1 Ikhaa jngó rí xúge̱ꞌ rá, nánguá máꞌ mi̱ꞌxná-máꞌíin rí mu̱míni̱í tsí mbá ꞌnduꞌ júwa̱ꞌ ga̱jma̱á nindxu̱u̱ Krísto̱ Jesús, ikhiin tsí na̱nguá júwa̱ꞌ xómá rí nandoo xuñúú, rí júwe̱e̱ꞌ xómá rí nandoo Xu̱u̱ꞌ Ana̱ꞌlóꞌ.* 2 Numuu rí xtángawoo Xu̱u̱ꞌ Ana̱ꞌlóꞌ, tsí naꞌne rí mbu̱ꞌyalóꞌ ga̱jma̱á nindxu̱u̱ Krísto̱, neꞌne-jríñáaꞌlóꞌ ná inuu xtángawoo aꞌkhán rí naꞌne rí ma̱ja̱ñálóꞌ. 3 Táꞌngo̱o̱ xtángoo gáꞌne-jríñáaꞌlóꞌ ga̱jma̱á numuu rí nda̱a̱ ski̱ñu̱ú xa̱bo̱ numbaa rí mune̱-mbáníí ne̱. I̱ndo̱ó máꞌ Ana̱ꞌlóꞌ ni̱ꞌngo̱o̱ neꞌne-jríñáaꞌlóꞌ ído̱ rí nixuꞌmaa̱ A̱dée̱ rí ma̱nindxu̱u̱ xómá xa̱bo̱ numbaa jayu, kajngó ma̱ja̱ñúu̱ ga̱jma̱á numuu aꞌkhúún xa̱bo̱. Xkuaꞌnii neꞌne-gámbo̱o̱ Ana̱ꞌlóꞌ ski̱yu̱u̱ꞌ aꞌkhán ga̱jma̱á majñu̱u̱ xuyuu Krísto̱, 4 kajngó ma̱mba̱núu mbá xúgíí rí na̱nda̱ꞌa̱ xtángoo ga̱jma̱á nindxa̱ꞌlóꞌ ikháánꞌlóꞌ. Numuu rí nánguá máꞌ juwalóꞌ xómá rí nandalóꞌ ikháánꞌlóꞌ, rí juwalóꞌ xómá rí nandoo Xu̱u̱ꞌ Ana̱ꞌlóꞌ.

5 Tsí júwa̱ꞌ xómá rí nandúún ikhiin, i̱ndo̱ó máꞌ nu̱ndxa̱ꞌwa̱-mijnée̱ rí muni̱i̱ rí nandoo xuñúu̱. Xómáꞌ tsí júwa̱ꞌ xómá rí nandoo Xu̱u̱ꞌ Ana̱ꞌlóꞌ rá, nu̱ndxa̱ꞌwa̱-mijnée̱ rí muni̱i̱ rí nandoo Xu̱u̱ꞌ Ana̱ꞌlóꞌ. 6 Tsí i̱ndo̱ó máꞌ xtáa ma̱ꞌne rí nandoo xuyuu, ma̱ja̱ñúu̱. Xómáꞌ tsí xtáa ma̱ꞌne rí nandoo Xu̱u̱ꞌ Ana̱ꞌlóꞌ rá, mba̱ꞌyee̱ jámuu jamí ma̱xtáa̱ tsímáá. 7 Numuu rí Ana̱ꞌlóꞌ xtáa sia̱nꞌ ga̱jma̱á rí nu̱ndxa̱ꞌwa̱-mijná xa̱bo̱ mune̱, numuu rí tsíndxa̱ꞌwa̱-mijnée̱ rí mune̱-mbáníi̱ xtángawoo Ana̱ꞌlóꞌ, ni máꞌ tsíꞌngúu̱n gúne̱-mbáníi̱ ne̱. 8 Ikhaa jngó, tsí i̱ndo̱ó máꞌ júwa̱ꞌ rí mune̱ rí nandoo xuñúú, tsíyoo rí ma̱ni̱gu̱u̱ꞌ Ana̱ꞌlóꞌ gúni̱i̱ ga̱jma̱á numuu rí nuni̱i̱.

