Lúka̱s 18

Ajngáa xkri̱da ga̱jma̱á numuu a̱ꞌgóxuáꞌa jamí xa̱bo̱ tsí naxúdaa awan tsí ra̱májáan

1 Jesús neꞌne mbá ajngáa xkri̱da kajngó ma̱ma̱ñúú tsí naꞌsngúu̱n rí ndaꞌyóo muthán-jáñíi̱ Ana̱ꞌlóꞌ jámba̱ miꞌtsú, jamí ma̱xáꞌne níꞌngúu̱n. 2 Xáꞌnii niꞌthúu̱n: «Nixtáa mbáa xa̱bo̱ tsí naxúdaa awan ná awúun mbá xuajen, tsí tsímíñuu eꞌne Ana̱ꞌlóꞌ, ni máꞌ tsíxná-gamiéjuun ene̱ xa̱bo̱. 3 Ikhín máꞌ ná xuajen rúꞌkhue̱n nixtáa mbáa a̱ꞌgóxuáꞌa tsí tsíniñuu na̱ka̱-raꞌthúun xa̱bo̱ ñajun tsúꞌkhue̱n: "A̱tra̱jwa̱ꞌ májáanꞌ numuu xkujndu rí gúꞌdo̱ꞌ ga̱jmi̱ꞌ mbáa xa̱bo̱". 4 Xómáꞌ xa̱bo̱ tsí naxúdaa awan, phú mba̱yo̱ꞌ nda̱a̱ rí niꞌnii̱ ga̱jma̱á numuu a̱ꞌgóxuáꞌa. I̱ndo̱ó máꞌ numuu rí nda̱wa̱á niꞌthán-mine̱e̱ꞌ xáꞌnii: "Maske máꞌ tsímíñuꞌ eꞌne Ana̱ꞌlóꞌ, ni máꞌ tsíxná-gamiéjunꞌ ene̱ xa̱bo̱, 5 naskoꞌ rí tsíniñuu rí na̱ꞌkha̱-raꞌne-gajmúꞌ a̱ꞌgóxuáꞌa tsíge̱ꞌ. I̱wa̱á máján rí ma̱ra̱jwa̱ꞌ numuu̱ jamí ma̱mbáyúu̱, ra̱ꞌkhá me̱kho̱ idxu̱ꞌ gáꞌnii̱ rí na̱ꞌkhe̱e̱ máꞌ xúꞌkhue̱n ná inuꞌ"».

6 A̱ꞌkhue̱n niꞌthán Táta̱: «Ga̱ma̱ñalaꞌ ga̱jma̱á majñu̱u̱ rí niꞌthán xa̱bo̱ tsí naxúdaa awan tsí ra̱májáan. 7 Xómáꞌ Ana̱ꞌlóꞌ rá, á ma̱xámbáñúu̱ xa̱bii̱ tsí niraꞌwíi̱n, jamí mbiꞌíí mbruꞌwíín nuthán-jáñíi̱ rá. Á maniñúu̱ rí ma̱guáꞌthi̱ín mba̱yo̱ꞌ rá. 8 Na̱tha̱nꞌlaꞌ rí ma̱xáꞌne-gajyúu̱ rí mambáñúu̱ tsúꞌkhue̱n. I̱ndo̱ó máꞌ numuu rí ído̱ gáthanga̱a A̱dée Xa̱bo̱ Numbaa, á ma̱ju̱wá xa̱bo̱ tsí wéje̱ a̱kui̱ín ná inuu̱ ná numbaa rá».