1 Jakób ndiyáa̱ ekhoo ni̱ka̱ mangaa. Ikhín ni̱díwíin ánje̱l drígo̱o̱ Ana̱ꞌlóꞌ inuu̱. 2 A̱ꞌkhue̱n niꞌthán Jakób ído̱ ndiꞌñúu̱: «Guꞌwá ná xtáa Ana̱ꞌlóꞌ ñajuun mbaa ríge̱ꞌ jno̱ꞌ». Ikhaa jngó nixnúu̱ mbiꞌyuu mbaa rúꞌkhue̱n Maanaím. 3 A̱ꞌkhue̱n rí nixuꞌmii Jakób xa̱bo̱ magóó juñu̱ú ajngáa inuu Esaú tsí dxíyo̱o̱ máꞌ, ná mbaa Seír, mbayuu máꞌ Edóm. 4 Niꞌthúu̱n: «Xáꞌnii gútha̱ánlaꞌ táta̱ xa̱bo̱ nikhi̱i̱ Esaú: "Xáꞌnii iꞌthán yumbiáaꞌ Jakób: ‘Nixtáá ga̱jme̱ꞌ Labán, mbá xúgíí mbiꞌi asndo máꞌ xúge̱ꞌ. 5 Gúꞌdiin xede̱, xtá-ngidi, mogo̱, yumbáá xa̱bekha jamí yumbáá go̱ꞌo̱. Ikhaa jngó na̱xu̱ꞌmá ajngáa ríge̱ꞌ inaaꞌ, táta̱, numuu rí gúꞌthu̱u̱n rí máján a̱kia̱a̱nꞌ gátha̱yo̱ꞌ.’ "»

6 Ído̱ rí niguáꞌnuu̱ꞌ xa̱bo̱ inuu Jakób tsí nigóó juñu̱ú ajngáa, nitháa̱n: «Nikuáxo̱ꞌ inuu dxíya̱a̱ꞌ Esaú, jamí jmína̱a̱ꞌ máꞌ mangaa̱ na̱ꞌkhe̱e̱ gágrui̱guíi̱n. Xúꞌkhue̱n máꞌ na̱ꞌkha̱ gajmíi̱ mbá akho̱ siénto̱ xa̱bekha».

7 A̱ꞌkhue̱n rí Jakób maphú nimíñuu, jamí nixtáa̱ gaꞌkho̱. A̱ꞌkhue̱n rí nixpíꞌthíi̱n xa̱bi̱i̱ tsí júwa̱ꞌ máꞌ ga̱jma̱á nindxu̱u̱, xúꞌkhue̱n máꞌ mogo̱, xede̱ jamí kaméyo̱, niꞌnii̱ a̱jma̱ kuthúún. 8 Numuu rí nindxaꞌwá-mine̱e̱ꞌ: «Xí na̱ꞌkha̱ Esaú gáxná-mina̱ꞌ ga̱jma̱á mbá kothon, rí i̱mba̱ kothon ma̱ꞌne-jríya̱ꞌ-mina̱ꞌ xúꞌkhue̱n rá».

9 A̱ꞌkhue̱n niꞌthán Jakób: «Anu̱u̱ xi̱ꞌñúꞌ Abraám jamí Anu̱u̱ anu̱ꞌ Isaák, Anu̱ꞌ Mikhuíí, ikháán nirathúnꞌ: "A̱tanga̱án ná xuajiaanꞌ jamí ná inúú máꞌ a̱ngia̱a̱nꞌ, jamí ma̱ña̱a̱ꞌ rí máján". 10 Ra̱jáꞌyo̱ꞌ ni xí lájuíin inuu mbá xúgíí rí nañáwíin a̱kia̱a̱nꞌ xtayo̱ꞌ, xúꞌkhue̱n máꞌ mbá xúgíí rí gakon rí nambánuu ajngáaꞌ inuu yumbiáaꞌ tsíge̱ꞌ. Numuu rí i̱ndo̱ó ixe̱ gída̱ꞌ ñawúnꞌ ído̱ rí ni̱ki̱dúún mañuu Jordán, jamí rí xúge̱ꞌ rá, na̱tha̱n-ñájúún a̱jma̱ kuthúún xa̱bo̱. 11 Athane̱-jríñu̱ú xúge̱ꞌ ná ñawúun dxíyo̱ꞌ Esaú, numuu rí namíñu̱ꞌ ja̱yo̱o̱, ra̱ꞌkhá ma̱ꞌkhe̱e̱ gáxíñáa̱ꞌxo̱ꞌ, asndo go̱ꞌo̱ gajmíí i̱ji̱ín. 12 Ikháán máꞌ nirathán: "Ikhúúnꞌ ma̱ña̱a̱ꞌ rí máján, jamí xa̱bia̱a̱ꞌ ma̱nindxu̱ún asndo xóo we̱ꞌe̱ rawuun iya a̱pha̱, rí ma̱xáꞌngo̱o̱ ma̱gi̱xnuu̱ rí mbaꞌii̱n"».

