1 Me Yaki, musalili a Nzambi na wa Pfumu Yisu Kristo, ndi mu upa bwehe huli bibandu kuumi na byole, bi byatsamuha mu matsi moosi.

2 Baana bangu a me, monwaani kinya mu pasi lobese lili uyila benu, 3 bu liyaabi ti lobese li imiinu hya benu, libaabuta mukonono. 4 Ka mukonono a benu afwana usupana mu ukuhasa vanga la nde, mana benu liba ba baakula, ba baakuha, na livelekiima pasi isiha.

5 Ni mu buuna, tso muutu mumosi mu benu veli na dyeele, nde avondo lo huli Nzambi, wu uva nde lo. Mu tooni ati, Nzambi ubaava huli baatu boosi mu mutima wu mubwe, hwavele masyembo. 6 Ka nde avondo lo mu imiinu, hwavele matsika. Mu tooni ati, wu ubasa matsika, li we po mubu, yi ifula hibaanyngasa na utsyete. 7 Muutu wa pila yina, utwala usa matsimi ma uyaka pasi isiha huli Pfumu ve. 8 Nde «mbambi malimi moole»*, muutu nga matsika.

9 Mwana a ngu wu li iyaha abaamono kinya mu tooni ati, Nzambi li mu usyenolo nde. 10 Na mwaana a ngu nga busina abaamono kinya mu tooni ati, Nzambi ukulamasa nde. Ka muutu nga busina uvyoho we ifulu hya bwadi. 11 Bu nyangu hubaapala, mbaahu a lwanga, yibaakanyisa bwadi. Ifulu hibaanengele, hibaabwa, na yoli-yoli a hyo yibaadimbala. Ni bumosi kaka huli isina, nde udimbala ŋa hati li mavaanga ma nde.

12 Kinya huli muutu wu ubaakunda lobese. Humbisa ubingala lo, nde ubaha mutata a moonyi, wu Nzambi hasiidi nzuhisini huli ba baatondo nde. 13 Pasi muutu, a haleele ŋa lobese li miiyila nde ti: «Ni Nzambi miilobese me!» Mu tooni ati, bubi utwala ulobese Nzambi ve. Na Nzambi nde mwakulu a habaalobese muutu ve. 14 Ka pasi muutu ubaabwa mu lobese, ŋa linyungi la nde mwakulu libaaduta na libaasoho nde. 15 Titswene, ŋa linyungi limiiyele, lo libaabuta lisumu. Na lisumu liyele, libaabuta lipfu.

16 A lipfuta benu mwakulu ve, baana ba ngu a me baa litondo. 17 Bungodu bu bungeele bwosi, na bu bwakuha, bubaamata hu yulu huli Nzambi, muvaangi mayalala ma yulu. Na huli nde, tsobili yo ve, nde a habaasobo ve, we bu inzinza hibaatanyuha na ukuukama. 18 Nzambi aviidi bisu moonyi. Nde aviidi bisu moonyi mu litondo la nde, na mu likumbasa la mambu ma nde ma mbuli, mana bisu liba we mbutu yatsomi mu byosi bi nde havanga.

19 Yaabaani lo, bambaahi ba me baa litondo. Pasi muutu atehe matswi, aba na limama mu utoyo, limama mu udasuha. 20 Mu tooni ati, kesi a muutu a yibaakuhasa litondo la Nzambi ve. 21 Ni mu buuna, timbaani mbindu yoosi na mavaanga moosi ma mabi. Yakaani hutso a kulimini, mambu ma Nzambi ma baakuni mu benu, ma mu utwala ufuuhasa benu.

22 Baasalilaani we bu mambu ma Nzambi mali mu uleele benu. A liba ndulu bayuhi ve. Benu livelesalila mo, benu lu upfuta benu mwakulu. 23 Muutu wu ubaayuha mambu ma Nzambi hwavele usalila mo, li we muutu wu li mu utala hiinzi hya nde mu limwenu. 24 Humbisa umono hiinzi hya nde, nde ubaayene, na ubaavusana mu mawasa buni abeedi. 25 Ka muutu wu ubakengese mu mikele mya tsiki, mikele mi bunyanga, ubaakwilala mu myo. Nde a habaasuka ndulu mu uyuha ve, na a habaavusana myo ve, ka nde ubaasalila myo. Muutu wa pila yiina, umono kinya mu bisalili bya nde.

26 Tso muutu li mu umonehele we musambili wa mbuli, hwavele ukuta limi la nde, nde li mu upfuta nde mwakulu, inzambi hya nde hya mu pu. 27 Inzambi hi hyatsyeme na hi hyavele na tsumiili, ŋa busu bwa wu li Nzambi na Taata, ni mu ubaakumbasa bitsana na bakwili mutso minyongi mya bo. Inzambi hi hyatsyeme, ni mu uvelesumaha mu mambu ma mabi ma tsi mo yiniiyi.