1 Ana̱ꞌlóꞌ Mikhuíí neꞌne tsakun-rámaa Sára̱, xómáꞌ rí niꞌthée̱n, jamí niꞌñuu̱ rí nixuda-mine̱e̱ꞌ. 2 Ikhaa jngó mbiꞌi rí niꞌthán Ana̱ꞌlóꞌ, nigo̱-éda Sára̱ jamí neꞌne ku̱maa̱ mbáa a̱dée Abraám, rí xi̱ꞌñú máꞌ ñajuun. 3 Xómáꞌ Abraám nixnúu̱ mbiꞌyuu ada̱ tsí niꞌnii̱ ga̱jmáa̱ Sára̱. Isaák neꞌne mbiꞌyuu̱. 4 A̱ꞌkhue̱n rí Abraám nixnúu̱ tsina-jndi a̱dée̱, ído̱ ni̱ga̱nú migiñuu mbiꞌi rí ni̱gu̱maa, xómá rí waꞌxná-ñájuíi̱n neꞌne Ana̱ꞌlóꞌ. 5 Xómáꞌ Abraám gíꞌdoo witsu skíñú (100) tsiguu ído̱ ni̱gu̱maa Isaák.

6 A̱ꞌkhue̱n rí Sára̱ niꞌthán: «Ana̱ꞌlóꞌ neꞌne rí ma̱ndu̱ꞌwa̱, jamí asndo tsáa tsí gáꞌdxuun ríge̱ꞌ manduꞌwá ga̱jma̱á nindxu̱ꞌ». 7 Niꞌthée̱n xóó: «Nguáná-lá ni̱ju̱mu̱u̱ Abraám rí a̱ꞌgui̱i̱ maxníxúún e̱je̱n rá. Maske máꞌ xúꞌkhue̱n, ne̱ne̱-ku̱maa mbáa a̱dée̱ rí xi̱ꞌñú máꞌ ñajuu̱n».

8 A̱ꞌkhue̱n rí ni̱ka̱-ragaja̱a̱ ada̱, xúꞌkhue̱n máꞌ niniñuu̱ yaꞌdú. Xómáꞌ Abraám phú mba̱a̱ ndxa̱a̱ niꞌnii̱ mbiꞌi rí niniñuu yaꞌdú Isaák. 9 A̱ꞌkhue̱n ndiꞌyoo Sára̱ rí a̱dée Agár mbo̱ Ejípto̱, ada̱ tsí neꞌne ku̱maa̱ ga̱jmáa̱ Abraám, tsúꞌkhue̱n naꞌne tsi̱ndíi Isaák. 10 Ikhaa jngó niꞌthúu̱n Abraám: «Araxkáá a̱ꞌgo̱ yumbáá tsúꞌkhue̱n ga̱jma̱á a̱dée, numuu rí a̱dée̱ ma̱xáre̱doo̱ ga̱jmáa̱ a̱ꞌdéꞌ Isaák».

11 Ído̱ niꞌdxuun ajngáa ríge̱ꞌ Abraám, maphú nidaa a̱kui̱i̱n numuu rí a̱dée̱ ñajuun. 12 A̱ꞌkhue̱n rí Ana̱ꞌlóꞌ niꞌthúun Abraám: «Ma̱xáꞌdaa máꞌ a̱kia̱a̱nꞌ ga̱jma̱á numuu dxáma ni máꞌ numuu yumbiáaꞌ. Mbá xúgíí rí naꞌtháanꞌ Sára̱, atadxawíín rí naꞌthée̱n. Numuu rí ga̱jma̱á majiu̱u̱nꞌ máꞌ Isaák ma̱guwá xa̱bo̱ ri̱jia̱a̱ꞌ. 13 Xúꞌkhue̱n máꞌ a̱dée yumbáá, ma̱ne̱ mbá xuajen mba̱a̱ ga̱jma̱á nindxu̱u̱, numuu rí a̱ꞌdeáaꞌ ñajuu̱n».

