1 A̱ꞌkhue̱n rí mbá xúgíin xa̱bo̱ ni̱tu̱xu̱ún, jamí nigóo̱ juya̱a̱ Jesús ná inuu xa̱bo̱ ñajun Piláto̱. 2 Ikhín ni̱gíꞌdíi̱n nini̱i̱ aꞌkhúun Jesús ga̱jma̱á ajngáa ríge̱ꞌ: «Xa̱bo̱ tsíge̱ꞌ nasngrúꞌúún xa̱bo̱ xuajñalóꞌ ndi̱ya̱áxo̱ꞌ. Naꞌthúu̱n rí na̱nguá gíꞌmaa mu̱ne̱ numaxo̱ꞌ inuu thúngaa Sésa̱r, mbáá máꞌ naꞌthée̱n rí ikhaa̱ ñajuu̱n Krísto̱. Thúngaa ñajuu̱n méꞌ».

3 A̱ꞌkhue̱n Piláto̱ niraxu̱u̱ Jesús:

―Á ikháánꞌ ñajwaanꞌ thúngaa drígu̱ún xa̱bo̱ judío̱ dxe̱ꞌ.

Xómáꞌ Jesús niriꞌña:

―Jmína̱áꞌ máꞌ ikháánꞌ irathán.

4 A̱ꞌkhue̱n Piláto̱ niꞌthúún dxakuun tsí gíꞌdoo numúú, jamí mbá xúgíin xa̱bo̱ xuajen:

―Na̱nguá i̱xkamaa asndo nimbá aꞌkhúun xa̱bo̱ tsíge̱ꞌ.

5 Xómáꞌ ikhii̱n i̱wa̱á gakhe̱ ithee̱n:

―Mbá xúgíí numbaa Judéa̱ nasngrúꞌúu̱n xa̱bo̱ ga̱jma̱á rí naꞌsngáa̱. Ginii nigíꞌdu̱u̱n ná numbaa Galiléa̱, jamí xúge̱ꞌ rá, ikhaa máꞌ iꞌnii̱ ná Jerusalén ge̱jyoꞌ.

6 Ído̱ rí Piláto̱ nidxawuun rúꞌkhue̱n, a̱ꞌkhue̱n niraxi̱i̱ xí xa̱bo̱ ná numbaa Galiléa̱ ñajuun Jesús. 7 Ído̱ nidxawuu̱n rí Jesús na̱ꞌkha̱ ná numbaa rí naꞌthán-ñájuun Eróde̱s, a̱ꞌkhue̱n Piláto̱ nixuꞌmaa̱ ná inuu Eróde̱s, numuu rí ná Jerusalén máꞌ ngrigo̱o̱ꞌ mangaa̱ mbiꞌi rúꞌkhue̱n. 8 Ído̱ rí Eróde̱s ndiꞌyoo Jesús, maphú nidxu a̱kuii̱n, numuu rí maphú neꞌne máꞌ gíꞌthu̱u̱n mba̱ꞌyoo̱. Nidxawuu̱n rí naꞌne Jesús, jamí gíꞌthu̱u̱n mba̱ꞌyoo̱ ma̱ꞌne mbá rí phú wáá ná inuu̱. 9 Ikhaa jngó Eróde̱s phú mbaꞌa graxe̱ niꞌñuu̱ Jesús, xómáꞌ Jesús táriꞌñuu̱ nitháan. 10 Ikhín wájun dxakuun tsí gíꞌdoo numúú gajmíí xa̱bo̱ tsí nusngáá xtángoo, jamí tsíni̱ñáa̱ nu̱ndxa̱ꞌwe̱e̱ rí nuni̱i̱ aꞌkhúun Jesús. 11 A̱ꞌkhue̱n rí Eróde̱s gajmíi̱ xa̱bii̱ tsí ku̱ra̱tuun ajwa̱nꞌ nene̱-mati̱i̱ꞌ jamí ni̱ndu̱ꞌwa̱jmaa̱ Jesús, ni̱tsuaꞌaa̱n mbá xtíin rí mitsaan mi̱ndaꞌkho, xómá thúngaa. Wámba̱ rúꞌkhue̱n rá, Eróde̱s nirthanga̱a Jesús ná inuu Piláto̱. 12 Nákhí mbiꞌi rúꞌkhue̱n Piláto̱ ga̱jma̱á Eróde̱s ninindxúu̱n iyanga̱jwa̱, numuu rí nákhí wapha ninindxúu̱n xa̱bo̱ sia̱nꞌ.

