1 Ŋa hati la buli li Isereli, hwaba na mimbihuli mi mapfuta. Bumosi kaka, ŋa hati la benu sa huba na milongisi mi mapfuta. Milongisi mo miina sa mikotese na dyeele loosi, ndongisili yi ubita baatu hu udunga. Bo sa batuna Pfumu wu ayobolo bo. Nzambi sa abungasana bo ipakali. 2 Baatu ba banzuhisini bu uduukala bo hutso a mbiili a bo yimbi. Na mu tooni a bo, baatu bu utuha nzila yi imbuli. 3 Mu tooni linyungi la mbongo, bo sa basoho benu mu bitoyili bya bo bi mapfuta. Ka tsundusu a bo, umata beleve, yamiitswiha. Na ndungili yili mu ukete bo.

4 Mu tooni ati, Nzambi asyembi bapofi ba baabwidi mu masumu, nde abwahi bo hutso a «mbeenge yi yadongo». Ni huuna bali mu ukeelese bo hutso a piipidi, bahada mu mapanga, natee ilumbu hya nde hya tsundusu. 5 Nzambi asyembi kaka baatu ba taangu a tsikulu, ŋa nde hatsindihi nyamba ŋa yulu a baatu banga masumu. Ka nde afuuhisi Nowa, wu aba mumosi mu pwombo la ba baafuuhi, bu nde hakalongese nzila yi yafwana. 6 Bumosi kaka, Nzambi atsundisi misyenge mya Sodoomo na Ngomooro, mu iteesi hya mbaahu, na nde akitusi myo mufutu. Ni mu umweese ifwaani hya ma mu uyiila huli banga masumu boosi. 7 Ka nde afuuhisi Loti, wu akadyata hutso butsiitsa. Loti aba mu lingebe mu tooni a mbiili a baatu ba taangu a nde, ba baakavele buyumu, ba baakaveledukala mikele mya Nzambi. 8 Mu tooni ati muutu mo wuuna, nga butsitu, wu aba ŋa hati la bo pasi ilumbu, akamono pasi hutso mutima, mu ma nde hakamono na ma nde hakayuha. 9 Ni mu buuna, Pfumu yaabi buni nde hu uyobolo mu malobese ba baakangama mu nde. Nde yaabi buni nde hukeelese baa bubaavaanga ma mabi mu usyembe bo, mu ilumbu hya tsundusu. 10 Nde usyembe homo, ba bali mu udyata mutso mapeyu ma bo ma musunya, na ba bali mu upenye lituma la Pfumu.

Milongisi mi mapfuta mo miina, myaluula mu nyeme na mu isaayi. Bo bali mu urokolo tso bisiha bya hu yulu, bi byaluula mu muyusu, hwavele umono boomo. 11 Tso bapofi ba baafulala bo mifudi na matwala, a bali mu uyehele utuha bisiha bya hu yulu ŋa busu bwa Pfumu ve. 12 Ka milongisi mo mi mapfuta minimi, myafwana na bibulu bi byavele na buyedi. Bo bali we bibulu bi Nzambi havanga mu ukangama mu myeto, mana baduba byo. Milongisi mi mapfuta minimi, mili mu utuha bi bo baaveleyaba. Bo buukwa we bu bibulu bibaakwa. 13 Wuuna ni musyendo a mavaanga ma bo ma mabi.

Bo bali na kinya mu ukuhasa mapeyu ma bo ma mabi ngembele a nyangu. Bo bali ndulu toodi na ipiha. Bo bali na kinya mu usalila mapfuta, hutso mikungi mi bo bali mu uba itwadi na benu. 14 Miisu ma bo maluula mu peyu usa mayamba na bo babaakwilala mu usa masumu. Mu myeto mya bo, bo bali mu uduta babavele na imiinu hi hyabama. Mitima mya bo myaluula mu nzala a mbongo. Tsingili a Nzambi yaaka mu bo. 15 Bu bo baasiisi nzila yi yasungama, bo baadungi, na baaduukili nzila a Balaami, mwaana a Bosoli✝. Nde wu atondi mbongo yi baaviidi nde mu usa bubi. 16 Ka Nzambi asyembi nde bu nde havelisiingala mukele. Buuna, ibulu hi hyavele a ndaha, hyayambili na nde we bu baatu bubaayambila, na hyasukisi nzila budyabidi yi mumbihuli Balaami hakaduukala.

17 Milongisi mi mapfuta mo miina, mili we mitswe mi manzali mi myavele a mamba, we mayidu ma ifula hili mu utsindahala. Nzambi amikwavangila bo mbuha hutso a pipidi ya dunga-dunga. 18 Bo bali mu usa bileedi bi binene bi byavele lisuunga. Humbisa mapeyu ma bo ma mayamba, bo bali mu usoho ba bamiikingula buyedi mawasa ma, na bamiisiisa manzila ma budyabidi. 19 Milongisi mi mapfuta mo minimi, mili mu usa nzuhisini huli baatu mo baana ti bo sa baba bunyanga bwosi*. Ka bo mwakulu bali baviha baa mapeyu ma mali mu ubita hu lipfu. Mu tooni ati, pasi muutu li muviha a hi hili mu utuma idiingu hya nde. 20 Mu mbuli, hu li na baatu ba baamiinyaha uvanga mambu ma mabi mamali mu utuma tsi. Mu tooni ati, bo baayabi bubwe-bubwe Pfumu na Mufuhisi a bisu Yisu Kristo. Ka tso babwekulamana hu tsina lituma li mavaanga ma mwakulu, idiingu hya bo hya tsyelele sa ifulala pasi na hyatsomi. 21 Hubeedi bubwe huli bo ŋa tsomi, mu uveleyaba nzila yi lisunga. Ka a mu uyaba yo, na ubwetehele mikele mya ngidi mbisa ve. 22 Ma mamiyila bo, ni ma makuma mali mu uleele: «Mvwa ubafutahala udya bi nde amiimana uluha✝!» Buuve: «Ngulu wu miimana uyobo mamba, ubabweya uyobo murobo!»