13 Mbroꞌon máꞌ rúꞌkhue̱n niwanúu Jakób rí mi̱gu ikhín, xúꞌkhue̱n máꞌ niraꞌwíi̱n xu̱kú tsí gíꞌdii̱n, tsi̱gi̱jia̱nꞌ rí maxnúu̱ Esaú: 14 a̱jma̱ siénto̱ tso̱toon iꞌgú jamí mbá skíñúu tso̱toon tsí jmba̱ꞌo̱, a̱jma̱ siénto̱ mogo̱ tsí iꞌgú jamí mbá skíñúu mogo̱ tsí jmba̱ꞌo̱, 15 mbá skíñú gu̱wi̱inꞌ kaméyo̱ tsí gajmíí máꞌ i̱ji̱ín, a̱jma̱ skíñúu xede̱ iꞌgú jamí gu̱wi̱inꞌ xede̱ tsí jmba̱ꞌo̱, mbá skíñúu xtá-ngidi tsí iꞌgú jamí mbá gu̱wi̱inꞌ xtá-ngidi tsí jmba̱ꞌo̱. 16 Jamí nixnáxi̱i̱n ñawúún yumbée̱, mbámbá máꞌ inii kuthúún xu̱kú. A̱ꞌkhue̱n niꞌthúu̱n yumbée̱ xáꞌnii: «A̱nújngalaꞌ gináa̱ꞌlaꞌ ná inu̱ꞌ, jamí a̱go̱niꞌñáálaꞌ ma̱jia̱nꞌ mbámbá kothon inúú xu̱kú».

17 A̱ꞌkhue̱n nixuꞌmaa̱ tsí ginii ma̱ꞌga, jamí niꞌthúu̱n xáꞌnii: «Xí naxkamáá dxíyo̱ꞌ Esaú, jamí naraxa̱a̱ꞌ: "Tsáa-lá xa̱bi̱i̱ ñajuaanꞌ ján róꞌ. Náá-lá idxo̱ꞌ rá. Tsáa xu̱kuíi ñajúún tsí xtiin idxo̱ꞌ róꞌ". 18 A̱ꞌkhue̱n rí ma̱ra̱tháa̱n: "Mbá tsi̱gi̱jia̱nꞌ drígo̱o̱ yumbiáaꞌ Jakób ñajuun ne̱, rí naxoꞌmee̱ inaaꞌ ikháán, táta̱ nikhi̱i̱ Esaú, xúꞌkhue̱n máꞌ mangaa̱ na̱ꞌkhe̱e̱ tsu̱da̱ꞌ-máxo̱ꞌ"».

19 Nixuꞌmaa̱ mangaa tsí riajma̱a̱, xúꞌkhue̱n máꞌ tsí riatsíi. Jamí mbá xúgíin tsí nagóó gajmíí mbámbá kuthúún xu̱kú niꞌthúu̱n: «Xkuaꞌnii máꞌ gútha̱ánlaꞌ Esaú, ído̱ gúxkamaa̱laꞌ. 20 Mu̱tháa̱nlaꞌ: "Na̱ꞌkha̱ máꞌ yumbiáaꞌ Jakób ná tsu̱da̱ꞌxo̱ꞌ"».

Numuu rí naꞌthán-mina̱ꞌ Jakób: «Ma̱xríguu̱ tháan a̱kui̱i̱n rí najiꞌnáa̱, ga̱jma̱á tsi̱gi̱jia̱nꞌ rí na̱ka̱ ginii inuu̱, jamí nda̱wa̱á gáyu̱u̱ jmína̱a̱ꞌ. Gáꞌne xí ma̱grui̱gúu̱n máján xúꞌkhue̱n rá». 21 Xkuaꞌnii jngó wapha nigánújngoo tsi̱gi̱jia̱nꞌ ná inuu̱. Xómáꞌ ikhaa̱, niꞌguii̱ mbroꞌon máꞌ rúꞌkhue̱n ná ni̱wi̱ji̱i̱.

