XÓ NI̱GI̱ꞋDU̱U̱N-MUU 43

Natangi̱i̱n a̱ngui̱i̱n José ná Ejípto̱ gajmíí Benjamín

1 Phú i̱tha̱n gakhe̱ eꞌne ewe ná numbaa rúꞌkhue̱n. 2 Ído̱ ni̱ga̱nú mbiꞌi rí wámbúu̱n ixí iña rí nigóo̱ gúdee̱ ná Ejípto̱, a̱ꞌkhue̱n rí niꞌthán anúu̱:

—Ga̱tangáa̱nꞌlaꞌ, ma̱gótse̱laꞌ i̱mba̱á chímbaꞌa ganitsu rí mo̱ꞌpholóꞌ.

3 A̱ꞌkhue̱n Judá niriꞌña̱a̱:

—Ikhaa xa̱biya̱ tsúꞌkhue̱n khaꞌu niꞌthánxo̱ꞌ: "Ma̱xúyu̱ꞌlaꞌ xí tsíguwa̱a̱ꞌlaꞌ ju̱ya̱a̱ ge̱ꞌthia̱ꞌlaꞌ". 4 Xí ma̱ta̱xu̱ꞌmáa ge̱ꞌthia̱ꞌxo̱ꞌ ma̱ꞌga ga̱jma̱á nindxa̱ꞌxo̱ꞌ, mu̱ꞌguáxo̱ꞌ gútse̱xo̱ꞌ ganitsu xúꞌkhue̱n rá. 5 I̱ndo̱ó-lá xí tsítatsíñáá rí ma̱ꞌgee̱, ma̱xúꞌguá-máxo̱ꞌ. Numuu rí ikhaa xa̱biya̱ tsúꞌkhue̱n niꞌthánxo̱ꞌ: "Ma̱xúyu̱ꞌlaꞌ xí tsíguwa̱a̱ꞌlaꞌ ju̱ya̱a̱ ge̱ꞌthia̱ꞌlaꞌ".

6 A̱ꞌkhue̱n niꞌthán Israél:

—Náá rí jngó ra̱ꞌkhá-tháán nu̱ñu̱ꞌlaꞌ rí ra̱máján róꞌ, rí ni̱tháánlaꞌ xa̱biya̱ tsúꞌkhue̱n rí kuaꞌdaalaꞌ i̱mba̱a̱ ge̱ꞌthia̱ꞌlaꞌ róꞌ.

7 Xómáꞌ ikhii̱n ni̱ri̱ꞌñaa̱:

—Ikhaa xa̱biya̱ tsúꞌkhue̱n niraxa̱ꞌxo̱ꞌ makoo xóo júwa̱ꞌxo̱ꞌ xúꞌkhue̱n máꞌ numúú a̱ngia̱nꞌxo̱ꞌ: "Á xtáa xóó ana̱ꞌlaꞌ rá. Á xtáa i̱mba̱a̱ ge̱ꞌthia̱ꞌlaꞌ rá dxe̱ꞌ". A̱ꞌkhue̱n ni̱tháa̱nxo̱ꞌ xómá rí niraxa̱ꞌxo̱ꞌ. Xáne-lá gúya̱áxo̱ꞌ rí maꞌthánxo̱ꞌ: "A̱guwalaꞌ ju̱ya̱a̱ ge̱ꞌthia̱ꞌlaꞌ," rá.

8 A̱ꞌkhue̱n rí Judá niꞌthúun anu̱u̱:

—Ataxuꞌmaa dxáma ma̱ꞌga ga̱jma̱á nindxu̱ꞌ, a̱ꞌkhue̱n rí mu̱ꞌguá-máxo̱ꞌ, jngó ma̱goo ma̱juwalóꞌ rí ma̱xájáñalóꞌ, ikháa̱nꞌxo̱ꞌ, ni ikháán, ni máꞌ i̱jia̱nꞌxo̱ꞌ. 9 Ikhúúnꞌ gári̱ꞌñuu ga̱jma̱á numuu dxáma, jamí ikhúúnꞌ máꞌ gáta̱nda̱ꞌa̱a̱ náá rí nigíꞌnuu̱. Xí ikhúúnꞌ tsíꞌkha̱ ja̱ya̱a̱ rí ma̱xna̱xíi̱ inaaꞌ, ikhúúnꞌ gúꞌdo̱ꞌ aꞌkhán inaaꞌ mbá jámuu mbiꞌi xúꞌkhue̱n rá. 10 Xí numuu rí tágajiáxo̱ꞌ rá, gakon máꞌ timbá riajma̱ nothon itangáa̱nꞌxo̱ꞌ.