14 A̱ꞌkhue̱n rí phú miꞌcha̱ ni̱tu̱xi̱i̱ Abraám, jamí nigui̱i̱ guma, ga̱jma̱á mbá xtá-lámbá ná gajno̱ꞌ iya. Nixnúu̱ ne̱ Agár, xúꞌkhue̱n máꞌ niríguii̱ ne̱ ná xpaphuu̱. Mangaa nixnáxi̱i̱ dxáma, a̱ꞌkhue̱n rí niꞌthán-ngawoo̱. Xómáꞌ ikhaa̱ nigájnuu̱ ni̱ke̱e̱ jamí ni̱ka̱-rangroꞌoo̱ ná mbaa niníí Beerséba̱. 15 Ído̱ rí wámba̱ iya ná xtá-lámbá, ni̱ka̱ gáti̱ga̱a̱ dxáma ná agoo mbá xtaꞌdu̱u̱ iná. 16 Xómáꞌ ikhaa̱ ni̱ke̱e̱ gági̱ꞌi̱i̱, mbá xóo ꞌmba̱ꞌ rí na̱ka̱ xkuíyu̱u̱ xkamídá ñawún. Numuu rí niꞌthán-mine̱e̱ꞌ: «Tsíyo̱ꞌ gáyu̱u̱ ído̱ ma̱ja̱ñúu dxáma». Ído̱ rí ikhaa̱ ni̱ka̱ gági̱ꞌi̱i̱, xómáꞌ dxáma nigíꞌdu̱u̱n ni̱mbi̱ya̱ꞌ.

17 Ído̱ nidxawuun Ana̱ꞌlóꞌ aꞌwóo dxáma, a̱ꞌkhue̱n rí ánje̱l drígo̱o̱ Ana̱ꞌlóꞌ nindxaꞌwóo̱ Agár asndo ná mikhuíí, jamí niꞌthúu̱n: «Náá rí itagíꞌníí rá, Agár. Ma̱xámíñaaꞌ, numuu rí Ana̱ꞌlóꞌ nidxawuun aꞌwóo dxáma ná kri̱ga̱a̱ a̱ꞌkhue̱n. 18 Ayu jamí ataxúxi̱i̱ dxáma, xúꞌkhue̱n máꞌ atartuwii̱n ga̱jma̱á ñawáanꞌ, numuu rí ikhúúnꞌ ma̱ne̱ mbá xuajen maphú mba̱a̱ ga̱jma̱á nindxu̱u̱». 19 A̱ꞌkhue̱n rí Ana̱ꞌlóꞌ nirmáꞌthoo iduu Agár, jamí ndiꞌyoo̱ mbá iduu iya. A̱ꞌkhue̱n ni̱ke̱e̱ gáxíña̱a̱ꞌ iya awúun xtá-lámbá, xúꞌkhue̱n máꞌ nixnúu̱ iya dxáma niꞌña̱a̱. 20 Ana̱ꞌlóꞌ nixtáa ga̱jma̱á nindxu̱u̱ dxáma, xúꞌkhue̱n máꞌ ni̱ka̱-ragaja̱a̱. Jamí nixtáa̱ ná mbaa niníí, xúꞌkhue̱n máꞌ ni̱ma̱ñuu̱ nadee̱ ga̱jma̱á xkamídá. 21 Nixtáa̱ ná mbaa niníí rí mbiꞌyuu Parán, xómáꞌ náníi̱ ndiyáa mbáa a̱ꞌgo̱ mbo̱ Ejípto̱ rí mbayáa̱.

