XÓ NI̱GI̱ꞋDU̱U̱N-MUU 20

Abraám neꞌne-nduwaa Abimelék

1 A̱ꞌkhue̱n rí nigájnuu Abraám ni̱ka̱ ná mbaa Negéb, jamí ni̱ka̱-raxtáa̱ ná majiu̱u̱nꞌ Káde̱s ga̱jma̱á Súr, xúꞌkhue̱n máꞌ nixtáa̱ naꞌcho̱o̱ ná Jerár. 2 Xómáꞌ Abraám naꞌthán ríge̱ꞌ ga̱jma̱á numuu Sára̱, tsí a̱ꞌgui̱i̱ máꞌ: «Ikhaa̱ ñajuu̱n dxáguíꞌ».

A̱ꞌkhue̱n rí Abimelék, tsí ñajuun thúngaa ná Jerár, nixuꞌmii̱ tsí ma̱guwá juya̱a̱ Sára̱ rí ma̱ꞌne a̱ꞌgui̱i̱. 3 I̱ndo̱ó ni̱ꞌkha̱ Ana̱ꞌlóꞌ awúun mbroꞌon ná xnuꞌnduu Abimelék, jamí niꞌthúu̱n:

—Xóo tsí nijáñuu máꞌ jaꞌníí, ga̱jma̱á numuu a̱ꞌgo̱ tsí ndiyáa. Numuu rí a̱ꞌgo̱ tsúꞌkhue̱n gíꞌdaa máꞌ a̱jmbaa̱.

4 I̱ndo̱ó numuu rí Abimelék xóó máꞌ tíguii̱ ga̱jmáa̱ Sára̱, ikhaa jngó niꞌthée̱n:

—Táta̱, á ma̱ta̱xíya̱a̱ mangaa tsí ra̱gíꞌdoo aꞌkhúun rá dxe̱ꞌ. 5 Á ra̱ꞌkhá ikhaa̱ máꞌ niꞌthán: "Dxáguíꞌ ñajuu̱n". Xúꞌkhue̱n máꞌ mangaa a̱ꞌgo̱ niꞌthán: "Díye̱ꞌ ñajuu̱n" rá. Mbá jañii a̱kui̱nꞌ ne̱ne̱lo̱ꞌ ríge̱ꞌ. Nda̱a̱-lá rí ra̱máján ne̱ne̱, e̱yo̱lo̱ꞌ jún.

6 A̱ꞌkhue̱n rí niriꞌña̱a̱ Ana̱ꞌlóꞌ ná xnuꞌnduu̱:

—Mangúún máꞌ nda̱yo̱o̱ rí mbá jañii a̱kia̱a̱nꞌ nithane̱ ríge̱ꞌ. Xúꞌkhue̱n máꞌ mangúún ni̱wájo̱n-tha̱a̱nꞌ rí ma̱xáta̱xu̱ꞌdá-mina̱ꞌ aꞌkhán ná inu̱ꞌ, jamí xkuaꞌnii táni̱ꞌñáaꞌ rí ma̱tru̱gua̱a̱. 7 Ikhaa jngó xúge̱ꞌ rá, ataxnáxi̱i̱ a̱ꞌgo̱ tsúꞌkhue̱n inuu a̱jmbaa̱. Numuu rí ikhaa̱ ñajuu̱n mbáa tsí naꞌthán-wíi̱ ajngáa rawu̱nꞌ, jamí maꞌthán-kháa̱n numaaꞌ jngó ma̱ra̱xtaa xóó. Xí tsítaxnáxi̱i̱, athayáá gúkuáaꞌ máꞌ rí ma̱ja̱ñáaꞌ ikháán, xúꞌkhue̱n máꞌ mbá guꞌwáa̱nꞌlaꞌ.

