1 A̱ꞌkhue̱n niguáꞌníi̱ ná kri̱doo ñañuu a̱pha̱, ná numbaa Gadára̱. 2 Jamí inu na̱gata̱a Jesús ná ixe̱-rguwa rí na̱ka̱ inuu iya, a̱ꞌkhue̱n mbá nacha̱ máꞌ ni̱ꞌkha̱ gáꞌyoo̱ mbáa xa̱bo̱ tsí nigájnuu ná mbaa rí gatiin wa̱jen. Tsúꞌkhue̱n gíꞌdaa mbáa gíñá ꞌguéen. 3 Xtáa̱ jayu ná mbaa rí gatiin wa̱jen, jamí nimbáa xa̱bo̱ tsíꞌngo̱o̱ maroꞌwóo̱, ni máꞌ ga̱jma̱á ñuu ajwa̱nꞌ. 4 Numuu rí mbaꞌa nothon nixtoꞌwóo̱ ga̱jma̱á ajwa̱nꞌ rí narmatsí nakhúu̱, xúꞌkhue̱n máꞌ ga̱jma̱á ñuu ajwa̱nꞌ ná ñawúu̱n. Xómáꞌ ikhaa̱ na̱ro̱thon-makee̱ nájma̱ rúꞌkhue̱n, ikhaa jngó asndo nimbáa xa̱bo̱ tsíꞌngo̱o̱ gáꞌne ga̱jmáa̱. 5 Mbiꞌíí mbruꞌwíín ngrigo̱o̱ꞌ-randxaꞌwée̱ ná júba̱ jamí ná mbaa gatiin wa̱jen, xúꞌkhue̱n máꞌ naꞌne-ñawún-mine̱e̱ꞌ ga̱jma̱á itsí.

6 Ído̱ rí nákhí máꞌ xóó tsíngua̱ꞌ i̱ꞌkha̱ Jesús ndiꞌyoo̱, a̱ꞌkhue̱n ni̱ꞌkhe̱e̱-ragáyuu̱ jamí nismáti̱go̱o̱ inuu. 7 A̱ꞌkhue̱n phú gakhe̱ nindxaꞌwée̱ inuu Jesús: «Dí iyaaꞌ ga̱jma̱á nindxu̱ꞌ, Jesús, tsáánꞌ ñajwaanꞌ A̱dée Ana̱ꞌlóꞌ Mikhuíí róꞌ. Na̱tha̱n-jáñaaꞌlo̱ꞌ ga̱jma̱á numuu Ana̱ꞌlóꞌ rí ma̱xátha̱ne̱ rí ma̱mínu̱u̱ꞌlo̱ꞌ». 8 Xkuaꞌnii niꞌthée̱n numuu rí wapha máꞌ waꞌtháa̱n neꞌne Jesús: «¡A̱ga̱jnáaꞌ ná xuyuu xa̱bo̱ tsíge̱ꞌ, ikháánꞌ gíñá ꞌguéen!».

9 Jamí niraxu̱u̱:

—Xáne mbiꞌyaaꞌ róꞌ.

Xómáꞌ ikhaa̱ niriꞌñee̱:

—Lejión* mbiꞌyuꞌ, numuu rí maphú mbaꞌáanꞌxo̱ꞌ.

10 A̱ꞌkhue̱n rí maphú niꞌthán-jáñuu̱ Jesús rí ma̱xáxkawíi̱n gíñá ꞌguéen rí magóó i̱mba̱ mbaa. 11 Ikhín máꞌ ná mijngi níjñúu júba̱ gachúún mbaꞌiin a̱ga napeꞌtso. 12 A̱ꞌkhue̱n rí mbá xúgíin gíñá ꞌguéen nithán-jáñíí Jesús: «Ataxúꞌmáaꞌxo̱ꞌ ná gachúún a̱ga kajngó ma̱ta̱ꞌa̱ꞌxo̱ꞌ ná xuñúu̱».

