XÓ NI̱GI̱ꞋDU̱U̱N-MUU 35

Ana̱ꞌlóꞌ naꞌne tsakun-rámaa Jakób ná Bet-él

1 A̱ꞌkhue̱n rí Ana̱ꞌlóꞌ niꞌthúun Jakób: «Ayu ja ná Bet-él, jamí araxtaa máꞌ ikhín. A̱ta̱rngo̱xe̱ itsí ikhín ná ma̱tha̱ne̱-mba̱a̱ Ana̱a̱ꞌ tsí nikujmaa inaaꞌ, nákhí ído̱ nitagáyaaꞌ inuu dxíya̱a̱ꞌ Esaú».

2 A̱ꞌkhue̱n rí Jakób niꞌthúún a̱ngui̱i̱n jamí mbá xúgíin tsí júwa̱ꞌ ga̱jma̱á nindxu̱u̱: «Gu̱ni̱ꞌñúúlaꞌ xándá tsí ra̱ñájúún Ana̱ꞌlóꞌ, tsí kuaꞌdiinlaꞌ a̱ꞌkhue̱n, jamí a̱go̱ne̱ khaꞌu̱u̱-mi̱jna̱a̱laꞌ, xúꞌkhue̱n máꞌ gu̱riꞌkhu̱u̱laꞌ xtíñalaꞌ. 3 U̱guaxo̱nlóꞌ, jamí u̱ꞌgua̱lóꞌ ná Bet-él. Ikhín ma̱rngo̱xe̱ itsí ná ma̱ne̱-mba̱a̱ Ana̱ꞌlóꞌ tsí nimbáyíꞌ nákhí rí nixtáá gaꞌkho̱, xúꞌkhue̱n máꞌ nixtáa̱ ga̱jma̱á nindxu̱ꞌ mbá xúgíí ná ngrigo̱ꞌ».

4 Xkuaꞌnii ni̱xna̱xi̱i̱n inuu Jakób mbá xúgíin xándá tsí ra̱ñájúún Ana̱ꞌlóꞌ, tsí kuaꞌdii̱n ikhii̱n, xúꞌkhue̱n máꞌ xábí rí xpri̱gú ná ñaꞌúu̱n. Xómáꞌ Jakób niꞌdu xúgíí rúꞌkhue̱n ná xtuun mbá ixe̱ xi̱xoo rí wéje̱ mijngi máꞌ ná Sikém. 5 Jamí ído̱ ikhii̱n nigájnúu̱, a̱ꞌkhue̱n Ana̱ꞌlóꞌ neꞌne rí ma̱mi̱ꞌñúú mi̱ndaꞌkho xa̱bo̱ xuajen rí kuíje̱ mijngi, ikhaa jngó tágóo̱ tsu̱dúún i̱ji̱i̱n Jakób.

6 A̱ꞌkhue̱n ni̱ga̱nú Jakób ná Lús (rí ikhaa máꞌ ñajuun Bet-él), rí ꞌgí ná mbayuu Kanaán. Ni̱ga̱níi̱ ikhaa̱ jamí mbá xúgíin xa̱bo̱ tsí júwa̱ꞌ ga̱jma̱á nindxu̱u̱. 7 Ikhín ni̱rngu̱xi̱i̱ itsí ná ma̱ꞌne-mba̱a̱ Ana̱ꞌlóꞌ, jamí mbaa rúꞌkhue̱n nixnúu̱ mbiꞌyuu Él-bet-él, numuu rí ikhín nikujmaa Ana̱ꞌlóꞌ inuu̱, nákhí ído̱ rí nagáyuu̱ inuu dxíyo̱o̱. 8 Jamí ikhín máꞌ nijáñuu nána̱ Débo̱ra̱, tsí nimédóo Rebéka̱. Nijnguáa̱n ná mijngi Bet-él, ná agoo mbá ixe̱ xi̱xoo. Ikhaa ne̱ nigo̱ mbiꞌyuu Alón-bakút.

9 Ído̱ rí nitanga̱a̱ máꞌ Jakób ná Padán-arám, nikujmaa mbu̱jú Ana̱ꞌlóꞌ inuu̱, jamí ni̱gu̱ma-tsakun-rámaa̱. 10 Xáꞌnii waꞌtháa̱n neꞌne Ana̱ꞌlóꞌ: «Jakób phú mbiꞌyaaꞌ no. Ná-xáꞌne mbiꞌyaaꞌ Jakób rá, rí Israél phú gáꞌne mbiꞌyaaꞌ». Ikhaa jngó Israél máꞌ neꞌne mbiꞌyuu̱. 11 Mangaa waꞌtháa̱n xóó neꞌne Ana̱ꞌlóꞌ: «Ikhúúnꞌ ñaju̱nꞌ Ana̱a̱ꞌ tsí Gíꞌdoo Xúgíí Tsiakhe̱. A̱ga̱mi̱diúún xa̱bia̱a̱ꞌ. Ná ikháán ma̱ga̱jnúu mbá xuajen mba̱a̱, xúꞌkhue̱n máꞌ mbaꞌa xuajen mba̱ꞌo̱ ma̱ꞌne. Jamí ma̱ga̱jnúú xa̱bo̱ ñajun mba̱ꞌu̱u̱n ná inúú xa̱bo̱ ri̱jia̱a̱ꞌ. 12 Mbaa rí ni̱xnu̱u̱ máꞌ Abraám ga̱jma̱á Isaák, na̱xna̱a̱ꞌ ne̱ ikháán, jamí nda̱wa̱á mangiin xa̱bia̱a̱ꞌ ma̱xnu̱ú ne̱». 13 A̱ꞌkhue̱n rí ni̱ka̱a̱ Ana̱ꞌlóꞌ ná rí nindxákuu̱n ga̱jma̱á Jakób.

