1 I’sa yuşan hı’ı ç’əvxhamee, Galileyeençe qığeç’u İordan damayne şargılyne Yahudeyayeeqa ayk’an. 2 Mang’uqab qihna geeb insanar qavayle. I’see manbı maa’ab yug qaa’anbı.

3 I’saysqa fariseyar* qeepxha Mana siliys ı’xəsva qiyghanan:

– Nişil-alla qariy adamiys cuna xhunaşşe qaxiyles yeexheye?

4 I’see manbışis inəxdun alidghıniy qele:

– Nya’a, şu qətqı' dişde, İpxhıning’vee ts’eppiykecab «adamiyiy zəiyfa ipxhın»*. 5 «Mançil-alla adamee dekkiy yed g’alyabaççe, xhunaşşeyka eyxhe. Adamiyiy xhunaşşe sa vuxhes»*. 6 Manbı q’öyre deş, sa vooxhe. Mançil-allad hasre Allahee at’iq’an hı’iyn insanaaşe curma’acen.

7 Fariseyaaşe I’sayk’le eyhen:

– Nya’a manke Mısee insanaaşik’le uvhu: «Xhunaşşeyne xılyaqa qaxiyvunava kağız huvu, qaxiyles yeexhe»?

8 I’see manbışik’le eyhen:

– Vuşun yik’bı g’ayebı xhinneva Mısee şosqa xhunaşşer qaxuvles hapsır. Ts’etta məxüd deşdiy vod. 9 Zımee şok’le eyhen, şavaayiy zinayle ğayrı menne karal-alla cuna xhunaşşe qaxiyvu, merna xhunaşşe hey’ı, mana zina hı’ına xhinnecar eyxhe.

10 Telebabışe I’sayk’le eyhen:

– Adamiynemee xhunaşşe hiveeciy manimee dağamın karxhee, xhunaşşe hidey’iycad mançile yugda eyxhe.

11 I’see manbışik’le eyhen:

– Zı man uvhiyn gırgıng’usse ha’as əxəs deş. Şavusiy man Allahee huvu, mang’usse ha’as əxəs. 12 Məxbınbı vobınbı, yedike vuxhayng’acab xadimba vuxha, məxbınbıb vobınbı, insanaaşe məxüb qav’u, sassanbışed Xəybışeene Paççahiyvalinemee xhunaşşe hee’ecar deş. Hasre şavusseyiy əxə, mang’veeyid he’ecen.

13 Mane gahıl insanaaşe I’saysqa uşaxar abayle, Mang’vee manbışilqa xıl gixhxhı, düə hee’ecenva. Telebabışe manbışik’le cuvabbı eyhe ıxha. 14 I’seeme manbışik’le eyhen:

– Uşaxar Zasqa qeepxhes havaasre! Manbışda yəq uvqumaaqqa! Xəybışeena Paççahiyvalla məxbınbışda vob.

15 I’see manbışilqa xıl gixhxhı, düə hav’u, mançe ayk’anna.

16 Sa insan I’saysqa arı qiyghanan:

– Mə’əllim, zı nəxbına yugvalane haa’as vukkan, zaqa gırgıne gahbışisda ı’mı’r vuxhecen?

17 I’see mang’uk’le eyhen:

– Nya’a ğu Zake yugvaline hək’ee qidghın ha’a? Yugna Sa Allah vorna. Vas məxbına ı’mı’r vukkanxhee, Mang’une əmrbışil k’ırı alixhxhı, Mang’vee eyhen he’e.

18 Mane insanee I’sayke «Nene əmrbışilyneva?» qidghın ha’a.

I’see mang’uk’le eyhen:

– Gimek’a, zina hıma’a, sixbı hıma’a, hidi’iyn karaı’dəən kar insanne gardanaqa gimiyxhe, 19 dekkısiy yedis hı’rmat gyuvxhe, yiğne k’anena ıkkiykne, nəxüriy vas ğu ıkkan.

20 «Zı man gırgın ha’anva, medın zas hucooyiy g’idiyxharva?» mane mek’vne insanee I’sayke qiyghan.

21 I’see eyhen:

– Vas yiğın gırgın işbı yugunbı ıxha ıkkanxhee, hark’ın yiğın gırgın kar massa hele. Qiyğad çike ıxhayn pıl kar deşinbışis bit’al he’e. Manke vaqa xəybışee xaziyna vuxhes. Mançile qiyğa Zasqa sak’le, Zaqar qihna qora.

22 Mane mek’vne insanıqa geed kar ıxhal-alla, I’see uvhiyn g’ayxhımee, mang’vee aq’va qı’ı mançe ayk’anna.

23 Mançile qiyğa I’see telebabışik’le eyhen:

– Zı şok’le qotkuyn eyhe, karnane insanın Xəybışeene Paççahiyvaleeqa ikkeç’uy dağamda vod. 24 Zı meed şok’le eyhen, devayn veebayne q’əç’eençe ılğevç’uy, karnane insanın Allahne Paççahiyvaleeqa ikkeç’uyle vaxxariyda vod.

25 Man I’see eyhen g’ayxhı, telebabı mançile matteebaxhenbıcab. Manbışe qiyghanan:

– Şavussene manke g’attixhanas əxəs?

26 I’sa manbışiqa ilyakkı eyhen:

– Man insanısse ha’as əxəs deş, Allahısseme ha’as dəxən kar deşin.

27 Pyoturee I’sayk’le eyhen:

– Haane, şi gırgın g’aletçu, Vaqab qihna qöö, mançil-alla şas hucoone ixhes?

28 I’see manbışis inəxdun alidghıniy qele:

– Zı şok’le qotkuyn eyhe, dyunye ts’ed qıxhamee, İnsanna Dix* Cune nurune taxtıl gyu’urmee, şu, Zaqab qihna qabıynbı İzrailyna yits’ıq’öble (12) nasıl vuk’lek vukkeesva yits’ıq’öne taxtıl gyuv’aras. 29 Şavaayiy Yizdemee xaybı, çocar, yiçubı, dek, yed, uşaxar, con cigabı g’ali’ı məxrıng’us vəş yəqqees mançile geed heles, gırgıne gahbışisda ı’mı’rıb mang’una vuxhes.

30 Tseppiynbışin gellesınbı, nekke qiyğiynbı vuxhes, nekke qiyğiynbıb tseppiynbı vuxhes.