Marcos 2

3 A̱ꞌkhue̱n niguáꞌnú ná xtáa Jesús mbá akhu̱un xa̱bo̱ tsí juya̱a̱ mbáa xa̱bo̱ tsí nixtriga̱a̱. 4 I̱ndo̱ó máꞌ numuu rí na̱nguá iyoo ma̱tu̱múu̱ asndo ná inuu Jesús, ga̱jma̱á numuu rí maphú mbaꞌiin xa̱bo̱ gachúún, ikhaa jngó nitsimúu̱ juya̱a̱ ná tsu̱du̱u̱ guꞌwá jamí ni̱rma̱ꞌtháa̱ ná naꞌne jmbuu wéje̱ Jesús. Ikhín máꞌ ni̱xri̱guíi̱ tsí nixtriga̱a̱ ga̱jma̱á agúu, ná ja̱ma̱ꞌtha nini̱i̱. 5 Ído̱ ndiꞌyoo Jesús rí wéje̱ a̱kui̱ín xa̱bo̱ tsúꞌkhue̱n ná inuu̱, a̱ꞌkhue̱n niꞌthúu̱n xa̱bo̱ tsí nixtriga̱a̱: «Táa̱, ningudi̱i máꞌ aꞌkháanꞌ rá».

6 Ikhín máꞌ trigi̱in mbá tikhuun xa̱bo̱ tsí nusngáá xtángoo, jamí nu̱ndxa̱ꞌwa̱-mijnée̱ xáꞌnii: 7 «Náá numuu kajngó xáꞌnii iꞌthán xa̱bo̱ tsíge̱ꞌ róꞌ. Naꞌthán-xkawi̱i̱ꞌ ga̱jma̱á numuu Ana̱ꞌlóꞌ. Tsáa i̱mba̱a̱ꞌ ma̱goo ma̱ꞌne mba̱a̱ a̱kui̱in jaꞌyoo aꞌkhúún xa̱bo̱ róꞌ. I̱ndo̱ó máꞌ Ana̱ꞌlóꞌ ma̱goo ma̱ꞌne rúꞌkhue̱n».

8 Xómáꞌ Jesús núkho̱ máꞌ ndiꞌyoo rí xkuaꞌnii nu̱ndxa̱ꞌwa̱-mijnée̱, ikhaa jngó niraxúu̱n: «Náá numuu kajngó xkuaꞌnii i̱ndxa̱ꞌwa̱-mijnálaꞌ róꞌ. 9 Náá rí i̱wa̱á na̱nguá mingíjyúu rí mi̱ꞌtháán xa̱bo̱ tsí nixtriga̱a̱ róꞌ: Á rí mi̱ꞌtháa̱n: "Ningudi̱i máꞌ aꞌkháanꞌ rá", o rí mi̱ꞌtháa̱n: "Araxu̱unꞌ, atiáxi̱i aguáaꞌ jamí ayu̱uꞌ" dxe̱ꞌ. 10 Ma̱snga̱jmálaꞌ mbu̱ya̱á rí A̱dée Xa̱bo̱ Numbaa gíꞌdoo tsiakhe̱ rí ma̱ꞌne mba̱a̱ a̱kui̱in jaꞌyoo aꞌkhúún xa̱bo̱ ná numbaa ríge̱ꞌ». A̱ꞌkhue̱n niꞌthúu̱n xa̱bo̱ tsí nixtriga̱a̱: 11 «Ikháánꞌ i̱tha̱a̱nꞌ, araxu̱unꞌ, atiáxi̱i aguáaꞌ, jamí ayu̱uꞌ guꞌwáaꞌ».

12 A̱ꞌkhue̱n rí núkho̱ máꞌ ni̱tu̱xii̱, jamí niyáxii̱ agúu̱. Inúú mbá xúgíin xa̱bo̱ nigájnaa̱ ni̱kaa̱. A̱ꞌkhue̱n rí mbá xúgíin xa̱bo̱ maphú nimakúún jamí nene̱-mba̱a̱ Ana̱ꞌlóꞌ rí xkuaꞌnii ndiyáa̱. Jamí nithee̱n: «¡Ninguáná túꞌyáálóꞌ rí xáꞌnii rá!».