numuu rí ikhii̱n ni̱radíi̱n xa̱bo̱ tsí ni̱rawíjnga̱a ajngóo Ana̱ꞌlóꞌ, xómáꞌ ikháanꞌlaꞌ nu̱xu̱xílaꞌ xu̱nꞌ ná iñá-wajñúu̱.

49 »Ikhaa jngó, maphú na̱ma̱ñuu Ana̱ꞌlóꞌ nákhí niꞌthán: "Ma̱xu̱ꞌmíi tsí mu̱rawíjnga̱a ajngóꞌ jamí tsí magóó juñu̱ú ajngóꞌ ná inalaꞌ, xómáꞌ ikháanꞌlaꞌ mu̱radíin mbá tikhuun xa̱bo̱ tsúꞌkhue̱n jamí tsí i̱ꞌwíin mu̱xkúúnlaꞌ". 50 Kajngó xa̱bo̱ tsí júwa̱ꞌ mbiꞌi xúge̱ꞌ, ma̱rigu tsu̱dúu̱n ga̱jma̱á numúú mbá xúgíin xa̱bo̱ tsí ni̱rawíjnga̱a ajngóo Ana̱ꞌlóꞌ, tsí nijáñúú nene̱ xa̱bo̱ asndo nákhí ni̱gu̱ma-ku̱maa numbaa. 51 Ma̱gi̱ꞌdu̱u̱n ma̱rigu tsu̱dúu̱n ga̱jma̱á numuu rí nijáñuu Abél, asndo ga̱jma̱á numuu Sakaría̱s tsí nijáñuu ná mijngi nakha-ráma tsi̱gi̱jña̱ꞌ ná rixo̱o̱ guꞌwá dxákuun. Ga̱jma̱á numúú mbá xúgíin tsúꞌkhue̱n ma̱tiin xa̱bo̱ tsí júwa̱ꞌ mbiꞌi xúge̱ꞌ rí mune̱-numa̱a.

52 »¡Maphú mingínáaꞌ ikháanꞌlaꞌ, tsáanꞌ xa̱bo̱ tsí na̱ma̱ñúú xtángoo ñajwanlaꞌ!, numuu rí na̱nga̱jwa̱ꞌlaꞌ rí ma̱ma̱ꞌthoo ma̱fruꞌu̱ún xa̱bo̱. Jmína̱áꞌ máꞌ ikháanꞌlaꞌ tsíyalaꞌ gáfraꞌa̱ꞌlaꞌ, jamí asndo nawajún-ꞌthu̱únlaꞌ tsí nandúún gáfruꞌu̱ún.

53 Ído̱ Jesús niꞌthán ajngáa rúꞌkhue̱n,* maphú nijiꞌníi xa̱bo̱ tsí nusngáá xtángoo gajmíí xa̱bo̱ fariséo̱ juyáa̱, a̱ꞌkhue̱n ni̱gíꞌdíi̱n nene̱-gajmáa̱ ga̱jma̱á mbaꞌa inii graxe̱. 54 Jamí nu̱ña̱maa̱ kajngó mbuyáa̱ xí naꞌthée̱n mbá rí ra̱jáꞌyoo maꞌthée̱n, a̱ꞌkhue̱n rí ma̱goo muni̱i̱ aꞌkhúun.*