1 Baana ba me, me ndi mu utsonehele benu mambu mo maniima, mana benu livelesa masumu. Ka tso muutu miisa masumu, bisu lili na muvolili mileembe ŋa busu bwa Taata, ni Yisu Kristo, nde wu li wu akuha. 2 Nde mwakulu asiingi ukwa we bungodu mu masumu ma bisu, mana Nzambi asa kolo-kolo. Nde unyahula masumu ma bisu, napa masumu ma baatu ba tsi yoosi.

3 Tso bisu libaasiingala mikele mya Nzambi, bisu lili na hiitu ti bisu liyaabi nde. 4 Tso muutu li mu uleele ti: «Me nzaabi Nzambi», hwavele usiingala Mikele mya nde, nde li mupfuti, na nde a hayabi Nzambi mu mbuli ve. 5 Ka woosi wu ubaakeelese mambu ma Nzambi na bukuhu bwosi, ubamweese ti, nde atondo Nzambi bu hwafwana. Ni buuna bisu luuba na hiitu ti bisu itwadi na Nzambi: 6 woosi wu ubaaleele ti nde akwilala mu Nzambi, afwana kaka ubaadyata we bu Yisu Kristo hakadyata.

7 Baana baa ngu baa litondo, me a handi mu utsonehele benu Mukele wu munyatihi ve, ka ni Mukele wu mukulu, wu benu laayaki umata hu mbandu. Mukele mo wu mukulu wuuna, ni musamu wu benu laamiiyuha. 8 Ka hwa nde, nde mukele wu munyatihi me ndi mu utsonehele benu. Na imbuli hi Mukele hili mu umonehele mu Kristo na mu benu. Mu mbuli, piipidi yili mu uvyoho, na liyalala la mbuli laaka mu umwedeme✝. 9 Woosi wu ubaatsima ti nde hutso liyalala ali, ka nde ubaabelele mwaana a ngu a nde, nde kini a hapala hutso a piipidi ve. 10 Woosi wu ubaatondo mwaana a ngu a nde, ubaakwilala hutso liyalala, na isiha tso imosi utwala ubwisa imiinu hya nde ve. 11 Ka woosi wu li na ibelili mu mwaana a ngu a nde, li hutso a piipidi. Nde li mu udyata mu piipidi hwavele uyaba hu nde ali mu uyene, mu tooni ati, piipidi yamiikitusa nde inzimana.

12 Baana ba me, me ndi mu utsonehele benu muhanda mo wunuuwu mu tooni ati, Nzambi amiisa kolo-kolo mu masumu ma benu, mu nduhi a Yisu Kristo.

13 Bataata, me ndi mu utsonehele benu muhanda mo wunuuwu, mu tooni ati benu liyaabi wu li moonyi, umata mbandu.

Bafudu, me ndi mu utsonehele benu muhanda mo wunuuwu, mu tooni ati benu laabiingili Nga bubi.

14 Me ndi mu utsonehele benu muhanda mo wunuuwu, baana ba me, mu tooni ati benu liyaabi Taata.

Me ndi mu utsonehele benu muhanda mo wunuuwu, bataata, mu tooni ati benu liyaabi wu li moonyi umata mbandu.

Me atsonehele benu muhanda mo wunuuwu, bafudu, mu tooni ati benu lili na mifudi. Mambu ma Nzambi mali mu ukwilala mu benu, na benu laamiibiingala Nga bubi.

15 A litondo tsi ve, tso bisiha bya tsi. Woosi wu tondi ndyatili a baatu ba tsi, utwala ubwetondo Taata Nzambi ve. 16 Mono bi libaateele bisiha bya tsi: manzala ma mabi ma imuutu, linyungi li musunya, linyungi la miisu, nyeme yi busina bwosi bu benu lili na bwo. Bisiha mo biina byosi, a bili mu umata huli Taata ve, ka byo bili bya tsi. 17 Tsi yili mu uvyoho, na byosi bi linyungi bi bili mu yo. Ka muutu wu ukuhasa litondo la Nzambi, ukwilala bilima na bilima.

18 Baana ba me, yiniiyi ni taangu a tsyelele. Benu laayuhi ti, muboho a Kristo mu uya ali. Ka bunuubu, baboho baa Kristo ba banzuhisini baamiimonehele. Ni mu buuna, bisu liyaabi ti bisu laaka mu taangu a tsyelele. 19 Baatu mo baniba baamiisiisa bisu, ka bo a babeedi banga imiinu baa mbuli ve. Mu tooni ati, bo kini baabeedi banga imiinu baa mbuli, bo baakiikwilala na bisu. Ka bu bo baamiisiisa bisu, bumiimonehele ti, baatu mo baana a bali banga imiinu baa mbuli ve.

20 Ka uto ti benu, Kristo apuhili benu Livupu la Ngidi, mana benu boosi liyaba imbuli. 21 Me a handi mu utsonehele benu muhanda mo wunuuwu, bu benu laadiimbili imbuli ve. Naana, me ndi mu utsonehele benu, mu tooni ati benu laayaba imbuli. Benu laayaba kaka ti, upfuta tso umosi utwala upala hutso imbuli ve.

22 Buuna na li mupfuti? Ni nde wuuna wu ubaatuna ti Yisu ni Kristo. Pasi muutu wu ubaatuna Nzambi Taata na Mwana a nde Yisu, ni wuuna li muboho a Kristo. 23 Ni mu buuna, woosi wu ubaatuna Mwana, ubaatuna kaka Taata. Ka woosi wu ubaasiinga ti Yisu Mwana a Nzambi, nde li kaka itwadi na Taata.

24 Ka uto ti benu, keelesaani bubwe-bubwe mambu ma benu laayuhi umata hu mbandu. Tso benu likeelisi mambu ma benu laayuhi umata hu mbandu, benu kaka sa likwilala ukangama mu Mwana na mu Taata. 25 Mu mbuli, moonyi wu bilima na bilima, ni nzuhisini li Kristo asiidi bisu.

26 Me miitsonehele benu mambu mo maniima, mu tooni a baatu ba bali mu usaha udungasa benu. 27 Ka uto ti mu benu, Livupu li Kristo hapuhili benu, lili mu ukwilala mu benu. Ni mu buuna, benu a lili na nzala mulongisi mukima ve. Mu tooni ati, Livupu mo liina, libaalongese benu mambu moosi. Lo lili Livupu li imbuli, ka a li mapfuta ve. Ni mu buuna, kwilalaani ba baakangama mu Kristo, we bu Livupu la Ngidi laalongisi benu.

28 Bunuubu, baana ba me, kangamaani mu Kristo, mana bisu liluula mu hiitu mu taangu yi nde huyamonehele. Kangamaani mu nde, mu uvelekwa tsonyi ŋa busu bwa Kristo, mu ilumbu hya nziili a nde. 29 Benu liyaabi ti Kristo li wu akuha. Ni mu buuna, benu laafwana uyaba kaka ti, woosi wu ubaavanga mambu ma maasungama, li wu Nzambi habuta.