1 Ikhaa jngó, ikháánꞌ tsáánꞌ narathán rí ra̱máján ene̱ xa̱bo̱, nda̱a̱ rí ma̱tha̱ne̱ tsu̱di̱í, asndo tsáa máꞌ najwaanꞌ. Ído̱ narathán rí ra̱máján ene̱ i̱ꞌwíin, naraxná-maꞌán-mina̱ꞌ máꞌ ikháánꞌ, numuu rí nathane̱ ikhaa máꞌ rí nuni̱i̱ ikhii̱n. 2 Xómáꞌ Ana̱ꞌlóꞌ, ído̱ naxudaa̱ awan numúú xa̱bo̱ tsí nune̱ rúꞌkhue̱n, nduꞌyáálóꞌ rí gakon rí naꞌthée̱n. 3 Tsáánꞌ narathán rí ra̱máján ene̱ xa̱bo̱ jamí ikhaa máꞌ ithane̱ ikháánꞌ, á na̱ju̱ma̱a̱ꞌ rí ma̱jríñáaꞌ ído̱ rí Ana̱ꞌlóꞌ maxúdaa awan ga̱jma̱á numúú xa̱bo̱ rá dxe̱ꞌ. 4 Ikháánꞌ tsítiamakuíí rí phú májáan Ana̱ꞌlóꞌ jaꞌyaaꞌ, rí phú mba̱a̱ a̱kuii̱n jamí rí na̱ꞌngo̱o̱ a̱kuii̱n ithane̱. Jamí tsífraꞌa̱a̱ꞌ rí Ana̱ꞌlóꞌ májáan a̱kuii̱n jaꞌyaa̱ꞌ numuu nandoo̱ rí ma̱thanga̱a a̱kia̱anꞌ ná inuu̱.

5 Xómáꞌ ikháánꞌ phú najñaguíín jamí tsíyoo gáthanga̱a a̱kia̱anꞌ inuu Ana̱ꞌlóꞌ. Ga̱jma̱á numuu rúꞌkhue̱n nathane̱-matíí jamínu̱ꞌ rí ma̱tri̱gú ído̱ gága̱nú mbiꞌi rí mu̱míni̱í xa̱bo̱, ikhaa máꞌ mbiꞌi rí Ana̱ꞌlóꞌ masngájma rí máján naxudaa̱ awan ga̱jma̱á numúú xa̱bo̱. 6 Numuu rí Ana̱ꞌlóꞌ ma̱ꞌne-numa̱a mbámbáa xa̱bo̱ xómá jaꞌyoo rí neꞌne. 7 Tsí nune̱ máꞌ xúꞌkhue̱n rí máján, nduꞌyée̱ rí ma̱gi̱ꞌdoo numúu̱, rí mi̱tiamakúu̱n, jamí nduꞌyée̱ rí ma̱ju̱wée̱ꞌ jámuu, ikhiin tsúꞌkhue̱n ma̱ju̱wá jámuu gáꞌne Ana̱ꞌlóꞌ. 8 Xómáꞌ tsí na̱ju̱mu̱ú rí i̱ndo̱ó máꞌ ikhiin gíꞌdoo numuu rí nuthan, jamí tsíñúú gánimbu̱únꞌ rí gakon, ga̱jma̱á numuu rí nune̱ rí xkawe̱ꞌ rá, Ana̱ꞌlóꞌ ma̱ꞌne rí mu̱míníi̱ ga̱jma̱á mbá xúgíí ski̱yu̱u̱ꞌ rí najiꞌnáa̱. 9 Madaa jamínu̱ꞌ jamí mbayá xkuíya̱ jámba̱a̱ xa̱bo̱ tsí naꞌne rí ra̱máján, xa̱bo̱ judío̱ ginii jayu, xúꞌkhue̱n máꞌ xa̱bo̱ tsí ra̱ꞌkháa judío̱ ñajuun mangaa. 10 Xómáꞌ xa̱bo̱ tsí naꞌne rí máján, ma̱gi̱ꞌdoo numuu̱, mi̱tiamakuíi̱ jamí ma̱xtáa̱ tsímáá, xa̱bo̱ judío̱ ginii jayu, xúꞌkhue̱n máꞌ xa̱bo̱ tsí ra̱ꞌkháa judío̱ ñajuun mangaa. 11 Numuu rí Ana̱ꞌlóꞌ tsíraꞌwíi̱n xa̱bo̱ tsí ma̱ꞌne-nga̱júu̱n.

