XÓ NI̱GI̱ꞋDU̱U̱N-MUU 42

Nagóó a̱ngui̱i̱n José ná Ejípto̱

1 Xómáꞌ Jakób nidxawuun rí ná Ejípto̱ ríga̱ ganitsu, a̱ꞌkhue̱n iꞌthúu̱n i̱ji̱i̱n: «Náá rí e̱ne̱laꞌ rí i̱ndo̱ó nu̱ya̱xe̱-míjnálaꞌ kuajúnlaꞌ róꞌ. 2 Ni̱dxawuunlo̱ꞌ rí ná Ejípto̱ ríga̱ ganitsu. Aꞌgualaꞌ ñúꞌún, jamí a̱go̱tse̱laꞌ ikhín rí ma̱goo ma̱juwalóꞌ ga̱jma̱á, jngó ma̱xájáñalóꞌ».

3 A̱ꞌkhue̱n rí nigóó mbá gu̱wi̱inꞌ dxíyo̱o̱ José ná Ejípto̱ gágótse̱ ixí iña. 4 Xómáꞌ Jakób táxuꞌmaa̱ Benjamín, mbo̱ ge̱ꞌthe̱e̱ máꞌ José, ma̱ꞌga gajmíí a̱ngui̱i̱n, numuu rí niꞌthée̱n: «Ra̱ꞌkhá ma̱gíꞌnuu̱ mbá gamíjun».

5 Xkuaꞌnii nigóó i̱ji̱i̱n Israél gágótse̱ gajmíí máꞌ iꞌwíin xa̱bo̱, numuu rí mbá xúgíí ná mbaa Kanaán ri̱ga̱ ewe. 6 Jamí José ñajuun tsí naꞌthán-ñájuun numbaa rúꞌkhue̱n, jamí ikhaa̱ máꞌ na̱ngu̱júu̱n ganitsu mbá xúgíin xa̱bo̱ xuajen. A̱ꞌkhue̱n niguáꞌnú dxíyo̱o̱ José, jamí xúꞌkhue̱n máꞌ ni̱sma̱ti̱gúu̱n inuu, asndo mbayíí niꞌgíi̱ inúu̱. 7 Ído̱ José ndiꞌñúú a̱ngui̱i̱n, núkho̱ máꞌ neꞌne-nuwuu̱nꞌ-la. Xómáꞌ ikhaa̱ naꞌnii̱ rí tséꞌne-nuwuu̱nꞌ jamí mbá mikoo iꞌthúu̱n:

—Náá iguwalaꞌ jánlaꞌ róꞌ.

A̱ꞌkhue̱n ikhii̱n niriꞌña̱a̱:

—Ná mbaa Kanaán igúwa̱ꞌxo̱ꞌ rí mo̱tse̱xo̱ꞌ tháan ganitsu.

8 Maske máꞌ José neꞌne-nuwuu̱nꞌ dxíyo̱o̱, xómáꞌ ikhii̱n túne̱-nuwi̱i̱nꞌ. 9 A̱ꞌkhue̱n rí ni̱rmáꞌáa̱n a̱kui̱i̱n José rí nigunda-jmíi̱ a̱ngui̱i̱n, jamí niꞌthúu̱n:

—Xa̱bo̱ tsí nu̱ña̱ma ngu̱ꞌwa̱ ñajuanlaꞌ jánlaꞌ. Naguwalaꞌ gágúya̱álaꞌ xóo kri̱ga̱ numbaa ríge̱ꞌ.

10 A̱ꞌkhue̱n ikhii̱n niriꞌña̱a̱:

—Ra̱ꞌkhá, táta̱. I̱ndo̱ó máꞌ ganitsu iguwá yumbiáaꞌ gágótse̱. 11 Mbá xúgiáa̱nꞌ-máxo̱ꞌ mbáwíi ana̱ꞌxo̱ꞌ. Xúꞌkhue̱n máꞌ xa̱bo̱ gamakuun ñajuanxo̱ꞌ. Nimbá miꞌtsún tánindxu̱ún yumbiáaꞌ xa̱bo̱ tsí nu̱ña̱ma ngu̱ꞌwa̱.

