XÓ NI̱GI̱ꞋDU̱U̱N-MUU 49

Jakób naꞌthúún i̱ji̱i̱n rí ma̱ri̱gá ga̱jma̱á numúú

1 A̱ꞌkhue̱n rí Jakób nindxaꞌúún i̱ji̱i̱n, jamí niꞌthúu̱n: «A̱ru̱wa-mi̱jna̱a̱laꞌ, jamí ma̱tha̱nꞌlaꞌ rí ma̱ri̱gá ga̱jma̱á numalaꞌ mbiꞌi rí inúú ge̱e̱.

2 »A̱ru̱wa-mi̱jna̱a̱laꞌ rí mu̱dxawíínlaꞌ, i̱ji̱i̱n Jakób.

A̱gu̱dxawíínlaꞌ rí maꞌthán ana̱ꞌlaꞌ Israél.

3 »Rubén, ikháán ñajuaanꞌ a̱ꞌdéꞌ tsí phú ginii,

ski̱yu̱ꞌ rí ginii jayu ñajuaanꞌ,

gamaku jamí tsiakhe̱ ginii ñajuaanꞌ.

4 Phú nacha̱a̱ꞌ xóo iya-mbo̱o̱ꞌ,

ikhaa jngó ná-xánindxa̱a̱ꞌ xa̱bo̱ ginii rá.

Numuu rí nitatsimaaꞌ ná xi̱yawoo ana̱a̱ꞌ,

jamí nithane̱ rí xkawe̱ꞌ ído̱ nitabáaꞌ ná xi̱yawo̱ꞌ.

5 »Simeón ga̱jma̱á Lebí mba̱wí-ikhúúnꞌ ñajúún,

ajua̱nꞌ rí naꞌne gamíjun ñajuun chídíi̱n.

6 Ma̱xáxtáá ná awúun rí nuthan-mi̱jne̱e̱,

ni máꞌ ma̱xámbáxu̱ꞌ gajmíꞌ.

Numuu rí awúun rí najiꞌníi̱ niradíi̱n xa̱bo̱,

jamí támíñúu̱ rí ni̱ru̱thii̱n nítú ruꞌúún xede̱.

7 Mbóó ra̱máján rí najiꞌníi̱ guéño,

jamí rí namanguu̱nꞌ gakhe̱.

Ikhúúnꞌ ma̱ra̱khún-wájíi̱n inuu mbayuu Jakób,

jamí ma̱ne̱ rí ma̱drúꞌúu̱n inúú xa̱bi̱i̱ Israél.

8 »Ikháán, Judá, muthan máján numaaꞌ a̱ngia̱a̱nꞌ.

Numuu rí na̱ꞌnga̱a̱ꞌ inúú xa̱bo̱ sia̱a̱nꞌ,

ikhaa jngó i̱ji̱i̱n ana̱a̱ꞌ mu̱sma̱ti̱gu̱ún inaaꞌ.

9 Xóo a̱ꞌdá-i̱ndi̱í jaꞌnii a̱ꞌdéꞌ Judá ja.

Wámbo̱o̱ niꞌkhu̱u̱ xu̱kú tsí nirtuwii̱n,

ni̱rnga̱du̱ꞌ-mine̱e̱ꞌ, nibóo̱ꞌ asndo xóo i̱ndi̱í,

asndo xóo jaꞌnii eꞌne i̱ndi̱í e̱jmba̱a̱.

Tsáa-lá gáꞌne gajmúu̱ ja rá.

10 Ma̱xága̱taa̱ ixe̱-mixú ñawúun Judá,

ni máꞌ ma̱xágájnuu ne̱ ná nakhúu̱,

asndo gáꞌkha̱ tsí phú drígo̱o̱ ne̱,

ikhaa tsí ma̱nimbu̱ún xa̱bo̱ xuajen juyáá.

11 Ná ajmu̱u̱ úba̱ iroꞌóo Judá xtá-ngidiuu,

xúꞌkhue̱n máꞌ naroꞌóo̱ a̱dée xtá-ngidi ná nakhúu ixu̱u̱ úba̱.

