1 Ído̱ wámbo̱o̱ Jesús ni̱ru̱wi̱in tsí mbá gu̱wa̱ꞌ i̱jmi̱i (12) naꞌsngúún, nixnúu̱ tsiakhe̱ rí mu̱xkawíi̱n gíñá ꞌguéen ná xuñúú xa̱bo̱ jamí rí mune̱-thanúu̱ xa̱bo̱. 2 Nixúnguii̱nꞌ magóó gúthan-raꞌa a̱pha̱ rí Ana̱ꞌlóꞌ maꞌthán-ñájúún xa̱bo̱, jamí rí mune̱-thanúu̱ xa̱bo̱ tsí najáñúú. 3 Xáꞌnii niꞌthúu̱n: «Mu̱xúdalaꞌ nitháan rí ma̱jmalaꞌ ná jamba̱a̱: ni máꞌ ixe̱ rí ma̱gi̱da̱ꞌ ñawánlaꞌ, ni máꞌ ama, ni máꞌ guma, ni máꞌ mbúkha̱a̱, ni máꞌ mu̱xúdalaꞌ a̱jma̱ idi̱i̱ xtíin. 4 Asndo náá guꞌwá niguáꞌnúlaꞌ, ga̱wajúnlaꞌ ikhín asndo gága̱nú mbiꞌi rí ma̱ga̱jnáaꞌlaꞌ ná xuajen rúꞌkhue̱n. 5 Xí ríga̱ mbá xuajen ná tsíñúú xa̱bo̱ gúdri̱guáanꞌlaꞌ, a̱ga̱jnáaꞌlaꞌ ikhín jamí gu̱xprígúulaꞌ yujnda̱ꞌ nakhuálaꞌ, kajngó mbuyáa̱ rí ra̱máján ini̱i̱».

6 A̱ꞌkhue̱n nigájnúu̱ nigóo̱ mbá xúgíí ná triga̱ xuajen laka. Nigóo̱-ruthan-raꞌee̱ ajngáa máján, jamí mbá xúgíí ná nigóo̱ nene̱-thanúu̱ xa̱bo̱.

7 Thúngaa tsí mbiꞌyuu Eróde̱s nidxawuun mbá xúgíí rí naꞌne Jesús. Tsíꞌyoo̱ dí gándxaꞌwá-mine̱e̱ꞌ numuu rí mbá tikhuun xa̱bo̱ nuthan rí Juáán ndiyáa mbiꞌyuu. 8 I̱ꞌwíin xa̱bo̱ nuthan rí Elía̱s tsí nixtáa wajyúú nikujma̱a. Júwa̱ꞌ i̱ꞌwíin tsí nuthan rí mbáa xa̱bo̱ tsí ni̱gu̱wíjnga̱a ajngóo Ana̱ꞌlóꞌ wajyúú ndiyáa mbiꞌyuu. 9 Xómáꞌ Eróde̱s niꞌthán: «Ikhúúnꞌ jmínu̱úꞌ ni̱xna̱-ñájun rí mu̱thon-rígú idxu̱u̱ Juáán. Tsáa xa̱bi̱i̱ ñajuun tsíge̱ꞌ, tsí na̱dxawuun rí phú wáá rí naꞌne xúꞌkhue̱n róꞌ». Ikhaa jngó ndaꞌyá Eróde̱s rí maxkamaa Jesús.

10 Ído̱ nithangi̱in tsí nixúngui̱inꞌ Jesús, nitháa̱n mbá xúgíí rí nini̱i̱ ná nigóo̱. A̱ꞌkhue̱n ni̱gu̱wíi̱n, ni̱ke̱e̱ gajmíi̱ janíí, ná xuajen rí mbiꞌyuu Betsái̱da̱. 11 Ído̱ nidxawíín xa̱bo̱ rí xkuaꞌnii, nigóo̱ tsu̱du̱u̱ Jesús. Xómáꞌ ikhaa̱ ni̱grui̱gúu̱n jamí niꞌthúu̱n ga̱jma̱á numuu rí xáne Ana̱ꞌlóꞌ naꞌthán-ñájúún xa̱bo̱, jamí neꞌne-thanúu̱ tsí najáñúú.