12 Xómáꞌ José niꞌthúu̱n:

—Ra̱gákon rúꞌkhue̱n, naguwalaꞌ gágúya̱álaꞌ xóo phú kri̱ga̱ numbaa ríge̱ꞌ.

13 A̱ꞌkhue̱n ikhii̱n niriꞌña̱a̱:

—Yumbiáaꞌ ñajuanxo̱ꞌ mbá gu̱wa̱ꞌ i̱jmáa̱ꞌxo̱ꞌ, i̱ji̱i̱n mbáwíi xa̱bo̱ nikhi̱i̱ tsí xtáa ná mbaa Kanaán. Tsí lájuíin xtáa ga̱jma̱á ana̱ꞌxo̱ꞌ xúge̱ꞌ, jamí tsí i̱mba̱a̱ tsíkujma̱a̱.

14 A̱ꞌkhue̱n José niꞌthúu̱n:

—Xómáꞌ rí na̱tha̱nꞌlaꞌ, gakon rí xa̱bo̱ tsí nu̱ña̱ma ngu̱ꞌwa̱ ñajuanlaꞌ. 15 Ge̱e̱ gákujmaa xí phú gakon rí nu̱tha̱nlaꞌ: Ndaꞌyoo máꞌ Faraón rí ma̱xágájna̱a̱ꞌlaꞌ ge̱jioꞌ asndo gáꞌkha̱ dxíya̱ꞌlaꞌ tsí lájuíin. 16 A̱gu̱xu̱ꞌmáa mbáa dxájualaꞌ jamí ga̱ꞌkha̱ jayáa̱ ge̱ꞌthia̱ꞌlaꞌ, xómáꞌ ikháa̱nꞌlaꞌ a̱wanálaꞌ ná guéjua̱nꞌ. A̱ꞌkhue̱n mbu̱ꞌyáálóꞌ xí phú nu̱tha̱nlaꞌ rí gakon. Jamí xí na̱nguá, ndaꞌyoo máꞌ Faraón rí ikháa̱nꞌlaꞌ ñajuanlaꞌ xa̱bo̱ tsí nu̱ña̱ma ngu̱ꞌwa̱.

17 A̱ꞌkhue̱n rí José nixúdii̱n mbá xúgíi̱n ná guéjua̱nꞌ mbá atsú mbiꞌi. 18 Ído̱ neꞌne atsú mbiꞌi José niꞌthúu̱n:

—Ikhúúnꞌ nda̱ya̱-makuu Ana̱ꞌlóꞌ. A̱go̱ne̱laꞌ ríge̱ꞌ, ikhaa jngó mbu̱ya̱a̱ mbiꞌyalaꞌ. 19 Xí gakon rí xa̱bo̱ gamakuun ñajuanlaꞌ, a̱wanúu mbáa dxájualaꞌ ná guéjua̱nꞌ, jamí aꞌgua̱a̱ꞌlaꞌ tikhuáa̱nꞌlaꞌ ju̱dalaꞌ ganitsu rí mo̱pho̱ a̱ngia̱nꞌlaꞌ ná guꞌwáá. 20 I̱ndo̱ó a̱guwa̱a̱ꞌlaꞌ ju̱ya̱a̱ dxíya̱ꞌlaꞌ tsí lájuíin. A̱ꞌkhue̱n rí ma̱kujmaa rí gakon rí nu̱tha̱nlaꞌ, ikhaa jngó ma̱xájáñalaꞌ.

A̱ꞌkhue̱n ndiyáa̱ rí nda̱a̱ i̱mba̱ rí muni̱i̱. 21 Ikhaa jngó nithan-mi̱jne̱e̱: «Rí phú gakon rí ni̱xu̱ꞌdá-míjnálóꞌ aꞌkhán ga̱jma̱á numuu ge̱ꞌtia̱ꞌlóꞌ. Ído̱ ndiꞌyáálóꞌ rí namínu̱u̱ꞌ xúꞌkhue̱n máꞌ rí naꞌthán-jáñalóꞌ, xómáꞌ ikháánlóꞌ túdxawíi̱nlóꞌ. Ikhaa jngó namíni̱ilóꞌ ikháánlóꞌ xúge̱ꞌ ge̱e̱ rá».

