1 Ído̱ nagájna̱a Jesús ná guꞌwá dxákuun, a̱ꞌkhue̱n waꞌtháa̱n eꞌne mbáa tsí naꞌsngóo̱:

—Táta̱ naꞌsngáá, ¡athayáá rí phú mitsaan itsúu xu̱nꞌ ríge̱ꞌ! ¡Atiaxe̱ rí phú tsída̱ꞌ guꞌwá rí ni̱gu̱ma ga̱jma̱á ne̱!

2 A̱ꞌkhue̱n niriꞌña Jesús:

—Á nathayáá guꞌwá rí phú mba̱ꞌwo̱ ge̱jyoꞌ rá. Ma̱ga̱nú mbiꞌi rí ni xí i̱mba̱ itsí náxárigu tsu̱du̱u̱ i̱mba̱ itsí. Ma̱ngudi-ri̱ga̱a mbá jayu guꞌwá mba̱ꞌwo̱ rúꞌkhue̱n.

3 Nda̱wa̱á a̱ꞌkhue̱n ꞌgí Jesús ná júba̱ rí mbiꞌyuu Olíbo̱, rí wéje̱ ná kri̱doo guꞌwá dxákuun. A̱ꞌkhue̱n Pédro̱, Santiágo̱,* Juáán ga̱jma̱á Andrés ni̱ra̱xíi̱ janíí xáꞌnii:

4 —Arathánxo̱ꞌ, nguáná gáríga̱ rúꞌkhue̱n rá. Dí ñajuun gáríga̱ ído̱ rí nangiyuu máꞌ ma̱mba̱núu mbá xúgíí rúꞌkhue̱n rá.

5 A̱ꞌkhue̱n Jesús niꞌthúu̱n:

—Xawi lá gúne̱laꞌ ra̱ꞌkhá mune̱-nduwáanꞌlaꞌ xa̱bo̱. 6 Numuu rí ma̱guwá mbaꞌiin xa̱bo̱ tsí ma̱jmúú mbiꞌyuꞌ, ikhiin tsúꞌkhue̱n muthan: "Ikhúúnꞌ ñajunꞌ Krísto̱". Jamí mune̱-nduwii̱n mbaꞌiin xa̱bo̱. 7 Jamí ído̱ gúdxawíínlaꞌ rí ge̱e̱ ñúꞌún ríga̱ xkujndu ná numbaa, jamí nuthan xa̱bo̱ rí ma̱ri̱gá ne̱, ma̱xámíñuu a̱kia̱nꞌlaꞌ, numuu rí ndaꞌyóo máꞌ rí xkuaꞌnii gáꞌne. I̱ndo̱ó máꞌ numuu rí ra̱ꞌkhá máꞌ núkho̱ ma̱mbá numbaa. 8 Numuu rí xa̱bi̱i mbá xuajen mba̱a̱ ma̱tu̱xu̱ún muxna-mijná gajmíí xa̱bi̱i i̱mba̱ xuajen mba̱a̱, jamí mbáa thúngaa ma̱tsa̱ñu̱u̱ꞌ ga̱jma̱á i̱mba̱a̱ꞌ thúngaa ga̱jma̱á numuu rí nuthan-ñajwíi̱n. Xúꞌkhue̱n máꞌ phú mbaꞌa xuajen ná ma̱xma mi̱ndaꞌkho, ma̱ri̱gá ewi jamí wee jayu gúne̱ xa̱bo̱.* Mbá xúgíí rúꞌkhue̱n nasngájma rí ni̱khú na̱gi̱ꞌdu̱u̱n jamínu̱ꞌ.

9 »Xómáꞌ ikháanꞌlaꞌ, gu̱ña̱wa̱n-mijnálaꞌ. Numuu rí mu̱xna̱xáa̱nꞌlaꞌ ná inúú xa̱bo̱ buanuu ede̱, xúꞌkhue̱n máꞌ mu̱xpa̱tháa̱nꞌlaꞌ ná awúun mbámbá guꞌwá rí na̱gi̱mbáanꞌlóꞌ. Jamí ma̱ꞌga jiꞌdáanꞌlaꞌ ná inúú xa̱bo̱ ñajun xúꞌkhue̱n máꞌ ná inúú thúngaa ga̱jma̱á numuꞌ ikhúúnꞌ, kajngó mu̱tha̱nlaꞌ rí ndi̱ya̱álaꞌ ga̱jma̱á numuꞌ ná inúu̱ ikhii̱n. 10 Numuu rí wapha ndaꞌyóo rí mi̱ꞌthán-raꞌa ajngáa máján ná inúú xa̱bo̱ tsí júwa̱ꞌ ná inuu mbá xúgíí numbaa. 11 Jamí ído̱ rí magóo̱ judáa̱nꞌlaꞌ ná inúú xa̱bo̱ ñajun, ma̱xáxná-gamiéjwanlaꞌ ni máꞌ mu̱xúndxa̱ꞌwa̱-mijnálaꞌ dí gútha̱nlaꞌ. I̱ndo̱ó máꞌ gu̱tha̱nlaꞌ ajngáa rí najanálaꞌ rí mu̱tha̱n mbrúma rúꞌkhue̱n. Numuu rí ra̱ꞌkhá ikháanꞌ gútha̱nlaꞌ, rí Xu̱u̱ꞌ Ana̱ꞌlóꞌ maꞌthán.

