XÓ NI̱GI̱ꞋDU̱U̱N-MUU 36

Tsí ñajúún xa̱bi̱i̱ Esaú

1 Tsíge̱ꞌ ñajúún xa̱bi̱i̱ Esaú, tsí ikhaa máꞌ mbiꞌyuu Edóm. 2 Esaú ninigúún nigu̱u̱n go̱ꞌo̱ i̱ji̱ín xa̱bo̱ Kanaán: Áda̱, a̱dée Elón mbo̱ xa̱bi̱i̱ Ét, ga̱jma̱á Aolibáma̱, a̱dée Aná tsí a̱dée máꞌ Sibeón mbo̱ ebéo̱, 3 ga̱jma̱á Basemát, a̱dée Ismaél, tsí dxáguíi máꞌ Nebayót. 4 Áda̱ neꞌne ku̱maa̱ Elifás a̱dée máꞌ Esaú, jamí Basemát neꞌne ku̱maa̱ Reuél. 5 Xómáꞌ Aolibáma̱ neꞌne ku̱maa Jeús, Jaalám ga̱jma̱á Koré. Tsúꞌkhue̱n ñajúún i̱ji̱i̱n Esaú tsí ni̱gu̱mii ná mbaa Kanaán.

6 A̱ꞌkhue̱n rí Esaú nigu̱u̱n gu̱ꞌwi̱i̱, i̱ji̱i̱n tsí jiáma, i̱ji̱i̱n tsí go̱ꞌo̱, jamí mbá xúgíin xa̱bo̱ ná goꞌóo̱, jamí mbá xúgíin xu̱kuíi̱, jamí mbá xúgíí rí ni̱ka̱ ra̱ge̱ꞌdoo̱ ná mbaa Kanaán, ni̱ke̱e̱ i̱mba̱ mbaa gáxtáa̱, rí neꞌne tsíngua̱ꞌ-mine̱e̱ꞌ inuu Jakób. 7 Numuu rí ikhii̱n phú kuaꞌdáa̱ mi̱ndaꞌkho, jamí tsíyoo ma̱ju̱wée̱ꞌ mbóó, ni máꞌ mbaa ná rí júwe̱e̱ꞌ tséꞌngo̱o̱ ma̱peꞌtso xu̱kuíi̱n. 8 Ikhaa jngó Esaú ni̱ka̱ gáxtáa ná júba̱ Seír. Edóm máꞌ mbiꞌyuu Esaú mangaa.

9 Tsíge̱ꞌ ñajúún xa̱bo̱ ri̱jiu̱u̱ꞌ Esaú, tsí ikhaa máꞌ ñajuun xi̱ꞌñúú xa̱bo̱ Edóm, tsí nijúwá ná mbaa júba̱ Seír. 10 Ríge̱ꞌ ñajuun mbiꞌñúú i̱ji̱i̱n Esaú: Elifás tsí a̱dée Áda̱ a̱ꞌgui̱i̱ máꞌ Esaú, xúꞌkhue̱n máꞌ Reuél a̱dée Basemát a̱ꞌgui̱i̱ máꞌ Esaú. 11 Jamí i̱ji̱i̱n Elifás ñajúún Temán, Omár, Séfo̱, Gatám jamí Senás. 12 Xúꞌkhue̱n máꞌ Tímna̱ ñajuun mbáa máꞌ a̱ꞌgui̱i̱ Elifás, jamí ikhaa̱ neꞌne ku̱maa̱ Amalék. Mbá xúgíin tsúꞌkhue̱n ninindxu̱ún i̱jín-xíñii Áda̱, a̱ꞌgui̱i̱ máꞌ Esaú. 13 Xómáꞌ i̱ji̱i̱n Reuél ñajúún Naát, Séra̱, Sáma̱ jamí Mísa̱. Tsúꞌkhue̱n ninindxu̱ún i̱jín-xíñii Basemát, a̱ꞌgui̱i̱ máꞌ Esaú. 14 Tsíge̱ꞌ ñajúún i̱ji̱i̱n Aolibáma̱ tsí i̱mba̱a̱ máꞌ a̱ꞌgui̱i̱ Esaú, tsí a̱dée Aná mbo̱ a̱dée máꞌ Sibeón. Ikhaa̱ neꞌne ku̱maa̱ Jeús, Jaalám jamí Koré, tsí i̱ji̱i̱n máꞌ Esaú.