14 Xómáꞌ Jakób nitsiji mbá tsina ná rí nindxákuu̱n ga̱jmáa̱ Ana̱ꞌlóꞌ. Mbá tsinuu itsí ñajuun ne̱, jamí nistrámuu̱ iyoo úba̱ ga̱jma̱á iya miꞌtsín ná inuu ne̱, rí neꞌne tsakun-rámuu̱. 15 Xúꞌkhue̱n máꞌ nixnúu mbiꞌyuu ne̱ Bet-él ná rí nindxákuu̱n ga̱jmáa̱ Ana̱ꞌlóꞌ.

Nijáñuu Rakél

16 Nda̱wa̱á nigájnúu̱ ná Bet-él. I̱lájuíin máꞌ eꞌne rí ma̱guáꞌníi̱ ná Efráta̱, ído̱ neꞌne xuajiin Rakél, jamí phú mingíjiúu neꞌne rí ma̱gu̱maa a̱dée̱. 17 Awúun máꞌ rí i̱tha̱n mingíjiúu eꞌne, a̱ꞌkhue̱n iꞌthán a̱ꞌgo̱ tsí na̱grui̱gúun e̱je̱n: «Ma̱xámíñaaꞌ, numuu rí xtaꞌdaa máꞌ i̱mba̱a̱ a̱ꞌdeáaꞌ dxáma». 18 Ído̱ rí inu máꞌ na̱ka̱ xu̱u̱ꞌ, nixnúu̱ mbiꞌyuu ada̱ Benóni̱,*35.18 Ná ajngáa ebréo̱, mbiꞌyuu Benóni̱ naꞌthán-wíi̱ «ada̱ gaꞌkho̱». a̱ꞌkhue̱n nijáñuu̱. I̱ndo̱ó numuu rí Jakób nixnúu̱ mbiꞌyuu ada̱ Benjamín.*35.18 Ná ajngáa ebréo̱, mbiꞌyuu Benjamín naꞌthán-wíi̱ «ada̱ nga̱jua̱a̱».

19 Xkuaꞌnii nijáñuu Rakél, jamí nijnguáa̱n ná jambo̱o̱ Efráta̱, rí ikhaa máꞌ ñajuun Belén xúge̱ꞌ. 20 Ná rí nijnguáa̱n, Jakób nitsiji mbá itsí. Ikhaa ne̱ isngájma ná rí nijnguáa̱n Rakél asndo máꞌ mbiꞌi xúge̱ꞌ. 21 A̱ꞌkhue̱n rí Israél nigájnuu, jamí ni̱ka̱ gáskuíji̱i̱ guꞌwá xtíin i̱tháan tsíngua̱ꞌ ná inuu Migdál-edár.

I̱ji̱i̱n Jakób

22 Awúun máꞌ rí xtáa Israél ná mbaa rúꞌkhue̱n, xómáꞌ Rubén rá, niꞌgu ga̱jma̱á Bíla̱ tsí mbáa máꞌ gu̱ꞌwi̱i̱ anu̱u̱, jamí nidxawuun anu̱u̱ rí niꞌnii̱.

Israél ni̱gi̱ꞌdiin mbá gue̱jmi̱i̱ i̱ji̱i̱n tsí xa̱bekha:

23 Tsí i̱ji̱i̱n Léa̱ ñajúún: Rubén xa̱bo̱ tsí ginii jayu a̱dée Jakób, Simeón, Lebí, Judá, Isakár jamí Sabulón.

24 Tsí i̱ji̱i̱n Rakél ñajúún: José jamí Benjamín.

25 Tsí i̱ji̱i̱n Bíla̱, yumbée máꞌ Rakél ñajúún: Dán jamí Neftalí.

26 Jamí tsí i̱ji̱i̱n Sílpa̱, yumbée máꞌ Léa̱ ñajúún: Gád jamí Asér.

Tsúꞌkhue̱n ñajúún i̱ji̱i̱n Jakób, tsí ni̱gu̱mii ná Padán-arám.

Nijáñuu Isaák

27 Nda̱wa̱á ni̱ka̱ Jakób ná xtáa Isaák tsí anu̱u̱ máꞌ, ná Mámre̱, ná xuajen Árba̱, rí ñajuun máꞌ Ebrón, ná rí nixtáa máꞌ Abraám ga̱jma̱á Isaák. 28 Mbiꞌi rí nixtáa Isaák neꞌne mbá mijnagu̱wa̱ꞌ skíñú (180) tsigu. 29 Xi̱ꞌñú guéño máꞌ ñajuu̱n ído̱ rí ni̱ka̱ xu̱u̱ꞌ nijáñuu̱, jamí nimbáxi̱i̱ꞌ gajmíi̱ a̱ngui̱i̱n. A̱ꞌkhue̱n rí Esaú ga̱jma̱á Jakób, tsí i̱ji̱i̱n máꞌ, nidi̱i̱.