22 A̱ꞌkhue̱n niꞌthán Rubén: «Á tátha̱nꞌlaꞌ ikhúúnꞌ rá: "Ma̱xáxu̱ꞌdá-míjnálaꞌ aꞌkhán ga̱jma̱á numuu dxáma", rá dxe̱ꞌ. Xómáꞌ ikháa̱nꞌlaꞌ túdxawuu̱nꞌlaꞌ. Ikhaa jngó xúge̱ꞌ noꞌne̱-numa̱a̱ꞌlóꞌ iꞌdiuu̱ rá».

23 Xómáꞌ ikhii̱n tsíyáa̱ xí nadxawuun José rí nothee̱n, numuu rí xtáa mbáa tsí naꞌthán-wíi̱ ajngúu̱n. 24 A̱ꞌkhue̱n rí José niríya̱ꞌ-mina̱ꞌ janíí, jamí ni̱mbi̱ye̱e̱ꞌ. Nda̱wa̱á a̱ꞌkhue̱n ni̱ꞌkha̱a̱, nindxákuu̱n gajmíi̱. A̱ꞌkhue̱n rí wartuwiin Simeón inúu̱ máꞌ ikhii̱n, jamí nixtoꞌwóo̱.

25 Nda̱wa̱á a̱ꞌkhue̱n nixná-ñájun José rí ma̱ti ixí iña ná xkudiúu̱n, xúꞌkhue̱n máꞌ mi̱rtanga̱a̱ la mbúkho̱o̱ mbámbáa, ma̱gi̱wa̱a̱ꞌ ne̱ ná xkudiúu̱n. Jamí niꞌthée̱n rí ma̱janúú rí mo̱pho̱ ná jamba̱á. Xkuaꞌnii máꞌ nene̱-mbáníi̱. 26 Xómáꞌ ikhii̱n niyaꞌdúu̱n ganitsu xtá-ngidi, jamí nigájnáa̱ nigúu̱n.

27 Jamí ído̱ niguáꞌníi̱ ná rí mbuya̱a̱ xúu̱nꞌ, a̱ꞌkhue̱n nirmáꞌthoo mbáa rawuun xkudiuu rí maxnúu̱ rí me̱kho̱ xtá-ngidiuu̱. A̱ꞌkhue̱n ndiꞌyoo̱ rí ná awúun xkudiuu̱ kua̱ꞌa̱n mbúkho̱o̱. 28 A̱ꞌkhue̱n iꞌthúu̱n a̱ngui̱i̱n: «Ji-lá mbúkho̱ꞌ wartanga̱a̱ jún. Á ra̱ꞌkhá ne̱ kua̱ꞌa̱n ge̱e̱ ná rawuun xkudio̱ꞌ».

A̱ꞌkhue̱n ni̱ka̱ a̱kuíi̱n, nimíñúu̱ jamí nithan-mi̱jne̱e̱: «Náá-lá rí ñajuun ríge̱ꞌ rí naꞌñalóꞌ Ana̱ꞌlóꞌ rá».

29 Ído̱ niguáꞌnúu̱ inuu anúu̱ ná mbaa Kanaán, a̱ꞌkhue̱n nitháa̱n mbá xúgíí xóo rí nigíꞌníi̱: 30 «Ikhaa xa̱biya̱ tsúꞌkhue̱n, tsí naꞌthán-ñájuun mbaa rúꞌkhue̱n, niꞌthánxo̱ꞌ mbá mikoo, xúꞌkhue̱n máꞌ niꞌñaxo̱ꞌ asndo xóo xa̱bo̱ tsí nu̱ya̱ma ngu̱ꞌwa̱á xuajen jaꞌñáa̱ꞌxo̱ꞌ. 31 Xómáꞌ ikháa̱nꞌxo̱ꞌ ni̱tháa̱nxo̱ꞌ: "Xa̱bo̱ gamakuun ñajuanxo̱ꞌ, nimbá miꞌtsún tánindxa̱ꞌxo̱ꞌ xa̱bo̱ tsí nu̱ya̱ma ngu̱ꞌwa̱. 32 Mbá gu̱wa̱ꞌ i̱jmi̱i̱ dxíya̱ꞌxo̱ꞌ rí mbáwíi máꞌ ana̱ꞌxo̱ꞌ. Mbáa tsí tsíkujma̱a̱, jamí tsí lájuíin xtáa xúge̱ꞌ ga̱jma̱á ana̱ꞌxo̱ꞌ ná mbaa Kanaán".

