1 Bambaahi baa litondo, wunuwu ka ni muhanda wa myole wu me ndi mu utsonehele benu. Hutso mihanda mi myole, me ndi mu unzibwala benu ndongisili yi benu laayaki, mu usaha uyelese nzaabili a benu yi misamu. 2 Yibwalaani moonyi, mu mambu ma mimbihuli mya ngidi myayabisi umata beleve. Yibwalaani kaka mukele wu Pfumu na Muyobili hatoosili benu, mu nzila biluumbi bya nde.

3 Hati a tsomi, yaabaani ti mu bilumbu bya tsyelele, sa umonehele bakwedi. Bo sa baduukala mapeyu ma bo ma mabi na ubaakwede benu. 4 Bo sa baleele: «Yisu asiidi nzuhisini ti nde uyafutaha. Ka nde a hayafutaha ve! Umata bu bakaaha ba bisu baakwidi, byosi byamiikwilala we hu mbandili a toto.» 5 Baatu mobaniba bakondini uyaba ti: umata beleve, Nzambi avangi yulu na toto mu lituma la mambu ma nde. Nde apalisi toto mu mamba, na ni mu mamba nde havangi yo. 6 Bo badimbili kaka ti, Nzambi anyambisini toto mu taangu a tsikulu mu mamba ma nyamba. 7 Mu ma mali mu utala toto na mayulu ma loloyi, mambu ma nde mali ti, Nzambi amiikeelese byo, mana nde anyengese byo hu mbaahu, mu ilumbu hya tsundusu, hi boosi ba baavelekiinza nde bu ukwa.

8 Ka dyaambu limosi li benu lu uvelevusana, bambaahi baa litondo ni ti: huli Pfumu, ilumbu imosi hili we iveeve (1 000) hi bilima, na «iveeve (1 000) hi bilima hili we ilumbu imosi✝.» 9 Pfumu a hutaamba mu utswihasa manzuhisini ma nde, we bu baatu bakima bali mu utsima ve. Ka nde li na mukami mu tooni a benu. Nde a hatondi ti tso mumosi mu benu anyambana ve. Ka nde tondi ti baatu boosi basobo mbiili na usa imiinu hya bo mu nde. 10 Ka ilumbu hya Pfumu hyuya kidumana we ŋa mwibi ubaya. Mu ilumbu mo hiina, yulu lu udimbala na idumu hiinene. Bisiha bya hu yulu byunyenge hu mbaahu na byukuda. Buuna, toto yoosi na mavaanga ma baatu moosi sa biyabaana paayalala mu tsundusu.

11 Mu tooni ati bisiha byosi sa bidimbala, yaabaani buni benu lafwana mu udyata! Mbiili a benu yafwana uba ya ngidi na yi Nzambi hatondo. 12 Benu laafwana ukeele na uhwada, mana ilumbu mo hiina, ilumbu hya Nzambi, hiveletamba mu uya. Ilumbu mo hiina, bya hu mayulu byusulamana hutso a ludi la mbaahu. 13 Ka bisu lili mu ukeele nzuhisini li Nzambi hasa: yulu li linyatihi na toto yi nyatihi, hu butsiitsa bwa Nzambi bumonehele.

14 Ni mu buuna, bambaahi baa litondo, bu lili mu ukeele ilumbu mo hiina, hwadaani mu uba babaatsyeme. Baani babaavele masyembo ŋa busu bwa Nzambi, mu hyenze hi nde ali mu uva. 15 Benu laafwana mu uyaba ti mukami a Pfumu a bisu, ni liyobolo la benu. Ni buuna kaka mwaana a ngu a bisu wu litondo, Pahuli haleeli ŋa nde hasonihi mu tsiki yi Nzambi hava nde. 16 Ni buuna nde hasonehe mambu mo maana mu mihanda mya nde myosi. Hu li na mambuha mu mihanda mya Pahuli ma mali na pasi mu utsikaha. Baatu bakima babaavele na nzaabili, na ba bali velo-velo, bali mu usobo mbindulili a mambu mo maana. Bo bali mu ubindula we bu hu li matsimi ma bo ma upfuta. Bumosi kaka, bo bali mu ukalula mbindulili a mambu mu mambuha makima ma Libuuku la Nzambi. Tsalili mo yiina yili mu ubita bo hu ubungana.

17 Ka benu bambaahi baa litondo, bu me miinzibusa benu, baani likanda. Kebaani baatu ba bavelekiinza Nzambi, ba baamiidunga nzila yimbwe, a balobese benu. Mana benu a lipatusa kwadili a benu mu Yisu Kristo. 18 Ka nyaha benu likula hutso a hyenze na nzaabili a Yisu Kristo, Pfumu na Muyobili a bisu.

Nyaha muyusu aba huli nde, loloyi na mu bilima na bilima! Ameni!