12 Numuu rí mbá xúgíin xa̱bo̱ tsí nune̱ aꞌkhán, maske máꞌ tsíne̱-nuwiin xtángawoo Moisés, ma̱ja̱ñúu̱, ra̱ꞌkhá máꞌ ga̱jma̱á majñu̱u̱ xtángoo rúꞌkhue̱n. Xúꞌkhue̱n máꞌ, mbá xúgíin xa̱bo̱ tsí nune̱ aꞌkhán, maske máꞌ nune̱-nuwiin xtángawoo Moisés, ga̱jma̱á majñu̱u̱ máꞌ xtángoo rúꞌkhue̱n mi̱tra̱jwa̱ꞌ numúu̱. 13 Numuu rí ra̱ꞌkháa xa̱bo̱ tsí i̱ndo̱ó máꞌ nu̱dxawíín xtángawoo Moisés ñajúún tsí nánda̱a̱ aꞌkhúún ná inuu Ana̱ꞌlóꞌ, rí xa̱bo̱ tsí nune̱-mbáníí xtángoo, ikhiin tsúꞌkhue̱n maꞌthán Ana̱ꞌlóꞌ rí nánda̱a̱ aꞌkhúún. 14 Xa̱bo̱ tsí ra̱ꞌkháa judío̱ ñajúún ra̱guáꞌdáa̱ xtángawoo Moisés. Ído̱ rí xa̱bo̱ tsúꞌkhue̱n nune̱-mbáníí rí naꞌthán xtángoo, nune̱-mbáníi̱ ne̱ numuu rí nduyáa̱ máꞌ ná awúun a̱kuíi̱n náá rí máján jamí náá rí ra̱máján muni̱i̱, maske máꞌ ra̱guáꞌdáa̱ xtángawoo Moisés. 15 Rí xkuaꞌnii ini̱i̱, nu̱snga̱jmee̱ rí waꞌtháán xtángoo ná awúun a̱kuíi̱n, numuu rí ju̱ma̱ rí guáꞌdáa̱ naꞌthán rí xkuaꞌnii jaꞌnii. Jamí a̱kuíi̱n maꞌthán rí gíꞌmii̱ aꞌkhán o maꞌthán-mbáá ne̱ numúu̱ mbo̱ꞌ, 16 ído̱ gága̱nú mbiꞌi rí Ana̱ꞌlóꞌ maxúdaa awan numuu rí guáꞌdáá ngu̱ꞌwa̱ xa̱bo̱ ná awúun a̱kui̱ín. Ana̱ꞌlóꞌ maxúdaa awan ga̱jma̱á majñu̱u̱ Jesukrísto̱, xómá iꞌthán ajngáa máján rí na̱sngáálo̱ꞌ.

17 Xómáꞌ ikháánꞌ tsáánꞌ narathán rí xa̱bo̱ judío̱ ñajwaanꞌ, na̱ju̱ma̱a̱ꞌ rí maphú mambáyáaꞌ xtángoo, jamí natakúxe̱-mina̱ꞌ numuu rí phú máján xtaa ná inuu Ana̱ꞌlóꞌ. 18 Nathayáá máꞌ dí ñajuun rí nandoo Ana̱ꞌlóꞌ ma̱tha̱ne̱, jamí ga̱jma̱á majñu̱u̱ rí na̱ma̱ñaaꞌ xtángoo natraꞌwíí ma̱tha̱ne̱ rí i̱tha̱án máján. 19 Na̱ju̱ma̱a̱ꞌ rí ikháánꞌ ꞌchá ikhúún tsí júgoo inúú, rí ikháánꞌ ñajwaanꞌ agu rí ma̱mbiꞌñúú tsí júwa̱ꞌ ná mijína, 20 xúꞌkhue̱n máꞌ na̱ju̱ma̱a̱ꞌ rí na̱ma̱ñaaꞌ ma̱ra̱sngúún tsí tsíma̱ñúú jamí e̱je̱n. Numuu rí ga̱jma̱á majñu̱u̱ xtángoo na̱ju̱ma̱a̱ꞌ rí na̱ma̱ñaaꞌ mbá xúgíí rí phú gakon. 