1 Ni̱ga̱nú Jesús ná xuajen Jerikó, jamí ni̱ka̱-ranújngoo̱ ná awúun ne̱. 2 Ikhín xtáa mbáa xa̱bo̱ tsí mbiꞌyuu Sakéo̱, tsí naꞌthán-ñájúún xa̱bo̱ tsí nu̱ru̱ma mbúkho̱o̱ guꞌwá-ñajun, jamí xa̱bo̱ tsí phú gíꞌdoo ñajuu̱n. 3 Ikhaa tsúꞌkhue̱n naꞌne a̱kui̱in rí mba̱ꞌyoo tsáa ñajuun Jesús. I̱ndo̱ó máꞌ numuu rí na̱nguá iyoo mba̱ꞌyoo̱ ga̱jma̱á numuu rí phú mbaꞌiin xa̱bo̱, jamí na̱nguá mba̱yi̱i̱ꞌ. 4 Ikhaa jngó nigáyuu̱ ni̱ke̱e̱ gátsimuu̱ mbá ixe̱ rí mbiꞌyuu sikómo̱ro̱, numuu rí ikhín ma̱nújngoo Jesús. 5 Ído̱ ni̱ga̱nú Jesús ikhín, a̱ꞌkhue̱n niraꞌée̱n ri̱jma̱á, jamí niꞌthúu̱n: «Sakéo̱, adxuta̱aꞌ re̱, nacha̱, numuu rí wakhíí xúge̱ꞌ jaꞌyoo rí ma̱wáju̱n ná guꞌwáaꞌ».

6 Xómáꞌ Sakéo̱ ni̱gataa̱-ragáyuu̱, jamí phú gagi a̱kuii̱n ni̱grui̱guíi̱ Jesús ná guꞌwóo̱. 7 Ído̱ ndiyáá xa̱bo̱ rí xkuaꞌnii, mbá xúgíi̱n ni̱gíꞌdíi̱n nuthan-ri̱ge̱e̱, nuthee̱n rí Jesús ni̱we̱je̱ ná guꞌwóo mbáa xa̱bo̱ aꞌkhán. 8 Xómáꞌ Sakéo̱ ni̱we̱je̱, jamí niꞌthúu̱n Jesús:

―Táta̱, athayáá rí ma̱xnu̱ú mbá ti̱kua̱pha̱a̱ rí gúꞌdo̱ꞌ tsí ngíníi. Jamí xí xtáa mbáa tsí ne̱ne̱-kúwo̱o̱ꞌ, ma̱rthanga̱alo̱ꞌ inuu̱ mbá akho̱ xó rí ni̱rígú-jáꞌyúu̱.

9 Xómáꞌ Jesús niꞌthúu̱n:

―Mbiꞌi máꞌ xúge̱ꞌ nijáwíin xa̱bo̱ ná guꞌwá ríge̱ꞌ, numuu rí a̱dée máꞌ táta̱ Abraám ñajuun xa̱bo̱ tsíge̱ꞌ mangaa. 10 Numuu rí A̱dée Xa̱bo̱ Numbaa ni̱ꞌkha̱ gáꞌñíi jamí ni̱ꞌkha̱ gáꞌne-jáwíin tsí nindáti̱gi̱in.

11 Awúun máꞌ rí nu̱dxawíín xa̱bo̱ rí naꞌthán Jesús, a̱ꞌkhue̱n ikhaa̱ niꞌthúu̱n mbá ajngáa xkri̱da, numuu rí nangiyuu máꞌ ma̱ga̱níi̱ ná Jerusalén, jamí nu̱ndxa̱ꞌwa̱-mijná xa̱bo̱ rí inu máꞌ magíꞌdu̱u̱n Ana̱ꞌlóꞌ maꞌthán-ñájúún xa̱bo̱. 12 Xáꞌnii niꞌthée̱n: «Mbáa xa̱bo̱ tsí maphú gíꞌdoo numuu nigájnuu ni̱ka̱ mbá xuajen tsíngua̱ꞌ, ná ma̱grui̱guíi̱ tsiakhe̱ rí ma̱nindxu̱u̱ thúngaa, jamí nda̱wa̱á a̱ꞌkhue̱n ma̱thangaa̱ ná xuajñuu̱. 13 Rí inu máꞌ nacho̱o̱ ma̱ga̱jnúu̱ ma̱ꞌgee̱, nindxaꞌwúu̱n mbá gu̱wi̱inꞌ yumbée̱. Mbámbáa tsúꞌkhue̱n nixnúu̱ mba̱a̱ mbúkha̱a̱,* jamí niꞌthúu̱n: "Gu̱ne̱laꞌ rí ma̱gaja̱a̱ mbúkha̱a̱ ríge̱ꞌ asndo gáꞌkha̱aꞌlo̱ꞌ". 14 I̱ndo̱ó máꞌ numuu rí tsíyoo gíꞌyáa̱ ene̱ xa̱bo̱ xuajñuu̱, ikhaa jngó ikhiin tsúꞌkhue̱n ni̱xu̱ꞌmii mbá tikhuun xa̱bo̱ magóó tsu̱du̱u̱, kajngó muthan: "Tsíyaxo̱ꞌ rí maꞌthán-ñájwanxo̱ꞌ xa̱bo̱ tsíge̱ꞌ".