12 Ído̱ ni̱ka̱-raꞌne wakhíí, a̱ꞌkhue̱n ni̱xu̱ꞌma-mijná tsí naꞌsngúún Jesús jamí nitháa̱n:

―Arathán-ngáwúún xa̱bo̱ magóó gúya̱a xu̱únꞌ jamí mbuꞌyá guma mu̱pho̱ ná xuajen laka rí triga̱ mijngi. Numuu rí nda̱a̱ nitháan rí ríga̱ ná mbaa niníí rí juwalóꞌ ge̱jyoꞌ.

13 Xómáꞌ Jesús niꞌthúu̱n:

―Gu̱xnúu̱laꞌ ikháanꞌlaꞌ rí mu̱phi̱i̱.

Xómáꞌ ikhii̱n ni̱riꞌñee̱:

―Nda̱a̱ i̱mba̱ rí guáꞌdááxo̱ꞌ mu̱xnúu̱ mu̱phi̱i̱, i̱ndo̱ó máꞌ witsu guma jamí a̱jmi̱i i̱gi̱ꞌ. O i̱ndo̱ó máꞌ xí mu̱ꞌguá gútse̱xo̱ꞌ rí mu̱pho̱ mbá xúgíin xa̱bo̱ tsíge̱ꞌ rá mbo̱ꞌ.

14 Naꞌne máꞌ xó mbá witsu míl (5 000) wáa xa̱bekha nimbáxi̱in ikhín. Xómáꞌ Jesús niꞌthúún tsí naꞌsngúún:

―Gu̱skuíji̱inlaꞌ mbámbá a̱jma̱ skíñú gu̱wi̱inꞌ (50) xa̱bo̱.

15 Xkuaꞌnii nini̱i̱, jamí mbá xúgíin xa̱bo̱ nitrigi̱in. 16 A̱ꞌkhue̱n niwatuun Jesús rí mbá witsu guma jamí a̱jmi̱i i̱gi̱ꞌ, niyaxi̱i̱ mikhuíí, jamí niríguu̱ la gamaku inuu Ana̱ꞌlóꞌ. A̱ꞌkhue̱n nixpíꞌthángaa̱ guma xúꞌkhue̱n máꞌ nixpíꞌthángañii̱ i̱gi̱ꞌ, jamí nixnúu̱ ne̱ tsí naꞌsngúu̱n kajngó muxnúú ne̱ xa̱bo̱ mu̱pho̱. 17 Mbá xúgíin xa̱bo̱ nipeꞌtso asndo ni̱gi̱ꞌmúú. Xómáꞌ guma xkuꞌxí rí nipíduun, ni̱raxii̱ ne̱, jamí nene̱-matíi̱ gu̱wa̱ꞌ i̱jma̱ (12) ixtu.

18 Mbá mbiꞌi niríya̱ꞌ-mina̱ꞌ Jesús janíí rí maꞌthán-jáñuu Ana̱ꞌlóꞌ, jamí gajmíi̱ máꞌ tsí naꞌsngúu̱n, a̱ꞌkhue̱n ikhaa̱ niraxúu̱n:

―Tsáa ñajunꞌ ithan xa̱bo̱ i̱ya̱álaꞌ rá.

19 Xómáꞌ ikhii̱n ni̱riꞌñee̱:

―Mbá tikhuun xa̱bo̱ nuthan rí Juáán tsí nixúꞌdu-maꞌíin xa̱bo̱ ná awúun iya ñajwaanꞌ. I̱ꞌwíin nuthan rí Elía̱s ñajwaanꞌ. Jamí i̱ꞌwíin nuthan rí mbáa xa̱bo̱ tsí ni̱gu̱wíjnga̱a ajngóo Ana̱ꞌlóꞌ wajyúú tsí ndiyáa mbiꞌyuu ñajwaanꞌ.

20 A̱ꞌkhue̱n Jesús niraxúu̱n:

―Xómáꞌ ikháanꞌlaꞌ, tsáa ñajunꞌ i̱tha̱n ikháanꞌlaꞌ rá.

A̱ꞌkhue̱n niriꞌña Pédro̱:

―Ikháánꞌ ñajwaanꞌ Krísto̱, tsí Ana̱ꞌlóꞌ nixúngua̱a̱ꞌ.

