XÓ NI̱GI̱ꞋDU̱U̱N-MUU 6

Rí ra̱máján none̱ xa̱bo̱ numbaa

1 Ído̱ ni̱gi̱ꞌdu̱u̱n ni̱mi̱diu̱ún mi̱ndaꞌkho xa̱bo̱ ná inuu ju̱ba̱ꞌ, jamí ni̱gu̱mii i̱jíi̱n tsí go̱ꞌo̱, 2 a̱ꞌkhue̱n ndiyáá i̱ji̱i̱n Ana̱ꞌlóꞌ rí phú tsiꞌíin i̱ji̱ín xa̱bo̱ numbaa. A̱ꞌkhue̱n rí majiu̱ún mbá xúgíin, niraꞌwíi̱n jamí nidii̱n tsí neꞌne a̱kuíi̱n rí ma̱ꞌne gu̱ꞌwíi̱n. 3 A̱ꞌkhue̱n rí Ana̱ꞌlóꞌ Mikhuíí niꞌthán: «Ma̱xáꞌngo̱o̱ jámuu a̱kui̱nꞌ góne̱ xa̱bo̱ numbaa, numuu rí xuwi ñajúu̱n. Ikhaa jngó ma̱ꞌne rí i̱ndo̱ó majuun skíñú (120) tsigu rí ma̱ju̱wá xa̱bo̱».

4 Mbiꞌi máꞌ rúꞌkhue̱n, xúꞌkhue̱n máꞌ nda̱wa̱á mangaa, nijúwa̱ꞌ xa̱bo̱ tsí mba̱ꞌu̱u̱n ná inuu ju̱ba̱ꞌ, numuu rí nimbáxu̱ún xa̱bi̱i̱ Ana̱ꞌlóꞌ gajmíí go̱ꞌo̱ tsí i̱ji̱ín xa̱bo̱, a̱ꞌkhue̱n ni̱gu̱mii i̱jíi̱n. Tsíge̱ꞌ tsí phú gakhe̱ a̱kui̱ín, jamí tsí phú ni̱gi̱ꞌdoo numúú ñajúu̱n asndo nákhí wajiúú mbiꞌi.

5 Ndiꞌyoo Ana̱ꞌlóꞌ Mikhuíí rí phú mba̱a̱ rí ra̱máján rí none̱ xa̱bo̱ ná inuu numbaa, jamí mbá xúgíí rí nu̱ndxa̱ꞌwa̱-mi̱jne̱e̱, jámba̱ miꞌtsún rí ra̱máján ñajuun ne̱. 6 Maphú natanga̱a̱ a̱kui̱i̱n Ana̱ꞌlóꞌ Mikhuíí rí neꞌne-ku̱mii̱ xa̱bo̱ ná inuu numbaa, xúꞌkhue̱n máꞌ rí phú nadaa a̱kui̱i̱n. 7 Ikhaa jngó niꞌthán Ana̱ꞌlóꞌ Mikhuíí: «Ma̱rngudii̱nꞌ-ri̱gi̱i̱n ná inuu ju̱ba̱ꞌ xa̱bo̱ tsí ne̱ne̱-ku̱mii, jamí mangiin xúgíin xu̱kú, asndo tsí nu̱xma̱tha-mi̱jna̱ jamí ño̱ꞌo̱n. Numuu rí phú natanga̱a̱ a̱kui̱nꞌ rí ne̱ne̱-ku̱mii̱lo̱ꞌ». 8 Xómáꞌ Noé ja rá, neꞌne a̱kui̱i̱n Ana̱ꞌlóꞌ Mikhuíí jaꞌyoo.

Noé naꞌne guꞌwá rguwa mba̱a̱

9 Ríge̱ꞌ naꞌthán xóo nixtáa Noé gajmíí xa̱bi̱i̱. Noé ñajuun mbáa xa̱bo̱ gamakuii jamí májáan ná majiu̱ún a̱ngui̱i̱n. Xúꞌkhue̱n máꞌ nixtáa̱ xómáꞌ nandoo Ana̱ꞌlóꞌ. 10 Ni̱gu̱mii mbá atsúun i̱ji̱i̱n Noé: Sém, Kám, jamí Jafét.