15 »Ni̱ga̱nú mbiꞌi rí nijanáa̱ tsiakhe̱ rí ma̱nindxu̱u̱ thúngaa, a̱ꞌkhue̱n nithangaa̱ ná xuajñuu̱. Ído̱ ni̱ga̱núu̱ nindxaꞌwúu̱n yumbée̱ tsí nixnúu̱ mbúkha̱a̱, kajngó mba̱ꞌyoo̱ wátha̱ mba̱a̱ ni̱ꞌkha̱ tsu̱du̱u̱ mbúkha̱a̱ rí nixnúu̱ mbámbáa. 16 Tsí ginii nixnáxe̱-mina̱ꞌ niꞌthán: "Táta̱, mbá gu̱wa̱ꞌ xó rí niraxnúꞌ ni̱ꞌkha̱ tsu̱du̱u̱ mbúkha̱a̱ꞌ". 17 Xómáꞌ thúngaa niriꞌñuu̱: "¡Maphú máján nithane̱! Yumbáá tsí májáan ñajwaanꞌ. Numuu rí jmbíín inuu rí lájwíin, na̱xna̱a̱ꞌ ma̱ra̱tha̱n-ñájwíín mbá gu̱wa̱ꞌ xuajen". 18 Nixnáxe̱-mina̱ꞌ yumbáá tsí riajma̱a̱, jamí ikhaa tsúꞌkhue̱n niꞌthán: "Táta̱, mbá witsu xó rí niraxnúꞌ ni̱ꞌkha̱ tsu̱du̱u̱ mbúkha̱a̱ꞌ". 19 Xómáꞌ thúngaa niriꞌñuu yumbáá tsíge̱ꞌ mangaa: "Na̱xna̱a̱ꞌ rí ma̱ra̱tha̱n-ñájwíín mbá witsu xuajen".

20 »A̱ꞌkhue̱n ni̱ꞌkha̱ yumbáá tsí riatsíi, jamí niꞌthée̱n: "Táta̱, ge̱jyoꞌ ríga̱ mbúkha̱a̱ꞌ. Ikhúúnꞌ ni̱ya̱xíi ne̱ awúun mbá pañíto̱, 21 numuu rí nimíñuꞌ ithane̱. Numuu nda̱yo̱o̱ rí maphú gakhe̱ a̱kia̱anꞌ, naraxi̱i ná na̱nguá nitiajun, jamí nada̱a ná na̱nguá nithadu". 22 A̱ꞌkhue̱n niꞌthán thúngaa: "Yumbáá i̱ꞌska, na̱xu̱ꞌdáa awan numaaꞌ ga̱jma̱á máꞌ ajngáa rí nirathán. Xí nathayáá májáanꞌ máꞌ rí maphú gakhe̱ a̱kui̱nꞌ, rí na̱gúxíi ná táñajun, jamí na̱gu̱u ná tádu, 23 náá numuu kajngó táta̱xu̱ꞌdáa mbúkho̱ꞌ ná ma̱goo ma̱ꞌkha̱ tsu̱du̱u̱ róꞌ. Kajngó ído̱ ma̱ꞌkha̱aꞌlo̱ꞌ ma̱ta̱xna̱xíi̱ mbúkho̱ꞌ ga̱jma̱á rí ni̱ꞌkha̱ tsu̱du̱u̱ ne̱". 24 Jamí niꞌthúu̱n yumbáá tsí wájun ikhín: "Gu̱rígúulaꞌ mbúkha̱a̱ ñawúu̱n, jamí gu̱xna̱álaꞌ ne̱ tsí nidaa mbá gu̱wa̱ꞌ xó rí ni̱xnu̱u̱". 25 Xómáꞌ ikhii̱n nitháa̱n: "¡Táta̱, ikhaa̱ gíꞌdoo̱ máꞌ i̱mbá gu̱wa̱ꞌ xó rí niraxnáa̱!" 26 Xómáꞌ thúngaa niriꞌña: "Na̱tha̱nꞌlaꞌ rí jámba̱a̱ tsí gíꞌdoo máꞌ, ikhaa tsúꞌkhue̱n ma̱janáá xóó. Xómáꞌ tsí nda̱a̱ rí gíꞌdoo rá, ma̱ga̱ta-jáꞌyúu̱ asndo rí gíꞌdoo̱ máꞌ. 27 Xómáꞌ xa̱bo̱ sia̱nꞌ drígo̱ꞌ tsí tsíñúú rí ma̱nindxu̱ꞌ thúngaa drígu̱ún rá, a̱guwa ju̱dii̱nlaꞌ ge̱jyoꞌ jamí gu̱radíi̱nlaꞌ ná inuꞌ"».

