1 Ído̱ niyaxe̱ Jakób ndiꞌyoo̱ rí na̱ꞌkha̱ Esaú, xúꞌkhue̱n máꞌ mbá akho̱ siénto̱ xa̱bekha tsí naguwá ga̱jma̱á nindxu̱u̱. A̱ꞌkhue̱n rí nixpíꞌthíi̱n e̱je̱n ná majiu̱ún Léa̱ ga̱jma̱á Rakél jamí ná-a̱jmi̱i̱ máꞌ yumbáá mbo̱ go̱ꞌo̱. 2 Xúꞌkhue̱n máꞌ nitsuájuu̱n yumbáá gajmíí i̱ji̱ín ginuu ná inúú, i̱ꞌkha̱a̱ la Léa̱ gajmíí i̱ji̱i̱n. Tsu̱di̱í jayu ni̱we̱je̱ Rakél ga̱jma̱á José. 3 A̱ꞌkhue̱n rí ikhaa̱ nigánújngoo̱ ginii̱ ná inúú, jamí ni̱ka̱-rasmáti̱go̱o̱ ná mbayíí mbá juan nothon, asndo náá ni̱ga̱níi̱ inuu dxíyo̱o̱. 4 Xómáꞌ Esaú nigáyuu gáxkama̱a̱ jamí ndiyá-raꞌaa̱ xúꞌkhue̱n máꞌ niraꞌnuu̱ inuu rí niraxi̱i̱. A̱ꞌkhue̱n rí ná-a̱jmi̱i̱ ni̱mbi̱ye̱e̱ꞌ. Nu̱xkama̱-mi̱jna̱a̱ Esaú ga̱jma̱á Jakób. 5 A̱ꞌkhue̱n niyaxe̱ Esaú, ndiꞌñúu̱ go̱ꞌo̱ xúꞌkhue̱n máꞌ e̱je̱n, jamí niꞌthée̱n:

―Tsíin ñajúún tsíge̱ꞌ róꞌ.

Xómáꞌ Jakób niriꞌña̱a̱:

―E̱je̱n tsíge̱ꞌ ñajúún tsí Ana̱ꞌlóꞌ nixníꞌ, tsúún ñaju̱nꞌ yumbiáaꞌ.

6 A̱ꞌkhue̱n rí ni̱xu̱ꞌma-mi̱jna̱ yumbáá gajmíí i̱ji̱ín, jamí ni̱sma̱ti̱gúu̱n. 7 A̱ꞌkhue̱n nixuꞌma-mina̱ꞌ Léa̱ gajmíí i̱ji̱i̱n, ikhaa máꞌ nini̱i̱ rí ni̱sma̱ti̱gúu̱n. Nda̱wa̱á a̱ꞌkhue̱n nixuꞌma-mina̱ꞌ José ga̱jma̱á Rakél, jamí ni̱sma̱ti̱gúu̱n máꞌ mangii̱n. 8 A̱ꞌkhue̱n niraxe̱ Esaú:

―Náá rí ithaꞌgí-mina̱ꞌ ga̱jma̱á nindxu̱u̱ mbá xúgíí kuthúún xu̱kú tsí niꞌkha ra̱xkamii róꞌ.

Xómáꞌ Jakób niriꞌña̱a̱:

―Rí máján a̱kia̱a̱nꞌ gátha̱yo̱ꞌ, i̱ꞌgí-mina̱ꞌ, táta̱.

9 A̱ꞌkhue̱n niꞌthán Esaú:

―Mbájndi máꞌ rí gúꞌdo̱ꞌ jún, dxíyo̱ꞌ. A̱ꞌne máꞌ dríga̱a̱ꞌ ikháán rí xtaꞌdáá.

