Marcos 8

Jesús naxníꞌtsúún mbá akho̱ míl xa̱bo̱

1 I̱mba̱ miꞌtsú, phú mbaꞌiin xa̱bo̱ ni̱gi̱mbúun mbu̱júꞌ, jamí na̱nguá judee̱ rí mu̱phi̱i̱. A̱ꞌkhue̱n Jesús nindxaꞌwúún tsí naꞌsngúún, jamí niꞌthúu̱n:

2 —Nañáwíin a̱kui̱nꞌ ja̱ñu̱ú xa̱bo̱ tsíge̱ꞌ, numuu rí naꞌne máꞌ atsú mbiꞌi rí júwe̱e̱ꞌ ga̱jma̱á nindxu̱ꞌ, jamí na̱nguá judee̱ rí mu̱phi̱i̱. 3 Jamí xí ma̱xu̱ꞌmíi̱ magúu̱n guꞌwúu̱n rí na̱xki̱dxúu̱n, ma̱jámíndúu̱n ná jamba̱a̱ gáꞌne, numuu rí mbá tikhuun naguwá tsíngua̱ꞌ.

4 Xómáꞌ tsí naꞌsngúu̱n ni̱riꞌñáa̱:

—Náá lá gáꞌkha̱ ná mbaa niníí ge̱jyoꞌ rí mu̱pho̱ xa̱bo̱ tsíge̱ꞌ asndo ma̱gi̱ꞌmúú rá.

5 Xómáꞌ ikhaa̱ niraxúu̱n:

—Wátha̱ guma ju̱dalaꞌ rá.

Xómáꞌ ikhii̱n nithee̱n:

—Mbá juwan ne̱.

6 A̱ꞌkhue̱n Jesús nixná-ñájúún mbá xúgíin xa̱bo̱ rí ma̱trigi̱in mbayíí. A̱ꞌkhue̱n niguatuu̱n rí mbá juwan guma, jamí niríguu̱ la gamaku inuu Ana̱ꞌlóꞌ ga̱jma̱á numuu ne̱. A̱ꞌkhue̱n nixpíꞌthá-makoo̱ ne̱, jamí nixnúu̱ ne̱ tsí naꞌsngúu̱n. Xómáꞌ ikhii̱n nixna-raꞌee̱ ne̱ ná inúú mbá xúgíin xa̱bo̱ kajngó mu̱pho̱. 7 Jamí judii̱n mbá wáthi̱in wáa i̱gi̱ꞌ tsí makiin mangaa. Niríguu̱ la gamaku inuu Ana̱ꞌlóꞌ ga̱jma̱á numúu̱, jamí nixná-ñájwii̱n rí ma̱wiꞌthá-raꞌiin ná inúú xa̱bo̱. 8 A̱ꞌkhue̱n rí mbá xúgíin xa̱bo̱ nipeꞌtso asndo ni̱gi̱ꞌmúú. Nda̱wa̱á a̱ꞌkhue̱n ni̱raxii̱ mbá juwan ixtu xkuꞌxí rí nipíduun. 9 Xómáꞌ tsí nipeꞌtso naꞌne xó mbá akho̱ míl (4 000) wáa xa̱bo̱ ñajúu̱n. A̱ꞌkhue̱n Jesús niꞌthán-ngawúu̱n rí magúu̱n.