9 Xómáꞌ ikháanꞌlaꞌ rá, nánguá máꞌ juwalaꞌ xómá rí nandoo xuyalaꞌ, rí juwalaꞌ xómá rí nandoo Xu̱u̱ꞌ Ana̱ꞌlóꞌ, numuu rí Xu̱u̱ꞌ Ana̱ꞌlóꞌ xtáa ga̱jma̱á nindxa̱ꞌlaꞌ. Jamí xí mbáa na̱nguá xtáa Xu̱u̱ꞌ Krísto̱ ga̱jma̱á nindxu̱u̱, ra̱ꞌkhá xa̱bi̱i Krísto̱ ñajuun tsúꞌkhue̱n. 10 Xí Krísto̱ xtáa ná awúun a̱kia̱nꞌlaꞌ, maske máꞌ wéje̱ tsiakhe̱ rí ma̱ja̱ñúu xuyalaꞌ ga̱jma̱á numuu aꞌkhán, Xu̱u̱ꞌ Ana̱ꞌlóꞌ naꞌne rí ma̱juwalaꞌ jámuu ga̱jma̱á numuu rí Ana̱ꞌlóꞌ naꞌthán rí nánda̱a̱ máꞌ aꞌkhánlaꞌ. 11 Xu̱u̱ꞌ Ana̱ꞌlóꞌ tsí neꞌne rí mbayáa mbiꞌyuu Jesús xtáa ga̱jma̱á nindxa̱ꞌlaꞌ. Ikhaa̱ máꞌ ma̱ꞌnii̱ rí mba̱ꞌya̱a xuyalaꞌ mangáanꞌlaꞌ, ga̱jma̱á majñu̱u̱ Xu̱u̱ꞌ tsí xtáa ga̱jma̱á nindxa̱ꞌlaꞌ.

12 Ikhaa jngó, a̱ngui̱nꞌ, gíꞌmáálóꞌ ná inuu Xu̱u̱ꞌ Ana̱ꞌlóꞌ, jamí na̱nguá gíꞌmáálóꞌ ná inuu xuyalóꞌ, ikhaa jngó náxúꞌne̱lóꞌ rí nandoo ne̱. 13 Xí ikháanꞌlaꞌ juwalaꞌ xómá nandoo xuyalaꞌ, ma̱ja̱ñálaꞌ. Jamí xí ga̱jma̱á majñu̱u̱ Xu̱u̱ꞌ Ana̱ꞌlóꞌ nu̱ne̱-gámba̱ꞌlaꞌ mbá xúgíí rí xkawe̱ꞌ nandoo xuyalaꞌ, ma̱juwalaꞌ jámuu.

14 Numuu rí mbá xúgíin tsí jiꞌyá ikhúún eꞌne Xu̱u̱ꞌ Ana̱ꞌlóꞌ, tsúꞌkhue̱n ñajúún i̱ji̱in Ana̱ꞌlóꞌ. 15 Numuu rí Ana̱ꞌlóꞌ táxnálaꞌ Xu̱u̱ꞌ kajngó ma̱juwalaꞌ máꞌ xúꞌkhue̱n ná awúun ngamí mbu̱júꞌ, rí nixnálaꞌ Xu̱u̱ꞌ numuu rí niguáa̱nꞌlaꞌ kajngó ma̱nindxa̱ꞌlaꞌ i̱jii̱n. Jamí ga̱jma̱á majñu̱u̱ Xu̱u̱ꞌ nuꞌtháa̱nlóꞌ: «Táa». 16 Jmína̱a̱ꞌ máꞌ Xu̱u̱ꞌ Ana̱ꞌlóꞌ naꞌthúun a̱kia̱nꞌlóꞌ rí i̱ji̱in Ana̱ꞌlóꞌ ñajwanlóꞌ. 17 Ga̱jma̱á numuu rí i̱ji̱in Ana̱ꞌlóꞌ ñajwanlóꞌ, mu̱ꞌda̱alóꞌ rí gíꞌdoo̱ xómá rí magu̱u ne̱ Krísto̱ mangaa. I̱ndo̱ó máꞌ numuu rí xúge̱ꞌ, ndaꞌyóo rí mu̱míni̱ílóꞌ ga̱jma̱á nindxu̱u̱ Krísto̱, kajngó ma̱juwalóꞌ mangáanꞌlóꞌ ga̱jma̱á nindxu̱u̱ ná phú tsímáá xtáa̱ ikhaa̱.

