1 I'sa Allahne Xaane məhleençe qığeç'umee, Mang'usqa telebabı qeebaxhe. Manbışis Allahne Xaana binaa Mang'us bıkırba haagvas vukkiykan. 2 I'see manbışik'le eyhen:

– Şok'le in gırgın g'ecenne? Zı şok'le hək'edacad eyhe, mançina g'aye-g'ayel aaxvas deş, mançin gırgınbı ç'iyeyka sa ha'as.

3 I'sa Zeytunne suval gyu'uriyng'a, Mang'usqa telebabı qabı, qiyghanan:

– Ğu şak'le eyhelan, man Ğu eyhen karbı mısane ixhes? Sayır Ğu qalesnang'a hucoone ixhes, dyunyeyn exır hiyxharang'a?

4 I'see manbışis inəxdun alidghıniy qele:

– Yugba ilyaake, şu neng'veecab yəqqı'le qığmaa'acen. 5 «Zı Masihva» geeb insanaaşe qabı eyhes. Manbışe məxüb geebbı yəqqı'le qığaa'as. 6 Şok'le muhaariba əəva, muhaariba vuxhesva g'ayxhes. Şu mançile qı'məəq'ən. Man gırgın ixhes ıkkan. Man gırgın eyxhenbı dyunyeyn exır qadıva eyhen deş vod. 7 Millet milletılqa, paççahiyvalla paççahiyvalilqa g'elil quvxhes. Curayne-curayne cigabışee mısvalybı ixhes, ç'iyebı ı'ğı'ykaras. 8 Man gırgın «k'oybı giyğalanbıva»* eyhen vodun.

9 Mane gahıl şos əq'übabı heles, gyapt'asınbı. Zal-alla şu gırgıne milletbışik'le g'umooce vuxhes. 10 Manke gellesın insanar Allahne yəqqı'le savk'alasınbı, manbışik'le sana-sanbı g'umooce qeepxhes, manbışe sana-sanbı duşmanaaşine xılyaqa qevles. 11 Horalay geeb peyğambarar qavaales, manbışe geebbı yəqqı'le qığaa'as. 12 Pisvalla geeb quvxhaylette gellesınbışin sana-sanbı vukkiykıniy k'ıl qixhes. 13 Vuşuyiy k'anyaqqamee örxür g'attixhanasda. 14 Mana Xəybışde Paççahiyvaline* hək'eena Yugna Xabar dyunyevollete yuşan haa'asda. Gırgıne milletbışilqa mana xabar hipxhırmee, dyunyeyn exır ixhes.

15 Şok'le Daniyal peyğambaree uvhuna xhinnena, muq'addasne cigeena «həlyvəəq'ənasda xhinnena q'əralla»* g'avces. Man hasre qədəqqəng'ulqa hixhrecen. 16 Manke Yahudeyayee vooxhenbı suvabışilqa heepxecen. 17 Hasre mane gahıl, daxalyna xaadın karbı alyaat'asva avqa gimeç'ecen. 18 Çoleenar tanalinçilqava xaaqa simiyk'alcen. 19 Vuxhne avxuynbışeyiy uşax gyoqa'anbışe mane yiğbışil əq'üba ts'ıts'a'as. 20 Düə hee'e, vuşun heepxiy q'ı'dmilqayiy Şabbatne yiğılqa* gimexhacen. 21 Mane yiğbışil məxdın divan qixhas, dyunye itxhıniyle həşdilqameeyid həşdiyle şaqad mısacad ixhes deş. 22 Man yiğbı k'ıl qidi'iynbıxhiy, sang'ussecar g'attixhanas əxəs deşdiy. Allahee g'əvxüynbışdemee man yiğbı k'ıl qa'as.

23 Mane gahıl şok'le şavaamecad, «İlyaakende, Masih inyaa vor, şaa vor» uvheene, mançil inyam hıma'a. 24 Manke horalay peyğambarariy horalay masihar qavaales. Manbışe ç'ak'ın əlaamatbıyiy gorsatmabı hagvas. Manbışis g'əvxüynbıb yəqqı'le qığaa'as vukkiykanas. 25 İlyaake, Zı şok'le vuşde vuk'lelqa qalesınbı uvhu. 26 Mançil-allad şavaamecad şok'le uvhee «Mana şaa'ar sahree vor», «Mana anne gozee vor» mançilqa haymeebaxhe, maqa hımaak'an. 27 Nəxüdiy ts'ayılpan şargıl ı'xı'mee garbıl g'ece, həməxüdıd İnsanna Dix*, Zı, siyk'almee ixhes. 28 Leşnane cigeeqa mayit otxhanan şityarxhe sadaylenbı.