Naꞌjiáa̱n xtíñuu̱ ga̱jma̱á iyoo úba̱,

xúꞌkhue̱n máꞌ naꞌjiáa̱n xtátso̱n aphu ná iꞌdiuu xndú úba̱.

12 Rí iduu̱, maña̱ꞌ skuni xóo iyoo xndú úba̱,

xúꞌkhue̱n máꞌ iñuu̱, miꞌxá asndo xóo yaꞌdú.

13 »Sabulón ma̱xtáa ná rawuun iya a̱pha̱,

jamí ná rí ma̱guáꞌnú rguwa rí na̱ka̱ inuu iya,

xúꞌkhue̱n máꞌ ndawoo̱ ma̱ꞌne asndo ná Sidón.

14 »Isakár, ñajuun xóo mbáa xtá-ngidi gúkuíi,

tsí na̱ka̱-rabóo ná na̱gi̱mbúun xu̱kú.

15 Mba̱ꞌyoo̱ rí máján rí mbayáa̱ xu̱u̱ꞌ,

xúꞌkhue̱n máꞌ mba̱ꞌyoo̱ rí phú mitsaan mbaa.

Ma̱rnga̱du̱u̱nꞌ rí magui̱i̱ eꞌda rí je̱ño̱,

xúꞌkhue̱n máꞌ ma̱nindxu̱u̱ mbáa yumbáá.

16 »Dán maxudaa awan numúú xa̱bo̱ xuajiuun máꞌ,

numuu rí ikhaa̱ ñajuun mbá máꞌ kuthúún xa̱bi̱i̱ Israél.

17 Ga̱nindxu̱u̱ Dán wiphii asndo xóo mbáa a̱bo̱ꞌ

tsí na̱ge̱ꞌe̱ ná rawuun jamba̱á.

Ga̱ki̱jmaa̱ mi̱khui̱i̱ nakhúu guáyo̱,

xúꞌkhue̱n máꞌ ma̱ꞌnii̱ rí ma̱rákaa skidi xa̱bo̱ sia̱nꞌ tsí rígu ikhín.

18 »Gúꞌthu̱u̱n máꞌ rí ma̱tha̱ne̱ jríñu̱ú, Anu̱ꞌ Mikhuíí.

19 »Xómáꞌ Gád, ma̱dráꞌiin xa̱bo̱ sia̱nꞌ inuu̱,

nda̱wa̱á ikhaa̱ ma̱ki̱jmaa̱ ngu̱ꞌwa̱ rí ma̱ꞌne gajmíi̱.

20 »Asér ma̱gi̱ꞌdoo mbaꞌa mi̱ndaꞌkho ganitsu,

jamí ikhaa̱ maxnúu̱ ganitsu rí ndasko̱ꞌ rí me̱kho̱ thúngaa mba̱a̱.

21 »Neftalí ñajuun xóo mbáa a̱ña̱ꞌ tsí ngrigo̱o̱ ikhaa.

Rí ajngóo̱ rí phú mitsaan asndo xóo jaꞌñúú i̱jín-áñá.

22 »José ñajuun xóo mbá ñawúun ixe̱,

wéje̱ ne̱ ná rawuun iya, jamí phú najma̱a̱ xndúu ne̱.

Xómáꞌ ñawúun ne̱ rí narudu-ri̱ya̱ꞌ, na̱ka̱-ratsimuu ne̱ ná xu̱nꞌ.

23 Mbo̱ nu̱xi̱díí xkuíyu̱u̱ xkamídá nini̱i̱ ma̱ꞌkhu̱u̱n a̱kui̱i̱n,

ni̱xi̱dí-jmaa̱ xkuíyu̱u̱ ne̱,

jamí nene̱ gajmáa̱ xa̱bo̱ tsúꞌkhue̱n.

24 I̱ndo̱ó ikhaa̱, ni̱we̱je̱ gúkú xkamídúu̱,

numuu rí ñawúu̱n ni̱gi̱ꞌdoo tsiakhe̱.