8 A̱ꞌkhue̱n rí phú miꞌcha̱ ni̱tu̱xi̱i Abimelék, xúꞌkhue̱n máꞌ nindxaꞌúu̱n mbá xúgíin yumbée̱, jamí niꞌthúu̱n xúgíí ajngáa ríge̱ꞌ. A̱ꞌkhue̱n rí ikhii̱n phú nimíñúu̱ mi̱ndaꞌkho. 9 Nda̱wa̱á a̱ꞌkhue̱n Abimelék nindxaꞌwóo̱ Abraám, jamí niꞌthúu̱n:

—Náá numuu jngó xáꞌnii nithaña̱ꞌxo̱ꞌ róꞌ. Náá aꞌkhán ni̱xu̱ꞌdá-mina̱ꞌ ikhúúnꞌ ná inaaꞌ, rí nidxa̱ꞌ ꞌcháa ra̱ꞌkhá-tháán mba̱a̱ aꞌkhán ná inu̱ꞌ jamí inuu xuajen rá. Nithañu̱ꞌ mbá rí ra̱gíꞌmaa ma̱tha̱ne̱.

10 Xúꞌkhue̱n máꞌ Abimelék niꞌthúun xóó Abraám:

—Náá rí phú ni̱ju̱ma̱a̱ꞌ, ikhaa jngó nithane̱ ríge̱ꞌ rá.

11 A̱ꞌkhue̱n rí Abraám niriꞌña̱a̱:

—Numuu rí ni̱ndxa̱ꞌwa̱-mina̱ꞌ: "Gáꞌne xí gakon rí tsímíñúú xa̱bo̱ ge̱jioꞌ eꞌne Ana̱ꞌlóꞌ, jamí mu̱xi̱ñúu̱ ga̱jma̱á numuu a̱ꞌgui̱ꞌ". 12 Gakon mangaa rí dxáguíꞌ ñajuu̱n, a̱dée anu̱ꞌ. I̱ndo̱ó rí ra̱ꞌkháa a̱dée ru̱dúꞌ, jamí ikhúúnꞌ ndi̱ya̱a̱ rí ma̱ꞌne a̱ꞌgui̱ꞌ. 13 Ído̱ rí Ana̱ꞌlóꞌ neꞌne rí ma̱ga̱jnúꞌ ná goꞌóo anu̱ꞌ rí ma̱ngroꞌo̱ꞌ, a̱ꞌkhue̱n ikhúúnꞌ ni̱thu̱u̱n a̱ꞌgui̱ꞌ: "Ríge̱ꞌ ñajuun mbá rí máján rí ma̱tha̱ñu̱ꞌ, rí asndo náá gúguáꞌnúlóꞌ xáꞌnii gára̱tha̱n tháan numu̱ꞌ: ‘Díye̱ꞌ ñajuu̱n.’ "

14 A̱ꞌkhue̱n rí Abimelék nixnúu Abraám mogo̱, xede̱, jamí yumbáá xa̱bekha jamí go̱ꞌo̱, mangaa máꞌ nirtanga̱a̱ Sára̱. 15 A̱ꞌkhue̱n rí Abimelék niꞌthúun Abraám:

—Atiaxi̱í ma̱thi̱yáá, a̱ꞌkhue̱n ri̱ga̱ mbá xúgíí mbayu̱ꞌ. Araxtaa asndo náá eꞌne a̱kia̱a̱nꞌ.

16 A̱ꞌkhue̱n niꞌthúu̱n Sára̱ mangaa:

—Ni̱xnu̱u̱ díya̱a̱ꞌ mbá míl mbúkha̱a̱ ajua̱nꞌ rí miꞌxá. Ikhaa maꞌthán-mbáá numaaꞌ inúú mbá xúgíin tsí júwa̱ꞌ ga̱jma̱á nindxa̱a̱ꞌ, jngó xúgíi̱n mbuya-makuaaꞌ.

17 A̱ꞌkhue̱n rí Abraám niꞌthán-jáñuu Ana̱ꞌlóꞌ, jamí Ana̱ꞌlóꞌ neꞌne maꞌndáa̱ Abimelék xúꞌkhue̱n máꞌ a̱ꞌgui̱i̱ gajmíí go̱ꞌo̱ yumbáá, a̱ꞌkhue̱n rí ndiyoo niguáꞌdii̱n i̱jíi̱n. 18 Numuu rí wapha máꞌ Ana̱ꞌlóꞌ Mikhuíí neꞌne rí ma̱xágu̱mii e̱je̱n ná goꞌóo Abimelék, ga̱jma̱á numuu Sára̱, a̱ꞌgui̱i̱ Abraám.