21 Xómáꞌ ikhaa̱ nixná-ñájúu̱n tsí naꞌsngúu̱n rí mu̱xútháa̱n mbá jayu asndo nimbáa xa̱bo̱ tsáa ñajuu̱n ikhaa̱. 22 Xáꞌnii niꞌthúu̱n mangaa:

―Maphú ndaꞌyóo rí A̱dée Xa̱bo̱ Numbaa ma̱nújngoo awúun mbaꞌa jamínu̱ꞌ, ma̱xáxúún gúyáa̱ xa̱bo̱ buanuu, xúꞌkhue̱n máꞌ dxakuun tsí gíꞌdoo numúú jamí xa̱bo̱ tsí nusngáá xtángoo. Mu̱xíya̱a̱, xómáꞌ ikhaa̱ mbayáa̱ mbiꞌyuu̱ ído̱ gárámuu atsú mbiꞌi.

23 A̱ꞌkhue̱n Jesús niꞌthúún mbá xúgíin xa̱bo̱: «Xí xtáa mbáa tsí nandoo gáꞌkha̱ tsu̱du̱ꞌ, ga̱mbumuu̱ jaꞌya-mine̱e̱ꞌ. Ga̱ꞌngo̱o̱ a̱kuii̱n rí mamínu̱u̱ꞌ tsitsíí jamí asndo rí ma̱ja̱ñúu̱ ga̱jma̱á numuꞌ, jamí ga̱ꞌkhe̱e̱ tsu̱du̱ꞌ xúꞌkhue̱n rá. 24 Numuu rí jámba̱a̱ tsí nandoo gáꞌne-jríya̱a̱ꞌ mbiꞌyuu, ma̱ndáti̱go̱o̱ ne̱. Jamí jámba̱a̱ tsí nandáti̱go̱o̱ mbiꞌyuu ga̱jma̱á numuꞌ ikhúúnꞌ, tsúꞌkhue̱n tsí ma̱jríya̱a̱ꞌ. 25 Náá lá rí gámbáyúu mbáa xa̱bo̱ rí ma̱gi̱ꞌdoo mbá xúgíí rí ríga̱ ná tsu̱du̱u̱ numbaa, xí naꞌne-mbáti̱ga̱-mine̱e̱ꞌ rá. 26 Xí xtáa mbáa xa̱bo̱ tsí na̱ti̱yu̱u̱ꞌ e̱ne̱lo̱ꞌ jamí na̱ti̱yu̱u̱ꞌ ga̱jma̱á numuu rí na̱sngáálo̱ꞌ, A̱dée Xa̱bo̱ Numbaa mangaa ma̱ti̱yu̱u̱ꞌ gáꞌne xa̱bo̱ tsúꞌkhue̱n, ído̱ ma̱thangaa̱ ga̱jma̱á mbá xúgíí ski̱yu̱u̱ꞌ, ga̱jma̱á ski̱yu̱u̱ꞌ Ana̱ꞌlóꞌ jamí ga̱jma̱á ski̱ñu̱ú ánje̱l drígo̱o̱ Ana̱ꞌlóꞌ. 27 Na̱tha̱nꞌ-jmbalaꞌ rí mbá tikhuun tsí gachúún ge̱jyoꞌ xúge̱ꞌ, ma̱xájáñúu̱ asndo gúyáa̱ rí Ana̱ꞌlóꞌ naꞌthán-ñájuun mbá xúgíí».

28 Ído̱ ninújngoo mbá migiñu wáa mbiꞌi rí niꞌthán Jesús ajngáa rúꞌkhue̱n, a̱ꞌkhue̱n nitsimuu̱ inuu júba̱ gáꞌthán-jáñuu̱ Ana̱ꞌlóꞌ. Ni̱ke̱e̱ ga̱jmáa̱ Pédro̱, Juáán, jamí Santiágo̱.* 29 Awúun máꞌ rí naꞌthán-jáñuu̱ Ana̱ꞌlóꞌ, neꞌne mbrúthun inuu̱. Xómáꞌ xtíñuu̱ neꞌne miꞌxá mbá jayu jamí phú gakhe̱ nambiꞌi-taꞌa ne̱. 30 A̱ꞌkhue̱n nikujmii a̱jmi̱i xa̱bo̱ buanuu tsí nu̱ndxákuun ga̱jma̱á nindxu̱u̱. Ikhiin tsúꞌkhue̱n ñajúún Moisés ga̱jma̱á Elía̱s. 31 Maphú nambiꞌi-taꞌiin máꞌ xa̱bo̱ buanuu tsúꞌkhue̱n mangiin, jamí nuthan-mijnée̱ ga̱jma̱á numuu mbiꞌi rí ma̱ja̱ñúu Jesús ná Jerusalén.