Nitambáyíi̱ eꞌne tsí Gakhi̱i̱, tsí xtáa jma̱á Jakób,

ikhaa máꞌ tsí ñajuun Waxtú, jamí Itsí Ski̱yu̱u̱ꞌ Israél ñajuu̱n.

25 Núma̱a̱ꞌ Anu̱u̱ ana̱a̱ꞌ rí nambáyáaꞌ,

núma̱a̱ꞌ máꞌ Ana̱ꞌ-málóꞌ tsí Gíꞌdoo Xúgíí Tsiakhe̱ rí ma̱ꞌne tsakun-rámáá.

Ikhaa̱ gáꞌne tsakun-rámaa̱ ga̱jma̱á rí na̱ꞌkha̱ ná mikhu,

a̱ga̱ꞌne tsakun-rámaa̱ ga̱jma̱á rí na̱ꞌkha̱ ná me̱jno̱ꞌ mbayíí,

a̱ga̱ꞌne tsakun-rámaa̱ ga̱jma̱á máꞌ rí na̱ꞌkha̱ ná yaꞌdúún jamí awúún go̱ꞌo̱.

26 Ana̱a̱ꞌ naꞌne tsakun-rámáá i̱tha̱n mba̱a̱

xóo rí ni̱gu̱ma-tsakun-rámúú nene̱ wa̱jen xíñu xi̱ꞌñúꞌ.

Asndo xóo rí mbá jámuu wájun júba̱,

jámuu máꞌ gágu̱ma-tsakun-rámaa José ja,

ikhaa máꞌ tsí waxtaꞌwí-ri̱ya̱a̱ꞌ ná majiu̱ún a̱ngui̱i̱n.

27 »Benjamín ñajuun xóo mbáa i̱ña̱ꞌ tsí minuꞌwaan.

Rí miꞌcha̱ naꞌkhu̱u̱ tsí nigatuwii̱n,

jamí xúꞌkhue̱n máꞌ rí wakhíí naxpiꞌtháa̱ rí napíduun».

28 Mbá xúgíin tsúꞌkhue̱n ñajúún tsí mbá gu̱wa̱ꞌ i̱jmi̱i̱ kuthiin i̱ji̱i̱n Israél, jamí ajngáa rúꞌkhue̱n ñajuun rí niꞌthúu̱n i̱ji̱i̱n ído̱ rí neꞌne tsakun-rámii̱. Mbámbáa máꞌ neꞌne tsakun-rámaa̱ xóo rí jaꞌyoo.

Nijáñuu Jakób jamí waꞌdi̱i̱

29 A̱ꞌkhue̱n rí Jakób nixná-ñájúún i̱ji̱i̱n: «Xtáá máꞌ rí ma̱ja̱ñúꞌ jún rá. A̱gu̱dúu̱nlaꞌ tháan gajmíꞌ wa̱jen xi̱ꞌñúꞌ ná iñá rí ꞌgí ná mbayuu Efrón mbo̱ Ét. 30 Ikhaa máꞌ iñá rí ꞌgí ná mbaa Makpéla̱, rí ꞌgí ná na̱ꞌkha̱ a̱kha̱ꞌ ná rawuun Mámre̱, ná mbayuu máꞌ Kanaán, ikhaa rí neꞌtse̱ Abraám ga̱jma̱á máꞌ mbayuu Efrón mbo̱ Ét, numuu rí ikhaa ne̱ gáꞌne iñá-wa̱jiúu̱n. 31 Ikhín máꞌ waꞌdi̱i̱ Abraám ga̱jma̱á Sára̱, ikhín máꞌ waꞌdi̱i̱ Isaák ga̱jma̱á Rebéka̱ jamí rí ikhín máꞌ ni̱dii̱ Léa̱ mangúún. 32 Waꞌtse̱ máꞌ mbaa jamí iñá rí ríga̱ ikhín inúú i̱ji̱i̱n xa̱bo̱ Ét».

33 Ído̱ rí Jakób wámbo̱o̱ nixná-ñájúu̱n i̱ji̱i̱n, nibáa̱ꞌ inuu xi̱yoo. A̱ꞌkhue̱n ni̱ka̱ xu̱u̱ꞌ, jamí nijáñuu̱.