18 Ikhúúnꞌ nda̱yo̱o̱ mújúnꞌ rí ni na̱nguá mba̱a̱ jamínu̱ꞌ rí nanújngalóꞌ xúge̱ꞌ xó rí phú mba̱a̱ rí tsímáá maxnálóꞌ Ana̱ꞌlóꞌ nda̱wa̱á. 19 Mbá xúgíí rí ni̱gu̱ma-ku̱maa ná numbaa ríge̱ꞌ maphú gíꞌthu̱u̱n mba̱ꞌyoo mbiꞌi ído̱ rí Ana̱ꞌlóꞌ masngájmii tsí phú gakon rí ñajúún i̱jii̱n. 20 Numuu rí mbá xúgíí rí ni̱gu̱ma-ku̱maa ná numbaa ríge̱ꞌ waꞌxná-máꞌáan ne̱, kajngó ma̱ꞌne rí nda̱a̱ mbá jayu numuu gáríga̱ ne̱, ra̱ꞌkhá numuu rí ikhaa ne̱ ndiyoo, rí ga̱jma̱á numuu rí xkuaꞌnii ndiꞌyoo Ana̱ꞌlóꞌ. I̱ndo̱ó máꞌ numuu rí ninguanúu ne̱ rí ma̱gi̱ꞌthu̱u̱n ga̱jma̱á mbá jañii a̱kui̱in ne̱, 21 numuu rí ma̱ga̱nú mbiꞌi rí ma̱jríya̱a̱ꞌ ne̱ inuu rí waꞌxná-máꞌáan ne̱. A̱ꞌkhue̱n rí nánguá ma̱ꞌchúu ne̱, kajngó ma̱ꞌdxu a̱kui̱in ne̱ mangaa ído̱ rí maphú tsímáá nijáwíin i̱ji̱in Ana̱ꞌlóꞌ.

22 Numuu nduꞌyáálóꞌ rí asndo xúge̱ꞌ, mbá xúgíí rí ni̱gu̱ma-ku̱maa ná numbaa ríge̱ꞌ naguwan ne̱. Naꞌkhui̱i̱ ne̱ xómá naꞌkho̱ awúun mbáa a̱ꞌgo̱ tsí inu ma̱ꞌne-xuajen. 23 Jamí ra̱ꞌkhá máꞌ i̱ndo̱ó rí ni̱gu̱ma-ku̱maa ná numbaa ríge̱ꞌ, rí ikháánꞌlóꞌ máꞌ mangaa tsáanꞌ ni̱dríguíilóꞌ ginii jayu Xu̱u̱ꞌ Ana̱ꞌlóꞌ, nu̱guwanlóꞌ ná awúun a̱kia̱nꞌlóꞌ, awúun mbiꞌi rí guáꞌthi̱ínlóꞌ rí Ana̱ꞌlóꞌ maguáa̱nꞌlóꞌ rí ma̱nindxa̱ꞌlóꞌ i̱jii̱n, ído̱ rí ma̱ꞌne-jríya̱a̱ꞌ mbá jayu xuyalóꞌ ná inuu mbá xúgíí. 24 Numuu rí ikhaa máꞌ numuu rúꞌkhue̱n ni̱gu̱ma-jríñáaꞌlóꞌ, rí ga̱jma̱á mbá jañii a̱kia̱nꞌlóꞌ mu̱waꞌthi̱ínlóꞌ rí ma̱jríya̱a̱ꞌ mbá jayu xuyalóꞌ. Jamí xí xóó na̱nguá iꞌyáálóꞌ rí ga̱jma̱á mbá jañii a̱kia̱nꞌlóꞌ guáꞌthi̱ínlóꞌ, ga̱jma̱á mbá jañii a̱kia̱nꞌlóꞌ guáꞌthi̱ínlóꞌ ne̱. Numuu rí ndawa̱a̱ máꞌ tsí gíꞌthu̱u̱n rí ndaꞌyoo máꞌ ga̱jma̱á iduu. 25 Jamí xí guáꞌthi̱ínlóꞌ mbá rí xóó tsíkujma mbu̱ꞌyáálóꞌ, tsíꞌne níꞌnga̱ꞌlóꞌ rí mu̱waꞌthi̱ínlóꞌ ne̱.