32 Xómáꞌ Pédro̱ gajmíí a̱ngui̱in nandúu̱n mi̱ndaꞌkho gúnii̱, ikhaa jngó ninii̱. Jamí ído̱ ni̱ma̱ꞌtha̱a idúu̱n, ndiyáa̱ rí maphú gakhe̱ nambiꞌi-taꞌaa Jesús, xúꞌkhue̱n máꞌ nájmi̱i xa̱bo̱ buanuu tsí wájun ga̱jma̱á nindxu̱u̱. 33 Awúun máꞌ rí nagúun xa̱bo̱ tsúꞌkhue̱n, a̱ꞌkhue̱n Pédro̱ niꞌthúun Jesús: «Táta̱ naꞌsngáá, phú máján rí trámáálóꞌ ge̱jyoꞌ. Mu̱ne̱xo̱ꞌ atsú guꞌwá xtúgua: mbá dríga̱a̱ꞌ ikháánꞌ, mbá drígo̱o̱ Moisés, jamí i̱mba̱ drígo̱o̱ Elía̱s». Xkuaꞌnii iꞌthée̱n numuu rí tsíꞌyoo̱ rí maꞌthée̱n. 34 Awúun máꞌ rí xóó naꞌthée̱n ajngáa rúꞌkhue̱n, a̱ꞌkhue̱n ni̱ꞌkha̱ mbá du̱u̱n rí nimbráꞌii̱n. Jamí phú nimíñúu̱ rí ni̱tu̱ꞌúu̱n ná awúun du̱u̱n.

35 A̱ꞌkhue̱n niwán-ti̱ya̱ꞌ mbá a̱ꞌwá ná awúun du̱u̱n, rí niꞌthán: «Tsíge̱ꞌ ñajuun A̱ꞌdéꞌ tsí phú nandoꞌ ja̱yo̱o̱.* Gu̱dxawíínlaꞌ rí naꞌthée̱n ikhaa̱». 36 Ído̱ wámba̱ niꞌthán a̱ꞌwá rúꞌkhue̱n, a̱ꞌkhue̱n ndiyáa̱ rí i̱mba̱wíi Jesús wéje̱ ikhín. Xómáꞌ ikhii̱n ni̱ruguáa̱ rawúu̱n, jamí mbá xúgíí awúun mbiꞌi rí ñúꞌún asndo nimbáa xa̱bo̱ tútháa̱n rí ndiyáa̱.

37 I̱mba̱ mbiꞌi, ído̱ niguátaa̱n ná júba̱, a̱ꞌkhue̱n rí maphú mbaꞌiin xa̱bo̱ niguwá gútsijnúu̱. 38 Ná majñu̱ú xa̱bo̱ tsí mbaꞌiin ni̱ga̱ti̱ya̱a̱ꞌ mbáa tsí gakhe̱ niꞌthúun Jesús:

―Táta̱ naꞌsngáá, na̱tha̱n-jáñaaꞌ rí ma̱tia̱xi̱í tháan a̱ꞌdéꞌ, tsí mbátsíi gúꞌdaalo̱ꞌ. 39 Mbáa gíñá ꞌguéen igatuwii̱n, naꞌne rí mandxaꞌwée̱, jamí naꞌne rí maxpátri̱ga̱-mine̱e̱ꞌ mbayíí, asndo na̱ꞌkha̱ xngaꞌá rawuu̱n. Phú naꞌne-ngínáa̱ jamí tsíyoo̱ gániñuu̱. 40 Ni̱tha̱n-jáñúúlo̱ꞌ tsí narasngúún rí mu̱xkriya̱a̱ꞌ gíñá ꞌguéen, jamí táꞌngúu̱n.

41 A̱ꞌkhue̱n niriꞌña Jesús:

―¡Ikháanꞌlaꞌ ñajwanlaꞌ xa̱bo̱ tsí tsínimbu̱únꞌ juyáá Ana̱ꞌlóꞌ, jamí xkawi̱i̱ꞌ a̱kia̱nꞌlaꞌ! Asndo nguáná jaꞌyoo rí ma̱xtáá ga̱jma̱á nindxa̱ꞌlaꞌ, jamí ma̱ꞌngo̱o̱ a̱kui̱nꞌ gúne̱laꞌ róꞌ. Aya̱ ꞌcháa a̱ꞌdiáaꞌ ge̱jyoꞌ.