13 A̱ꞌkhue̱n Piláto̱ nindxaꞌwúún dxakuun tsí gíꞌdoo numúú, xa̱bo̱ ñajun, xúꞌkhue̱n máꞌ xa̱bo̱ xuajen. 14 Jamí niꞌthúu̱n: «Ikháanꞌlaꞌ niguwa ju̱ya̱a̱ xa̱bo̱ tsíge̱ꞌ ná inuꞌ jamí ni̱tha̱nlaꞌ rí nasngrúꞌúu̱n xa̱bo̱ xuajen. Ná ina máꞌ ikháanꞌlaꞌ ni̱ra̱xu̱u̱lo̱ꞌ, jamí na̱nguá ni̱xkamaalo̱ꞌ asndo nimbá aꞌkhúun xómá rí nu̱tha̱n ikháanꞌlaꞌ. 15 Nda̱a̱ máꞌ aꞌkhúu̱n ndiꞌyoo Eróde̱s mangaa, ikhaa jngó nirthangaa̱ ná inalóꞌ. Nda̱a̱ mbá jayu rí neꞌne xa̱bo̱ tsíge̱ꞌ xí ma̱xna̱xíi̱ ma̱ja̱ñúu̱. 16 Ikhaa jngó, ma̱xna̱-ñájun rí mi̱xpáthii̱n, wámba̱ rúꞌkhue̱n ma̱ni̱ꞌñúu̱lo̱ꞌ».

17 Mbámbá rí nagájnuu ndxa̱a̱ Páskua̱, wéje̱ inuu Piláto̱ rí maríya̱aꞌ mbáa xa̱bo̱ tsí kra̱ꞌaa géjwa̱nꞌ.* 18 Xómáꞌ xa̱bo̱ xuajen, mbá xúgíi̱n ni̱ru̱waa̱ a̱ꞌwúu̱n, ni̱ndxa̱ꞌwe̱e̱: «¡Ga̱ja̱ñúu xa̱bo̱ tsúꞌkhue̱n! ¡Barabás gáta̱tsi̱ꞌñáá!».

19 (Tsí Barabás, ni̱ke̱e̱ géjwa̱nꞌ numuu rí nixkaxi̱i̱ xkujndu ná xuajen, jamí nixíya̱a̱ mbáa xa̱bo̱). 20 A̱ꞌkhue̱n rí Piláto̱ niꞌthúún mbu̱júꞌ xa̱bo̱, numuu rí nandoo̱ gáꞌne-jríya̱a̱ꞌ Jesús. 21 Xómáꞌ ikhii̱n ni̱ndxa̱ꞌwe̱e̱ gakhe̱: «¡Athadujmaa̱ ná ixe̱ krúsi̱! ¡Athadujmaa̱ ná ixe̱ krúsi̱!».

22 A̱ꞌkhue̱n Piláto̱ niꞌthúún mbu̱júꞌ xa̱bo̱, rí riatsú nothon: «Náá rí ra̱máján niꞌnii̱ kajngó róꞌ. Ikhúúnꞌ na̱nguá ni̱xkamaa asndo nimbá aꞌkhúu̱n rí jaꞌyoo ma̱ja̱ñúu̱. Ikhaa jngó ma̱xna̱-ñájun rí mi̱xpáthii̱n, wámba̱ rúꞌkhue̱n ma̱ni̱ꞌñúu̱lo̱ꞌ».

