1 Ni me Simoni Peetelo, musalili na iluumbi hya Yisu Kristo. Me ndi mu utsonehele huli benu, baa lili na imiinu hya tsongo we hya bisu mu hyese hya Yisu Kristo, Nzambi na Muyobili a bisu. 2 Nyaha Nzambi asyeme benu na ava benu hyenze hi hyafulala mu nzaabili a Nzambi na Yisu Pfumu a bisu.

3 Nzambi mu matwala ma nde, ava bisu byosi bi byakuha mu idiingu hya bisu, mu ukangama mu nde. Pfumu ayabisi bisu wuuna wu ateele bisu, mu muyusu na bubwe bwa nde. 4 Ni mu buuna, Nzambi amiisa bisu manzuhisini ma bungodu bwa talu na bu bubwe. Nde hasiidi manzuhisini mo maana, mana benu limata mu manzala ma uvanga mambu ma mabi ma utsala baatu ba tsi. Ŋa mbuha unyambana, Nzambi miikitusa benu bababwe, we nde mwakulu wuli wu mubwe.

5 Ni mu buuna, benu lafwana uva mifudi mya benu myosi, mu ubwese ŋa yulu imiinu hya benu, mbiili yimbwe; na ŋa yulu a mbiili yimbwe, nzaabili a Nzambi; 6 ŋa yulu a nzaabili a Nzambi, ukuta hu linyutu; ŋa yulu ukuta hu linyutu, mukonono; ŋa yulu mukonono, ukangama hwa mu Nzambi; 7 ŋa yulu a ukangama hwa benu mu Nzambi, litondo li bumwana bu bungu bwa mu Kristo; ŋa yulu litondo li bumwana bu bungu bwa mu Kristo, bwesaani litondo. 8 Eye, tso benu lili na bisiha mo biina, na tso byo bipfuni mu benu, byo byutelemese benu mu usala. Na nzaabili a Pfumu a bisu Yisu Kristo sa yibutala benu mimbutu. 9 Ka muutu wu avele na byo, li we muutu nga monihili yi kusi, na nde li inzimana. Nde amiivusana ti Nzambi atsyemisi nde mu masumu ma nde matsomi.

10 Ni mu buuna, baana ba ngu, hwadaani mu usa mifudi mu usilasa ti ni mbuli, Nzambi ateele benu na asoolo benu mu uba buli la nde. Tso benu livaangi buuna, benu utwala ubwisa imiinu hya benu ve. 11 Ka ni buuna Nzambi husiingasa benu kotili mu Ipfumu hi bilima na bilima, hya Pfumu na Muyobili a bisu Yisu Kristo.

12 Ni mu tooni mo yiina, me apfwana ubaayibwala benu moonyi mu bisiha mo biina. Ka me nzaabi ti benu laamikwayaba byo, na benu laamiikangama mu imbuli hi benu laayaki. 13 Ka me ndi mu utsima ti, hwafwana huli me mu ubaayibusa benu mu uba likanda, bu me kini moonyi. 14 Ka, me nzaabi ti taangu yi lipfu la me yaka bebele, we bu Pfumu a bisu Yisu Kristo hayabisi me. 15 Ka me tsa kwada mu uyelese benu, mana humbisa lipfu la me, benu libaayibwala moonyi mu ma me ndi mu undongese benu.

16 Ŋa bisu laayabisa benu nziili a Pfumu a bisu Yisu Kristo hutso matwala ma nde moosi, bisu a laasingama mu masahu ma baatu baasuunda mu buyedi bwa bo ve. Ka bisu laamono bunene bwa nde mu miisu ma bisu. 17 Mu tooni ati, Taata Nzambi ava nde likiinzu na muyusu, ŋa ndaha a nde yi yapali hutso mayidu ma muyusu yaleeli: «Wunuwu ni Mwana a me wu litondo, wu li mu usa kinya a me yoosi✝.» 18 Ndaha mo yiina yamati hu yulu. Bisu mwakulu layuhi yo, ŋa bisu laaba na nde hu yulu isyelo hya ngidi.

19 Ni mu buuna, bisu lili mu usa hiitu hya bisu hyoosi mu mambu ma mimbihuli. Hwafwana huli benu mu ukele mambu ma mimbihuli mo miina. Mu tooni ati, mambu mo maana mali we mwinda wu li mu umwedeme ŋa mbuha ya pipidi. Hwadaani mu ukeele mo natee ŋa busi bu ukya, natee ŋa mvwelele a ŋa ngwali hupanduha hutso mitima mya benu. 20 Yaabaani hati a tsomi ti, a huli na pasi dyaambu li mimbihuli myasonehe mutso mabuuku ma Ngidi, li muutu hu ubindula mu matsimi ma nde mwakulu ve. 21 Ka, a mu litondo li imuutu baabihuli ve. Ka ni mu likumbasa li Livupu la Ngidi, baatu baatoyi mu nduhi a Nzambi.