42 Awúun máꞌ rí naxuꞌma-mina̱ꞌ dxáma inuu Jesús, a̱ꞌkhue̱n nixpátri̱ga̱a̱ mbu̱júꞌ mbayíí neꞌne gíñá ꞌguéen, jamí niꞌnii̱ rí ma̱guaꞌaa̱n gakhe̱. Xómáꞌ Jesús nixkriya̱a̱ꞌ gíñá ꞌguéen, jamí núkho̱ niꞌni̱i a̱kui̱in dxáma, a̱ꞌkhue̱n nixnáxii̱ ñawúun tátée̱. 43 Mbá xúgíin xa̱bo̱ nimakúún rí maphú mba̱a̱ Ana̱ꞌlóꞌ.

Awúun máꞌ rí namakúún mbá xúgíin xa̱bo̱ ga̱jma̱á numuu mbá xúgíí rí naꞌne Jesús, a̱ꞌkhue̱n ikhaa̱ niꞌthúu̱n tsí naꞌsngúu̱n: 44 «Gu̱dxawíín májánlaꞌ jamí ma̱xámbumalaꞌ rí ma̱tha̱nꞌlaꞌ: A̱dée Xa̱bo̱ Numbaa mi̱xnáxi̱i̱ ná ñawúún xa̱bo̱ sia̱nꞌ». 45 Xómáꞌ ikhii̱n táfruꞌúu̱n rí niꞌthán Jesús, numuu rí tájanúu̱ rí ma̱fruꞌúu̱n ne̱, jamí namíñúu̱ gúra̱xíi̱ dí ndiyoo̱ gáꞌthée̱n ga̱jma̱á ajngáa rúꞌkhue̱n.

46 Mbá mbiꞌi tsí naꞌsngúún Jesús ni̱gíꞌdíi̱n ni̱tsa̱ñúu̱, nu̱ra̱xe̱-mijnée̱ tsáa tsí ikhii̱n i̱wa̱á gíꞌdoo numuu. 47 Xómáꞌ Jesús ndiꞌyoo rí xkuaꞌnii i̱ndxa̱ꞌwa̱-mijnée̱ ná awúun a̱kuíi̱n, a̱ꞌkhue̱n nindxaꞌwóo̱ mbáa ada̱ lájwíin, nitsijii̱ ná nijñúu̱. 48 A̱ꞌkhue̱n niꞌthúu̱n tsí naꞌsngúu̱n: «Asndo tsáa tsí na̱grui̱guíi ada̱ tsíge̱ꞌ ga̱jma̱á numuꞌ, ikhúúnꞌ máꞌ i̱grui̱gúu̱n. Jamí tsí na̱grui̱gúúnꞌ ikhúúnꞌ, na̱grui̱guíi̱ máꞌ tsí nixúngu̱únꞌ mangaa. Numuu rí xa̱bo̱ tsí i̱wa̱á lájwíin ná majña̱ꞌ mbá xúgiáanꞌlaꞌ, ikhaa tsúꞌkhue̱n tsí phú i̱wa̱á gíꞌdoo numuu».

49 A̱ꞌkhue̱n Juáán niꞌthúun Jesús:

―Táta̱, ndi̱ya̱áxo̱ꞌ mbáa xa̱bo̱ tsí naxkawíin gíñá ꞌguéen ná xuñúú xa̱bo̱ ga̱jma̱á mbiꞌyaaꞌ. Ni̱tháa̱nxo̱ꞌ rí ma̱xáꞌnii̱ rúꞌkhue̱n, numuu rí na̱nguá ngrigo̱o̱ꞌ ga̱jma̱á nindxa̱ꞌlóꞌ.

50 Xómáꞌ Jesús niriꞌñuu Juáán:

―Mu̱xúrikháa̱laꞌ. Numuu rí xa̱bo̱ tsí na̱nguá gíꞌdáa̱nꞌlaꞌ sia̱nꞌ, ikhaa tsúꞌkhue̱n xtáa ga̱jma̱á nindxa̱ꞌlaꞌ.