12 »Mbiꞌi máꞌ rúꞌkhue̱n ma̱xtáa xa̱bo̱ tsí maxnáxi̱i̱ dxíyo̱o̱ ma̱ja̱ñúu, jamí xa̱bo̱ nikhi̱i̱ maxnáxi̱i̱ a̱dée ma̱ja̱ñúu. Xúꞌkhue̱n máꞌ e̱je̱n ma̱tsa̱ñúu̱ gajmíi̱ anúu̱, jamí mu̱xna̱xíi̱n ma̱ja̱ñúu̱. 13 Jamí mbá xúgíin xa̱bo̱ ma̱xáxúún gúyalaꞌ ga̱jma̱á numuꞌ ikhúúnꞌ. I̱ndo̱ó máꞌ numuu rí xa̱bo̱ tsí ma̱we̱je̱ xa̱ꞌ asndo jámuu, ikhaa tsúꞌkhue̱n tsí ma̱jríya̱a̱ꞌ.

14 »Ikhaa jngó ma̱ga̱nú mbiꞌi rí mbu̱ya̱álaꞌ rí "xkawe̱ꞌ mi̱ndaꞌkho", rígu ne̱ ná ra̱jáꞌyoo ma̱rigu (tsí na̱gu̱xnuu ríge̱ꞌ, ga̱froꞌo̱o̱ rí naꞌthán ne̱), xómá niꞌthán Daniél tsí ni̱gu̱wíjnga̱a ajngóo Ana̱ꞌlóꞌ wajyúú.* Ído̱ ma̱kujma rúꞌkhue̱n, xa̱bo̱ tsí júwa̱ꞌ ná numbaa Judéa̱ agáñúu̱ magóo̱ ná júba̱. 15 Tsí kra̱ꞌmáa ndayáa xu̱u̱ꞌ ná tsu̱du̱u̱ guꞌwóo, ma̱xáta̱ꞌaa̱ la ma̱gu̱wíi̱ rí ríga̱ ná awúun guꞌwóo̱ ído̱ rí ma̱ga̱taa̱-ragáyuu̱. 16 Xómáꞌ tsí inu xtáa nañajun xanáá, ma̱xáꞌkha̱a ná guꞌwóo kajngó mbayá xtátsi̱in. 17 ¡Maphú mingíníi go̱ꞌo̱ tsí juda-éda, jamí tsí nu̱xníxúún i̱ji̱ín gáꞌne mbiꞌi rúꞌkhue̱n! 18 Gu̱tha̱n-jáñíílaꞌ Ana̱ꞌlóꞌ kajngó ma̱xáꞌne go̱nꞌ rí ngúwán ído̱ rí mu̱ga̱yálaꞌ. 19 Numuu rí mbiꞌi rúꞌkhue̱n ma̱ri̱gá mi̱ndaꞌkho jamínu̱ꞌ, rí ninguáná táríga̱ asndo nákhí máꞌ mbiꞌi rí Ana̱ꞌlóꞌ neꞌne-ku̱maa numbaa asndo mbiꞌi máꞌ xúge̱ꞌ. Xúꞌkhue̱n máꞌ náxáríga̱ nda̱wa̱á rí ma̱ri̱gá mbiꞌi rúꞌkhue̱n. 20 Xí numuu rí Táta̱ ma̱xáxtriga̱ mbiꞌi rúꞌkhue̱n, asndo nimbáa xa̱bo̱ ma̱xájríya̱a̱ꞌ. I̱ndo̱ó máꞌ numuu rí ga̱jma̱á numúú tsí ikhaa̱ niraꞌwíi̱n, niꞌnii̱ rí ma̱xtriga̱ mbiꞌi rúꞌkhue̱n.

21 »Ikhaa jngó xí mbáa xa̱bo̱ naꞌthánlaꞌ: "A̱gu̱ya̱álaꞌ, rí ge̱jyoꞌ xtáa Krísto̱", o "A̱gu̱ya̱álaꞌ rí a̱ꞌkhue̱n xtáa̱", ma̱xánimba̱ꞌlaꞌ rúꞌkhue̱n. 22 Numuu rí ma̱guwá xa̱bo̱ tsí mi̱nduwiin tsí muthan rí krísto̱ ñajúún, jamí ma̱guwá xa̱bo̱ tsí mi̱nduwiin rí nu̱rawíjnga̱a ajngóo Ana̱ꞌlóꞌ. Tsúꞌkhue̱n mune̱ rí maphú wáá jamí muni̱i̱ rí ma̱makúún xa̱bo̱, kajngó mune̱-nduwii̱n, jamí xí numuu rí na̱ꞌngúu̱n, mune̱-nduwii̱n asndo tsí niraꞌwíin Ana̱ꞌlóꞌ. 23 ¡Xawi gúne̱laꞌ! Numuu rí wapha máꞌ ni̱tha̱nꞌlaꞌ mbá xúgíí ríge̱ꞌ.