11 A̱ꞌkhue̱n niriꞌña̱a̱ anúu̱:

—Nda̱a̱ rí ma̱ꞌne rámá. A̱go̱ne̱-málaꞌ xáꞌnii. A̱gu̱da ná awúun xkudialaꞌ rí i̱tha̱n máján rí najma̱a̱ ná mbaa ríge̱ꞌ, a̱gu̱dalaꞌ ne̱ asndo xóo mbá gamaku inuu xa̱biya̱ tsúꞌkhue̱n: mbá lájuíin wájia thana ndaa thawuun, mbá lájuíin yáá, mbá lájuíin iya rí ndaa thawuun, wájioo ixu̱u̱ mírra̱, xúꞌkhue̱n máꞌ tsída̱a̱n ga̱jma̱á alméndra̱. 12 Mangaa a̱gu̱ya̱a̱-málaꞌ rí a̱jma̱ kíxnuu mbúkha̱a̱, numuu rí ma̱ꞌgaa̱ rí wartanga̱a̱ ná awúun xkudialaꞌ. Gáꞌne xí ni̱ngra̱ꞌaa tsí neꞌne ne̱. 13 Aꞌgualaꞌ gajmiálaꞌ ge̱ꞌthia̱ꞌlaꞌ mangaa, jamí ga̱tangáa̱nꞌlaꞌ inuu xa̱bo̱ tsúꞌkhue̱n. 14 Jamí Ana̱ꞌlóꞌ tsí Gíꞌdoo Xúgíí Tsiakhe̱ gáꞌne rí xa̱bo̱ tsúꞌkhue̱n ma̱ñáwíin a̱kui̱i̱n jaꞌyalaꞌ jamí maniñuu̱ꞌ i̱mba̱a̱ dxíya̱ꞌlaꞌ, xúꞌkhue̱n máꞌ Benjamín. Xí ikhúúnꞌ jaꞌyoo rí ma̱ndáti̱gi̱i̱n i̱ji̱nꞌ, ga̱ꞌne máꞌ xúꞌkhue̱n.

15 A̱ꞌkhue̱n rí ikhii̱n nidee̱ gamaku, ga̱jma̱á máꞌ a̱jma̱ kíxnuu mbúkha̱a̱, xúꞌkhue̱n máꞌ juya̱a̱ Benjamín mangaa. A̱ꞌkhue̱n rí niguáxi̱i̱n nigóo̱ ná Ejípto̱, jamí ni̱xna̱xe̱-mi̱jne̱e̱ inuu José. 16 Ído̱ ndiꞌyoo José rí ni̱ꞌkha̱ Benjamín gajmíí a̱ngui̱i̱n, a̱ꞌkhue̱n niꞌthúu̱n xa̱bo̱ tsí na̱ru̱thuun ñajun ná goꞌóo̱: «Ayu xtiin tháan xa̱bekha tsíge̱ꞌ ná guꞌwáá, jamí ataxíya̱a̱ mbáa xede̱ xúꞌkhue̱n máꞌ athane̱ májáa̱nꞌ. Numuu rí xa̱bekha tsíge̱ꞌ ma̱kueꞌtsolo̱ꞌ wakho̱ꞌ gajmíꞌ». 17 Xómáꞌ yumbáá tsúꞌkhue̱n neꞌne-mbánuu mbá xóo waꞌtháán, ni̱ka̱ jagu̱u̱n xa̱bekha tsúꞌkhue̱n ná goꞌóo máꞌ José.

