1 Ído̱ rí ninújngoo máꞌ a̱jma̱ tsigu, a̱ꞌkhue̱n nigundaa Faraón. Ndiꞌyoo̱ rí wíji̱i̱ ná rawuun mañuu Nílo̱. 2 Xúꞌkhue̱n máꞌ ndiꞌyoo̱ rí ná rawuun mañuu natsimúú mbá juiin xede̱ iꞌgú tsí phú tsiꞌíin, xúꞌkhue̱n máꞌ phú rangíin, jamí napiꞌtsii̱ ná maxa ra̱xa̱. 3 Jamí ná tsu̱dúún máꞌ xede̱ tsúꞌkhue̱n nitsimúú i̱mba̱á juiin xede̱ iꞌgú tsí phú xkawi̱i̱nꞌ jamí tsa̱jui̱i̱nꞌ, xúꞌkhue̱n máꞌ niwájuii̱n ná inúú xede̱ tsí tsiꞌíin tsí kachúún ná rawuun mañuu. 4 A̱ꞌkhue̱n rí xede̱ tsí xkawi̱i̱nꞌ tsa̱jui̱i̱nꞌ niꞌphu̱ún xede̱ tsí mbá juiin tsí tsiꞌíin jamí rangíin ndiꞌyoo̱. A̱ꞌkhue̱n nifuii̱ꞌ Faraón.

5 Niꞌgu̱u̱ mbu̱jú, jamí nigundaa̱ rí riajmu̱u̱. Ndiꞌyoo̱ mbá juan iñuu ixí ra̱xa̱ mba̱ꞌo̱ jamí phú mitsaan ne̱, rí nangujuíi mbóó máꞌ ná diyuu ne̱. 6 Jamí nda̱wa̱á a̱ꞌkhue̱n ni̱díwíi i̱mba̱á juan iña rí ngíná nijndoo xtá neꞌne gíñá-xoo. 7 Xúꞌkhue̱n máꞌ rí mbá juan iña rí ngíná niꞌkho̱ mbá juan iña rí máján mba̱ꞌo̱. A̱ꞌkhue̱n nifuii̱ꞌ Faraón, ndiꞌyoo̱ rí xnuꞌndaa ñajuun ne̱.

8 Ído̱ rí watse rá, phú naꞌthúun a̱kui̱i̱n nifuii̱ꞌ, a̱ꞌkhue̱n nindxaꞌúu̱n mbá xúgíin xa̱bo̱ tsí na̱ma̱ñúú xawan tsí júwá ná Ejípto̱, jamí mbá xúgíin máꞌ xa̱bo̱ tsí nduyáá. A̱ꞌkhue̱n niꞌthúu̱n rí nigundaa̱, i̱ndo̱ó numuu rí nimbáa tséꞌngo̱o̱ rí maꞌthán-wíi̱ ne̱ inuu Faraón.

9 A̱ꞌkhue̱n rí xa̱bo̱ tsí naꞌthán-ñájúún mbo̱ nu̱xi̱ña̱ꞌ iya niꞌthúun Faraón: «Na̱rmáꞌáa̱n a̱kui̱nꞌ xúge̱ꞌ rí ra̱máján ne̱ne̱lo̱ꞌ. 10 Ído̱ nijiꞌnáá xtayaxo̱ꞌ tsáa̱nꞌ yumbiáaꞌ ñajuanxo̱ꞌ, nitaskuádáa̱nꞌxo̱ꞌ guéjua̱nꞌ ná goꞌóo máꞌ xa̱bo̱ tsí naꞌthán-ñájúún mbo̱ nu̱ña̱wa̱án, ikhúúnꞌ ga̱jme̱ꞌ xa̱bo̱ tsí naꞌthán-ñájúún mbo̱ none̱ mújúún guma wopho. 11 Ikhaa̱ jamí ikhúúnꞌ ni̱nu̱ꞌndaaxo̱ꞌ mbóó mbroꞌon. Jamí mbámbá xóo rí naꞌthán xnuꞌndaxo̱ꞌ. 12 Ikhín gída̱ꞌ mbáa dxáma mbo̱ ebréo̱ ga̱jma̱á nindxa̱ꞌxo̱ꞌ, yumbée máꞌ xa̱bo̱ tsí naꞌthán-ñájúún mbo̱ nu̱ña̱wa̱án máꞌ. Jamí ni̱tháa̱nxo̱ꞌ xnuꞌndaxo̱ꞌ, xúꞌkhue̱n máꞌ ikhaa̱ niꞌthán-wíi̱ ne̱, mbámbá xó rí ni̱nu̱ꞌndaaxo̱ꞌ. 13 Xómáꞌ rí niꞌthán-wíi̱ ne̱ ikhaa̱, xkuaꞌnii máꞌ neꞌne. Ikhúúnꞌ nitangu̱ún ni̱ni̱i̱ máꞌ ñaju̱nꞌ, xómáꞌ tsí i̱mba̱a̱ wandráka-maa̱ ja».