51 Ído̱ nangiyuu máꞌ mbiꞌi rí ma̱ꞌga̱a Jesús mikhuíí, a̱ꞌkhue̱n nixná-mine̱e̱ꞌ tsiakhe̱ rí ma̱ꞌgee̱ ná Jerusalén. 52 Nixúnguii̱nꞌ mbá tikhuun xa̱bo̱ magóó ginuu. Ikhiin tsúꞌkhue̱n nigóó mbá xuajen lájwíin rí ꞌgí ná numbaa Samária̱, kajngó mune̱-mbáníi̱ ná ma̱guáꞌníi̱. 53 Xómáꞌ xa̱bo̱ Samária̱ ra̱khúu̱n gúdri̱guíi̱ Jesús ná xuajñúu̱, numuu nduyáa̱ rí ná Jerusalén i̱ke̱e̱. 54 Ído̱ ndiꞌyoo Santiágo̱ ga̱jma̱á Juáán rí xkuaꞌnii, a̱ꞌkhue̱n ni̱ra̱xíi̱ Jesús: «Táta̱, á nandaaꞌ rí mu̱ne̱xo̱ꞌ rí ma̱ráka agu mikhuíí mi̱khiin xa̱bo̱ tsíge̱ꞌ dxe̱ꞌ, xómá neꞌne Elía̱s nákhí wajyúú».*

55 Xómáꞌ Jesús nitangayii niyaxúu̱n jamí nixprígúu̱n. [Xáꞌnii niꞌthúu̱n: «Ikháanꞌlaꞌ tsíya̱álaꞌ xáne jaꞌnii a̱kia̱nꞌlaꞌ. 56 Numuu rí A̱dée Xa̱bo̱ Numbaa táꞌkhe̱e̱ rí ma̱ꞌne-gámbii̱n xa̱bo̱, rí ni̱ꞌkhe̱e̱ ma̱ꞌne-jáwíi̱n».]* A̱ꞌkhue̱n nigóo̱ i̱mba̱ xuajen.

57 Ído̱ inu júwe̱e̱ꞌ nagóo̱ jamba̱a̱, a̱ꞌkhue̱n rí mbáa xa̱bo̱ niꞌthúun Jesús:

―Táta̱,* ma̱ꞌgá tsu̱da̱a̱ꞌ asndo náá idxo̱ꞌ.

58 A̱ꞌkhue̱n Jesús niriꞌñuu̱:

―Tsí e̱ge̱ guáꞌdáá iñúu itsí ná júwa̱ꞌ, xúꞌkhue̱n máꞌ ño̱ꞌo̱n guáꞌdáá xáñúú mangiin. Xómáꞌ A̱dée Xa̱bo̱ Numbaa na̱nguá gíꞌdoo ná maꞌgí idxu̱u̱.

59 A̱ꞌkhue̱n Jesús niꞌthúun i̱mba̱a̱ꞌ xa̱bo̱:

―Aya̱ ga̱jma̱á nindxu̱ꞌ.

Xómáꞌ xa̱bo̱ tsúꞌkhue̱n niꞌthúun Jesús:

―Táta̱, atatsíñúꞌ rí ma̱ꞌgá gádi̱i tátéꞌ ginii.

60 Xómáꞌ Jesús niꞌthúu̱n:

―Atatsíñúú tsí nijáñúú rí mudi̱in wa̱jen drígu̱ún. Xómáꞌ ikháánꞌ rá, ayu gára̱tha̱n-ráꞌa rí Ana̱ꞌlóꞌ maꞌthán-ñájúún xa̱bo̱.

61 A̱ꞌkhue̱n rí i̱mba̱a̱ꞌ xa̱bo̱ niꞌthúun Jesús:

―Táta̱, ma̱ꞌgá tsu̱da̱a̱ꞌ ikhúúnꞌ. I̱ndo̱ó máꞌ numuu rí atatsíñúꞌ ma̱ꞌgá gátha̱n-ngáwúún xa̱bo̱ guꞌwóꞌ ginii, ni̱kú mu̱ꞌgua̱lóꞌ.

62 Xómáꞌ Jesús niꞌthúun xa̱bo̱ tsúꞌkhue̱n:

―Xí mbáa xa̱bo̱ naguatuun xkandajwa rí ma̱ꞌga gajmíí xede̱, jamí nayaxe̱ tsu̱du̱u̱, ma̱xájmaa tsúꞌkhue̱n ná naꞌthán-ñájun Ana̱ꞌlóꞌ.