18 A̱ꞌkhue̱n rí ikhii̱n nimíñúu̱ ído̱ ni̱ka̱ jiꞌdii̱n ná goꞌóo José, xúꞌkhue̱n máꞌ nithee̱n: «Ga̱jma̱á numuu mbúkha̱a̱ rí wartanga̱a̱ ná awúun xkudialóꞌ nákhí rí ginii, ikhaa ñajuun rí na̱ꞌkha̱ jiꞌdáánlóꞌ ge̱jioꞌ rá. Ikhaa jngó ma̱goo mu̱rugua-raꞌáa̱nꞌlóꞌ jamí mu̱rtuwáa̱nꞌlóꞌ rí ma̱nindxa̱ꞌlóꞌ yumbáá, xúꞌkhue̱n máꞌ xtá-ngidialóꞌ». 19 A̱ꞌkhue̱n rí ni̱xu̱ꞌma-mi̱jne̱e̱ inuu xa̱bo̱ tsí na̱ru̱thuun ñajun ná goꞌóo José, jamí xáꞌnii nitháa̱n rí inuu máꞌ ma̱nújngúu̱n ná rawuun guꞌwáá:

20 —Athane̱ mba̱a̱ a̱kia̱a̱nꞌ, táta̱. Ikháa̱nꞌxo̱ꞌ phú gakon máꞌ rí ni̱gúwa̱ꞌ-máxo̱ꞌ wapha rí mo̱tse̱xo̱ꞌ ganitsu. 21 Ído̱ natangáa̱nꞌ-máxo̱ꞌ rá, niguáꞌnúxo̱ꞌ ná rí mbu̱ya̱a̱ xa̱ꞌxo̱ꞌ, ni̱rmáꞌthááxo̱ꞌ xkudiaxo̱ꞌ. A̱ꞌkhue̱n ndi̱ya̱áxo̱ꞌ rí kua̱ꞌa̱n mbúkho̱o̱ mbámbáa ná awúun xkudiuu, mbá xóo rí kíxnuu máꞌ ne̱. Ikhaa jngó ju̱ya̱xo̱ꞌ ne̱ igúwa̱a̱ꞌxo̱ꞌ xúge̱ꞌ. 22 Xúꞌkhue̱n máꞌ mangaa ju̱ya̱-máxo̱ꞌ mbúkha̱a̱ rí mo̱tse̱xo̱ꞌ xóó ganitsu. Jamí tsíya̱áxo̱ꞌ tsáa ñajuun tsí nirtanga̱a̱ mbúkha̱a̱ ná awúun xkudiaxo̱ꞌ.

23 Xómáꞌ ikhaa̱ niriꞌña̱a̱:

—Ma̱xáꞌthúun máꞌ a̱kia̱nꞌlaꞌ, ni máꞌ ma̱xámíñalaꞌ. Ana̱ꞌlaꞌ ikháa̱nꞌlaꞌ, tsí Anu̱u̱ máꞌ ana̱ꞌlaꞌ, nigíwa̱a̱nꞌ mbúkha̱a̱ ná awúun xkudialaꞌ. Jmínu̱ú máꞌ ni̱gruígú mbúkha̱ꞌlaꞌ rí ne̱ne̱-númáá.

A̱ꞌkhue̱n rí niríya̱a̱ꞌ Simeón jamí nixnáxi̱i̱ máꞌ ná inúu̱. 24 A̱ꞌkhue̱n rí ikhaa̱ niꞌthúu̱n rí ma̱nújngúu̱n ná goꞌóo José, jamí nixnúu̱ iya rí mujiáa̱n nakhúu̱n, xúꞌkhue̱n máꞌ nijanúú rí mo̱pho̱ xtá-ngidi mangiin. 25 Xómáꞌ ikhii̱n none̱-mbáníi̱ gamaku rí judee̱, awúun máꞌ rí ma̱ga̱núu̱ José wakha̱ꞌ, numuu rí nidxawíi̱n rí ikhín máꞌ gúpiꞌtsii̱.