14 A̱ꞌkhue̱n rí Faraón nixná-ñájun rí ma̱ꞌkha̱ José, jamí mbá nacha̱ máꞌ ni̱ri̱ya̱a̱ꞌ ná guéjua̱nꞌ. Xómáꞌ José niꞌda̱a̱ tsu̱u̱n inuu, xúꞌkhue̱n máꞌ niriꞌkhu̱u̱ la xtíñuu̱, a̱ꞌkhue̱n ni̱ꞌkhe̱e̱ inuu Faraón. Na̱ga̱nú José inuu thúngaa mba̱a̱ ná Ejípto̱. 15 A̱ꞌkhue̱n Faraón niꞌthúun José:

―Ikhúúnꞌ ni̱gúndaa, jamí ndawa̱a̱ nimbáa tsí maꞌthán-wíi̱ wáa ne̱. I̱ndo̱ó na̱dxawuun ga̱jma̱á numaaꞌ ikháán, rí natadxawíín xnuꞌndaa jamí xúꞌkhue̱n máꞌ na̱ma̱ñaaꞌ narathán-wíi̱ ne̱.

16 A̱ꞌkhue̱n niriꞌña̱a̱ José ajngóo Faraón:

―Ra̱jáꞌyo̱ꞌ ikhúúnꞌ ma̱tha̱a̱nꞌlo̱ꞌ, rí Ana̱ꞌlóꞌ ñajuun tsí phú maꞌthán-wíi̱ mújúun inuu Faraón.

17 A̱ꞌkhue̱n rí Faraón niꞌthúun José:

―Ni̱gúndaa ndi̱yo̱o̱ rí ná rawuun mañuu Nílo̱ kuájo̱n. 18 Jamí ná rawuun mañuu natsimúú mbá juiin xede̱ iꞌgú rangíin jamí phú tsiꞌíin, xúꞌkhue̱n máꞌ napiꞌtsii̱ ná maxa ra̱xa̱. 19 Jamí ná rí tsu̱dúún máꞌ xede̱ tsúꞌkhue̱n nitsimúú i̱mba̱á juiin xede̱ tsí phú tsa̱jui̱i̱nꞌ jamí phú xkawe̱ꞌ jaꞌñúú. Ra̱ꞌkhá-tháán mingíníi̱, rí asndo nimbá miꞌtsún táñu̱ú xede̱ tsí phú xkawi̱i̱nꞌ xóo tsúꞌkhue̱n mbá xúgíí mbaa ná Ejípto̱. 20 Xómáꞌ xede̱ tsí tsa̱jui̱i̱nꞌ jamí xkawi̱i̱nꞌ niꞌphu̱ún tsí mbá juiin xede̱ tsí rangíin. 21 Nda̱wa̱á ído̱ rí wámba̱ niꞌphúu̱n, na̱nguá-lá nikujmii̱ mbá jayu xí niꞌphúu̱n, ikhaa máꞌ jaꞌñúu̱ rí tsa̱jui̱i̱nꞌ xómáꞌ rí wapha. A̱ꞌkhue̱n rí nifuii̱ꞌlo̱ꞌ.

22 »Jamí mangaa ndi̱yo̱o̱ rí na̱gúndaa i̱mba̱, mbá juan iñuu ixí ra̱xa̱ mba̱ꞌo̱ jamí phú mitsaan ne̱ rí nangujuíi mbóó máꞌ diyuu ne̱. 23 Nda̱wa̱á nijráꞌán i̱mba̱á juan iña ngíná nijndoo xtá neꞌne gíñá-xoo. 24 Iña rí ngíná a̱ꞌkhue̱n niꞌpho̱ rí mbá juan iña rí mitsaan. Xómáꞌ ikhúúnꞌ ni̱thu̱ún xúgíí rúꞌkhue̱n xa̱bo̱ tsí nduyáá xawan, jamí nimbáa tséꞌngo̱o̱ maꞌthán-wíi̱ ne̱ inu̱ꞌ.