28 Ído̱ wámbo̱o̱ Jesús niꞌthán rúꞌkhue̱n, niꞌgíi̱ la jambo̱o̱ ma̱ꞌgee̱ ná Jerusalén. 29 Ído̱ nangiyuu máꞌ ma̱ga̱níi̱ ná xuajen rí mbiꞌyuu Betfajé ga̱jma̱á Betánia̱, rí triga̱ mijngi ná júba̱ rí mbiꞌyuu Olíbo̱, a̱ꞌkhue̱n nixná-ñájúu̱n a̱jmi̱i tsí naꞌsngúu̱n: 30 «Gaꞌgualaꞌ ná xuajen rí ꞌgí mbíꞌthá. Ído̱ águáꞌnúlaꞌ ikhín, a̱ꞌkhue̱n mbu̱ya̱álaꞌ xtoꞌwóo mbáa xtángidi lájwíin, tsí asndo nimbáa xa̱bo̱ xóó tárigu tsu̱du̱u̱. Gu̱ra̱khuíi̱laꞌ jamí a̱guwa ju̱ya̱a̱laꞌ ge̱jyoꞌ. 31 Xí mbáa xa̱bo̱ gáraxa̱ꞌlaꞌ: "Náá numuu kajngó nu̱ra̱khuíílaꞌ xtángidi lájwíin róꞌ". Xáꞌnii gútháa̱nlaꞌ: "Numuu rí ndaꞌyóo̱ ma̱riguu Táta̱"».

32 A̱ꞌkhue̱n nigóó tsí waxúꞌmii, jamí ni̱xkamaa̱ xómá jayu waꞌthúu̱n neꞌne Jesús. 33 Awúun máꞌ rí nu̱ra̱khuíi̱ xtángidi lájwíin, a̱ꞌkhue̱n watraxúu̱n nene̱ ña̱ꞌñii xu̱kú:

―Náá numuu kajngó nu̱ra̱khuíílaꞌ xtángidi lájwíin róꞌ.

34 Xómáꞌ ikhii̱n ni̱riꞌñee̱:

―Numuu rí ndaꞌyóo̱ ma̱riguu Táta̱.

35 A̱ꞌkhue̱n nigóo̱ juya̱a̱ xtángidi ná inuu Jesús. Ikhín ni̱strámee̱ xtátsíi̱n tsu̱du̱u̱ jamí ni̱mbáyíi̱ Jesús rí ma̱riguu̱. 36 Xó i̱ka̱ Jesús, xkuaꞌnii nagóó-ru̱striga̱ xtátsi̱ín xa̱bo̱ ná ma̱ꞌga-ranújngoo̱. 37 Ído̱ na̱ga̱taa̱ máꞌ ná brákoo júba̱ rí mbiꞌyuu Olíbo̱, a̱ꞌkhue̱n mbá xúgíin xa̱bo̱ tsí mbaꞌiin naꞌsngúu̱n, ni̱gíꞌdíi̱n ni̱ndxa̱ꞌwe̱e̱ numuu rí gagi a̱kuíi̱n jamí nune̱-mba̱a̱ Ana̱ꞌlóꞌ, ga̱jma̱á numuu mbá xúgíí rí phú wáá rí neꞌne Jesús ndiyáa̱. 38 Xáꞌnii nu̱ndxa̱ꞌwe̱e̱:

«¡A̱gu̱ma-tsakun-rámaa Thúngaa tsí na̱ꞌkha̱ ga̱jma̱á numuu Táta̱!

