1 Monwaani ki pila litondo Nzambi hatondi bisu! Nde li mu uteele bisu baana ba nde. Mbuli, bisu ni baana ba nde. Tso baatu ba tsi a bayabi bisu ve, ni buuna kaka, bo a bayabi Nzambi ve. 2 Baana baa ngu baa litondo, bunuubu bisu lika baana ba Nzambi. Ka, bisu a laayaaba buni bisu luuba mu bilumbu bya hu busu ve. Bisu liyabi linili: ŋa Kristo huyamonehele, bisu luufwanina na nde mu tooni ati, bisu luumono nde we bu nde ali. 3 Woosi wu li mu usa hiitu mu nde, li mu ukituha wu atsyeme we bu Kristo nde mwakulu ali wu atsyeme.

4 Woosi wu li mu usa lisumu, li mu unyanza Mukele a Nzambi mu tooni ati, lisumu ni unyanza hu Mukele a Nzambi. 5 Ka benu liyabi ti, Yisu Kristo hayidi mu tsi, mu tooni uyamaasa masumu. Mu nde a huli na lisumu ve. 6 Pasi muutu wu ukwilala mu nde, afwana usiisa masumu. Ka nde wuuna wuli mu ukwilala mu usa masumu, ubaamweese ti nde kini a hayaba Yisu na a hatsikaha nde ve.

7 Baana ba me, kebaani pasi muutu a hadungasa benu! Woosi wuli mu usalila butsiitsa, akuha we bu Yisu ali wu akuha. 8 Woosi wu ubaakwilala mu usa masumu, li mwaana Mukuyi mu tooni ati, Mukuyi asiidi masumu umata mbandu a tsi. Ka Mwana a Nzambi hayidi ŋa tsi, mu udyata mavaanga ma Mukuyi. 9 Pasi muutu wu Nzambi habuta, masumu ubwesa ve mu tooni ati, moonyi wu ubaamata huli Nzambi, ubaakwilala mu nde. Nde masumu ubwesa ve mu tooni ati, Nzambi ni wu abuta nde. 10 Pasi nde wu avelevaanga butsiitsa, buuve wu aveletondo mwaana a ngu a nde, a hali mwaana a Nzambi ve. Liina ni li libaamweese lisobosono ŋa hati la baana ba Nzambi na baana ba Mukuyi.

11 «Litondosonwaani bisu na bisu.» Maana ni mambu ma benu laayuhi umata hu mbandu. 12 A lisaani we Kayini ve: nde li mwaana a Nga bubi na wu ahehi likiingu la mwaana a ngu a nde. Ka mu ki tooni hadubi nde? Kayini hadubi mwaana a ngu a nde mu tooni ati, mavaanga ma Kayini aba ma mabi na ma mwaana a ngu a nde aba ma maakuha.

13 Baana baa ngu a me a likimuha ve, tso baatu ba tsi mo yiniiyi babelili benu. 14 Bisu liyaabi ti bisu laamiimata mu lipfu, mu uvyoho hu moonyi mu tooni ati, bisu libaatondo baana ba ngu ba bisu. Pasi nde wu aveletondo baana ba ngu a nde, li muutu wu akwa. 15 Woosi wuli na ibelili mu mwaana a ngu a nde, li mudubi. Na benu liyabi ti, mudubi utwala uyaka moonyi wu bilima na bilima ve.

16 Mono buni lafwana uyaba litondo hima lo lili: Yisu Kristo ayehuli muvumu a nde mu bisu. Ni buuna, bisu kaka lafwana uyeholo mivumu mya bisu mu baana ba ngu a bisu. 17 Tso muutu li na busina bu bulahi, na li mu ukama mutima ŋa busu bwa mwaana a ngu a nde wu avele na hi ufuuhala, buni muutu mo wuuna hutwala ubinuha ti nde atondo Nzambi? 18 Baana ba me, a libaani na litondo ndulu li bibodu na bileedi bibibwe ve. Ka mwesaani litondo la mbuli li libaamonehele mu mavaanga.

19 Tso bisu litondisini, ni buuna bisu luuyaba ti bisu lili banga imbuli. Na ni buuna, mutima a bisu hubaha isuusi ŋa busu bwa Nzambi. 20 Eye, tso mutima a bisu ubaatungalala bisu, Nzambi afulala uyaba ma bisu laayaaba mu mutima a bisu. Nde ayaba moosi!

21 Baana baa ngu baa litondo, tso mutima a bisu a hatungilili bisu ve, bisu laaluula mu hiitu ŋa busu bwa Nzambi. 22 Bisu libaayaka byosi bi bisu libaavondo nde. Mu tooni ati, bisu libaakeele Mikele mya nde na bisu libaavaanga moosi ma nde ubaatondo. 23 Bunuubu, Mukele wu Nzambi ali mu uva bisu ni wunuwu: bisu libaasa imiinu mu nduhi a mwaana a nde Yisu Kristo, na libaatondosono mu bumwana bu bungu, we bu Kristo hatumi bisu. 24 Woosi wu ubaasiingala Mikele mya Nzambi, ubaakwilala mu Nzambi na Nzambi ubaakwilala mu nde. Mono buni bisu libaayaba ti Nzambi akwilala mu bisu: ni mu tooni Livupu la nde li nde hava bisu.