25 A̱ꞌkhue̱n rí José niriꞌña̱a̱ ajngóo Faraón:

―Xnuꞌnduu Faraón mbóó máꞌ ñajuun ne̱. Ana̱ꞌlóꞌ nasngájma rí wéje̱ ma̱ꞌne. 26 Tsí mbá juiin xede̱ tsí tsiꞌíin, juan tsigu ñajuun ne̱, xúꞌkhue̱n máꞌ rí mbá juan iña rí mitsaan, juan tsigu ñajuun ne̱. Mbóó máꞌ ñajuun rí naꞌthán xnuꞌndaa. 27 Xúꞌkhue̱n máꞌ tsí mbá juiin xede̱ tsí tsa̱jui̱i̱nꞌ jamí xkawi̱i̱nꞌ tsí nitsimúú nda̱wa̱á, juan tsigu ñajuun ne̱. Xúꞌkhue̱n máꞌ rí mbá juan iña ngíná rí nijndoo xtá neꞌne gíñá-xoo, ikhaa máꞌ ñajuun mbá juan tsigu rí ma̱ri̱gá ewe. 28 Rúꞌkhue̱n ñajuun rí na̱tha̱a̱nꞌ, xa̱bo̱ nikhi̱i̱. Rí Ana̱ꞌlóꞌ wéje̱ ma̱ꞌne, ikhaa ñajuun rí nasngájmaa̱ꞌ. 29 Ma̱ꞌkha mbá juan tsigu rí ma̱jma̱a̱ guéño ganitsu mbá xúgíí mbaa ná Ejípto̱. 30 Nda̱wa̱á a̱ꞌkhue̱n ma̱ꞌkha̱ mbá juan tsigu rí ma̱ꞌne ewe, jamí ma̱mbumúú mbá xúgíí xa̱bo̱ rí nijma̱a̱ guéño ná mbaa Ejípto̱, jamí ewe ma̱ꞌne gámba̱a̱ xuajen. 31 Jamí rí nijma̱a̱ guéño ná-xármáꞌáa̱n a̱kuíi̱n juyáa̱, ga̱jma̱á numuu ewe rí ma̱ꞌkha̱, rí phú gakhe̱ gáꞌne. 32 Rí a̱jma̱ nothon rí nitanuꞌndaa, xa̱bo̱ nikhi̱i̱, rúꞌkhue̱n naꞌthán rí Ana̱ꞌlóꞌ naꞌgí-mina̱ꞌ rí ma̱ꞌne-mbánuu, jamí phú wapha naꞌgí-mine̱e̱ꞌ rí ma̱ꞌne-mbánuu̱ ne̱.

33 »Ikhaa jngó xúge̱ꞌ rá, máján xí ma̱tha̱ꞌyáa mbáa xa̱biya̱ tsí wiphii jamí nafroꞌo̱o̱, xúꞌkhue̱n máꞌ ma̱thaꞌgíi̱ꞌ rí maꞌthán-nájuu̱n mbaa Ejípto̱. 34 Athane̱ ríge̱ꞌ, xa̱bo̱ nikhi̱i̱: ataskuíji̱i̱n xa̱bo̱ ñajun inuu xuajen tsí ma̱tsu̱daa rí ma̱gi̱xi̱i̱ mbóó awúun rí mbámbá witsu rí ma̱jma̱a̱ inuu mbayuu Ejípto̱, awúun rí mbá juan tsigu rí ma̱jma̱a̱ guéño. 35 Jamí a̱gi̱mbóo̱ mbá xúgíí rí ma̱jma̱a̱ mbá jañii tsigui̱i̱ rí máján na̱ꞌkha̱ ge̱e̱. A̱gi̱xi̱i̱ ixí iña ná ñawáanꞌ máꞌ rí mambáñúú-múú xa̱bo̱ xuajen. 36 Ikhaa jngó ma̱ti mújúun ganitsu rúꞌkhue̱n ná xtagaꞌo, rí mambáñúú xa̱bo̱ xuajen ído̱ rí ma̱ꞌne ewe mbá juan tsigu ná mbaa Ejípto̱. A̱ꞌkhue̱n rí ma̱xájáñúú xa̱bo̱ rí ma̱khéñúú.

