1 Qiyğa I’sa iblisın siliys ı’xecenva Allahne Rı’hı’n mana sahreeqa ıkekka. 2 I’sa sahreenang’a, Mang’vee yoq’ts’al yiğnayiy yoq’ts’al xəmna kar udyotxhan ıxhayke, Mana it’umra mıs qexhe.

3 Manke siliys ı’xı’yxəna Mang’usqa qarı eyhen:

– Ğu Allahna Dixxhee, mane g’ayebışik’le eyhe gınelqa sak’lecen.

4 I’see mang’us inəxdun alidghıniy qele:

– «İnsanee saccu gıneykacab deş, Allahne ghalençe qı’ğəəne cuvabıkab çikana ı’mı’r haa’ava»* otk’un.

5 Qiyğa iblisın Mana muq’addasne İyerusalimne şahareeqa arı, Allahne Xaane nekke axtıne cigeeqa giyxhxhı, 6 eyhen:

– Ğu Allahna Dixxhee, Ğucar-Ğu inçe avqa ehe. Nya’a, otk’un dişde:

Allahee «Yiğnemee malaaikaşilqa əmr haa’as,

Ğu xılibışil qıkkecen,

Yiğın g’elybı g’ayebışilek’ena qimiyxharcenva»*.

7 I’see mang’uk’le eyhen:

– «Yiğna Rəbb Allah siliys ı’xmiyxəvad»* otk’un vod.

8 Manke iblisın I’sa sa geed axtıne suvalqa alqavhu, Mang’uk’le dyunyeyn gırgın paççaharnan cigabı hits’ayghar hagu eyhen:

9 – Ğu kyorzul zas ı’bəədat he’eene, in gırgın Vak’le g’ecen zı Vas heles.

10 Manke I’see mang’uk’le eyhen:

– Şeyt’an, Zake əq’əna qixhe! Nya’a otk’un dişde:

«Rəbbis Allahıs k’yozre, saccu Mang’us ı’bəədat he’e»*.

11 Mançile qiyğa iblisın Mana Culer-alqa g’alyaraççe. Mang’usqa malaaikar g’ullux haa’as adayle.

12 I’sayk’le Yəhye aqqı aqa arçuva g’ayxhımee, Mana Galileyeeqa siyk’al. 13 Mana Nazaretğançe qığeç’u, Zevuluniy Naftaliyne nasılbışde cigabışeeqa, golyune mıglekne Kefernahum eyhene şahareeqa qarı, maa axva. 14 İnəxüd Yeşaya peyğambaree otk’unin xhinne eyxhe:

15 «Zevulunneyiy Naftaliyne cigabışee,

Deryahısqane yəqqı’l, İordanne damayne şene aq’val,

Allah dyats’ane milletbı eyxhene Galileyee,

16 Miç’axiyvalee eyxhene milletık’le,

Xədın işix g’ece.

Hapt’asde əqı’n avquynbışilqa

Nur gyoğa»*.

17 Mane gahıle I’sa giyğalna Allahın cuvab hixhar ha’a. Mang’vee eyhe ıxha:

– Bınahbışike xıl ts’ıts’ee’e, Allahne yəqqı’lqa savk’le! Xəybışda Paççahiyvalla* k’ane quvxha.

18 Yiğbışde sa yiğıl I’sa Galileyayne golyusse ı’lğəəmee, Mang’uk’le q’öyre çoc g’ooce: Pyoturva eyhena Şimoniy mang’una çoc Andrey. Manbı baluğar aqqaqqanbı vuxha. Manbışe xhineeqa tor ayhe ıxha. 19 I’see manbışik’le eyhen:

– Zaqab qihna qudoora, Zı şoke Xəybışeene Paççahiyvaleeqa insanar avqaaqqanbı haa’as.

20 Çocaaşe mankecad torbı g’ali’ı, I’sayqab qihna qavayle.

21 I’sa sık’ırra ögilqa ark’ınmee, Mang’usqa sa mebın çocar, Zavdayna dix Yaaq’ubiy mang’una çoc Yəhye qızaaxa. Manbışe cone dekkıka, Zavdayika, sacigee lotk’ee torbı qa’a eyxhe. I’see manbı Cusqa qoot’al. 22 Mang’vee qopt’uluykum, manbışe dekkır, lotk’ad g’aletçu, Mang’uqab qihna qavayle.

23 I’sa Galileyavolle iykır maane, manbışde sinagogbışee* xət qa’a ıxha. Mang’vee Xəybışde Paççahiyvalina Yugna Xabar insanaaşilqa hivxhar haa’a vuxha, insanar gırgıne ık’arbışike, ç’irvalybışike yug qaa’a vuxha. 24 Mang’une hək’ee Suuriyeevolled ats’axhxhen. Mançile qiyğa Mang’usqa gırgın it’umun ık’arbınanbı, cinaaşe avquynbı, cole əəmbı, paralic ı’xhı’ynbı abayle vuxha. Mang’veeyib manbı yug qaa’a vuxha. 25 Galileyeençe, Dekapolis eyhene cigeençe, İyerusalimeençe, Yahudeyayeençe, İordanne damayne şene aq’vayle Mang’uqab qihna insanaaşin t’arat’cad qöö ıxha.