1 Ni me Peetelo, iluumbi hya Yisu Kristo. Me ndi mu utsindaha muhanda mo wunuuwu, huli baa Nzambi hasoolo na ba baamiilalaana hu tsi bumwenyi, ba bali mu bitaanzi bya Pooti, Ngalatiya, Kapadosi, mu matsi ma Asiya, na Bitiniya. 2 Taata Nzambi atswamini usoolo benu, we bu huli matsimi ma nde. Nde miikitusa benu ibaandu hya ngidi, mu likumbasa li Livupu la nde. Nde hasiidi buuna, mana benu lisiingala Yisu Kristo, na makila ma nde ma maapuhimi matsyemese benu.

Nyaha Nzambi ava benu hyese na hyenze bu hwafulala.

3 Ba wu baasyeme Nzambi, Taata a Pfumu a bisu Yisu Kristo! Mu bunene bwa kwili a nde lingebe, nde amiiva bisu moonyi wu munyatihi, mu tsuuhili a Yisu Kristo ŋa hati la babaakwa. Nde hasiidi buuna, mana bisu liba na hiitu hi hili moonyi. 4 Tso bisu lili na hiitu mo hiina, bisu sa liyaka mukobe wu Nzambi hamiiswehele baatu ba nde. Mukobe mo wuuna wu buuveleduba, wu buuvelesa mbindu, ka nde afwana ukeelese umwedeme hwa nde. Nzambi amiiswehele benu nde hu mayulu. 5 Mu tooni ati, Nzambi li nga matwala. Nde ubaakeelese benu bubwe-bubwe mu imiinu hya benu mu Yisu Kristo. Tangu a tsukusu aka bebele, taangu yi Nzambi humweese liyobolo la benu.

6 Ni mu buuna, tso mapasi ma pila mu pila mali mu umweese benu lingebe mu mwaana a taangu hole, benu laaluula mu kinya. 7 Mapasi mo maana, mali mu umweese imbuli hi imiinu hya benu. Wolo utwala ubiiya, ka bubaabwaha lo hu mbaahu, mu umono tso lo lili lilibwe. Ni bumosi kaka mu imiinu hya benu. Hyo hyafulala wolo talu, ka hyo kaka bubaalobese. Buukete imiinu hya benu mu umono tso hyo hili hihibwe. Titswene, ilumbu Yisu Kristo hu uyamonehele, benu sa liyaka muyusu, likiinzu na butsitu. 8 Benu laatondo Yisu, tso bu benu laavelemono nde. Benu libaasiila nde imiinu, tso bu benu laamaavelemono nde. Ni mu tooni imiinu hya benu mu nde, benu lili mu kinya yi yafulala, yi muyusu, yi bu uveletwala uyelemese. 9 Benu lili mu kinya mo yiina, mu tooni ati, mivumu mya benu sa miyoboho. Wuuna ni musyendo wu imiinu hya benu, mu Yisu Kristo.

10 Mimbihuli myasahi utsikaha mu bungeele bwosi, liyobolo mo liina. Myo myabihuli mu mamali mu utala hyese hi Nzambi haswehili benu. 11 Livupu la Kristo laaba mu bo, lo laayabisi bo manzuhu ma Kristo hu umono na muyusu wu uya humbisa a mo. Bo baasahi uyaba ki taangu na buni mo mu utwala uvangama. 12 Mambu ma Nzambi hayabisi bo ni maniima: maluumbi ma bo baakatoosele, a maba mu tooni a bo ve, ka mu tooni a benu. Bunuubu, ba bali mu uyabisa Musamu wu Mubwe, baatoosili benu maluumbi mo maana mu matwala ma Livupu la Ngidi, libaatsindihi umata hu yulu. Bapofi bo mwakulu kaka, bubaatondo uyaba mambu mo maana.

13 Ni mu buuna, vangamaani! Baani likanda! Saani hiitu hya benu hyoosi mu hyese hi Nzambi huva benu, ŋa Yisu Kristo huyamonehele. 14 Singalaani Nzambi bu benu lili baana ba nde. Na a likangama mu mapeyu ma mabi ma benu laaba na mo tsikulu ve, ŋa benu laaba kini hutso budimbu. 15 Ka baani baatu bangidi mu mbiili a benu yoosi, we bu Nzambi wu ateele benu ali wa ngidi. 16 Ni mu buuna, Mabasonehe mali mu uleele: «Baani bangidi, mu tooni ti me ndi wa ngidi✝.»

17 Mu masambulu ma benu, benu libaateele Nzambi: «Taata». Ni nde wuuna wu avelesa lisobosono la baatu. Ka nde ubaatsundasa pasi muutu mu mavaanga ma nde. Ni mu buuna, mu taangu yi yimiisaala benu mu uvyoso ŋa toto we byenyi, baani na boomo bwa Nzambi mu mbiili a benu. 18 Benu liyabi mu ki talu Nzambi hafuti mu uyobolo benu mu idiingu hi hyavele na tsongo. Ni mbiili yi yavyasaana yina, yi bakaaha ba benu baalongisi benu. Nzambi a hafuti yo mu biloho bi bibaabiya we mbongo na wolo ve. 19 Naana, Nzambi ayobili benu mu makila ma talu ma Kristo, ŋa baayehuli na baadubi nde we mwaana limeme li lavele ipiha na toodi, li baaviidi bungodu huli Nzambi. 20 Nzambi asooli nde tswamina pangili a tsi, na mu libwe la benu, nde ayabisi benu Kristo mu taangu mo ya tsyelele yi. 21 Mu nde benu lili mu usa imiinu mu Nzambi wu asuula nde ŋa hati la babaakwa, na wu ava nde muyusu. Ni mu buuna, benu libaasa imiinu na hiitu mu Nzambi.

22 Benu limiitsyeme bu benu limiisiingala imbuli, limiitondosono hwavele muwala. Ni mu buuna, tondosonwani mu mifudi na mu mutima mumosi. 23 Baamiibuta benu buta li linyatihi. A mu muhunu wu ubaakwa ve, ka mu muhunu wu avelekwa. Muhunu mo wuuna, ni mambu ma Nzambi ma moonyi, ma bilima na bilima. 24 Mu tooni ati, baasonehe:

«Baatu boosi bali we himbu,

na muyusu a bo li we ifulu hi matsyehe.

Bu himbu himiikanya, ifulu himiibwa,

25 ka mambu ma Pfumu mu baakwilala taangu yoosi✝.»

Mambu mo ni Musamu wu Mubwe wu baayabisi benu.