23 Xómáꞌ ikhii̱n i̱wa̱á gakhe̱ ni̱ndxa̱ꞌwe̱e̱ rí nu̱nda̱ꞌe̱e̱ mi̱ꞌdujmaa Jesús ná ixe̱ krúsi̱. Ikhaa jngó ni̱ꞌngo̱o̱ ajngúu̱n ikhii̱n, ga̱jma̱á ajngúún dxakuun tsí gíꞌdoo numúú.* 24 A̱ꞌkhue̱n Piláto̱ nixudaa awan rí ma̱ꞌne xómá rí naꞌne a̱kuíi̱n ikhii̱n. 25 Xkuaꞌnii neꞌne-jríya̱a̱ꞌ xa̱bo̱ tsí ikhii̱n ni̱nda̱ꞌa̱a̱, tsí ni̱ka̱ géjwa̱nꞌ numuu rí nixkaxi̱i̱ xkujndu jamí nixíya̱a̱ xa̱bo̱. Xómáꞌ Jesús nixnáxi̱i̱ rí ma̱gíꞌnuu xómá rí naꞌne a̱kuíi̱n ikhii̱n.

26 Awúun máꞌ rí xa̱bo̱ tsí ku̱ra̱tuun ajwa̱nꞌ nagóó juya̱a̱ Jesús rí mi̱ꞌdujmaa ná ixe̱ krúsi̱, ni̱rtuwii̱n mbáa xa̱bo̱ tsí na̱ꞌkha̱ ná xuajen Siréne̱ tsí mbiꞌyuu Simón, tsí inu na̱ꞌkha̱a ni̱ka̱ xanáá. Ikhaa tsúꞌkhue̱n nene̱-ski̱yíi̱ rí mago̱ ixe̱ krúsi̱ jamí ma̱ꞌga tsu̱du̱u̱ Jesús. 27 Maphú mbaꞌiin xa̱bo̱ xuajen jngrígúun nagóó tsu̱du̱u̱ Jesús, xúꞌkhue̱n máꞌ nagóó mbaꞌiin go̱ꞌo̱ tsí nu̱mbi̱ya̱ꞌ jamí nadaa a̱kui̱ín ga̱jma̱á numuu̱. 28 Xómáꞌ Jesús nitangayii niyaxúu̱n jamí niꞌthúu̱n: «Go̱ꞌo̱ Jerusalén, mu̱xúmbi̱ya̱ꞌlaꞌ ga̱jma̱á numuꞌ ikhúúnꞌ, rí gu̱mbi̱ya̱ꞌlaꞌ ga̱jma̱á numalaꞌ ikháanꞌlaꞌ jamí ga̱jma̱á numúú i̱jña̱ꞌlaꞌ. 29 Numuu rí ma̱ga̱nú mbiꞌi rí muthan xa̱bo̱ ajngáa ríge̱ꞌ: "Phú gagi júwa̱ꞌ go̱ꞌo̱ tsí túni̱i e̱je̱n, ikhiin tsí ra̱khóo gúda-éda, jamí ni miꞌtsú túxníxúún e̱je̱n". 30 A̱ꞌkhue̱n mu̱gíꞌdi̱ín xa̱bo̱ mutháán júba̱: "Ga̱xpátrámáaꞌlaꞌ tsu̱da̱ꞌxo̱ꞌ". Xúꞌkhue̱n máꞌ mutháa̱n bríjníí: "Gu̱rkaꞌwáanꞌxo̱ꞌ". 31 Xí mbá xúgíí ríge̱ꞌ nuñíi̱ ixe̱ rí maxa, dí ágíꞌnuu ixe̱ rí nijndoo rá».

32 Nagóo̱ judii̱n mangaa i̱jmi̱i xa̱bo̱ tsí gíꞌmii aꞌkhán mba̱a̱, kajngó mi̱ꞌdujmii ma̱ja̱ñúú ga̱jma̱á nindxu̱u̱ Jesús. 33 Ído̱ niguáꞌníi̱ ná mbaa rí mbiꞌyuu «Itso̱ Idxu̱u̱ Xa̱bo̱», ikhín nidujmaa̱ Jesús ná ixe̱ krúsi̱, xúꞌkhue̱n máꞌ nájmi̱i xa̱bo̱ tsí gíꞌmii aꞌkhán mba̱a̱ mangiin. Mbáa ni̱tsijii̱ krúsi̱i ná níjñú mújúun Jesús, jamí i̱mba̱a̱ꞌ ná níjñú xti̱yu̱u̱ꞌ. 34 A̱ꞌkhue̱n Jesús niꞌthán-jáñuu Ana̱ꞌlóꞌ: «Táa, athane̱ mba̱a̱ a̱kia̱anꞌ xtañúu̱, numuu rí tsíyáa̱ rí ini̱i̱».* Xómáꞌ tsí ku̱ra̱tuun ajwa̱nꞌ, nitsíi̱n kajngó mu̱xpi̱ꞌtha̱-mijnée̱ xtíñuu Jesús.