37 A̱ꞌkhue̱n rí Faraón gajmíí máꞌ xa̱bi̱i̱ ndiyáa̱ rí máján ju̱ma̱ rúꞌkhue̱n. 38 A̱ꞌkhue̱n Faraón niꞌthúún xa̱bi̱i̱: «Á mu̱xkamaalóꞌ i̱mba̱a̱ xa̱bo̱ tsí xóo tsíge̱ꞌ, tsí gíꞌdoo xu̱u̱ꞌ Ana̱ꞌlóꞌ rá».

39 A̱ꞌkhue̱n Faraón niꞌthúun José: «Numuu rí Ana̱ꞌlóꞌ naꞌne rí nandoo nathiyáá xúgíí ríge̱ꞌ, ndawa̱a̱ nimbáa tsí nafroꞌo̱o̱ jamí tsí phú ju̱ma̱a̱ xóo rí ikháán. 40 Ikháán ma̱ra̱tha̱n-ñájuíín guꞌwá ñajun drígo̱ꞌ, jamí mbá xúgíin xa̱bo̱ xuajiu̱nꞌ mone̱-mbáníí rí ma̱ra̱tha̱n. I̱ndo̱ó ikhúúnꞌ rí ꞌgúnꞌ ge̱e̱, i̱tha̱n ginúú xó rí ikháán. 41 ―Faraón niꞌthúun xóó José―: Athayáá rí xúge̱ꞌ ikhúúnꞌ na̱ꞌgíínlo̱ꞌ rí ma̱ra̱tha̱n-ñájuíín mbá xúgíí mbaa Ejípto̱».

42 A̱ꞌkhue̱n rí Faraón niríya̱ꞌ ajua̱nꞌ tsina rí gída̱ꞌ ná a̱dée ñawúu̱n, jamí nigíde̱e̱ꞌ ne̱ ná ñawúun José. Xúꞌkhue̱n máꞌ niꞌnii̱ rí majúwuu̱n xtíin rí máján waba jamí nundu, xúꞌkhue̱n máꞌ nigíwe̱e̱nꞌ mbá xábí rí ajua̱nꞌ mo̱jmo̱ꞌ ná aphuu. 43 Mangaa niꞌnii̱ rí ma̱tsimuu̱ ixe̱ rí kixmáthaa nagáyuu rí drígo̱o̱ jayuu xa̱bo̱ ñajun tsí riajma̱a̱, xúꞌkhue̱n máꞌ nithan-raꞌa xa̱bo̱ ná inuu̱: «¡A̱gu̱sma̱tíga̱ꞌlaꞌ!» Xkuaꞌnii niꞌgíi̱ José rí maꞌthán-ñájun mbá xúgíí inuu mbaa Ejípto̱.

44 A̱ꞌkhue̱n Faraón niꞌthúun José: «Maske máꞌ ikhúúnꞌ ñaju̱nꞌ Faraón, nimbáa xa̱bo̱ mbá xúgíí ná Ejípto̱ ma̱xáxóo ma̱ꞌmba̱a̱n ñawúun ni máꞌ nakhúu xí tsírathán ikháán».

45 A̱ꞌkhue̱n rí Faraón niꞌthán rí Safnát-panéa̱ ma̱ꞌne mbiꞌyuu José, xúꞌkhue̱n máꞌ nixnáa̱ a̱ꞌgo̱ tsí ma̱ꞌne a̱ꞌgui̱i̱ mbiꞌyuu Asenát, tsí a̱dée máꞌ Potífe̱ra̱ mbo̱ dxakuun ná Ón. A̱ꞌkhue̱n rí nigájnuu José ni̱ka̱ mbá xúgíí mbaa Ejípto̱. 46 José gíꞌdoo mbá skíñú gu̱wa̱ꞌ tsiguu̱ ído̱ rí waxnáxi̱i̱ inuu Faraón, thúngaa mba̱a̱ ná Ejípto̱. A̱ꞌkhue̱n rí José nigájnuu inuu Faraón, jamí ni̱ka̱-raꞌyoo̱ mbá xúgíí mbaa Ejípto̱.

