1 Ríge̱ꞌ ñajuun ajngáa máján rí naꞌthán ga̱jma̱á numuu Jesukrísto̱, tsí ñajuun A̱dée Ana̱ꞌlóꞌ. Ni̱gi̱ꞌdu̱u̱n ne̱ 2 xómá ka̱ma naꞌthán ná i̱yu̱u̱ꞌ Isaía̱s, tsí ni̱gu̱wíjnga̱a ajngóo Ana̱ꞌlóꞌ wajyúú:

«Athayáá lá rí ikhúúnꞌ na̱xu̱ꞌmáa xa̱bi̱ꞌ tsí ma̱gu̱wíjnga̱a ajngóꞌ, ikhaa̱ ma̱ꞌgee̱ inaaꞌ.

Ikhaa̱ ma̱ꞌne-mújúu̱n jamba̱a̱ꞌ ná mi̱dxo̱ꞌ.*

3 Phú gakhe̱ naꞌthán mbáa xa̱bo̱ ná mbaa niníí:

"Gu̱ne̱-májánlaꞌ jamba̱a̱ ná ma̱ꞌkha̱ Táta̱.

Gu̱ríya̱ꞌlaꞌ mbá ikha jmbu ma̱ꞌgee̱"».*

4 Xáꞌnii jaꞌnii ni̱ꞌkha̱ Juáán raxúꞌdu-maꞌíin xa̱bo̱ ná awúun iya ná mbaa niníí jamí ni̱ka̱-raꞌthán-rúꞌúu̱n xa̱bo̱ rí ma̱thanga̱a a̱kuíi̱n ná inuu Ana̱ꞌlóꞌ, jamí rí ga̱jngúu̱n ná awúun iya kajngó marngudi̱i la Ana̱ꞌlóꞌ aꞌkhúu̱n. 5 A̱ꞌkhue̱n rí naguwá ná inuu Juáán mbá xúgíin xa̱bo̱ tsí júwa̱ꞌ ná numbaa Judéa̱, jamí mbá xúgíin xa̱bo̱ xuajen Jerusalén. Nune̱-maphíi̱ aꞌkhúu̱n, jamí ikhaa̱ naxúꞌdu-maꞌíi̱n ná awúun iya ná matha Jordán.

6 Xtíin rí júwuun Juáán ni̱gu̱ma ga̱jma̱á tsa̱wu̱u̱n kaméyo̱, xúꞌkhue̱n máꞌ xtuꞌwá-máꞌán mbá xtá ná smídúu̱. I̱ndo̱ó máꞌ tsíꞌbu iꞌkhúu̱n ga̱jma̱á yáá xáná. 7 Xáꞌnii iꞌthán-raꞌee̱: «Ná tsu̱du̱ꞌ na̱ꞌkha̱ mbáa tsí i̱wa̱á mba̱a̱ ski̱yu̱u̱ꞌ xó rí ikhúúnꞌ, tsí ni ra̱jáꞌyoꞌ ma̱rnga̱du̱u̱n kajngó ma̱mbáyúu̱ ma̱ra̱khúu ñawiin chádoo̱. 8 Gakon máꞌ rí ikhúúnꞌ na̱xu̱ꞌdú-maꞌáanꞌlaꞌ ná awúun iya. Xómáꞌ ikhaa̱ ma̱ꞌnii̱ rí mu̱dríguíilaꞌ Xu̱u̱ꞌ Ana̱ꞌlóꞌ».

9 Mbá mbiꞌi rí ñúꞌún, nigájnuu Jesús ná Nasarét rí ꞌgí ná numbaa Galiléa̱, ni̱ga̱níi̱ ná inuu Juáán, jamí tsúꞌkhue̱n nixúꞌdu-maꞌáa̱n ná awúun iya ná matha Jordán. 10 Ído̱ rí nagájna̱a máꞌ Jesús ná awúun iya, a̱ꞌkhue̱n ndiꞌyoo̱ rí na̱ma̱ꞌthoo mikhu, jamí na̱ga̱taa Xu̱u̱ꞌ Ana̱ꞌlóꞌ ná wíji̱i̱, xómá na̱ga̱taa rigu. 11 A̱ꞌkhue̱n niwán-ti̱ya̱ꞌ mbá a̱ꞌwá ná mikhuíí rí naꞌthán: «Ikháánꞌ ñajwaanꞌ A̱ꞌdéꞌ. Phú nandoꞌ ja̱ya̱a̱ꞌ jamí phú nadxu a̱kui̱nꞌ ithane̱».