35 Xa̱bo̱ tsí wájun ikhín nu̱ya̱xi̱i̱ rí nagíꞌnuu Jesús, jamí asndo xa̱bo̱ ñajun nune̱-mati̱i̱ꞌ ga̱jma̱á ajngáa ríge̱ꞌ: «Neꞌne-jáwíi̱n i̱ꞌwíin xa̱bo̱. Ga̱ꞌne-jríya̱ꞌ-mine̱e̱ꞌ xúge̱ꞌ rá, xí gakon rí ikhaa̱ ñajuu̱n Krísto̱, tsí niraꞌwíi Ana̱ꞌlóꞌ». 36 Xúꞌkhue̱n máꞌ xa̱bo̱ tsí ku̱ra̱tuun ajwa̱nꞌ mangiin, nu̱xu̱ꞌma-mijnée̱ rí nune̱-mati̱i̱ꞌ Jesús, jamí nuxnáa̱ iyoo úba̱ rí miga̱ꞌ ma̱ga̱a̱n, 37 jamí nutháa̱n: «Xí ikháánꞌ ñajwaanꞌ thúngaa drígu̱ún xa̱bo̱ judío̱, athane̱-jríya̱ꞌ-mina̱ꞌ máꞌ ikháánꞌ». 38 Jamí ná idxu̱u̱ ixe̱ krúsi̱i Jesús, ka̱ma naꞌthán ríge̱ꞌ ga̱jma̱á ajngáa griégo̱, latín jamí ebréo̱:* «TSÍGE̱Ꞌ ÑAJUUN THÚNGAA DRÍGU̱ÚN XA̱BO̱ JUDÍO̱».

39 Jamí mbáa tsí gíꞌmaa aꞌkhán mba̱a̱, tsí waꞌdujmaa ikhín, naꞌthán-xkawiu̱u̱ꞌ Jesús mangaa: «Xí gakon rí ikháánꞌ ñajwaanꞌ Krísto̱, athane̱-jríya̱ꞌ-mina̱ꞌ máꞌ ikháánꞌ, jamí athane̱-jríñáaꞌ mangáanꞌxo̱ꞌ».

40 Xómáꞌ tsí i̱mba̱a̱ꞌ gíꞌmaa aꞌkhán mba̱a̱ nixprígúu dxájuu: «Á tsímíñaaꞌ eꞌne Ana̱ꞌlóꞌ, tsáánꞌ xtaa natamíni̱í ikhaa máꞌ jamínu̱ꞌ rá dxe̱ꞌ. 41 Máján máꞌ i̱gíꞌníí ikháánꞌlóꞌ rí nu̱míni̱ílóꞌ xáꞌnii, numuu rí nu̱drígúlóꞌ rí jaꞌyoo aꞌkhánlóꞌ. Xómáꞌ xa̱bo̱ tsíge̱ꞌ, nda̱a̱ mbá jayu aꞌkhúu̱n».

42 Wámba̱ rúꞌkhue̱n xa̱bo̱ tsúꞌkhue̱n niꞌthán:

―Jesús, ga̱rmáꞌáan lá a̱kia̱anꞌ xtayoꞌ ído̱ gáta̱gíꞌdi̱ín ma̱ra̱tha̱n-ñájun.

43 A̱ꞌkhue̱n rí Jesús niriꞌñuu̱:

―Na̱tha̱n-jmbaaꞌ rí asndo nákhí máꞌ xúge̱ꞌ ma̱ra̱xtaa ga̱jma̱á nindxu̱ꞌ ná mbaa rí phú mitsaan.

