1 Miç'eed qıxhamee, gırgıne kaahinaaşine ç'ak'ınbışeyiy milletne ağsaqqalaaşe I'sa gik'u ak'an ha'as ıkkanva eyhe. 2 Manbışe I'sayn xıl ayt'ıl, Roomeençe xərna xhinne g'axuvuyne Pilatne* xılyaqa qele.

3 I'sa merıng'une xılyaqa quvuyne Yahudayk'le Mana gik'as ıkkan g'acumee, mang'us vucee hı'iynçile naş qexhe. Vucee alyaat'uyn xhebts'al nuk'ra kaahinaaşine ç'ak'ınbışisqayiy ağsaqqalaaşisqa qadı, 4 «Zı bınah hav'u, taxsir deşda İnsan gik'asva vuşde xılyaqa quvuva» eyhe. Manbışeme mang'uk'le «Mançike şas hucoone? Vak'le ats'ava» eyhe.

5 Yahudee vucee mane işil-alla alyaat'uyn pıl Allahne Xaa dağı'ı, mançe ark'ın vuceecar-vuc givayxanna. 6 Kaahinaaşine ç'ak'ınbışe mang'vee dağı'iyn pıl sı'ı eyhen:

– İna ebake quvuna q'iymat vuxhayke, Allahne Xaane q'utyeeqa gyuvxhes vuxhes deş.

7 Manbışe conecab əree gaf hav'u, mane pılıke menne cigeençe qabıynbı k'eepxhesın, nyuq'vneke k'olabı ha'ang'un çol ileşşe. 8 Mançil-allad, mane cigayk'le g'iyniyne yiğılqamee* «eban çolva» eyhe. 9 İnəxüd Yeremiya peyğambaree otk'unin xhinne eyxhe: «İzrailybışe Mang'us gyuvxhuna q'iymat, xhebts'al nuk'ra, manbışe alyapt'ı 10 mançike k'olabı ha'ang'un çol ileşşe. Manva zak'le Rəbbeeniy uvhu».

11 I'sa Pilatısqa, mane cigayne xərıng'usqa arımee, mang'vee I'sayke qiyghanan:

– Yahudeeşina Paççah Ğune?

I'seeyid mang'uk'le «Ğucad məxüd eyheva» eyhe. 12 Kaahinaaşine ç'ak'ınbışeyiy ağsaqqalaaşe Mang'une gardanaqa taxsir giyxhemee, I'see nıq'cad qığayhe deş. 13 Manke Pilatee Mang'uke qiyghanan:

– Yiğne gardanaqa giyxhenmeen karbı Vak'le g'iyxhe dişee?

14 I'see mang'une nenecad cuvabıs alidghıniy qele deş. Mançile Pilat geer mattexhena.

15 Gırgıne Peesaxne bayrambışil, mane cigayne xərıng'vee, Pilatee sa aqqına insan g'ekkan ədatniy vod. Məxrına insan cəmə'ətıniy g'əxəna. 16 Mane yiğbışil sa qıvaats'ına, I'sa Barabba eyhena insan aqqı eyxhe. 17 Mançil-allad millet sacigeeqa sadımee, Pilatee qiyghanan:

– Şos zı vuşu g'aykkıne ıkkan? I'sa Barabbane deşxhee, Masihva eyhena I'sane?

18 Mang'uk'le ats'anniy, manbışe I'sa paxılıyvalin cune xılyaqa quvuva. 19 Pilat cune taxtıl gyu'urmee, mang'une xhunaşşee mang'usqa ina xabar ana insan g'ıxele:

– Mane qorkune İnsanıkana vaqa iş mooxhecen, g'iyna zı nik'ek, Mang'unemee geeb əq'üba opxhun.

20 Kaahinaaşine ç'ak'ınbışeyiy ağsaqqalaaşe millet mizel aqqı, manbışe Barabba g'aykkeva, I'sar gik'eva eyhecenva. 21 Pilatee manbışike qiyghanan:

– Zı vuşdemee q'öng'una nenane g'aykke?

Manbışed eyhen:

– Barabba!

22 Pilatee manbışike qiyghan:

– Masihva eyhene I'sayk hucoo he'evane?

Manbışde gırgıng'vee eyhe

– Çarmıxılqa ts'ıts'e'e!