29 Mane yiğbışil qitxhuyne divanıle qiyğa,

«verığ k'yooçes,

vuzanıd işix heles deş,

xənebı xəənçe k'yoharas,

xəybışeedın gucbı ı'ğiykaras».*

30 Manke İnsanne Dixen əlaamat xəybışee g'aces. Ç'iyeyne aq'valin gırgın milletbı ts'irbı ha'a geşşes. Manbışik'le İnsanna Dix xəybışeene buludbışil* xənne gucukayiy nuruka qöö g'aces. 31 Mang'vee Cun malaaikar g'axuvles, malaaikaaşed gaçeençe qı'ğəəne it'umne syuttyuka Mang'un g'əvxüynbı dyunyeyne yoq'ne surale, q'omançe k'anyaqqamee saa'asınbı.

32 İnciliyne yivene hək'eene misaalal k'ırı alixhxhe: mançin t'ur g'avhu t'ele aleylya'ang'a, g'ı'l k'ane qexheva şok'le ats'axhxhen. 33 Şok'led man gırgın kar g'acumee, ats'axhxhe, İnsanna Dix k'ane vor, Mana akkayne ghalee vor. 34 Zı şok'le hək'en eyhe, ine gahılin insanar əlyhəəssecab, man gırgın kar ixhes. 35 Xəybıyiy ç'iye ılğeeç'u əlyhəəsınbı, Zı cuvabme mısacad əlyhəəs deş.

36 Man yiğ mısayiy ixhesva, sə'ət xhulençiliy ixhesva xəəne malaaikaşik'led, Allahne Dixek'led ats'a deş. Man yiğ mısayiy ixhesva Dekkıle ğayrı şavuk'lecad ats'a deş. 37 Nüh peyğambarne gahıl nəxüdiy ıxha, həməxüdıd İnsanna Dix siyk'almeeyid ixhes. 38 Q'ıfrımıle ögil, Nüh gameeqa ikkeç'esde yiğılqamee, insanaaşe otxhan-ulyoğa, adameeşe xhunaşşer haa'a, yedarıb adameeşis əlyhəə vuxha. 39 Q'ıfrım qabı manbışin gırgınbı vukkeesmee, manbışik'le vuççud ats'a deşdiy. Həməxüdıd İnsanna Dix sak'alasnang'a ixhes. 40 Mane gahıl çolee iş haa'anbışda sa alyart'u, sa g'alerçesda. 41 Yöxxee suk g'iviyxərne q'öne zəiyfayna sa alyart'u, sa g'alerçesda.

42 Mançil-allab muğurba vuxhe, şok'le vuşda Xərna mısa ayres ıxhay ats'a deş. 43 Şok'le innıd ats'axhxhe, xaane iyesiyk'le sixnariy mısa ayresva ats'axhxhanxhiy, mana g'ilydirxhu, sixnariy xaaqa ikkeç'escar hassaras deşdiy. 44 Mançil-allab yugba ilyaake, şok'le İnsanna Dix mısa ayres ıxhay ats'a deş.

45 Nukaraaşis cine gahıl otxhuniy helecenva, manbışil ooqa iyesee gixhxhına qorkuna, ək'elynana nukar vuşune? 46 İyesiy xaaqa sak'ımee, vucee uvhuna iş haa'a g'oocena nukar nimee baxtivariy! 47 Zı şok'le hək'edacad eyhe, iyesee mang'uke cune gırgıneecar karana xərnaniy ha'as. 48 Hucooniyxan ixhes manacar nukar pisda ıxhanaxhiy? Mang'vee «Yizda xərna həşdebışee qales deşva» uvhu, 49 giğalasdaniy vuc xhinnen nukarar gyoota, p'iyanınbşika otxhun-ulyoğa. 50 Mang'una xərna, mang'une ək'eleeqacar qidyalesde yiğıl, sə'ətıl qarı, 51 mang'us yı'q'na cazaa huvu q'öbvalla haa'anbışika sacigeeniy havaces. Mançe geşşuybıyiy ık'arıke silibı sana-sançil qadaxan ses qöö ixhes.