22 Ni̱ga̱nú mbá mbiꞌi rí ni̱ka̱ Abimelék gáꞌthúun Abraám, ni̱ka̱ ga̱jmáa̱ Fikól tsí jayá ikhúún xa̱bo̱ ajua̱nꞌ. Xáꞌnii niꞌthúu̱n:

―Ana̱ꞌlóꞌ xtáa ga̱jma̱á nindxa̱a̱ꞌ awúun mbá xúgíí rí nathane̱. 23 Ikhaa jngó xúge̱ꞌ rá, ataxúda-mina̱ꞌ inu̱ꞌ jamí inuu máꞌ Ana̱ꞌlóꞌ ge̱jioꞌ, rí ma̱xátha̱ñu̱ꞌ rí ra̱máján, ni máꞌ i̱ji̱nꞌ, ni máꞌ i̱jín-xíñi̱ꞌ. Mbá xóo gamaku rí ni̱gúꞌdo̱ꞌ ga̱jma̱á nindxa̱a̱ꞌ, xkuaꞌnii máꞌ gátha̱ne̱ ga̱jma̱á nindxu̱ꞌ mangáán, xúꞌkhue̱n máꞌ ga̱jma̱á mbaa ná rí nangraꞌaaꞌ.

24 A̱ꞌkhue̱n niriꞌña̱a̱ Abraám:

―Ikhúúnꞌ na̱xu̱ꞌdá-mina̱ꞌlo̱ꞌ.

25 I̱ndo̱ó numuu rí Abraám neꞌne xkujnduu Abimelék ga̱jma̱á mbá iduu iya, numuu rí xa̱bi̱i̱ máꞌ Abimelék ni̱ri̱gú-jáꞌyíi̱ ne̱. 26 A̱ꞌkhue̱n niriꞌña̱a̱ Abimelék:

―Tsíyo̱lo̱ꞌ tsáa ñajuun neꞌne rúꞌkhue̱n, ni máꞌ ikháán táta̱gíꞌda̱ꞌ idxu̱ꞌ, ni máꞌ ikhúúnꞌ tádxawuun asndo xúge̱ꞌ.

27 Xómáꞌ Abraám ni̱ꞌkha̱ jagu̱u̱n mogo̱ gajmíí xede̱, jamí nixnúu̱ Abimelék. A̱ꞌkhue̱n rí niguaꞌdáa̱ awan ná-a̱jmi̱i̱. 28 A̱ꞌkhue̱n rí Abraám niskuíji̱i̱n janíí mbá juiin mogo̱-iꞌgú ná inúú máꞌ tsí gíꞌdii̱n. 29 Xómáꞌ Abimelék niraxu̱u̱ Abraám:

―Náá rí iyoo gáꞌthán rí nitaskuíji̱i̱n janíí mbá juiin mogo̱-iꞌgú róꞌ.

30 A̱ꞌkhue̱n rí ikhaa̱ niriꞌña̱a̱:

―Tsí mbá juiin mogo̱ tsíge̱ꞌ ma̱tri̱gúun ná ñawúnꞌ, numuu rí rúꞌkhue̱n maꞌthán rí jmbu ikhúúnꞌ ni̱ndi iduu iya ríge̱ꞌ.

31 Ikhaa jngó nixnúu̱ mbiꞌyuu mbaa rúꞌkhue̱n Beerséba̱, numuu rí ikhín ni̱xu̱da̱ꞌ-mi̱jne̱e̱ awan ná-a̱jmi̱i̱. 32 Xkuaꞌnii niꞌkhu̱u̱ rí niguaꞌdáa̱ awan ná Beerséba̱. A̱ꞌkhue̱n rí ni̱tu̱xu̱u̱ Abimelék ga̱jma̱á Fikól, tsí jayá ikhúún xa̱bo̱ ajua̱nꞌ, nitangi̱i̱n ná mbañúú xa̱bo̱ filistéo̱. 33 A̱ꞌkhue̱n rí Abraám niꞌdu mbá ixu̱u̱ tamarísko̱ ná Beerséba̱, jamí ikhín nixrégo̱o̱ mbiꞌyuu Ana̱ꞌlóꞌ Mikhuíí tsí xtáa jámuu mbiꞌi. 34 Jamí phú mba̱yo̱ꞌ nixtáa̱ ná mbañúú xa̱bo̱ filistéo̱.