26 Xúꞌkhue̱n máꞌ mangaa nambáyálóꞌ Xu̱u̱ꞌ Ana̱ꞌlóꞌ numuu rí wabáanꞌlóꞌ. Tsíma̱ñalóꞌ gúꞌthán-jáñíí Ana̱ꞌlóꞌ xómá phú jaꞌyoo, xómáꞌ Xu̱u̱ꞌ Ana̱ꞌlóꞌ naꞌthán-kháan ga̱jma̱á numalóꞌ, ga̱jma̱á a̱ꞌwá rí tsíyoo mi̱ꞌthán ga̱jma̱á ajngáa. 27 Xómáꞌ Ana̱ꞌlóꞌ, tsí naꞌne-nuwiin máꞌ a̱kia̱nꞌlóꞌ rá, ndaꞌyoo̱ máꞌ dí ñajuun naꞌthán Xu̱u̱ꞌ, numuu rí Xu̱u̱ꞌ Ana̱ꞌlóꞌ naꞌthán kháan numalóꞌ xómá rí nandoo Ana̱ꞌlóꞌ.

28 Jamí nduꞌyáálóꞌ máꞌ rí mbá xúgíí rí naríga̱, nambáñúú ne̱ tsí nandúún juyáá Ana̱ꞌlóꞌ, ikhiin máꞌ tsí Ana̱ꞌlóꞌ nindxaꞌwúún rí ma̱nindxu̱ún xómá niꞌgí-mine̱e̱ꞌ ikhaa̱. 29 Numuu rí Ana̱ꞌlóꞌ asndo nákhí máꞌ ginii neꞌne-nuwii̱n tsí ma̱nindxu̱ún xa̱bii̱, jamí asndo nákhí máꞌ ginii niꞌgí-mine̱e̱ꞌ rí tsíge̱ꞌ ma̱nindxu̱ún xómá jaꞌnii A̱dée̱ mangaa, kajngó ikhaa̱ ma̱nindxu̱u̱ ada̱ ginii inúú mbaꞌiin a̱nguii̱n. 30 Ikhiin máꞌ tsí asndo nákhí ginii niꞌgí-mina̱ꞌ Ana̱ꞌlóꞌ rí ma̱nindxu̱ún i̱ji̱in, ikhiin máꞌ tsíge̱ꞌ nindxaꞌwúu̱n mangaa. Jamí ikhiin máꞌ tsí nindxaꞌwúu̱n, ikhiin máꞌ tsíge̱ꞌ niꞌthée̱n rí nánda̱a̱ aꞌkhúún mangaa. Jamí ikhiin máꞌ tsí niꞌthée̱n rí nánda̱a̱ aꞌkhúún, ikhiin máꞌ tsíge̱ꞌ niꞌnii̱ rí ma̱ju̱wá ga̱jma̱á nindxu̱u̱ ná phú tsímáá xtáa̱ ikhaa̱.