26 Jamí ído̱ ni̱ga̱núu̱ José ná guꞌwáá, xómáꞌ ikhii̱n niguwá judúu̱n gamaku rí judee̱ jamí ni̱xna̱xi̱i̱ ne̱, xúꞌkhue̱n máꞌ ni̱sma̱ti̱gúu̱n ná inuu, rí niꞌgíi̱ inúu̱ asndo mbayíí. 27 A̱ꞌkhue̱n rí José niraxúu̱n xáne júwe̱e̱ꞌ, mangaa niraxi̱i̱:

—Ana̱ꞌlaꞌ tsí xi̱ꞌñú mbo̱ ni̱tha̱nlaꞌ numuu, á xtáa̱ mújúu̱n rá. Á xtáa̱ xóó rá.

28 Xómáꞌ ikhii̱n ni̱ri̱ꞌñaa̱:

—Xtáa mújúun máꞌ yumbiáaꞌ tsí ana̱ꞌxo̱ꞌ, xóó máꞌ xtáa̱.

A̱ꞌkhue̱n rí ni̱rnga̱du̱u̱n rí ndiya-makuíi̱. 29 A̱ꞌkhue̱n niyaxe̱ José ndiꞌyoo Benjamín, tsí ge̱ꞌthe̱e̱, a̱dée máꞌ ru̱dúu̱, jamí niꞌthúu̱n:

—Á tsíge̱ꞌ ñajuun dxíya̱ꞌlaꞌ tsí lájuíin, mbo̱ ni̱thu̱nꞌlaꞌ rá dxe̱ꞌ. —A̱ꞌkhue̱n niꞌthúu̱n Benjamín—: Ana̱ꞌlóꞌ gáꞌne tsakun-rámáá, táa̱.

30 A̱ꞌkhue̱n rí José maphú gagi eꞌne xo̱xto̱o̱ ga̱jma̱á numuu rí ndaꞌyoo̱ dxíyo̱o̱, ikhaa jngó mbá nacha̱ ni̱ke̱e̱, ndiꞌyée̱ꞌ ná ma̱mbi̱ye̱e̱ꞌ. Ni̱ta̱ꞌa̱a̱ ná naꞌguii̱ jamí ikhín máꞌ ni̱mbi̱ye̱e̱ꞌ. 31 Nda̱wa̱á ído̱ neꞌne gakhe̱-mine̱e̱ꞌ wáa, a̱ꞌkhue̱n niꞌjiáa̱n inuu̱, jamí nigájna̱a̱, xúꞌkhue̱n máꞌ niꞌthée̱n: «Ga̱khuáa máꞌ ganitsu rá».

32 A̱ꞌkhue̱n rí ni̱stra̱mee̱ꞌ mbá kiajuun rí me̱kho̱ José ja, xúꞌkhue̱n máꞌ mbá kiajuun rí mo̱pho̱ dxíyo̱o̱, jamí i̱mba̱ jayuu kiajuun rí mo̱pho̱ mbo̱ Ejípto̱ tsí napeꞌtso máꞌ ga̱jma̱á nindxu̱u̱ José. Numuu rí mbo̱ Ejípto̱ tsíyoo ma̱peꞌtso gajmíí mbo̱ ebréo̱, numuu rí mbá mate̱ꞌ mba̱a̱ iyáa̱ ikhii̱n. 33 A̱ꞌkhue̱n rí waskuíji̱i̱n ná inuu máꞌ ꞌgí José. Ginii mbo̱ nikhi̱i̱, xómá i̱ꞌkha̱ tsigúu̱n nikuíji̱i̱n asndo tsí lájuíin jayu. Jamí ído̱ ndiyáa̱ rúꞌkhue̱n, phú namakúu̱n, i̱ndo̱ó nu̱ya̱xe̱-mi̱jne̱e̱. 34 A̱ꞌkhue̱n rí José nixpíꞌthá-raꞌa ganitsu rí tráma máꞌ ná inuu̱ rí mu̱phi̱i̱. Xómáꞌ rí me̱kho̱ Benjamín ja rá, mbá witsu i̱tha̱n mba̱a̱ nikhuáa xóo rí nikhuáa inúú iꞌwíin. Xúꞌkhue̱n máꞌ niwa̱a̱n, jamí nijúwe̱e̱ꞌ gagi ga̱jma̱á nindxu̱u̱ José.