23 Pilatee qiyghan:

– Nişil-allane? Hucoone Mang'vee qəlasın hı'ı?

Milletınmee sık'ılbab xəbna ts'ir haa'a:

– Çarmıxılqa ts'ıts'e'e!

24 Pilatık'le cune xılençe vuççud qüdöö, millet sık'ıldad g'elil qexhe g'acumee, mang'vee xhyan alyaat'u milletne ögil xıleppı hodğul eyhen:

– Şok'lecad g'ecen, Mang'uke k'yapk'ıyne ebal-alla zalqa taxsir deşin.

25 Milletıncad mang'us inəxdın alidghıniy qele:

– Mang'uke k'yapk'ınne ebal-alla şinayiy yişde uşaxaaşe cuvab qeles!

26 Manke Pilatee manbışdemee Barabba g'aykka'ana. I'sar çümqbı ı'xı', çarmıxılqa ts'ıts'a'as qeleva eyhe.

27 Eskeraaşer I'sa Pilatne sarayeeqa qıkkekka. Maa'ad Mang'une vuk'lelqa legioncad sadayle. 28 Manbışe Mang'ule tanalinbı qakki'ı, Mang'ulqa ç'əran p'laş alya'a. 29 Zazalxumbışike tac hootxur, vuk'lelqa gyavhu, sağne xılyaqad q'amış hele. Qiyğab q'aratsabışil gyuv'ur «Yahudeeşine paççahıs salam vuxhenava!» uvhu, Mana demalqa giyxhe. 30 Mang'us tyubı ı'xiyxə, q'amış alyapt'ı, vuk'lelek'ena üvxiyxə. 31 Mana demalqa gixhxhıyle qiyğa, Mang'ulyun p'laş g'avşu tanalqa Cuncad karbıd ali'ı çarmıxılqa ts'ıts'a'asva g'aqa qığayhe.

32 Manbı g'aqa qı'ğəəng'ə, manbışisqa Şimon donana Kireneençena sa insan qızaxxa. Eskeraaşe mang'usqa I'sa givaxanasın çarmıx haqqas ilekka. 33 Golgota donane cigeeqa qavayle. Golgota «vuk'lena bark'v» eyhen vodun. 34 Mang'us ödüka alikkı'iyn çaxır hele. I'see man ghalik set'umee, ulyoğas ıkkiykan deş.

35 Eskeraaşe Mana çarmıxılqa ts'ıts'ı'iyle qiyğa, çöp k'eççu, Mang'un tanalinbı cone əree qa'a. 36 Qiyğab maa gyuv'ur Mang'uqa ilyaaka. 37 Vuk'lel ooqad «Yahudeeşina Paççah I'sa haaneva», mana nişil-allayiy çarmıxılqa ts'ıts'ı'ıva otk'un gixhxhı ıxha. 38 Mane gahıl I'sayka sacigee, Mang'une sağıliy solul q'öyre g'uldur çarmıxılqa ts'ıts'aa'a.

39 K'anençe ı'lğəəmbışe vuk'ulybı g'uvoyxhar, Mang'uk'le cuvabbı eyhe ıxha. 40 «Allahın Xav qottul, xhebne yiğee alya'ana! Ğu Allahna Dixxhee, çarmıxıle giç'e, Ğucar Ğu g'attixhan he'eva!» eyhe ıxha.

41 Kaahinaaşine ç'ak'ınbışer, Q'aanunne mə'əllimaaşer, ağsaqqalaaşer I'sa demalqa gixhxhı eyhe ıxha:

42 – Mebınbıniy g'attivxhan haa'a, Vucme g'attixhan ha'as əxə deş! İzrailyna Paççah vorna, hasre həşde çarmıxıle giç'ecen, şinad Cus inyam ha'as. 43 Mang'vee yı'q' Allahılqaniy qizzır, Allahısır Mana ıkkanxhee, hasre g'attixhan he'ecen. Nya'a Mang'vee «Vuc Allahna Dixvaniy» eyhen!

