1 Bunuubu, me ndi mu ukwadisa bakuutu ba libundu ba bali ŋa hati la benu. Me kaka wu ndi mukuutu libundu we bo. Me ndi mbangi mapasi ma Kristo hamoni, na me tsambaha kaka kabu mu muyusu wu uya. Me ndi mu upondo bo mambu mo maniima: 2 Baakeelesaani konge mameme yi Nzambi hava benu we bakeedi. Bakeelesaani yo, a hwati mu kwamisa ve, ka mu mutima wu ayaluha, we bu hu li litondo la Nzambi. Baasaani buuna hwavele a nzala a kaluha, ka mu tooni lisiingala. 3 A lisaha unangimana ba baasuusa hutso lituma la benu ve. Ka baani na mbiili yimbwe ŋa busu bwa konge mameme, mana mo madukala ifwaani hya benu. 4 Na ŋa Mukuutu babungili hu uyamonehele, benu lu uyaka mutata a muyusu, wu uvelebiya.

5 Ni bumosi kaka, benu pfudu-mbahala, baani hu tsina lituma la ba baakulala benu. Na benu boosi, lwataani kulimini mu itwadi hya benu. Mu tooni ati, Mabasonehe mali mu uleele ti: «Nzambi ubaatelemene banga likwayi, ka nde ubava hyese hya nde huli banga a kulimini✝.» 6 Ni mu buuna, baandamaani na bulembo hu tsina a hoho hwa Nzambi hu matwala, mana nde asyenolo benu mu taangu yi nde hakese. 7 Yeholwaani nde mapasi ma benu moosi, mu tooni ati nde ubaakeelese benu.

8 Kutaani linyutu! Baani likanda! Mu tooni ati muboho a benu, Mukuyi li mu uvyana we kosi, wu li mu usiinga na ubaasaha wu nde hu umbyasa. 9 Telemenaani nde na kangamaani mu Nzambi. Yaabaani ti, mapasi mo maniima, bali mu umweese mo kaka huli baana ba ngu a benu mu tsi yoosi. 10 Benu sa libwemono pasi mwaana a taangu hoole. Ka Nzambi wu ubaamweese hyese hya nde hyoosi, amiiteele benu mu ukoto hutso muyusu a nde wu bilima na bilima, mu itwadi hya na Yisu Kristo. Nde mwakulu sa atelemese benu, nde sa ahwadisa benu, sa ava benu mifudi, nde sa asusa benu ŋa yulu ibeene hi hyavangama. 11 Nyaha matwala maba mu nde mu bilima na bilima! Ameni!

12 Me atsonihili benu muhanda mo wunuuwu wu mukusi, mu likumbasa la Silaasi wu me umbaapolo we mwaana a ngu a me wu akuha mu imiinu. Me atsonihi nde, mu uhwadisa benu, na mu usilasa ti, benu hutso a hyese hya Nzambi laakangama. 13 Libundu la Nzambi li lili huni, hu musyenge a Babylooni, na li Nzambi hasoolo we benu, litsindihi benu mabwehe. Ni bumosi kaka, Malako mwaana a me, tsindihi benu mabwehe. 14 Baavaani mabwehe ma ubumbasana mu litondo li bumwana bu bungu.

Nyaha hyenze hiba na benu boosi ba lili mu Kristo!