12 A̱ꞌkhue̱n rí Xu̱u̱ꞌ Ana̱ꞌlóꞌ núkho̱ máꞌ ni̱ka̱ jayáa̱ Jesús ná mbaa niníí. 13 Ikhín máꞌ nixtáa̱ a̱jma̱ skíñú (40) mbiꞌi ná júwa̱ꞌ xu̱kú-xáná. Xómáꞌ Satanás ndiyoo gáꞌne-rájáa̱ rí ma̱ꞌnii̱ aꞌkhán, jamí ánje̱l nu̱ña̱wáa̱n.

14 Ído̱ nikhuáa máꞌ Juáán ni̱ka̱ géjwa̱nꞌ, nda̱wa̱á a̱ꞌkhue̱n ni̱ka̱a Jesús ná numbaa Galiléa̱. Ikhín nigíꞌdu̱u̱n niꞌthán-raꞌee̱ ajngáa máján rí naꞌthán rí Ana̱ꞌlóꞌ maꞌthán-ñájúún xa̱bo̱. 15 Xáꞌnii iꞌthée̱n: «Ni̱ga̱nú máꞌ mbiꞌi rá, jamí nangiyuu máꞌ mbiꞌi rí Ana̱ꞌlóꞌ maꞌthán-ñájúún xa̱bo̱. Ga̱thanga̱a a̱kia̱nꞌlaꞌ ná inuu Ana̱ꞌlóꞌ jamí ga̱nimba̱ꞌlaꞌ ju̱ya̱á ajngáa máján».

16 Ído̱ na̱ka̱-ranújngoo Jesús ná rawuun ñañuu a̱pha̱ rí mbiꞌyuu Galiléa̱, ikhín ndiꞌyoo̱ Simón ga̱jma̱á dxíyo̱o̱ tsí mbiꞌyuu Andrés. Nuda-maꞌée̱n amúu̱ ná awúun iya, numuu rí xa̱bo̱ tsí nduꞌñíi i̱gi̱ꞌ ñajúu̱n. 17 A̱ꞌkhue̱n Jesús niꞌthúu̱n: «A̱guwalaꞌ tsu̱du̱ꞌ, jamí ikhúúnꞌ ma̱sngálaꞌ rí mbu̱ꞌñíilaꞌ xa̱bo̱». 18 A̱ꞌkhue̱n mbá nacha̱ máꞌ ni̱ni̱ꞌñáa̱ amúu̱, jamí nigóo̱ tsu̱du̱u̱ Jesús.

19 Ído̱ ninújngoo Jesús ni̱ka̱ i̱tha̱án xóó, a̱ꞌkhue̱n ndiꞌyoo̱ Santiágo̱* ga̱jma̱á Juáán, tsí i̱ji̱in Sebedéo̱. Gatii̱n ná awúun ixe̱-rguwa rí na̱ka̱ inuu iya, jamí nuxmíi̱ amúu̱. 20 A̱ꞌkhue̱n núkho̱ máꞌ nindxaꞌwúu̱n. Xómáꞌ ikhii̱n nigóo̱ tsu̱du̱u̱ Jesús, ni̱ni̱ꞌñáa̱ anúu̱ ná ixe̱-rguwa gajmíí yumbáá.

21 A̱ꞌkhue̱n ni̱ga̱nú Jesús gajmíí tsí naꞌsngúún ná xuajen Kapernaúm. Jamí ído̱ ni̱ga̱nú mbiꞌi rí nduya̱a xu̱únꞌ xa̱bo̱ judío̱, a̱ꞌkhue̱n ni̱to̱ꞌo̱o̱ Jesús ná guꞌwá rí na̱gi̱mbíi̱n, jamí nigíꞌdu̱u̱n niꞌsngúu̱n. 22 Maphú namakúún xa̱bo̱ eꞌne rí naꞌsngáa̱. Numuu rí naꞌsngúu̱n asndo xómá mbáa xa̱bo̱ tsí naꞌthán-ñájun, ra̱ꞌkhá xómá nune̱ xa̱bo̱ tsí nusngáá xtángoo.