15 Tsíge̱ꞌ ñajúún xúgíin xa̱bo̱ ede̱ ná rí majiu̱ún i̱ji̱i̱n Esaú. I̱ji̱i̱n Elifás, a̱dée Esaú tsí xa̱bo̱ ginii, tsí ñajúún xa̱bo̱ ede̱: Temán, Omár, Séfo̱, Senás, 16 Koré, Gatám jamí Amalék. Tsúꞌkhue̱n ninindxu̱ún xa̱bo̱ ede̱ ná rí ri̱jiu̱u̱ꞌ Elifás ná numbaa máꞌ Edóm, tsí i̱jín-xíñii máꞌ Áda̱. 17 Jamí tsíge̱ꞌ ñajúún i̱ji̱i̱n Reuél, a̱dée máꞌ Esaú, tsí ninindxu̱ún xa̱bo̱ ede̱: Naát, Séra̱, Sáma̱ jamí Mísa̱. Tsúꞌkhue̱n ninindxu̱ún xa̱bo̱ ede̱ ná rí ri̱jiu̱u̱ꞌ Reuél ná rí numbaa máꞌ Edóm. Jamí xúgíin tsúꞌkhue̱n ninindxu̱ún i̱jín-xíñii Basemát, a̱ꞌgui̱i̱ máꞌ Esaú. 18 Xómáꞌ tsíge̱ꞌ ñajúún i̱ji̱i̱n Aolibáma̱, a̱ꞌgui̱i̱ máꞌ Esaú, tsí ñajúún xa̱bo̱ ede̱: Jeús, Jaalám ga̱jma̱á Koré. Tsúꞌkhue̱n ninindxu̱ún xa̱bo̱ ede̱ ná i̱ji̱i̱n Aolibáma̱, a̱dée máꞌ Aná. 19 Mbá xúgíin tsúꞌkhue̱n ninindxu̱ún i̱ji̱i̱n Esaú, xúꞌkhue̱n máꞌ xa̱bo̱ ede̱ drígúu̱n. Esaú mbiꞌyuu máꞌ Edóm.

20 Xómáꞌ tsíge̱ꞌ ñajúún i̱ji̱i̱n Seír mbo̱ oréo̱, mbo̱ júwá máꞌ ná mbaa rúꞌkhue̱n: Lotán, Sobál, Sibeón, Aná, 21 Disón, Esér ga̱jma̱á Disán. Tsúꞌkhue̱n ninindxu̱ún xa̱bo̱ ede̱ drígu̱ún mbo̱ oréo̱, i̱ji̱i̱n máꞌ Seír, ná rí mbayuu Edóm. 22 Tsí i̱ji̱i̱n Lotán ñajúún Óri̱ ga̱jma̱á Emám, xúꞌkhue̱n máꞌ Tímna̱ ñajuun dxáguíi Lotán. 23 Tsí i̱ji̱i̱n Sobál ñajúún Albán, Manaát, Ebál, Séfo̱ ga̱jma̱á Onám. 24 Tsí i̱ji̱i̱n Sibeón ñajúún Ája̱ ga̱jma̱á Aná. Aná tsíge̱ꞌ ñajuun tsí nixkamaa iduu iya ná mbaa niníí, ído̱ rí na̱ka̱ ra̱ña̱wúu̱n xtá-ngidiuu Sibeón tsí anu̱u̱ máꞌ. 25 Tsí i̱ji̱i̱n Aná ñajúún Disón ga̱jma̱á mbáa a̱ꞌgo̱ mbiꞌyuu Aolibáma̱. 26 Tsíge̱ꞌ ñajúún i̱ji̱i̱n Disón: Emdán, Esbán, Itrán ga̱jma̱á Kerán. 27 Jamí tsíge̱ꞌ ñajúún i̱ji̱i̱n Esér: Bilán, Saabán ga̱jma̱á Akán. 28 Tsíge̱ꞌ ñajúún i̱ji̱i̱n Disán: Ús ga̱jma̱á Arán. 29 Ikhín máꞌ tsíge̱ꞌ ñajúún xa̱bo̱ ede̱ drígu̱ún mbo̱ oréo̱: Lotán, Sobál, Sibeón, Aná, 30 Disón, Esér ga̱jma̱á Disán. Tsúꞌkhue̱n ninindxu̱ún xa̱bo̱ ede̱ tsí mbámbáa máꞌ niꞌthán-ñájuun xuajiuun ná mbaa Seír.

