1 Manbı İyerusalimısqa hiviyxharne cigee, Zeytunne suvaysneene Bet-Fage eyhene xiveeqa qavayle. Mançe I'see q'öyre teleba g'axuvu, 2 eyhen:

– Ögilyne xiveeqa havak'ne. Şok'le maqa ikkepç'ımeecab, avt'ulna əməleyiy çina q'udux g'avces. Manbı Zasqa alle. 3 Şoke şavaamecad «Hucoone ha'ava?» qiyghıneene, «Manbı Xərıng'usqa ıkkanva» eyhe. Mane insanee mankecad şosqa ıkkees hassarasınbı.

4 Man karbı peyğambaree otk'unin xhinne eyxhe:

5 «İyerusalimeene milletık'le eyhe:

Şosqa vuşda Paççah qöö vor.

Mang'vee Vucecar Vuc axtıra ıkkeka deş,

Mana xev ıxı'yxəne əməlel,

Əməleyne q'uduxul gyu'ur qarayle».*

6 Telebabı hapk'ın gırgın I'see uvhiyn xhinne ha'a. 7 Əməleyiy çina q'udux qabı, çilqa con tanalinbı adaççe. Mançil ooğançer I'sa giy'ar. 8 Maqa sabıyne gellesınbışe tanalinbı g'ayşu, yəqqı'lqa gyadaççe, avxuynbışed yivaaşin bıtağbı gyatxı, yəqqı'lqa gyoka. 9 I'sayle ögil, yı'q'əl əlyhəənbışe ts'irbı ha'a inəxüd eyhe ıxha:

– Hosanna* Davudne Dixes!*

Rəbbine doyuka Qarıyng'us şukur vuxhenava!

Nekke axtıne xəybışee hosanna! *

10 I'sa İyerusalimqa ikkeç'umee «İna Vuşuneva?» gırgına şaharcab g'elil qooxhe. 11 Cəmə'ətınıd eyhe ıxha:

– İna Galileyayne Nazaret şahareençena I'sa Peyğambar vor.

12 I'sa Allahne Xaane məhleeqa ikkeç'u, maa kar alişşu-massa helen gırgınbı g'e'eebaşenbı. Mang'vee pılbı badal ha'anbışin istolbı, qı'nerker massa helenbışin iskambı alytik'al hı'ı, 13 eyhen:

– «Yizde Xaan do düəyn xav ixhesva»* otk'un, şume man g'ulduraaşine akvaalqa sak'al hı'ı.

14 Mang'vee Allahne Xaane məhlee Cusqa qeepxhayn k'aanbıyiy bı'rq'ı'nbı yug qaa'anbı. 15 Uşaxaaşe Allahne Xaane məhlee «Davudne Dixes hosannava!» ts'irbı ha'a. Kaahinaaşine ç'ak'ınbışik'leyiy Q'aanunne mə'əllimaaşik'le Mang'vee hı'iyn əlaamatbıyiy uşaxaaşe ha'an man ts'irbı g'ayxhımee, manbışda I'salqa qəl avqaaqqa. 16 Manbışe I'sayk'le eyhen:

– Manbışe eyhen Vak'le g'iyxheye?

I'seeyid manbışik'le eyhen:

– Ho'o. Nya'a şu qətqı' dişde: «Uşaxaaşeyiy yedik gyooqanbışe Ğu axtı qa'as»*?

17 Mang'vee manbı g'alyav'u, şahareençe qığeç'u Bet-Anya eyhene cigeeqa ayk'an. Xəmder maa axva.

18 Qinne yiğıl miç'eer, I'sa şahareeqa siyk'almee, mısniy qıxha vor. 19 Yəqqı'ne mıglek Mang'uk'le inciliyna yiv g'avcu, çisqa qexhe. Mang'uk'le yivel t'eleyle ğayrı vuççud ivdeeke g'acumee, I'see yiveyk'le eyhen:

– Hasre val sayib meyva ılymaalecen!

İnciliyna yiv mankecab qooqqana. 20 Telebabışik'le man ıxhayn g'acu, matteepxha eyhen:

– Nimee zaarabane inciliyna yiv qooqqu?

21 I'see manbışis inəxdun alidghıniy qele:

– Zı şok'le hək'edacad eyhe, şu şakkee idyavxu yik'eençe inyam he'eene, şene inciliyne yivene vuk'lelqa qadıynçiled hexxanbı şosse ha'as əxəs. Şu ine suvayk'lecad «Oza quvxha, deryaheeqa g'ook'le!» uvhee, həməxüdıd ixhesın. 22 Vuşde yik'ee inyam vodxhee, düə haa'amee hucooyiy heqqı man gırgın ixhesın.

23 I'sa Allahne Xaane məhleeqa arı, maa insanaaşis xət qa'amee, Mang'usqa kaahinaaşin ç'ak'ınbıyiy ağsaqqalar qeepxha eyhen:

– Şavaane Vasqa man işbı ha'as hassır? Şavaane Ğu Xərna hı'ı?

24 I'see manbışis inəxdun alidghıniy qele:

– Zınad şoke sa kar qiyghanas, şu Zas alidghıniy quveene, Zınad Şavaayiy Zasqa man işbı ha'as hassırva şok'le eyhesın. 25 Yəhyeysqa insanaaşis gicəpxı'ybı alyaat'a'as Şavaaniy hassır, Allaheenyiy insanaaşeniy?

