Marcos 11

Nduya-makuíi̱ Jesús ído̱ na̱to̱ꞌo̱o̱ ná Jerusalén

1 Ído̱ nangiyuu máꞌ ma̱guáꞌníi̱ ná Jerusalén, niguáꞌníi̱ ná xuajen rí mbiꞌyuu Betfajé ga̱jma̱á Betánia̱, ná kri̱doo júba̱ rí mbiꞌyuu Olíbo̱, a̱ꞌkhue̱n Jesús nixná-ñájúu̱n a̱jmi̱i tsí naꞌsngúu̱n. 2 Xáꞌnii niꞌthúu̱n: «Gaꞌgualaꞌ ná xuajen rí ꞌgí mbíꞌthá. Ído̱ águáꞌnúlaꞌ ikhín, a̱ꞌkhue̱n mbu̱ya̱álaꞌ xtoꞌwóo mbáa xtángidi lájwíin, tsí asndo nimbáa xa̱bo̱ xóó tárigu tsu̱du̱u̱. Gu̱ra̱khuíi̱laꞌ jamí a̱guwa ju̱ya̱a̱laꞌ ge̱jyoꞌ. 3 Jamí xí mbáa xa̱bo̱ gáraxa̱ꞌlaꞌ: "Náá numuu kajngó nu̱ra̱khuíílaꞌ xtángidi lájwíin róꞌ". Xáꞌnii gútháa̱nlaꞌ: "Numuu rí ndaꞌyóo̱ ma̱riguu Táta̱, jamí marthangaa̱ máꞌ ma̱ꞌkha̱a i̱mbégo wáa"».

4 A̱ꞌkhue̱n nigóo̱, ni̱xkamaa̱ a̱ꞌdá-xtángidi xtoꞌwóo ná jamba̱a̱, ná mijngi rawuun mbá guꞌwá, jamí ni̱ra̱khuíi̱. 5 A̱ꞌkhue̱n rí mbá tikhuun xa̱bo̱ tsí wájun máꞌ ikhín niwaꞌthúu̱n nene̱: «Dí e̱ne̱laꞌ rí nu̱ra̱khuíílaꞌ a̱ꞌdá-xtángidi róꞌ». 6 A̱ꞌkhue̱n ikhii̱n ni̱riꞌñúu̱ xómá rí waꞌthúu̱n neꞌne Jesús. A̱ꞌkhue̱n ni̱ni̱ꞌñúu̱ rí magóo̱ juya̱a̱. 7 A̱ꞌkhue̱n niguáꞌnúu̱ juya̱a̱ xtángidi lájwíin ná inuu Jesús, jamí ni̱strámee̱ xtátsíi̱n ná tsu̱du̱u̱. A̱ꞌkhue̱n rí Jesús ni̱riguu̱.

8 Xúꞌkhue̱n máꞌ mangaa mbaꞌiin xa̱bo̱ nagóó-ru̱striga̱ xtátsi̱ín ná jamba̱a̱, jamí i̱ꞌwíin nu̱ro̱thon inúu ixe̱, jamí nu̱strige̱e̱ ne̱ ná jamba̱a̱. 9 Xómáꞌ xa̱bo̱ tsí nagóó ginuu jamí tsí naguwá tsu̱di̱í nu̱ndxa̱ꞌwe̱e̱ xáꞌnii:

«¡A̱gu̱ma-mba̱a̱ Ana̱ꞌlóꞌ!

¡A̱gu̱ma-tsakun-rámaa tsí na̱ꞌkha̱ ga̱jma̱á numuu Táta̱!

10 ¡A̱gu̱ma-tsakun-rámaa tsí na̱ꞌkha̱ gáꞌthán-ñájwanlóꞌ

xómá rí neꞌne xi̱ꞌñálóꞌ Dabíd wajyúú!

¡A̱gu̱ma-mba̱a̱ Ana̱ꞌlóꞌ tsí xtáa mikhuíí!».

11 A̱ꞌkhue̱n ni̱to̱ꞌo̱o̱ Jesús ná Jerusalén, jamí ni̱ke̱e̱ ná guꞌwá dxákuun. Ído̱ wámbo̱o̱ niyaxu̱u̱ mbá xúgíí rí ríga̱ mbá nawa̱a̱, a̱ꞌkhue̱n ni̱kaa̱ ná Betánia̱ gajmíi̱ mbá gu̱wa̱ꞌ i̱jmi̱i (12) tsí naꞌsngúu̱n, numuu rí inu máꞌ na̱ka̱-raꞌne jína.