23 Jamí ná guꞌwá rí na̱gi̱mbíin xa̱bo̱ judío̱, ikhín kra̱ꞌaa mbáa xa̱bo̱ tsí gíꞌdaa gíñá ꞌguéen. Ikhaa tsúꞌkhue̱n nindxaꞌwá: 24 «Dí ñajuun iyaaꞌ ga̱jma̱á nindxa̱ꞌxo̱ꞌ róꞌ, Jesús, tsáánꞌ nadxa̱ꞌ ná Nasarét. Á nadxa̱ꞌ rí ma̱tha̱ne̱ gámbáanꞌxo̱ꞌ dxe̱ꞌ. Ikhúúnꞌ nda̱yo̱o̱ rí ikháánꞌ ñajwaanꞌ tsí jaꞌwii nixúngua̱a̱ꞌ Ana̱ꞌlóꞌ».

25 Xómáꞌ Jesús niríyúu gíñá ꞌguéen jamí niꞌthúu̱n: «¡Wíí gáꞌne rawaanꞌ! ¡A̱ga̱jnáaꞌ ná xuyuu xa̱bo̱ tsúꞌkhue̱n!». 26 A̱ꞌkhue̱n rí gíñá ꞌguéen nikruiga̱a̱ gakhe̱ xa̱bo̱, jamí phú gakhe̱ nindxaꞌwá gíñá ꞌguéen. A̱ꞌkhue̱n nigájnaa̱ ná xuyuu xa̱bo̱. 27 Jamí mbá xúgíin xa̱bo̱ maphú nimakúún, a̱ꞌkhue̱n ni̱ra̱xe̱-mijnée̱: «Dí lá ñajuun ríge̱ꞌ rá. Dí lá gisngáá nuxe̱ꞌ ñajuun ne̱ rá, rí asndo naꞌthée̱n xómá mbáa xa̱bo̱ tsí naꞌthán-ñájun. ¡Asndo gíñá ꞌguéen naxná-ñájúu̱n, jamí nune̱-mbáníí rí naꞌthée̱n!». 28 A̱ꞌkhue̱n rí mbá nacha̱ máꞌ ni̱dróꞌoo ajngáa ga̱jma̱á numuu̱, mbá xúgíí nawa̱a̱ numbaa Galiléa̱.

29 Ído̱ nigájna̱a Jesús ná guꞌwá rí na̱gi̱mbíin xa̱bo̱ judío̱, a̱ꞌkhue̱n ni̱ke̱e̱ ná guꞌwóo Simón ga̱jma̱á Andrés. Ni̱ka̱ máꞌ Santiágo̱ ga̱jma̱á Juáán mangaa. 30 Xómáꞌ dxa̱gui̱i Simón kri̱ga̱a̱ najáñuu ná xi̱yoo numuu rí mikaa̱. A̱ꞌkhue̱n mbá nacha̱ máꞌ nitháa̱n Jesús rí najáñuu̱. 31 A̱ꞌkhue̱n rí Jesús nixuꞌma-mina̱ꞌ inuu tsí najáñuu, niguatuu̱n ñawúun jamí nimbáyúu̱ ma̱tu̱xii̱. A̱ꞌkhue̱n rí núkho̱ máꞌ ni̱gata̱a rí mikaa̱, jamí nigíꞌdu̱u̱n neꞌne-mba̱ꞌwii̱n.

32 Ído̱ ni̱tra̱ꞌmúu máꞌ a̱kha̱ꞌ, jamí ni̱ka̱-raꞌne jína, a̱ꞌkhue̱n niguwá xa̱bo̱ judiin mbá xúgíin tsí najáñúú ná inuu Jesús, xúꞌkhue̱n máꞌ tsí guáꞌdiin gíñá ꞌguéen. 33 Jamí mbá xúgíin xa̱bo̱ xuajen ni̱gi̱mbúun ná rawuun xkrugua. 34 Xómáꞌ Jesús neꞌne-thanúú mbaꞌiin xa̱bo̱ tsí guáꞌdáá mbaꞌa inii nandii, mangaa máꞌ nixkawíi̱n mbaꞌiin gíñá ꞌguéen. I̱ndo̱ó máꞌ numuu rí tániñúu̱ rí muthan, numuu rí nduyáa̱ máꞌ tsáa ñajuu̱n ikhaa̱.