22 A̱ꞌkhue̱n rí ni̱tu̱xu̱u̱ Jakób mbroꞌon máꞌ rúꞌkhue̱n, ni̱ki̱daa̱ gajmíi̱ ná-a̱jmi̱i̱ gu̱ꞌwi̱i̱, xúꞌkhue̱n máꞌ ná-a̱jmi̱i̱ yumbée̱ mbo̱ go̱ꞌo̱ jamí mangiin máꞌ i̱ji̱i̱n tsí mbá gu̱wa̱ꞌ i̱mbii̱n. Ni̱ki̱dii̱n mañuu Jabók ná mbawi-wáa iya. 23 Xúꞌkhue̱n máꞌ niꞌnii̱ rí ma̱ki̱dii̱n ná mañuu ga̱jma̱á mbá xúgíí máꞌ rí gíꞌdoo̱. 24 Xkuaꞌnii niwanúu i̱mba̱wíi Jakób. A̱ꞌkhue̱n nixná-míjná ga̱jmáa̱ mbáa xa̱biya̱ asndo inu máꞌ ma̱mbiꞌi-ti̱ga̱ wáa. Jakób naxná-míjná ga̱jma̱á mbáa xa̱biya̱. 25 Ído̱ ndiꞌyoo xa̱biya̱ rí tséꞌngo̱o̱ ma̱ꞌne ga̱jma̱á Jakób, nixnúu̱ ná rí kajua̱a̱ itso̱ xuéjiuu̱n. A̱ꞌkhue̱n rí ni̱we̱ngoo nítú sndi̱yu̱u̱ꞌ Jakób, awúun rí naxná-míjná ga̱jmáa̱. 26 A̱ꞌkhue̱n xa̱biya̱ niꞌthán:

―Atatsíñúꞌ, numuu rí nangiyuu máꞌ ma̱mbiꞌi-ti̱ga̱.

Xómáꞌ Jakób niriꞌña̱a̱:

―Ma̱xáni̱ꞌñáaꞌ xí tsíthane̱ tsakun-rámúú.

27 Xómáꞌ xa̱biya̱ niraxe̱:

―Xáne mbiꞌyaaꞌ rá.

A̱ꞌkhue̱n rí ikhaa̱ niriꞌña̱a̱:

―Jakób mbiꞌyu̱ꞌ.

28 A̱ꞌkhue̱n rí xa̱biya̱ niꞌthúu̱n:

―Ná-xáꞌne mbiꞌyaaꞌ Jakób rá, rí Israél gáꞌne mbiꞌyaaꞌ. Numuu rí niraxná-míjná ga̱jma̱a̱ꞌ Ana̱ꞌlóꞌ, xúꞌkhue̱n máꞌ gajmiáaꞌ xa̱bo̱ numbaa, jamí ni̱ꞌnga̱a̱ꞌ.

29 A̱ꞌkhue̱n Jakób niraxu̱u̱:

―Arathúnꞌ xúge̱ꞌ xáne mbiꞌyaaꞌ ikháán rá.

Xómáꞌ xa̱biya̱ niriꞌña̱a̱:

―Déjngó-lá natraxu̱ꞌ xáne mbiꞌyu̱ꞌ jún rá.

A̱ꞌkhue̱n rí neꞌne tsakun-rámaa̱ ikhín. 30 Xómáꞌ Jakób nixnúu mbiꞌyuu mbaa rúꞌkhue̱n Peniél, numuu rí niꞌthée̱n: «Ndi̱yo̱o̱ gakon inuu Ana̱ꞌlóꞌ, jamí nijríñu̱ú rí tájáñu̱ꞌ máꞌ».

31 Ído̱ rí nigánújngoo̱ máꞌ ná Peniél, nixpátri̱ya̱a̱ꞌ a̱kha̱ꞌ. Jamí napáte̱go̱o̱ i̱ke̱e̱ numuu rí niñawúun xuéjiuu̱n. 32 Ikhaa jngó asndo máꞌ mbiꞌi xúge̱ꞌ, tséꞌpho̱ xa̱bo̱ Israél nítú rí ríga̱ ná kajua̱a̱ itso̱ xuéjiúún xu̱kú, numuu rí ikhín waꞌxnáá Jakób ná nítú rúꞌkhue̱n.