13 Xómáꞌ Jesús niniñúu̱ rí ma̱tu̱ꞌúu̱n. A̱ꞌkhue̱n nigájna̱á gíñá ꞌguéen ná xuyuu xa̱bo̱ jamí ni̱tu̱ꞌúu̱n ná xuñúú a̱ga, tsí naꞌne xó mbá a̱jma̱ míl (2 000) wáa ñajúún. Xómáꞌ a̱ga niguátaan-ragáñúú ná brákoo asndo ni̱stuáꞌán-mijnée̱ ná awúun ñañuu a̱pha̱, jamí ikhín nixmátu̱ꞌúu̱n asndo nijáñúu̱.

14 Xómáꞌ xa̱bo̱ tsí nu̱ña̱wu̱ún a̱ga ningujwíi̱n-ragáñúu̱, nigúu̱n gúthúu̱n xa̱bo̱ tsí júwa̱ꞌ ná xuajen jamí tsí júwa̱ꞌ ná xanáá. A̱ꞌkhue̱n rí nigájnúú xa̱bo̱ ágúyáá dí ñajuun niríga̱. 15 Ído̱ niguáꞌníi̱ ná wéje̱ Jesús, a̱ꞌkhue̱n ndiyáa̱ xa̱bo̱ tsí ni̱gu̱ma-ngínáa nene̱ mbaꞌiin gíñá ꞌguéen nákhí wapha. Nánda̱a̱ rí gíꞌdoo̱ ꞌgíi̱ꞌ, júwuu̱n xtíin jamí káxe̱ ju̱mu̱u̱ ndiyáa̱. A̱ꞌkhue̱n rí phú nimíñúu̱. 16 Xómáꞌ xa̱bo̱ tsí ndiyáá xáne nigíꞌnuu tsí ni̱gi̱ꞌdiin gíñá ꞌguéen, xúꞌkhue̱n máꞌ rí nigíꞌníí a̱ga, ikhiin tsúꞌkhue̱n nithúún i̱ꞌwíin xa̱bo̱ rí ndiyáá. 17 A̱ꞌkhue̱n ni̱gíꞌdíi̱n nithán-jáñíi̱ Jesús rí ma̱ga̱jnáa ná mbañúu̱.

18 Ído̱ rí natsima̱a máꞌ Jesús ná ixe̱-rguwa, a̱ꞌkhue̱n rí xa̱bo̱ tsí ni̱gi̱ꞌdiin gíñá ꞌguéen niꞌthán-jáñuu̱ Jesús rí maniñuu̱ ma̱ꞌgee̱ ga̱jma̱á nindxu̱u̱. 19 Xómáꞌ Jesús tániñuu̱ ma̱ꞌgee̱, jamí niꞌthúu̱n: «Ayu̱uꞌ guꞌwáaꞌ, ná inúú xa̱bia̱aꞌ, jamí arathúu̱n rí phú mba̱a̱ neꞌne Táta̱ ga̱jma̱á numaaꞌ, jamí arathúu̱n xáne niñáwíin a̱kuii̱n jaꞌyaa̱ꞌ». 20 A̱ꞌkhue̱n ni̱ka̱a xa̱bo̱ tsúꞌkhue̱n, jamí nigíꞌdu̱u̱n niꞌthúu̱n xa̱bo̱ ná numbaa Dekápo̱li̱s rí phú mba̱a̱ neꞌne Jesús ga̱jma̱á numuu̱. Jamí mbá xúgíin xa̱bo̱ nimakúún ga̱jma̱á numuu rí niꞌthée̱n.

21 Ído̱ Jesús ni̱ꞌkha̱a ga̱jma̱á ixe̱-rguwa ná i̱mba̱ mbíꞌthóo ñañuu a̱pha̱, a̱ꞌkhue̱n phú mbaꞌiin xa̱bo̱ niwi̱in mbá nawa̱a̱ inuu̱. Ikhaa jngó ninguanúu̱ máꞌ ná rawuun iya. 22 Awúun máꞌ rúꞌkhue̱n ni̱ꞌkha̱ mbáa xa̱bo̱ tsí mbiꞌyuu Jáiro̱, tsí ñajuun xa̱bo̱ ede̱ ná awúun guꞌwá rí na̱gi̱mbíin xa̱bo̱ judío̱. Ído̱ ndiꞌyoo̱ Jesús, ni̱ke̱e̱ gásmáti̱go̱o̱ ná wéje̱, 23 jamí phú naꞌthán-jáñuu̱ xáꞌnii: «Táta̱, na̱tha̱n-jáñaaꞌ rí aya̱ guꞌwáá, ataxkrámaa tháan a̱ꞌdéꞌ tsí dxáꞌgú, numuu rí inu na̱ka̱ xu̱u̱ꞌ kri̱ga̱a̱. Kajngó ma̱ꞌni̱i a̱kuii̱n, jamí ma̱xtáa̱ xóó».