47 Awúun rí mbá juan tsigu rúꞌkhue̱n, gatíí mi̱ndaꞌkho rí nijma̱a̱ ná inuu ju̱ba̱ꞌ. 48 Xómáꞌ José ni̱ka̱-ragímbóo̱ mbá xúgíí ganitsu rí nijma̱a̱ mi̱ndaꞌkho ná Ejípto̱ awúun rí juan tsigu, jamí ni̱ka̱ ra̱gu̱xi̱i̱ ne̱ ná xuajen. Rí nijma̱a̱ ná rawuun mbámbá xuajen, ikhín máꞌ ni̱gu̱xi̱i̱. 49 Nigímbóo̱ José ixí iña asndo xóo we̱ꞌe̱ rawuun iya a̱pha̱. Ra̱ꞌkhá-tháán mba̱a̱ mi̱ndaꞌkho rí nigímbóo̱, asndo ná-táꞌngo̱o̱ rí ma̱gia̱wan ne̱, numuu rí nánguá xóo rí ma̱gi̱xnuu ne̱.

50 A̱ꞌkhue̱n ni̱gu̱mii a̱jmi̱i̱ i̱ji̱i̱n José rí xóó táꞌkha̱ nimbá tsigu rí ewe. E̱je̱n tsúꞌkhue̱n neꞌne ku̱mii Asenát, tsí a̱dée máꞌ Potífe̱ra̱ dxakuun ná Ón. 51 A̱ꞌkhue̱n rí José nixnúu̱ mbiꞌyuu a̱dée̱ tsí ginii, Manasés,* numuu rí niꞌthée̱n: «Ana̱ꞌlóꞌ neꞌne rí ma̱mbumu̱ꞌ mbá xúgíí ñaju̱nꞌ, xúꞌkhue̱n máꞌ mbá xúgíin a̱ngui̱nꞌ ná goꞌóo anu̱ꞌ». 52 Xómáꞌ tsí riajma̱a̱ nixnúu̱ mbiꞌyuu Efraín,* numuu rí niꞌthée̱n: «Ana̱ꞌlóꞌ neꞌne rí ma̱gu̱mii i̱ji̱nꞌ ná numbaa rí nimínu̱u̱ꞌ».

53 Xkuaꞌnii nirámuu rí mbá juan tsigu rí nijma̱a̱ mi̱ndaꞌkho ganitsu ná mbaa Ejípto̱. 54 A̱ꞌkhue̱n rí ni̱gi̱ꞌdu̱u̱n ni̱ꞌkha̱ mbá juan tsigu ewe, xómáꞌ niꞌthán José. Jamí niríga̱ ewe mbá xúgíí xuajen, i̱ndo̱ó mbá xúgíí mbaa Ejípto̱ ríga̱ ganitsu. 55 Jamí ído̱ nijuꞌdu-ti̱ga̱ gakhe̱ ewe mbá xúgíí mbaa Ejípto̱, a̱ꞌkhue̱n rí xuajen nindxaꞌwá-raꞌa inuu Faraón ga̱jma̱á numuu ganitsu. Xómáꞌ Faraón niꞌthúún mbá xúgíin xa̱bo̱ Ejípto̱: «Gaꞌgualaꞌ inuu José, jamí a̱go̱ne̱-mbáníílaꞌ rí maꞌthánlaꞌ ikhaa̱». 56 Jamí mbá a̱pha̱ ri̱ga̱ ewe mbá xúgíí xuajen rúꞌkhue̱n. A̱ꞌkhue̱n rí José nirmbáꞌthoo mbá xúgíí xtagaꞌo ná ríga̱ ganitsu, jamí na̱ngo̱jue̱e̱ ne̱ nuda xa̱bo̱ Ejípto̱, numuu rí phú mba̱a̱ ewe i̱ꞌkha̱-raríga̱ ná numbaa rúꞌkhue̱n. 57 Jamí mbá xúgíí numba̱a̱ naguwá xa̱bo̱ ná Ejípto̱ rí mutsi̱i̱ inuu José, numuu rí mbá xúgíí numba̱a̱ phú mba̱a̱ ewe i̱ꞌkha̱-raríga̱.