33 »A̱ꞌkhue̱n rí xa̱biya̱ tsúꞌkhue̱n, tsí naꞌthán-ñájuun máꞌ mbaa rúꞌkhue̱n, niꞌthánxo̱ꞌ: "Ga̱jma̱á ríge̱ꞌ mba̱yo̱o̱ xí phú gakon rí xa̱bo̱ gamakuun ñajuanlaꞌ. Gu̱ni̱ꞌñáálaꞌ mbáa dxíya̱ꞌlaꞌ ga̱jma̱á nindxu̱ꞌ, jamí aꞌgua̱a̱ꞌlaꞌ guꞌwálaꞌ ju̱da rí mo̱pho̱ a̱ngia̱nꞌlaꞌ. 34 Xúꞌkhue̱n máꞌ a̱guwa̱a̱ꞌlaꞌ ju̱ya̱a̱ ge̱ꞌthia̱ꞌlaꞌ, ikhaa jngó mba̱yo̱o̱ rí ra̱ñájuanlaꞌ xa̱bo̱ tsí nu̱ya̱ma ngu̱ꞌwa̱, jngó mba̱yo̱o̱ máꞌ rí xa̱bo̱ gamakuun ñajuanlaꞌ. A̱ꞌkhue̱n rí ma̱xna̱xíi̱lo̱ꞌ dxíya̱ꞌlaꞌ, xúꞌkhue̱n máꞌ ma̱goo ma̱ngriga̱ꞌlaꞌ ná numbaa ríge̱ꞌ"».

35 Ído̱ rí ni̱rti̱jngaa̱ xkudiúu̱n, a̱ꞌkhue̱n nikujma̱a̱ mbúkhúu̱n katúxna̱a̱ ná xkudiuu máꞌ mbámbáa. Ído̱ rí ikhii̱n gajmíi̱ anúu̱ ndiyáa̱ mbúkhúu̱n, a̱ꞌkhue̱n phú nimíñúu̱. 36 A̱ꞌkhue̱n rí waꞌthúu̱n neꞌne Jakób:

—Ikháa̱nꞌlaꞌ no̱ne̱ gámbia̱ꞌlaꞌ i̱ji̱nꞌ. Tsíkujma̱a̱ José, ni máꞌ Simeón, jamí mu̱ꞌgua ju̱ya̱a̱ꞌlaꞌ Benjamín mangaa. Jamí ikhúúnꞌ na̱gruígúlo̱ꞌ xúgíí gaꞌkho̱ rúꞌkhue̱n.

37 A̱ꞌkhue̱n Rubén niꞌthúun anu̱u̱:

—Ataxnáxi̱i̱ ja ge̱ꞌthe̱ꞌ ná ñawúnꞌ ikhúúnꞌlo̱ꞌ, jamí ikhúúnꞌ máꞌ gáꞌkha̱a̱ꞌ ja̱ya̱a̱lo̱ꞌ inaaꞌ. I̱ndo̱ó-lá xí tsíꞌkha̱a̱ꞌ ja̱ya̱a̱lo̱ꞌ inaaꞌ, a̱ꞌkhue̱n ma̱goo ma̱radíin ná-a̱jmi̱i̱ máꞌ i̱ji̱nꞌ.

38 A̱ꞌkhue̱n Jakób niꞌthán:

—Ma̱xáꞌga a̱ꞌdéꞌ ga̱jma̱á nindxa̱ꞌlaꞌ, numuu rí nijáñuu máꞌ dxíyo̱o̱, jamí i̱mba̱wíi̱ ikhaa̱ iwanúu. Gáꞌne xí magíꞌnuu̱ mbá gamíjun ná jamba̱á ná nakualaꞌ, a̱ꞌkhue̱n rí mo̱ne̱laꞌ rí xi̱ꞌñú tsíge̱ꞌ ma̱ꞌgaa̱ ná iñá wa̱jíín ga̱jma̱á gaꞌkho̱.