1 Bunuubu benu bisina, yuhaani me! Lilaani, yayanani mu tooni mapasi ma mu ubwila benu! 2 Busina bwa benu buli bu bwabolo, na bikutu bya benu batsyedidi baamiisyehe byo. 3 Wolo na mbongo a benu, byamiiluula mu malali. Na malali mo maana, mu uba huli benu we bambangi baa bu ukese benu. Na mo mu utsuha nyutu a benu yoosi we mbaahu. Buuna ni busina, bu benu laamiitsonzehe mu bilumbu mo bya tsukusu biniibi! 4 Monwaani! Benu a laava pfuta basali ba matsyehe ma benu ve. Yuhaani minyongo mya bo. Bililu bya bo, byamiito natee mu matswi ma Nzambi, Pfumu a tsi yoosi. 5 Benu laatsahili ŋa toto, hutso makinya na hutso a bya talu. Benu laanyebi we bibulu bi bali mu utsuha, mbadi bahehe byo makingu. 6 Benu laabelisi, benu laadubi wu asungama, hwavele uva nde muswa, wu ukalana linyutu la nde.

7 Ni mu buuna, susaani pumi baana ba ngu, natee mu pfutihili a Pfumu. Tsimaani musali mangundu: nde li na isusi mu ubaakeele miluunda mya toto mya talu, natee bu nde hu uyaka miluunda myatsomi na bikootele. 8 Benu kaka, susaani pumi, hwadisaani mitima, mu tooni ati, pfutihili a Pfumu yaka bebele. 9 Nyahaani bikumini benu na benu baana ba ngu, kini Nzambi utsundasa benu. Mutsundisi amiikwateleme ŋa munywa a nzo. 10 Baana baa ngu, mimbihuli mi myakatoyo mu nduhi a Pfumu, myakasa mukonono bu baakamono pasi. Volwaani ifwaani hya bo. 11 Eye! Bisu libaaleele, kinya huli ba baamiisa mukonono. Benu laayuhi buni Yobi hakuundi pasi. Na benu laamoni tsukusu yi Pfumu hasili nde. Ka Pfumu aluula mu litondo, na lingebe.

12 Hati a tsomi, baana ba ngu, a lilaba milabu, tso mu yulu, tso mu toto, tso mu pasi ndabili. Ka eye a benu, yiba «eye», naana a benu yiba «naana». Saani buuna, mana benu livelebwa mu tsyembili a Nzambi.

13 Muutu ŋa hati la benu li na pasi? Nyaha asambila. Muutu mumosi li mu kinya? Nyaha ayimba nyimbu. 14 Muutu ŋa hati la benu li na ubeele? Nyaha ateele bakuutu ba libundu, mana basambila mu nde, na bakuba nde maadi, mu nduhi a Pfumu. 15 Lisambulu la nga imiinu, lu ufuuhasa mubeedu mo wuuna. Na Pfumu utelemese nde. Tso nde hasa masumu, nde uyaka kolo-kolo mu mo. 16 Baasiingani masumu ma benu ŋa busu bu bambaahi. Na baabitasanaani bana mu masambulu, mana benu libeloho. Ŋa muutu wu akuha ubaasambila, lisambulu la nde, libaaba na mifudi.

17 Eliya aba muutu we bisu a benu. Nde asambili na mukonono mana mvula avelenoho ŋa toto. Buuna, bilima bitatu na batsungi basamunu, mvula a hanohi ŋa toto ve. 18 Titswene, nde abwesambila na Nzambi anohisi mvula, toto yabuti mimbutu.

19 Baana baa ngu a me, tso muutu mumosi ŋa hati la benu tahuhi na imbuli, yaabaani ti mukima utwala uyafutala nde. 20 Muutu wu ubaayafutala musumihi mo wuuna mu nzila, ufuuhasa muvumu a nde mu lipfu, na ufungala limya li masumu.