1 Nda̱wa̱á rí ninújngoo máꞌ rúꞌkhue̱n, xa̱bi̱i̱ thúngaa mba̱a̱ mbo̱ Ejípto̱, mbo̱ máꞌ naxíña̱ꞌ rí naꞌña̱a̱, jamí mangaa xa̱bo̱ tsí naꞌne-mújúun ganitsu, nini̱i̱ rí táni̱gu̱u̱ꞌ xa̱bo̱ nikhi̱i̱, thúngaa mba̱a̱. 2 A̱ꞌkhue̱n rí nijiꞌnáa Faraón* jaꞌñúú ná-a̱jmi̱i̱ xa̱bo̱ ede̱ tsíge̱ꞌ, tsí naꞌthán-ñájúún mbo̱ nu̱xi̱ña̱ꞌ rí naꞌña̱a̱ ga̱jma̱á xa̱bo̱ tsí naꞌthán-ñájúún mbo̱ none̱ mújúún guma wopho. 3 Jamí niskuádi̱i̱nꞌ guéjua̱nꞌ ná goꞌóo máꞌ xa̱bo̱ tsí naꞌthán-ñájúún mbo̱ nu̱ña̱wa̱án, ná guéjua̱nꞌ rí kra̱ꞌaa máꞌ José. 4 Xómáꞌ xa̱bo̱ tsí naꞌthán-ñájúún mbo̱ nu̱ña̱wa̱án máꞌ, niniñúu̱ xa̱bo̱ tsíge̱ꞌ ñawúun José, jamí ikhaa̱ ndaya-ngawii̱n. Xúꞌkhue̱n máꞌ mba̱a̱ mbiꞌi nijúwe̱e̱ꞌ ná guéjua̱nꞌ.

5 Mbá mbroꞌon ná-a̱jmi̱i̱ xa̱bo̱, mbo̱ naxíña̱ꞌ rí naꞌña̱a̱ thúngaa Ejípto̱ ga̱jma̱á mbo̱ naꞌne-mújúun guma wopho, ni̱nu̱ꞌndaa̱ mbámbíi̱n ná katii̱n guéjua̱nꞌ, xúꞌkhue̱n máꞌ mbámbá xóo rí naꞌthán xnuꞌndúu̱n. 6 A̱ꞌkhue̱n rí José ni̱ka̱ gáꞌñúu̱ rí i̱mba̱ mbiꞌi, jamí ndiꞌñúu̱ rí phú jíná a̱kuíi̱n. 7 A̱ꞌkhue̱n ikhaa̱ niraxúu̱n xa̱bi̱i̱ Faraón, mbo̱ tsí xtáa̱ máꞌ gajmíi̱ ná guéjua̱nꞌ ná goꞌóo máꞌ xa̱bo̱ nikhi̱i̱:

―Déjngó rí xúge̱ꞌ phú jíná guéño inalaꞌ róꞌ.

8 Xómáꞌ ikhii̱n nitháa̱n:

―Ríga̱ rí ni̱nu̱ꞌndaaxo̱ꞌ, jamí ndawa̱a̱ tsí maꞌthán-wíi̱ ne̱ rá.

A̱ꞌkhue̱n rí José niꞌthúu̱n:

―Á ra̱ꞌkháa máꞌ Ana̱ꞌlóꞌ ñajuun tsí maꞌthán-wíi̱ ne̱ rá dxe̱ꞌ. A̱gu̱thu̱nꞌlaꞌ ne̱ xúge̱ꞌ mba̱yo̱.

9 A̱ꞌkhue̱n rí xa̱bo̱ mbo̱ naꞌthán-ñájúún tsí nu̱xi̱ña̱ꞌ iya niꞌthúun José xnuꞌnduu: Mbáa xa̱bo̱ naꞌthúun José rí nigundaa ná guéjua̱nꞌ.

―Ikhúúnꞌ ni̱gúndaa rí nda̱yo̱o̱ mbá ajmu̱u̱ xndú úba̱, wéje̱ ne̱ ná inu̱ꞌ, 10 jamí ríga̱ mbá atsú ñawúun ne̱. Ído̱ rí narudu-ráma̱a̱ꞌ ne̱, naxná ri̱ꞌyu̱u̱ ne̱, jamí na̱ka̱-raꞌgo̱o̱ juáyúu xndú úba̱. 11 Xómáꞌ ikhúúnꞌ gída̱ꞌ ñawúnꞌ xu̱wá-ndiyuu Faraón, jamí na̱gruígú xndú úba̱ xúꞌkhue̱n máꞌ na̱duun ne̱ ná xu̱wá-ndiyuu̱. A̱ꞌkhue̱n rí na̱xna̱a̱ ne̱ naꞌña̱a̱ ndi̱yo̱o̱.

