1 Woosi wu ubaasa imiinu ti Yisu ni Kristo, li wu Nzambi habuta. Na woosi wu atondo Nzambi Taata, atondo kaka baana ba nde habuta. 2 Mu umweese ti bisu laatondo baana ba Nzambi, bisu libaatondo Nzambi na libaasiingala mikele mya nde. 3 Ni mu buuna, utondo Nzambi ni usiingala mikele mya nde. Na usiingala mikele mya nde, a huli na pasi ve. 4 Mu tooni ati, boosi ba Nzambi habuta, bubaabiingala tsi. Na ilwanili hi bisu libaabiingala tsi, ni imiinu hya bisu. 5 Na ubaabiingala tsi? Ni nde wuuna, wu ubaasa imiinu ti Yisu mbuli ni Mwana a Nzambi.

6 Yisu Kristo ni muutu wu ayiili bisu mu iliimbu hya mamba ma tondihili a nde na makila ma lipfu la nde. Nde a hayidi ndulu na iliimbu hya mamba ve, ka na iliimbu hya mamba na hi makila. Livupu la Ngidi, lili mu uta imbangi ti liina lili la mbuli, mu tooni ati Livupu ni imbuli. 7 Ni mu buuna, bambangi batatu bali: 8 Livupu, mamba na makila. Na bo babatatu bubaayuhasana mu uta imbangi imosi. 9 Huli mbuli ti bisu libaasiinga imbangi hya baatu. Ka imbangi hya Nzambi, hyafulala tsoongo. Imbangi mo, ni hi Nzambi ubaatiila mu mwaana a nde.

10 Ni mu buuna, woosi wu usa imiinu mu Mwana a Nzambi, nde mwakulu ubaasiinga imbangi mo hiina mu mutima a nde woosi. Ka muutu wu ubaavelesa imiinu mu Nzambi, ubaateele Nzambi «mupfuti». Mu tooni ati, nde a hubaasiinga imbangi hi Nzambi hatiili mu Mwana a nde ve. 11 Yuhaani imbangi mo ni hinihi: Nzambi aviidi bisu moonyi wu bilima na bilima, na tso bisu lili na moonyi mo wuuna, ni mu likumbasa la Mwana a nde. 12 Pasi muutu wu akangama mu Mwana, li na moonyi. Ka pasi muutu wu avelekangama mu Mwana a Nzambi, a hali na moonyi ve.

13 Me miitsonehele benu muhanda mo wunuuwu, mana benu baa lili mu usa imiinu mu nduhi a Mwana a Nzambi, liyaba ti benu lili na moonyi wu bilima na bilima. 14 Hiitu hi bisu lili na hyo huli Nzambi ni hinihi: taangu yoosi yi bisu lili mu uvondo isiha hi hyayelemene na litondo la Nzambi, nde li mu uyuhala bisu. 15 Ka bu bisu liyabi ti, Nzambi ubaayuhala bisu bu lili mu uvondo nde isiha, bisu lili kaka na hiitu, mu uyaka biina bi bisu lili mu uvondo huli nde.

16 Tso muutu li mu umono mwaana a ngu a nde mu usa lisumu li libaavelebita hu lipfu li muvumu, nde afwana usambila mu mwaana a ngu mo wuuna, mana Nzambi ava nde moonyi. Me ndi mu undeele buuna, huli boosi ba bubaasa lisumu li libaavelebita hu lipfu. Lisumu li libaabita hu lipfu lili, ka me a handi mu undeele mu usambila mu baatu ba bubaasa lisumu li libaabita hu lipfu ve. 17 Mavaanga moosi ma mu baatungalala Nzambi, ni lisumu. Ka pasi lisumu a libaabita kokoo hu lipfu ve.

18 Bisu liyaabi ti pasi wu Nzambi habuta, a hubaabwesumaha ve, mu tooni ati Mwana a Nzambi ubaakeelese nde, na Nga bubi utwala ubwevangila nde lilibi ve. 19 Bisu liyaabi ti bisu lili baana ba Nzambi, na tsi mo yiniiyi yoosi yili hu tsina matwala ma Nga bubi. 20 Bisu liyabi kaka ti, Mwana a Nzambi ayidi ŋa tsi na aviidi bisu buyedi mana bisu litsikaha Nzambi wa mbuli. Bisu lili ba baakangama mu Nzambi wa mbuli mu tooni a Mwana a nde Yisu Kristo. Nde ni Nzambi wa mbuli na moonyi wu bilima na bilima. 21 Kebaani mu usambila bifwita, baana ba me.