¡Ga̱ju̱wá tsímáá xa̱bo̱ gajmíí Ana̱ꞌlóꞌ, jamí a̱gu̱ma-mba̱a̱ Ana̱ꞌlóꞌ ná mikhuíí!».

39 A̱ꞌkhue̱n mbá tikhuun xa̱bo̱ fariséo̱ tsí nagóó ná majñu̱ú xa̱bo̱, nitháa̱n Jesús:

―Táta̱ naꞌsngáá, ataxprígúún xa̱bo̱ tsí narasngúún kajngó ma̱ꞌne-wíyuu rawúu̱n.

40 Xómáꞌ ikhaa̱ niriꞌñúu̱:

―Xí xa̱bo̱ tsíge̱ꞌ naꞌne-wíyuu rawúún, magíꞌdu̱u̱n mbá xúgíí itsí mandxaꞌwá.

41 Ído̱ ni̱ga̱nú Jesús ná mijngi Jerusalén jamí ndiꞌyoo̱ xuajen, a̱ꞌkhue̱n ni̱mbi̱ye̱e̱ꞌ ga̱jma̱á numuu ne̱. 42 Jamí niꞌthúu̱n ne̱: «¡Xí numuu rí nafraꞌa̱a̱ꞌ mangáánꞌ no, maske asndo mbóó mbiꞌi ríge̱ꞌ, dí ñajuun rí ma̱ꞌne rí ma̱ra̱xtaa tsímáá! I̱ndo̱ó máꞌ numuu rí xúge̱ꞌ rá, kri̱ga̱ ngu̱ꞌwo̱o̱ ne̱ inaaꞌ, jamí tsífraꞌa̱a̱ꞌ ne̱. 43 Ma̱ga̱nú mbiꞌi rí ma̱tu̱xu̱u̱ xu̱nꞌ mbá nawa̱a̱ níjñáaꞌ gúne̱ xa̱bo̱ sia̱nꞌ gajmiáaꞌ, ma̱ju̱guá-máꞌáán gúni̱i̱. Jamí ge̱e̱ ñúꞌún gádráꞌii̱n muxnaa̱ꞌ. 44 Ma̱mbáánꞌ mbá jayu gúni̱i̱, ikháánꞌ gajmiáaꞌ xa̱bia̱aꞌ, jamí asndo ni xí i̱mba̱ itsúu guꞌwáaꞌ náxárigu tsu̱du̱u̱ i̱mba̱ itsí. Numuu rí ra̱kháaꞌ gánimba̱a̱ꞌ rí Ana̱ꞌlóꞌ ni̱ꞌkha̱ gáꞌne-jríñáaꞌ».

45 Ído̱ ni̱ga̱nú Jesús ná Jerusalén, ni̱to̱ꞌo̱o̱ ná guꞌwá dxákuun, a̱ꞌkhue̱n nigíꞌdu̱u̱n nixkawíi̱n xa̱bo̱ tsí trigi̱in nu̱ngu̱jwa̱ jamí nutse̱* ikhín. 46 Jamí niꞌthúu̱n: «Xáꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: "Rí guꞌwóꞌ, guꞌwá ná mi̱ꞌthán-jáñuꞌ ñajuun ne̱".* Xómáꞌ ikháanꞌlaꞌ rá, ni̱ni̱ilaꞌ ne̱ "iñúu itsí ná gatiin ku̱ꞌwá"».*

47 Mbámbá mbiꞌi gída̱ꞌ Jesús naꞌsngáá ná guꞌwá dxákuun. Xómáꞌ dxakuun tsí gíꞌdoo numúú, xa̱bo̱ tsí nusngáá xtángoo jamí tsí ñajúún xa̱bo̱ ede̱ ná xuajen, nduꞌyée̱ xáne gúni̱i̱ rí mu̱xíya̱a̱. 48 Jamí na̱nguá i̱xkamaa̱ xáne gúni̱i̱ rí mu̱xíya̱a̱, numuu rí mbá xúgíin xa̱bo̱ maphú nuꞌgí idxu̱ún mu̱dxawíín rí naꞌthée̱n.