21 Ikhaa jngó, ikháánꞌ tsáánꞌ narasngúún i̱ꞌwíin xa̱bo̱, náá numuu kajngó tsírasngá-mina̱ꞌ máꞌ ikháánꞌ róꞌ. Ikháánꞌ tsáánꞌ narathán rí ra̱gíꞌmaa mune̱ ku̱ꞌwá xa̱bo̱, náá numuu kajngó nathane̱ ku̱ꞌwá ikháánꞌ róꞌ. 22 Ikháánꞌ tsáánꞌ narathán rí xa̱bo̱ ra̱gíꞌmaa mubúu̱n gajmíi̱ xa̱bo̱ tsí túya̱a̱, náá numuu kajngó ikháánꞌ nathabáaꞌ ga̱jma̱a̱ꞌ xa̱bo̱ tsí tíya̱a̱ róꞌ. Ikháánꞌ tsáánꞌ narathán rí tsíni̱gua̱a̱ꞌ ene̱ tsí ra̱ꞌkháa Ana̱ꞌlóꞌ ñajúún, náá numuu kajngó nathane̱ ku̱ꞌwá ná guꞌwá dxákuíi̱n xúꞌkhue̱n róꞌ. 23 Ikháánꞌ tsáánꞌ natakúxe̱-mina̱ꞌ ga̱jma̱á numuu rí na̱ma̱ñaaꞌ xtángoo, phú natríya̱ꞌ gamakuu Ana̱ꞌlóꞌ ído̱ rí tsíthane̱-mbáníí xtángoo. 24 Numuu rí xkuaꞌnii ka̱ma naꞌthán ná i̱yi̱i̱ꞌ ajngóo Ana̱ꞌlóꞌ: «Ga̱jma̱á numalaꞌ ikháanꞌlaꞌ, xa̱bo̱ tsí ra̱ꞌkháa judío̱ ñajúún nuthan-xkawi̱i̱ꞌ ga̱jma̱á numuu Ana̱ꞌlóꞌ».*

25 Gakon máꞌ rí gíꞌdoo numuu rí ni̱tri̱gú tsina jndi, xí nathane̱-mbáníí rí naꞌthán xtángoo. I̱ndo̱ó máꞌ numuu rí, xí tsíthane̱-mbáníí xtángoo rá, asndo xómá rí na̱nguá máꞌ ꞌchá tsina jndi jaꞌnii rí xkuaꞌnii. 26 Xí mbáa xa̱bo̱ tsí ra̱jáyá tsina jndi naꞌne-mbánuu rí naꞌthán xtángoo drígo̱o̱ Moisés, asndo xó rí jayée̱ máꞌ tsina jndi jaꞌnii rí xkuaꞌnii. 27 Tsí ra̱jáyá tsina jndi ná xuyuu, jamí naꞌne-mbánuu mújúun rí naꞌthán xtángoo, ikhaa̱ maxná-máꞌáa̱n ikháánꞌ, numuu rí maske máꞌ ꞌchá tsina jndi, tsíthane̱-mbáníí rí naꞌthán xtángoo. 28 Numuu ra̱ꞌkhá rí rígu inúú naꞌne rí mbáa phú gakon rí xa̱bo̱ judío̱ ñajuun, ni máꞌ ra̱ꞌkhá tsina jndi rí phú gakon ñajuun rí na̱gu̱ma ná xuyuu xa̱bo̱. 29 Tsí phú gakon rí xa̱bo̱ judío̱ ñajuun, ikhaa̱ ñajuu̱n ne̱ ná awúún. Xúꞌkhue̱n máꞌ rí phú gakon tsina jndi ñajuun, na̱gu̱ma ne̱ ná awúun a̱kui̱in xa̱bo̱, rí naꞌne Xu̱u̱ꞌ Ana̱ꞌlóꞌ, ra̱ꞌkháa rí na̱gu̱ma ga̱jma̱á ajngóo xtángoo. Xa̱bo̱ tsí xkuaꞌnii jaꞌñúú, Ana̱ꞌlóꞌ naꞌthán rí máján ga̱jma̱á numúu̱, ra̱ꞌkhá xa̱bo̱ numbaa nuthan rí máján ga̱jma̱á numúu̱.