XÓ NI̱GI̱ꞋDU̱U̱N-MUU 5

Xa̱bi̱i̱ Adán

1 Ríge̱ꞌ ñajuun i̱yi̱i̱ꞌ ná na̱ꞌkha̱ mbiꞌñúú xa̱bi̱i̱ Adán. Mbiꞌi rí neꞌne ku̱mii Ana̱ꞌlóꞌ xa̱bo̱, xómáꞌ jaꞌnii Ana̱ꞌlóꞌ xkuaꞌnii niꞌnii̱. 2 Xa̱biya̱ jamí a̱ꞌgo̱ niꞌnii̱. Jamí asndo nákhí mbiꞌi rí ni̱gu̱mii̱ neꞌne tsakun-rámii̱, jamí niꞌthée̱n rí ma̱ꞌne mbiꞌñúu̱ «xa̱bo̱ numbaa».

3 Adán gíꞌdoo máꞌ mbá majuun skíñú gu̱wa̱ꞌ (130) tsiguu, ído̱ rí ni̱gu̱maa mbáa a̱dée̱ tsí phú xó rí ikhaa̱ jayuu jaꞌnii, jamí Sét neꞌne mbiꞌyuu̱. 4 Rí ni̱gu̱maa máꞌ Sét, nda̱wa̱á a̱ꞌkhue̱n nixtáa xóó Adán i̱mba̱á migiñuu siénto̱ (800) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 5 Mbá mijnagu̱wa̱ꞌ siénto̱ mbá skíñú gu̱wa̱ꞌ (930) tsigu nixtáa Adán, a̱ꞌkhue̱n rí nijáñuu̱.

6 Sét gíꞌdoo máꞌ witsu skíñú i̱ꞌkha̱a̱ mbá witsu (105) tsiguu, ído̱ rí ni̱gu̱maa mbáa a̱dée̱ tsí mbiꞌyuu Enós. 7 Rí ni̱gu̱maa máꞌ Enós, nda̱wa̱á a̱ꞌkhue̱n Sét nixtáa xóó i̱mba̱á migiñuu siénto̱ juan (807) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 8 Mbá mijnagu̱wa̱ꞌ siénto̱ gue̱jma̱ (912) tsigu nixtáa Sét, a̱ꞌkhue̱n rí nijáñuu̱.

9 Enós gíꞌdoo máꞌ akho̱ skíñú gu̱wa̱ꞌ (90) tsiguu, ído̱ rí ni̱gu̱maa mbáa a̱dée̱ tsí mbiꞌyuu Kainán. 10 Rí ni̱gu̱maa máꞌ Kainán, nda̱wa̱á a̱ꞌkhue̱n Enós nixtáa xóó i̱mba̱á migiñuu siénto̱ gu̱wa̱ꞌ-nítsu (815) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 11 Mbá mijnagu̱wa̱ꞌ siénto̱ i̱mba̱á witsu (905) tsigu nixtáa Enós, a̱ꞌkhue̱n rí nijáñuu̱.

12 Kainán gíꞌdoo máꞌ atsú skíñú gu̱wa̱ꞌ (70) tsiguu, ído̱ rí ni̱gu̱maa mbáa a̱dée̱ tsí mbiꞌyuu Maalaleél. 13 Rí ni̱gu̱maa máꞌ Maalaleél, nda̱wa̱á a̱ꞌkhue̱n Kainán nixtáa xóó i̱mba̱á migiñuu siénto̱ i̱jma̱ skíñú (840) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 14 Mbá mijnagu̱wa̱ꞌ siénto̱ gu̱wa̱ꞌ (910) tsigu nixtáa Kainán, a̱ꞌkhue̱n rí nijáñuu̱.

15 Maalaleél gíꞌdoo máꞌ mbá atsú skíñú witsu (65) tsiguu, ído̱ rí ni̱gu̱maa mbáa a̱dée̱ tsí mbiꞌyuu Jaréd. 16 Rí ni̱gu̱maa máꞌ Jaréd, nda̱wa̱á a̱ꞌkhue̱n Maalaleél nixtáa xóó i̱mba̱á migiñuu siénto̱ mbá skíñú gu̱wa̱ꞌ (830) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 17 Mbá migiñuu siénto̱ akho̱ skíñú gu̱wa̱ꞌ-nítsu (895) tsigu nixtáa Maalaleél, a̱ꞌkhue̱n rí nijáñuu̱.