11 Ndiꞌyoo Ana̱ꞌlóꞌ rí nichú-ri̱ga̱ mbá jayuu inuu ju̱ba̱ꞌ, xúꞌkhue̱n máꞌ gatíí rí xkujndu. 12 Niyaxu̱u̱ Ana̱ꞌlóꞌ ná inuu ju̱ba̱ꞌ, ndiꞌyoo̱ rí gajni̱í mi̱ndaꞌkho rí ra̱máján, numuu rí nikhíi xóo júwa̱ꞌ mbá xúgíin xa̱bo̱ ná tsu̱du̱u̱ numbaa. 13 A̱ꞌkhue̱n rí Ana̱ꞌlóꞌ niꞌthúun Noé: «Ni̱ꞌgí-mina̱ꞌ rí ma̱ne̱ gámbi̱i̱n xúgíin xa̱bo̱, numuu rí gajni̱í ná inuu ju̱ba̱ꞌ rí xkujndu ga̱jma̱á numúu̱ ikhii̱n. Jamí xúge̱ꞌ rá, ma̱ne̱ gámbi̱i̱n ikhii̱n xúꞌkhue̱n máꞌ ju̱ba̱ꞌ mangaa. 14 Athane̱ mbá guꞌwá rguwa ixe̱ gofér rí ma̱rada̱ꞌ, jamí xúꞌkhue̱n ma̱tha̱ne̱ xtóo ne̱ ná awúún, jamí ma̱ta̱xta̱jma̱á wájia awúun jamí tsu̱du̱u̱ ne̱. 15 Xáꞌnii jaꞌnii khiáwan ne̱ ma̱tha̱ne̱: rí ꞌmba̱ꞌ ma̱ꞌne mbá atsú siénto̱ (300) iduu itso̱ rí na̱gia̱wan ñawúun xa̱bo̱,*6.15 Rí 300 iduu itso̱ naꞌne mbá 140 wáa métro̱. rí ma̱jia̱nꞌ ma̱ꞌne a̱jma̱ skíñú gu̱wa̱ꞌ (50) iduu itso̱,*6.15 Rí 50 iduu itso̱ naꞌne mbá 23 wáa métro̱. jamí rí tsída̱ꞌ ma̱ꞌne mbá skíñú gu̱wa̱ꞌ (30) iduu itso̱.*6.15 Rí 30 iduu itso̱ naꞌne mbá 14 wáa métro̱. 16 Ná mijngi dámba̱wóo rí ri̱jma̱á, ma̱ta̱tsi̱ꞌñáá mbá iduu rguwa ja̱ma̱ꞌtha mbá iduu itso̱. Xúꞌkhue̱n máꞌ ma̱ta̱gíꞌma mbá xkrugua ná níjiúu rguwa. Athane̱ mbá atsú xtóo ne̱ rí ka̱jngro̱xe̱ ná awúun ne̱. 17 Numuu rí ikhúúnꞌ ma̱xu̱ꞌmá rí ma̱ꞌne ruꞌwa a̱pha̱ ná inuu numbaa, rí ma̱ne̱ gámbi̱i̱n mbá xúgíin tsí kuaꞌdáá xe̱ꞌ rí ndaꞌya ná agoo mikhu. Mbá xúgíí rí ríga̱ ná inuu ju̱ba̱ꞌ ma̱mbáa̱. 18 I̱ndo̱ó ikháán na̱xu̱ꞌdá-mina̱ꞌ mbá awan ga̱jma̱á nindxa̱a̱ꞌ, rí ma̱ta̱ꞌa̱a̱ꞌ ná awúun rguwa ikháán, gajmiáaꞌ i̱jia̱a̱nꞌ, a̱ꞌgia̱a̱ꞌ jamí gu̱ꞌgiáanꞌ. 19 Jamí mbá xúgíin xu̱kú tsí nduya júwa̱ꞌ, ma̱ta̱xu̱ꞌdíi̱n ná awúun rguwa, a̱jmi̱i̱ jamí a̱jmi̱i̱ mbámbá inii, a̱jmba jamí iꞌgú gáꞌne. A̱ꞌkhue̱n rí ma̱goo ma̱jáwíi̱n ga̱jma̱á nindxa̱a̱ꞌ. 20 Ma̱tu̱ꞌúún ga̱jma̱á nindxa̱a̱ꞌ mbámbá inii xu̱kú-xna, xu̱kú kiraꞌda mbámbá inii máꞌ mangaa, jamí mbámbá inii tsí nu̱xma̱tha-mi̱jna̱. A̱jmi̱i̱ jamí a̱jmi̱i̱ rí mbámbá inii gáꞌne, jngó ma̱goo ma̱jáwíi̱n. 21 Xúꞌkhue̱n máꞌ araxi̱i̱ mbá xúgíí inii ganitsu, jamí athane̱ matíí ne̱, numuu rí ikhaa ne̱ mambáyáaꞌ, xúꞌkhue̱n máꞌ mangiin xu̱kú».

22 Mbá xkuaꞌnii neꞌne Noé, rí neꞌne-mbánuu̱ mbá xúgíí rí waꞌtháa̱n neꞌne Ana̱ꞌlóꞌ.