10 A̱ꞌkhue̱n niriꞌña̱a̱ Jakób:

―Na̱nguáa̱, ikhúúnꞌ na̱tha̱n-jáñaaꞌ. Xí xúge̱ꞌ máján a̱kia̱a̱nꞌ na̱xkamáálo̱ꞌ rá, a̱tri̱gúꞌ tsi̱gi̱jiu̱nꞌ. Rí na̱ya̱xu̱u̱ inaaꞌ, mbá xóo rí na̱ya̱xu̱u̱ inuu Ana̱ꞌlóꞌ jaꞌnii, numuu rí phú máján a̱kia̱a̱nꞌ na̱tri̱gúún. 11 Na̱tha̱n-jáñaaꞌlo̱ꞌ, táta̱, rí ma̱tri̱gúꞌ tsi̱gi̱jiu̱nꞌ rí ja̱ya̱ iꞌkhalo̱ꞌ. Numuu rí Ana̱ꞌlóꞌ nixníꞌ guéño máꞌ, jamí mbá xúgíí rí ríga̱ ge̱jioꞌ drígo̱ꞌ máꞌ ñajuun ne̱.

I̱ndo̱ó numuu rí Jakób ra̱ꞌkhá-tháán niꞌthán-jáñuu̱, a̱ꞌkhue̱n rí Esaú ni̱grui̱gú. 12 A̱ꞌkhue̱n niꞌthán Esaú:

―U̱ꞌgua̱lóꞌ rámá, jamí ikhúúnꞌ ma̱ꞌgá ginúú inaaꞌ.

13 Xómáꞌ Jakób niꞌthúu̱n:

―Táta̱, nathayáá máꞌ rí phú ruduun e̱je̱n, jamí gúꞌdiin mogo̱ jamí xede̱ tsí nene̱ xuajiin. Xí rí magóo̱ nacha̱ guéño, awúun rí mbá mbiꞌi ma̱ja̱ñúú mbá xúgíin xu̱kú. 14 A̱nújngaaꞌ me̱dxo̱ꞌ giníí, táta̱, inuu yumbiáaꞌ. Jamí ikhúúnꞌ ma̱ꞌgá mañuu awuun nakhúún xu̱kú, xúꞌkhue̱n máꞌ awuun nakhúún e̱je̱n, asndo gáguáꞌnúxo̱ꞌ rí mu̱xkama-mi̱jnalóꞌ ná Seír.

15 A̱ꞌkhue̱n Esaú niꞌthán:

―Ma̱ni̱ꞌñúú ga̱jma̱á nindxa̱a̱ꞌ mbá tikhuun xa̱bo̱ tsí niꞌkha gajmíꞌ, xúꞌkhue̱n róꞌ.

Xómáꞌ Jakób niriꞌña̱a̱:

―Ma̱xára̱xtaa máꞌ gaꞌkho̱. Athane̱ mba̱a̱ a̱kia̱a̱nꞌ xtayo̱ꞌ, táta̱.

16 Mbiꞌi máꞌ rúꞌkhue̱n nitanga̱a̱ ni̱ka̱a̱ Esaú ná Seír. 17 Xómáꞌ Jakób ja rá, ni̱ka̱ ná Sukót, jamí ikhín máꞌ niꞌnii̱ guꞌwá ná ma̱xtáa̱. Xúꞌkhue̱n máꞌ niꞌnii̱ guꞌwá xtúgúún xu̱kuíi̱, ikhaa jngó mbaa rúꞌkhue̱n nixnúu̱ mbiꞌyuu Sukót.*

18 Ído̱ rí ni̱ꞌkha̱a̱ Jakób ná Padán-arám, nda̱a̱ máꞌ rí nigíꞌnuu̱, rí ni̱ga̱núu̱ mújúu̱n ná xuajen Sikém, rí ꞌgí ná mbaa Kanaán. Jamí ikhín máꞌ nixtáa̱ ná jri̱doo xuajen rúꞌkhue̱n. 19 A̱ꞌkhue̱n rí niꞌtsi̱i̱ mbá mbaa rí jámaa mbá witsu skíñú (100) mbúkha̱a̱ ajua̱nꞌ. Niꞌtsi̱i̱ ne̱ ná ñawúún i̱ji̱i̱n Amór tsí anu̱u̱ Sikém, jamí ikhín máꞌ niꞌgíi̱ guꞌwá xtíñuu̱. 20 Jamí ikhín ni̱rngu̱xi̱i̱ itsí ná ma̱ꞌne-mba̱a̱ Ana̱ꞌlóꞌ, xúꞌkhue̱n máꞌ nixnúu̱ mbiꞌyuu ne̱ Él-Elóe̱-Israél.*