Thúngaa mba̱ꞌu̱u̱n ná Edóm

31 Nákhí rí xóó ndawa̱a̱ nimbáa thúngaa mba̱a̱ inúú xa̱bo̱ Israél, tsíge̱ꞌ ñajúún thúngaa mba̱ꞌu̱u̱n ná numbaa máꞌ Edóm: 32 Béla̱ a̱dée Beór niꞌthán-ñájun ná mbayuu Edóm, jamí Dinába̱ mbiꞌyuu xuajiuu̱n. 33 Ído̱ nijáñuu Béla̱, a̱ꞌkhue̱n ninújnga̱a̱ꞌ niꞌthán-ñájun Jobáb, a̱dée Séra̱ tsí na̱ꞌkha̱ ná Bósra̱. 34 Ído̱ nijáñuu Jobáb, a̱ꞌkhue̱n ninújnga̱a̱ꞌ niꞌthán-ñájun Usám, tsí na̱ꞌkha̱ ná numbaa Temán. 35 Ído̱ nijáñuu Usám, a̱ꞌkhue̱n ninújnga̱a̱ꞌ niꞌthán-ñájun Adád, a̱dée Bedád. Adád ni̱ꞌngo̱o̱ rí nixná-míjná ga̱jmáa̱ Madián ná mbaa Moáb, jamí Abít mbiꞌyuu xuajiuu̱n. 36 Ído̱ nijáñuu Adád, a̱ꞌkhue̱n ninújnga̱a̱ꞌ niꞌthán-ñájun Sámla̱, tsí na̱ꞌkha̱ ná Masréka̱. 37 Ído̱ nijáñuu Sámla̱, a̱ꞌkhue̱n ninújnga̱a̱ꞌ niꞌthán-ñájun Saúl, tsí na̱ꞌkha̱ ná Reobót rí ꞌgí ná rawuun mañuu Éufra̱te̱s. 38 Ído̱ nijáñuu Saúl, a̱ꞌkhue̱n ninújnga̱a̱ꞌ niꞌthán-ñájun Baál-anán, a̱dée Akbór. 39 Ído̱ nijáñuu Baál-anán a̱dée Akbór, a̱ꞌkhue̱n ninújnga̱a̱ꞌ niꞌthán-ñájun Adár. Páu̱ mbiꞌyuu xuajiuu̱n, xómáꞌ a̱ꞌgui̱i̱ mbiꞌyuu Meetabél, tsí a̱dée nána̱ Matréd, a̱ꞌdá-xíñii máꞌ Mesaáb.

40 Ríge̱ꞌ ñajuun mbiꞌñúú xa̱bo̱ ede̱ ná rí xa̱bi̱i̱ máꞌ Esaú, mbámbá inii ri̱jiúu̱n, mbámbá inii xuajiúu̱n: Tímna̱, Álba̱, Jetét, 41 Aolibáma̱, Éla̱, Pinón, 42 Senás, Temán, Mibsár, 43 Magdiél ga̱jma̱á Irám. Tsúꞌkhue̱n ninindxu̱ún xa̱bo̱ ede̱ ná xa̱bi̱i̱ Edóm, mbámbá máꞌ mbaa rí kuaꞌdáa̱ ná rí júwe̱e̱ꞌ. Edóm ñajuun máꞌ Esaú, xi̱ꞌñúú xa̱bo̱ Edóm.