18 Jaréd gíꞌdoo máꞌ mbá migiñuu skíñú i̱jma̱ (162) tsiguu, ído̱ rí ni̱gu̱maa mbáa a̱dée̱ tsí mbiꞌyuu Enók. 19 Rí ni̱gu̱maa máꞌ Enók, nda̱wa̱á a̱ꞌkhue̱n Jaréd nixtáa xóó i̱mba̱á migiñuu siénto̱ (800) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 20 Mbá mijnagu̱wa̱ꞌ siénto̱ atsú skíñú i̱jma̱ (962) tsigu nixtáa Jaréd, a̱ꞌkhue̱n rí nijáñuu̱.

21 Enók gíꞌdoo máꞌ atsú skíñú witsu (65) tsiguu, ído̱ rí ni̱gu̱maa mbáa a̱dée̱ tsí mbiꞌyuu Matusalén. 22 Rí ni̱gu̱maa máꞌ Matusalén, ni̱ka̱-raxtáa Enók xómáꞌ nandoo Ana̱ꞌlóꞌ i̱mba̱á atsú siénto̱ (300) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 23 Mbá atsú siénto̱ e̱tso̱ skíñú witsu (365) tsigu nixtáa Enók. 24 Enók nixtáa xómáꞌ nandoo Ana̱ꞌlóꞌ, a̱ꞌkhue̱n rí ná-tákujma̱a̱, numuu rí Ana̱ꞌlóꞌ ni̱ka̱ jayáa̱.

25 Matusalén gíꞌdoo máꞌ mbá mijnagu̱wa̱ꞌ skíñú juan (187) tsiguu, ído̱ rí ni̱gu̱maa mbáa a̱dée̱ tsí mbiꞌyuu Lamék. 26 Rí ni̱gu̱maa máꞌ Lamék, nda̱wa̱á a̱ꞌkhue̱n Matusalén nixtáa xóó i̱mba̱á juan siénto̱ i̱kho̱ skíñú i̱jma̱ (782) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 27 Mbá mijnagu̱wa̱ꞌ siénto̱ atsú skíñú mijnagu̱wa̱ꞌ (969) tsigu nixtáa Matusalén, a̱ꞌkhue̱n rí nijáñuu̱.

28 Lamék gíꞌdoo máꞌ mbá mijnagu̱wa̱ꞌ skíñú i̱jma̱ (182) tsiguu, ído̱ rí ni̱gu̱maa mbáa a̱dée̱. 29 Tsúꞌkhue̱n nixnée̱ mbiꞌyuu Noé, jamí niꞌthée̱n: «Ada̱ tsíge̱ꞌ ma̱ꞌne rí mbu̱ꞌyáa̱ xa̱ꞌlóꞌ inuu xúgíí ñajun rí noꞌne̱lóꞌ, numuu rí kixná-maꞌáan ju̱ba̱ꞌ neꞌne Ana̱ꞌlóꞌ Mikhuíí». 30 Rí ni̱gu̱maa máꞌ Noé, nda̱wa̱á a̱ꞌkhue̱n Lamék nixtáa xóó i̱mba̱á witsu siénto̱ akho̱ skíñú gu̱wa̱ꞌ-nítsu (595) tsigu, jamí ni̱gu̱mii xóó i̱ji̱i̱n xa̱bekha jamí go̱ꞌo̱. 31 Mbá juan siénto̱ atsú skíñú gu̱wa̱ꞌ-nítsu i̱jma̱ (777) tsigu nixtáa Lamék, a̱ꞌkhue̱n rí nijáñuu̱.

32 Noé gíꞌdoo máꞌ mbá witsu siénto̱ (500) tsigu ído̱ ni̱gu̱mii i̱ji̱i̱n tsí mbiꞌñúú Sém, Kám, jamí Jafét.