35 Maphú miꞌcha̱ rí asndo xóó máꞌ jína guéño, ni̱tu̱xu̱u̱ꞌ Jesús ni̱ka̱ ná mbaa ná ndawi̱in xa̱bo̱, jamí ikhín naꞌthán-jáñuu̱ Ana̱ꞌlóꞌ. 36 A̱ꞌkhue̱n Simón gajmíí a̱ngui̱in, nigóo̱ gúꞌyáa̱ Jesús. 37 Jamí ído̱ ni̱xkamaa̱, a̱ꞌkhue̱n nitháa̱n:

—Mbá xúgíin xa̱bo̱ nduꞌñáaꞌ, Táta̱.

38 A̱ꞌkhue̱n Jesús niꞌthúu̱n:

—Gu̱ꞌgua̱lóꞌ ná xuajen rí triga̱ máꞌ mijngi ge̱jyoꞌ, kajngó ma̱tha̱n-ráꞌa a̱pha̱ ikhín mangaa. Numuu rí ikhaa numuu rúꞌkhue̱n niꞌkhalo̱ꞌ.

39 Ikhaa jngó ni̱ka̱-rangroꞌoo Jesús mbá xúgíí numbaa Galiléa̱, naꞌthán-ráꞌee̱ a̱pha̱ ná mbámbá guꞌwá rí na̱gi̱mbíin xa̱bo̱ judío̱, xúꞌkhue̱n máꞌ naxkawíi̱n gíñá ꞌguéen.

40 A̱ꞌkhue̱n ni̱ꞌkha̱ mbáa xa̱bo̱ tsí naꞌgajmuu xuyuu ná inuu Jesús, jamí nismáti̱go̱o̱ niꞌthán-jáñuu̱:

—Táta̱, xí ikháánꞌ nandaaꞌ, ikhúúnꞌ nda̱yo̱o̱ rí ma̱ꞌnga̱a̱ꞌ ma̱tha̱ne̱-thanuꞌ.

41 Xómáꞌ Jesús niñáwíin a̱kui̱in jaꞌyoo̱, a̱ꞌkhue̱n nitsriye̱e̱ꞌ ñawúu̱n nixkajmaa̱ jamí niꞌthúu̱n:

—Nandoꞌ, ¡ga̱ꞌni̱i a̱kia̱anꞌ rámá!

42 Ído̱ wámbo̱o̱ Jesús niꞌthán rúꞌkhue̱n,* núkho̱ máꞌ nigáyuu nandii rí naꞌne rí naꞌgajmuu xuyuu xa̱bo̱ tsúꞌkhue̱n, jamí niꞌni̱i a̱kuii̱n. 43 A̱ꞌkhue̱n rí Jesús niꞌthán-ngawoo xa̱bo̱ tsúꞌkhue̱n, jamí nixná-ñájuu̱n ríge̱ꞌ:

44 —A̱tia̱wa̱án lá rí ma̱xára̱tha̱án asndo nimbáa xa̱bo̱ ríge̱ꞌ, rí i̱ndo̱ó máꞌ ayu gáta̱xna̱xí-mina̱ꞌ ná inuu dxakuun, jamí ataxnáxe̱ tsi̱gi̱jña̱ꞌ ga̱jma̱á numaaꞌ, xómá rí naꞌthán ná xtángawoo Moisés, kajngó mbuyáá xa̱bo̱ rí niꞌni̱i máꞌ a̱kia̱anꞌ.

45 Xómáꞌ xa̱bo̱ tsúꞌkhue̱n ído̱ ni̱ka̱a, a̱ꞌkhue̱n nigíꞌdu̱u̱n niꞌthúu̱n mbá xúgíin xa̱bo̱ rí niríga̱. Ikhaa numuu rúꞌkhue̱n nánguá iyoo ma̱to̱ꞌo̱o̱ Jesús pa̱jnu ná awúun nimbá xuajen, rí i̱ndo̱ó máꞌ nanguanúu̱ ná rawuun xuajen ná mbaa rí ndawi̱in xa̱bo̱. Maske máꞌ xúꞌkhue̱n, mbá xúgíin xa̱bo̱ tsí júwa̱ꞌ ná mbámbá xuajen naguwá ruyáa̱.