44 Ído̱ naꞌne xó mbá wakha̱ꞌ niníí wáa asndo atsú i̱ka̱ ajwa̱nꞌ rí wakhíí, neꞌne jína inuu mbá xúgíí numbaa. 45 Neꞌne jína iduu a̱kha̱ꞌ, jamí ti̱kua̱pha̱a̱ nithongaa xtíin rí kra̱jngaa ná awúun guꞌwá dxákuun. 46 A̱ꞌkhue̱n rí phú gakhe̱ nindxaꞌwá Jesús rí naꞌthán: «¡Táa, ná ñawáanꞌ ikháánꞌ i̱ni̱ꞌñúu ními̱ꞌlo̱ꞌ!». Jamí ído̱ wámbo̱o̱ niꞌthée̱n rúꞌkhue̱n, a̱ꞌkhue̱n ni̱ka̱ xu̱u̱ꞌ.

47 Xómáꞌ xa̱bo̱ tsí naꞌthán-ñájúún tsí ku̱ra̱tuun ajwa̱nꞌ, ído̱ ndiꞌyoo̱ rí niríga̱, neꞌne-mba̱a̱ Ana̱ꞌlóꞌ jamí niꞌthée̱n: «Maphú gakon rí nda̱a̱ aꞌkhúun xa̱bo̱ tsíge̱ꞌ». 48 Jamí mbá xúgíin xa̱bo̱ tsí ni̱gi̱mbíin ikhín rí mu̱mindu, ído̱ ndiyáa̱ rí niríga̱, nigúu̱n guꞌwúu̱n jamí nuxnáa̱ xo̱xtúu̱n numuu rí maphú natájwíin a̱kuíi̱n. 49 Xómáꞌ xa̱bo̱ tsí nene̱-nuwiin Jesús, jamí go̱ꞌo̱ tsí niguwá ga̱jma̱á nindxu̱u̱ asndo ná Galiléa̱, mbá xúgíi̱n wájwii̱n tsíngua̱ꞌ nu̱ya̱xi̱i̱ rí naríga̱.

50 Nixtáa mbáa táta̱ májáan jamí jmbii, tsí mbiꞌyuu José. Na̱ꞌkhe̱e̱ ná xuajen Arimatéa̱, rí ꞌgí ná numbaa Judéa̱, jamí ikhaa̱ máꞌ mangaa̱ ñajuu̱n mbáa xa̱bo̱ buanuu ede̱. 51 Tíkho̱ a̱kuii̱n neꞌne awan rí niguáꞌdáá a̱nguii̱n, jamí mangaa̱ máꞌ gíꞌthu̱u̱n rí ma̱ga̱nú mbiꞌi rí Ana̱ꞌlóꞌ maꞌthán-ñájúún xa̱bo̱. 52 Ikhaa táta̱ José ni̱ka̱ gáꞌyoo Piláto̱, jamí ni̱ndo̱ꞌo̱o̱ xuyuu Jesús kajngó ma̱ꞌdii̱ ne̱. 53 Ído̱ nirígúu̱ xuyuu Jesús ná krúsi̱, nimbróꞌoo̱ ne̱ ga̱jma̱á mbá xtíin wapa, jamí ni̱ka̱ jayáa̱ ná iñá-wajen rí waꞌndi-raꞌáá ná itsí, ná táwaꞌdi̱i asndo nimbáa xóó wa̱jen. 54 Wakhíí rí na̱gu̱ma-májáán ganitsu ñajuun mbiꞌi rúꞌkhue̱n, jamí phú inu máꞌ ma̱gi̱ꞌdu̱u̱n mbiꞌi rí nduya̱a xu̱únꞌ xa̱bo̱ judío̱.

55 Go̱ꞌo̱ tsí niguwá ga̱jma̱á nindxu̱u̱ Jesús asndo ná Galiléa̱, nigóó mangiin tsu̱du̱u̱ táta̱ José. Ikhii̱n ndiyáa̱ iñá-wajen, jamí ndiyáa̱ xáne nibóo xuyuu Jesús. 56 Ído̱ niguwáa̱n guꞌwáá, nene̱-mújúu̱n iyoo iná ndaa thawuun ga̱jma̱á iya ndaa thawuun, rí mu̱xta̱jmáa̱ ná xuyuu Jesús. A̱ꞌkhue̱n ndiyaa̱ xúu̱nꞌ mbiꞌi rí nduya̱a xu̱únꞌ xa̱bo̱ judío̱, xómá rí naꞌthán xtángoo.