44 I'sayka sacigee çarmıxılqa ts'ıts'av'uyne g'ulduraaşed I'sayk'le həməxdun cuvabbı uvhu.

45 Yı'q'ı'hı'le sə'ət xhebınçilqamee ç'iyeyn aq'va miç'ax qexhe. 46 Sə'ət xheyible vooxhemee, I'see ts'irıka eyhen:

– Eli, Eli, lema sabaxtani? (İn «Yizda Allah, Yizda Allah, nya'a Ğu Zı g'alerçuva?»* eyhen vodun.)

47 Maa k'ane ulyobzurne sabaranbışik'le man g'ayxhı, eyhen:

– İng'vee İlyas peyğambarır qoyt'al.

48 Manbışda sa mankecar g'adarxhun, gupk'a alyaat'u ç'ürç'üməne çaxıreeqa k'yoq'u, q'amışilqa qı'ı, Mang'une ghalesqa qaa'a, ulyoğecenva. 49 Mansanbışemee eyhe ıxha:

– Mana Culer-alqa g'alerçe. İlyaakas, İlyasee arı, Mana g'attixhan ha'asee?

50 I'see meeb xəbna ts'ir hav'umee, nafas qığeç'en. 51 Mane gahıl Allahne Xaa'ab gyuvapxınna örtyug ooğançe avqamee qıt'aaxı, q'öne cigeeqa qooxhe*. Ç'iyebı ı'ğiykar, ganzbı q'öne cigeeqa qeedaxhe. 52 Nyaq'vbı çiled-alqa aaqı, maabın gellesın qopkuyn insanar suğoots'anbı. 53 Manbı I'sa üç'ür qıxhayle qiyğa, nyaq'vbışeençe qığeepç'ı muq'addasne şahareeqa, İyerusalimeeqa ikkeebaç'e. Maa'ab manbı xılece insanaaşik'le g'ooce.

54 I'sayne vuk'lel oğa ulyorzulyne k'omandirık'leyiy eskeraaşik'le ç'iyebı ı'ğiykar, maa eyxhen karbı g'acumee, manbı mançile it'umba qəpq'ı'n, «Hək'erar, Mana Allahna Dix ooxhurva!» eyhe.

55 Maa'ab əq'ənançe ilyaakan xılece yedarıb vuxhaynbı. Manbı Galileyeençecab I'sayqab qihna, Mang'us g'ullux haa'as qöönbı vuxha. 56 Maa'ar manbışde yiq'ne Magdaleençena Mayram, Yaaq'ubnayiy Yusufna yed Mayram, Zavdayne dixbışda yedir vuxhaynbı.

57 Exha qexhemee, sa karnana insan arayle. Mana I'sayne telebabışda sa, Arimateya eyhene şahareençena Yusuf eyxhe. 58 Mana Pilatne k'anyaqa hark'ın, I'sayn mayit qeqqa. Pilateeyib I'sayn mayit mang'usqa qeleva əmr haa'a. 59 Yusufee I'sayn mayit alyaat'u, məttıne kafaneeqa hiyk'ar. 60 Qiyğar Mana ganzıne ab hipk'ırne cune ts'ebne nyuq'vneeqa gixhxhı, mançeeqa ikkəəne cigeeqab xəbna g'aye qavaak'an haa'a. 61 Magdaleençena Mayramiy manasa Mayram nyuq'vnene ögee gyuv'ur vooxhe.

62 Qinne yiğıl, man Şabbatın yiğ eyxhe, kaahinaaşin ç'ak'ınbıyiy fariseyar* Pilatne k'anyaqa sabı 63 eyhen:

– Xərna, şene horalee üç'ürnang'a uvhiynniy «Vuc xhebne yiğıle üç'ür qixhes». 64 Mançil-allab əmr hee'e xhebıd'esde yiğılqamee nyuq'vneka ilyaakecen. Deşxhee telebabı abı Mana qöqü milletık'le «Mana hapt'ıynbışde yı'q'neençe üç'ür qıxhava» eyhes. Man qiyğiyn hor, ts'ettiynçile pisın ixhes.

65 Pilatee manbışik'le eyhen:

– G'aravulyçerıb alyapt'ı havak'ne, şos nəxüdiy ıkkan, he'e.

66 Manbıb hapk'ın nyuq'vneeqa ikkəəne cigeene g'ayelqa peçat gı'xı', maa g'aravulyçer ulyoozar haa'a.