24 A̱ꞌkhue̱n ni̱ka̱ Jesús ga̱jma̱á Jáiro̱. Jamí phú mbaꞌiin xa̱bo̱ nigóó tsu̱du̱u̱, asndo nitarmatsíi̱ ene̱ xa̱bo̱. 25 Jamí ná majñu̱ú xa̱bo̱ a̱ꞌkhue̱n na̱ka̱ mbáa a̱ꞌgo̱ tsí timbá gu̱wa̱ꞌ i̱jma̱ (12) tsigu eꞌne rí na̱ga̱díí iꞌdiuu. 26 Phú mbaꞌiin máꞌ xa̱bo̱ tsí nene̱-thanáa̱, i̱ndo̱ó máꞌ nini̱i̱ rí mbayamínu̱u̱ꞌ, jamí ma̱ꞌne-gámbo̱o̱ mbá xúgíí rí gíꞌdoo̱. Ni xí lájwíin támbáyuu̱ thanúú xa̱bo̱ tsúꞌkhue̱n, a̱ꞌkhue̱n gakon i̱tha̱án gakhe̱ iꞌñuu̱ nandii. 27 Ído̱ nidxawuu̱n rí naꞌne Jesús, a̱ꞌkhue̱n ni̱ꞌkhe̱e̱ tsu̱du̱u̱ ná majñu̱ú mbaꞌiin xa̱bo̱, a̱ꞌkhue̱n nixkajmee̱ xtíñuu Jesús. 28 Numuu rí niꞌthán-mine̱e̱ꞌ: «Maske máꞌ i̱ndo̱ó xtíñuu̱ gáxkajmalo̱ꞌ, ma̱ꞌnii̱ a̱kui̱nꞌ». 29 Núkho̱ máꞌ ni̱we̱je̱ rí na̱ga̱díí iꞌdiuu̱, jamí ni̱ju̱mu̱u̱ rí nánguá máꞌ iꞌñuu̱ nandii rúꞌkhue̱n.

30 Xómáꞌ Jesús, núkho̱ máꞌ ndiꞌyoo rí nigájnuu tsiakhe̱ drígo̱o̱, a̱ꞌkhue̱n nitangayii̱ niyaxúu̱n xa̱bo̱ tsí phú mbaꞌiin, a̱ꞌkhue̱n niraxúu̱n: «Tsáa nixkajma xtíñuꞌ róꞌ».

31 Xómáꞌ tsí naꞌsngúu̱n nithan: «Nathayáá máꞌ rí xa̱bo̱ tsí phú mbaꞌiin nu̱rmatsíín, jamí xóó natraxe̱: "Tsáa nixkajmúú" róꞌ».

32 Xómáꞌ Jesús mbá nawa̱a̱ iyaxúu̱n xa̱bo̱, kajngó mba̱ꞌyoo̱ tsáa ñajuun tsí nixkajmaa̱. 33 A̱ꞌkhue̱n rí phú nimíñuu a̱ꞌgo̱. Asndo naguaꞌaa̱n wíji̱i̱, numuu rí ndiꞌyoo̱ máꞌ rí niꞌni̱i a̱kuii̱n. A̱ꞌkhue̱n ni̱ꞌkhe̱e̱ nismáti̱go̱o̱ inuu Jesús, jamí niꞌthúu̱n mbá jmbu mbá xúgíí. 34 Xómáꞌ Jesús niꞌthúu̱n: «Nána̱, niꞌni̱i a̱kia̱anꞌ numuu rí wéje̱ a̱kia̱anꞌ ná inuꞌ. Tsímáá gídxúuꞌ rá, numuu rí niꞌni̱i mbá jayu máꞌ a̱kia̱anꞌ inuu nandiaaꞌ».