31 Dí gúꞌthánlóꞌ xúꞌkhue̱n rá. Xí Ana̱ꞌlóꞌ xtáa ga̱jma̱á nindxa̱ꞌlóꞌ, tsáa gáꞌngo̱o̱ ma̱ꞌne ga̱jma̱á nindxa̱ꞌlóꞌ xúꞌkhue̱n rá. 32 Ana̱ꞌlóꞌ táꞌne xtándúu̱ ni máꞌ ga̱jma̱á numuu asndo jmína̱a̱ꞌ A̱dée̱, a̱ꞌkhue̱n gakon nixnáxi̱i̱ kajngó ma̱ja̱ñúu̱ ga̱jma̱á numalóꞌ mbá xúgiáanꞌlóꞌ. Á ma̱xáxnálóꞌ ga̱jma̱á nindxu̱u̱ Krísto̱ mbá xúgíí rí gíꞌdoo̱ mangaa rá. 33 Ana̱ꞌlóꞌ ñajuun tsí naꞌthán rí nánda̱a̱ aꞌkhánlóꞌ tsáanꞌ xa̱bii̱ tsí niraꞌwíi̱n ñajwanlóꞌ, tsáa gáꞌngo̱o̱ maꞌthán rí ríga̱ aꞌkhánlóꞌ xúꞌkhue̱n rá. 34 Ndawa̱a̱ tsí ma̱ꞌngo̱o̱ maxná-máꞌáanꞌlóꞌ rí mu̱míni̱ílóꞌ, numuu rí Krísto̱ nijáñuu ga̱jma̱á numalóꞌ. Ra̱ꞌkhá máꞌ i̱ndo̱ó rúꞌkhue̱n, rí ndiyáa̱ mbiꞌyuu̱ mangaa, ꞌgíi̱ ná ñawún mújúun Ana̱ꞌlóꞌ, jamí naꞌthán-jáñuu̱ Ana̱ꞌlóꞌ ga̱jma̱á numalóꞌ mangaa. 35 Tsáa gáꞌngo̱o̱ ma̱ꞌne-tsíngua̱ꞌlóꞌ inuu rí nandoo jaꞌyalóꞌ Krísto̱ róꞌ. Á ma̱ꞌngo̱o̱ jamínu̱ꞌ dxe̱ꞌ, o gaꞌkho̱ dxe̱ꞌ, o rí nune̱-ngínáaꞌlóꞌ xa̱bo̱ dxe̱ꞌ, o rí na̱xki̱dxa̱ꞌlóꞌ dxe̱ꞌ, o rí nda̱a̱ xtíñalóꞌ dxe̱ꞌ, o rí ngamí ma̱ja̱ñálóꞌ dxe̱ꞌ, o rí ma̱ja̱ñálóꞌ dxe̱ꞌ. 36 Xómá ka̱ma naꞌthán ná i̱yi̱i̱ꞌ ajngóo Ana̱ꞌlóꞌ:

«Ga̱jma̱á numaaꞌ ikháánꞌ najáñaxo̱ꞌ mbámbá mbiꞌi.

Nuña̱ꞌxo̱ꞌ xa̱bo̱ xómá xu̱kú mogo̱ tsí na̱ka̱ jiꞌdiin rí ma̱ja̱ñúú».*

37 Xómáꞌ ikháánꞌlóꞌ, ído̱ rí juwalóꞌ awúun mbá xúgíí gaꞌkho̱ ríge̱ꞌ, i̱tha̱án máꞌ nanújngo-rámuu rí na̱ꞌnga̱ꞌlóꞌ ga̱jma̱á majñu̱u̱ tsí ndiyoo jaꞌyalóꞌ. 38 Ikhaa jngó, ikhúúnꞌ nda̱yo̱o̱ mújúnꞌ rí nda̱a̱ nimbá rí ma̱ꞌngo̱o̱ ma̱ꞌne-tsíngua̱ꞌlóꞌ inuu rí nandoo Ana̱ꞌlóꞌ jaꞌyalóꞌ, ni máꞌ rí ma̱ja̱ñálóꞌ, ni máꞌ rí juwa nduꞌyalóꞌ, ni máꞌ ánje̱l, ni máꞌ nimbá inii tsiakhe̱, ni máꞌ rí ríga̱ xúge̱ꞌ, ni máꞌ rí ma̱ri̱gá nda̱wa̱á. 39 Ni máꞌ tsiakhe̱ rí ríga̱ ná i̱tha̱án tsída̱ꞌ, ni máꞌ tsiakhe̱ rí ríga̱ ná me̱jno̱ꞌ, ni máꞌ nimbá rí ni̱gu̱ma-ku̱maa, ma̱xáꞌngo̱o̱ ma̱ꞌne-tsíngua̱ꞌlóꞌ inuu rí nandoo Ana̱ꞌlóꞌ jaꞌyalóꞌ ga̱jma̱á majñu̱u̱ Tátiálóꞌ Krísto̱ Jesús.