Mateus 21

I’sa İyerusalimeeqa qarı

1 Manbı İyerusalimısqa hiviyxharne cigee, Zeytunne suvaysneene Bet-Fage eyhene xiveeqa qavayle. Mançe I’see q’öyre teleba g’axuvu, 2 eyhen:

– Ögilyne xiveeqa havak’ne. Şok’le maqa ikkepç’ımeecab, avt’ulna əməleyiy çina q’udux g’avces. Manbı Zasqa alle. 3 Şoke şavaamecad «Hucoone ha’ava?» qiyghıneene, «Manbı Xərıng’usqa ıkkanva» eyhe. Mane insanee mankecad şosqa ıkkees hassarasınbı.

4 Man karbı peyğambaree otk’unin xhinne eyxhe:

5 «İyerusalimeene milletık’le eyhe:

Şosqa vuşda Paççah qöö vor.

Mang’vee Vucecar Vuc axtıra ıkkeka deş,

Mana xev ıxı’yxəne əməlel,

Əməleyne q’uduxul gyu’ur qarayle».*21:5 İnəxüd Zakariye peyğambarne kitabee otk’un (9:9).

6 Telebabı hapk’ın gırgın I’see uvhiyn xhinne ha’a. 7 Əməleyiy çina q’udux qabı, çilqa con tanalinbı adaççe. Mançil ooğançer I’sa giy’ar. 8 Maqa sabıyne gellesınbışe tanalinbı g’ayşu, yəqqı’lqa gyadaççe, avxuynbışed yivaaşin bıtağbı gyatxı, yəqqı’lqa gyoka. 9 I’sayle ögil, yı’q’əl əlyhəənbışe ts’irbı ha’a inəxüd eyhe ıxha:

– Hosanna*21:9 Hosanna: Cühüt’yaaşine mizel «Şi g’attivxhan hee’eva» eyhen vodun. Məxür Allah axtı qa’a ıxha. Davudne Dixes!*21:9 Davudna Dix: Masih Davudaanbışda ixhes, məxüd peyğambaraaşe oyk’an ıxha. Mançil-allad Mang’uk’le Davudna Dixva eyhe ıxha.

Rəbbine doyuka Qarıyng’us şukur vuxhenava!

Nekke axtıne xəybışee hosanna! * 21:9 Manva Zaburee otk’un (117:25-26).

10 I’sa İyerusalimqa ikkeç’umee «İna Vuşuneva?» gırgına şaharcab g’elil qooxhe. 11 Cəmə’ətınıd eyhe ıxha:

– İna Galileyayne Nazaret şahareençena I’sa Peyğambar vor.