12 A̱ꞌkhue̱n José niꞌthúu̱n:

―Ríge̱ꞌ ñajuun rí naꞌthán xnuꞌndaaꞌ: rí atsú ñawúun ajma̱a̱ ñajuun atsú mbiꞌi. 13 Ído̱ rí ma̱ꞌne atsú mbiꞌi maꞌthán Faraón numaaꞌ, jamí maꞌgíi̱nꞌ máꞌ ñajun rí nathane̱, xúꞌkhue̱n máꞌ ma̱ra̱xna̱a xu̱wá-ndiyuu Faraón ná ñawúun, xómáꞌ nathane̱ jayu nákhí rí naraxná rí naꞌña̱a̱. 14 A̱ga̱rmáꞌáa̱n-lá a̱kia̱a̱nꞌ ga̱jma̱á nindxu̱ꞌ ído̱ gátánga̱án ma̱ra̱xtaa májáanꞌ mbu̱jú, jamí na̱tha̱n-jáñaaꞌ rí ma̱ñáwíin a̱kia̱a̱nꞌ xtayo̱ꞌ. Arathán tháan numu̱ꞌ inuu Faraón, rí maríñúu̱nꞌ awúun guéjua̱nꞌ ríge̱ꞌ. 15 Numuu rí ni̱gu̱ma-kúwu̱ún ná mbañúú mbo̱ ebréo̱, xúꞌkhue̱n máꞌ nimbá nda̱a̱ rí ne̱ne̱ ge̱jioꞌ, xí ma̱gúda̱ꞌlo̱ꞌ guéjua̱nꞌ.

16 Ído̱ ndiꞌyoo xa̱bo̱ tsí naꞌthán-ñájúún mbo̱ none̱ mújúún guma wopho rí máján niꞌthán-wíi̱ José, a̱ꞌkhue̱n niꞌthúu̱n mangaa̱:

―Ikhúúnꞌ mangúún ni̱gúndaa rí nda̱yo̱o̱ atsú ixtuu guma wopho rí miꞌxá tráma ná idxu̱ꞌ. 17 Ixtu rí rígu inúú gati mbaꞌa inii guma wopho rí thawuun rí me̱kho̱ Faraón. I̱ndo̱ó ndi̱yo̱o̱ rí ño̱ꞌo̱n naꞌpho̱ rí gati ná ixtu rí rígu ná idxu̱ꞌ.

18 A̱ꞌkhue̱n niriꞌña̱a̱ José:

―Ríge̱ꞌ ñajuun rí naꞌthán xnuꞌndaaꞌ: rí atsú ixtu, ikhaa ñajuun atsú mbiꞌi. 19 Ído̱ rí ma̱ꞌne atsú mbiꞌi Faraón marígú idxa̱a̱ꞌ, jamí ma̱ꞌnii̱ rí ma̱bra̱káán ná ixe̱, xúꞌkhue̱n máꞌ mo̱pho̱ ño̱ꞌo̱n xuyaaꞌ.

20 Ído̱ ni̱ga̱nú mbiꞌi riatsú niráma̱a̱ꞌ tsiguu Faraón, jamí niꞌnii̱ mbá ndxa̱a̱ inúú mbá xúgíin xa̱bi̱i̱. A̱ꞌkhue̱n rí inúú máꞌ xa̱bi̱i̱, niríya̱a̱ꞌ ná guéjua̱nꞌ xa̱bo̱ tsí naꞌthán-ñájúún mbo̱ nu̱xi̱ña̱ꞌ iya, ga̱jma̱á máꞌ xa̱bo̱ tsí naꞌthán-ñájúún mbo̱ none̱ guma wopho. 21 Xúꞌkhue̱n máꞌ niꞌnii̱ rí ma̱tanga̱a̱ ná ñajun drígo̱o̱ xa̱bo̱ tsí naꞌthán-ñájúún mbo̱ nu̱xi̱ña̱ꞌ iya, jamí ikhaa̱ maxnáa̱ la xu̱wá-ndiyuu Faraón ná ñawúun rí ma̱ga̱a̱n. 22 I̱ndo̱ó xa̱bo̱ tsí naꞌthán-ñájúún mbo̱ none̱ mújúún guma wopho wandráka-maa̱, mbá xóo niꞌthán-wíi̱ xnuꞌndaa José. 23 Xómáꞌ xa̱bo̱ tsí naꞌthán-ñájúún mbo̱ nu̱xi̱ña̱ꞌ iya ná-tármáꞌáa̱n a̱kui̱i̱n jaꞌyoo̱ José, rí nimbumuu̱ mbá jayu.