Manbışe sana-sang'uk'le eyhe ıxha:

– Şi «Allaheeva» uvhee, «Nya'a şu mang'ulqa inyam hidi'ıva?» eyhes. 26 «İnsanaaşeva» uvheeyid, cəmə'ətıle qəvəyq'ən. Gırgıng'vee Yəhye peyğambarvaniy eyhe.

27 Manbışe I'sayk'le «Şak'le ats'a deşva» eyhe. I'seeyid manbışik'le eyhen:

– Zınad Şavaayiy Zasqa man işbı ha'as hassırva şok'le eyhes deş.

28 I'see meed eyhen:

– Şu inçik'le hucoova eyheyiy: Sa adamiyqa q'öyre dixniy vor. Mana dixbışde sang'usqa qıxha, «Dix, g'iyna hark'ın t'ımılene bağee iş he'eva» eyhe. 29 Ts'etta dixee «Zas ıkkan deşva» eyhe. Qiyğalemee fıkır badal hav'u, hayk'annacar. 30 Mana insan q'ör'esde dixesqa qıxha, manva eyhe. Q'ör'esde dixeeme «Xərna, ı'qqənava» uvhu hayk'an deş. 31 Mane q'öng'üne neng'veene dekkıs ıkkanan ha'a?

Manbışe «Ts'erriyng'veeva» eyhe. I'see manbışik'le eyhen:

– Zı şok'le hək'edacad eyhe, nalok'bı sa'anbıyiy* gocebı şole ögil Allahne Paççahiyvaleeqa əlyhəə vob. 32 Yəhye şosqa qopkuna yəq haagvasniy qarı. Şumee mang'ulqa inyam hı'ı deş, nalok'bı sa'anbışeyiy gocebışemee mang'ulqa inyam hı'iyn. Şok'le man gırgın g'acuyled qiyğa, fıkır badal hav'u mang'ulqa inyam hı'ı deş.

33 – Sa menne misaalal k'ırı alixhxhe: Sa xaane iyesee t'ımıllığ ezu, çine hiqiy-allad cabır alya'a. Qiyğad mane cabırıke ad t'ımıl hoyç'anan ciga hı'ı, k'aneb hiqiy-allan ciga g'acecenva talvar alyaa'a. Qiyğad man t'ımıllığ arendays menne bağbanaaşisqa quvu, vucur menne ölkeeqa ayk'an. 34 Şagav sa'ana gah hipxhırmee, mang'vee cun nukarar culqa gyooxhana pay alyapt'asva mane bağbanaaşisqa g'ıxoole. 35 Mane bağbanaaşeme maqa abıyne mang'une nukaraaşine vuk'lelqa yiğbı exa. Manbışin sassabı gyootanbı, sassabı gyabat'anbı, sassabıb g'ayeqqa hoole. 36 Manesa nəqqee xaane iyesee sık'ılbab geeb nukarar g'ıxoole. Bağbanaaşeme manbışikıd, cole ögil abıyne nukaraaşik hı'iyn ha'a. 37 Nekke qiyğa mang'vee manbışisqa dix g'ıxele: «Dixelexheeyid manbışis naş qexheva» uvhu. 38 Bağbanaaşik'le dix g'acumee, manbışe sana-sang'uk'le eyhen: «Dekkın gırgın kar ing'us axvas. Qudoora, manar gik'as, şascad axvecen». 39 Manbışe mana aqqı, t'ımıllığeençe qığavhu, gek'ana. 40 Bağına iyesiy arıyng'a, mang'vee mane bağbaaşik hucooniyxan ha'as?

41 Manbışe I'sayk'le eyhen:

– Mang'vee manbı əq'üba hoole-hoole gyapt'as. Qiyğad cun t'ımılen bağ mebınbışisqa arendays qeles, şagavbı hiyxharne gahıl culqa gyooxhana pay manbışe qevlecenva.

42 I'see manbışik'le eyhen:

– Nya'a şu Muq'addasne Otk'uniybışee in qətqı' dişde:

«Ustadaaşe dağepçina g'aye

nekke kara əəne vutteeqa gyuvxhuyne g'ayelqa sapk'ıl.

Mana Rəbbina iş vuxha,

şi mançile ghalybı aaqı avxu.»*

43 Zı mançil-alla şok'le eyhe, Allahna Paççahiyvalla şosse g'avşu, Cun şagav hixhara'asde menne milletısqa qevles. 44 Mane g'ayelqa qutyork'ulyung'uke xüvəbı ixhes, şavulqayiy mana g'a'aypxhıb hoç'anasda.

45 Kaahinaaşine ç'ak'ınbışik'leyiy fariseyaaşik'le* Mang'vee ts'ıts'an misaalabı g'ayxhımee, manbışilqa hiyxharan, Mang'vee cone hək'ee vod eyheva. 46 Mançil-alla manbışis Mana aqqas ıkkiykıneeyir, milletıle qəvəyq'ən aaxvanbı. Milletık'ler I'sa peyğambar xhinneniy ats'a.