35 Asndo xóó máꞌ tsíyámbo̱o̱ Jesús naꞌthán, ído̱ niguwá xa̱bo̱ ná guꞌwóo Jáiro̱, tsí ñajuun xa̱bo̱ ede̱ ná awúun guꞌwá rí na̱gi̱mbíin xa̱bo̱ judío̱. A̱ꞌkhue̱n nitháa̱n: «Nijáñuu máꞌ a̱ꞌdiáaꞌ rá. Nánda̱a̱ máꞌ numuu rí ma̱tha̱ne̱ gajmáá Táta̱ naꞌsngáá rá».

36 Xómáꞌ Jesús nidxawuun rí nithan xa̱bo̱ tsúꞌkhue̱n, jamí táꞌnedi̱i̱ ne̱, a̱ꞌkhue̱n niꞌthúu̱n Jáiro̱: «Ma̱xámíñaaꞌ, i̱ndo̱ó máꞌ ga̱nimba̱a̱ꞌ xtayoꞌ».

37 Jamí Jesús tániñuu rí ma̱ꞌga asndo nimbáa xa̱bo̱ ga̱jma̱á nindxu̱u̱, rí i̱ndo̱ó máꞌ Pédro̱, ga̱jma̱á Santiágo̱ jamí Juáán, dxíyo̱o̱ máꞌ Santiágo̱, nigóó ga̱jma̱á nindxu̱u̱. 38 Ído̱ niguáꞌníi̱ ná guꞌwóo tsí ñajuun xa̱bo̱ ede̱ ná awúun guꞌwá rí na̱gi̱mbíin xa̱bo̱ judío̱, a̱ꞌkhue̱n ndiꞌyoo Jesús rí wee jayu kri̱ga̱ ene̱ xa̱bo̱, xúꞌkhue̱n máꞌ nu̱mbi̱ye̱e̱ꞌ jamí nu̱ndxa̱ꞌwe̱e̱-jínúu̱. 39 A̱ꞌkhue̱n ni̱to̱ꞌo̱o̱ Jesús, jamí niꞌthúu̱n: «Náá numuu kajngó wee guéño e̱ne̱laꞌ jamí nu̱mbi̱ya̱ꞌlaꞌ róꞌ. Tájáñuu dxáꞌgú, rí naꞌguii̱ kri̱ga̱a̱».

40 A̱ꞌkhue̱n ni̱ndu̱ꞌwa̱jmaa̱ Jesús rí xkuaꞌnii niꞌthán. Xómáꞌ ikhaa̱, nixkawíi̱n mbá xúgíin xa̱bo̱ rixa̱á. I̱ndo̱ó máꞌ anu̱u̱ jamí nánée dxáꞌgú, xúꞌkhue̱n máꞌ tsí gajmíi̱, tsúꞌkhue̱n ni̱to̱ꞌo̱o̱ gajmíi̱ ná kri̱ga̱a̱ dxáꞌgú. 41 A̱ꞌkhue̱n niguatuu̱n ñawúun dxáꞌgú, jamí niꞌthúu̱n: «Talíta̱ kúm», (rí nithán-wíi xáꞌnii: «Dxáꞌgú, ikháánꞌ i̱tha̱a̱nꞌ, araxu̱unꞌ»).

42 A̱ꞌkhue̱n núkho̱ máꞌ ni̱tu̱xi̱i dxáꞌgú ningrigo̱o̱ꞌ, numuu rí gíꞌdoo̱ máꞌ gu̱wa̱ꞌ i̱jma̱ (12) tsiguu̱. Jamí phú nimakúún xa̱bo̱ rí xkuaꞌnii niríga̱. 43 Xómáꞌ Jesús maphú nixnángawúu̱n rí asndo nimbáa xa̱bo̱ mu̱xútháa̱n rí niríga̱. Nda̱wa̱á a̱ꞌkhue̱n niꞌthée̱n rí ma̱janáá dxáꞌgú rí me̱kho̱.