24 »Ído̱ gánújngoo rí jamínu̱ꞌ mi̱ndaꞌkho ná mbiꞌi rí ñúꞌún, a̱ꞌkhue̱n ma̱ji̱ná iduu a̱kha̱ꞌ, jamí go̱nꞌ náxáxná aguu. 25 Ma̱friguun a̱ꞌgua̱án tsí júwa̱ꞌ ná mikhu, jamí mi̱tamajnga-ri̱gi̱in tsiakhe̱ tsí júwa̱ꞌ ná mikhu. 26 A̱ꞌkhue̱n xa̱bo̱ mbuyáá A̱dée Xa̱bo̱ Numbaa, na̱ꞌkhe̱e̱ ná du̱u̱n ga̱jma̱á maphú mba̱a̱ tsiakhe̱ jamí asndo nambiꞌi-taꞌaa̱. 27 A̱ꞌkhue̱n maxuꞌmii̱ ánje̱l drígo̱o̱, kajngó mune̱-ꞌnduu̱n tsí niraꞌwíi̱n ná mbá nákho̱ rakhóo numbaa, asndo ná rawuun ju̱ba̱ꞌ jamí asndo ná rawuun mikhu.

28 »A̱ga̱ma̱ñalaꞌ xkri̱da rí nasngájma ixu̱u̱ ígo̱: Ído̱ rí narudu-ráma̱a máꞌ ñawúun ne̱ jamí natráma̱a máꞌ inúu ne̱, ndu̱ya̱álaꞌ rí nangiyuu máꞌ go̱nꞌ rí ma̱ꞌne mika. 29 Xkuaꞌnii máꞌ mangaa, ído̱ ágúya̱álaꞌ rí naríga̱ máꞌ rí ni̱tha̱nꞌlaꞌ, a̱ꞌkhue̱n ga̱ma̱ñalaꞌ rí mijngi máꞌ wíji̱i̱ ná rawuun xkrugua. 30 Na̱tha̱nꞌ-jmbalaꞌ rí xa̱bo̱ tsí júwa̱ꞌ xúge̱ꞌ, ma̱xájáñúu̱ wapha asndo ágúyáa̱ rí ma̱mba̱núu mbá xúgíí rí na̱tha̱nꞌlaꞌ xúge̱ꞌ. 31 Ma̱ga̱nú mbiꞌi rí ma̱mbáa mikhu ga̱jma̱á numbaa, xómáꞌ rí ajngóꞌ mbá jámuu ma̱ri̱gá ne̱.

32 »I̱ndo̱ó máꞌ numuu rí asndo nimbáa tsíꞌyoo náá mbiꞌi jamí náá xtáa a̱kha̱ꞌ gáꞌne rúꞌkhue̱n. Ni máꞌ ánje̱l tsí júwa̱ꞌ ná mikhuíí tsíyáá, ni máꞌ A̱dée Ana̱ꞌlóꞌ, rí i̱ndo̱ó máꞌ Ana̱ꞌlóꞌ ndaꞌyoo.

33 »Ga̱juwalaꞌ xawi jamí mbiꞌi idalaꞌ gáꞌne, xúꞌkhue̱n máꞌ gu̱tha̱n-jáñíílaꞌ Ana̱ꞌlóꞌ,* numuu rí tsíya̱álaꞌ nguáná gága̱nú mbiꞌi rúꞌkhue̱n. 34 Rúꞌkhue̱n jaꞌnii xómá mbáa xa̱bo̱ tsí nagájnuu na̱ka̱ tsíngua̱ꞌ, naniñuu̱ guꞌwóo̱ ñawúún yumbée̱ rí mu̱ña̱wa̱án ne̱. Mbámbáa yumbáá naxnúu̱ ñajun rí ma̱ꞌne, jamí tsí na̱ña̱wu̱u̱n rawuun guꞌwá rá, naxná-ñájuu̱n rí ma̱xtáa̱ xawi. 35 Ikhaa jngó ga̱juwalaꞌ xawi, numuu rí tsíya̱álaꞌ nguáná gáꞌkha̱a táta̱ tsí guꞌwóo. Á gáꞌne xí ma̱ꞌkhaa̱ rí inu máꞌ na̱ka̱-raꞌne jína, o tikhu mbroꞌon mbo̱ꞌ, o rí inu máꞌ mandxaꞌwá mba̱xtá mbo̱ꞌ, o rí na̱ꞌkha̱-ratse mbo̱ꞌ. 36 Ga̱juwalaꞌ xawi, ra̱ꞌkhá nda̱a̱ ajngóo gáꞌkhaa̱, jamí maxkamáa̱nꞌlaꞌ rí nu̱nu̱ꞌlaꞌ. 37 Jamí rí na̱tha̱nꞌ ikháanꞌlaꞌ, ikhaa máꞌ na̱thu̱ún mbá xúgíin xa̱bo̱: ¡Ga̱juwalaꞌ xawi!