1 Midingu na iboho bya benu, huni bili mu umata? Byo bili mu umata mu manzala ma benu ma nyinga, ma mali mu ulwana pasi taangu, mutso mitima mya benu. 2 Benu libaanyungala isiha, ka benu utwala ubaha hyo ve. Ni mu buuna, benu lamiivangama mu uduba. Benu libaasaha ubaha isiha, ka benu utwala ubaha hyo ve. Ni mu buuna, benu libaakakana na libaalwana. Benu laavelebaha bi benu lili na byo nzala, mu tooni ati, benu a lili mu uvondo byo huli Nzambi ve. 3 Ŋa benu libaavondo, benu libaaveleyaka, mu tooni ati, masambulu ma benu mali we pinda bipolo. Na bi benu libaavondo, bili ndulu bi usalila mu uywatisa manzala ma benu ma mabi. 4 Bimbembo mo biniibi! Benu a liyabi ve ti, utondo mambu ma tsi, ni ubelele hwa Nzambi? Ni mu buuna, tso muutu tondi uba mbaahi a tsi, nde aka muboho a Nzambi. 5 Benu libaatsima ti, Libuuku la Ngidi mu pu laatoyo ŋa baaleele ti: «Nzambi ubaasa bisu likwabi mu livupu li nde hasusa mu bisu✝.» 6 Ka hyese hi Nzambi ubaava, hyabwefulala bunene. Hyo hibaaleele ti: «Nzambi abelele banga isaayi, ka nde ubaava lisyeme la nde, huli baatu banga a kulimini.» 7 Ni mu buuna, singalaani Nzambi, bisalaani Saatana, na nde ubata benu. 8 Yasusahani huli Nzambi, na nde uyasusaha huli benu. Swahani myoho mya benu, benu baatu banga masumu. Tsyemesaani mitima mya benu, benu banga a moole-moole. 9 Baani mu lingebe, lilaani na nyongwaani. Nyaha hyenze hya benu, hikituha ililu, na kinya a benu yikituha lingebe. 10 Kulamanaani ŋa busu bwa Pfumu Nzambi, na nde usyenolo benu.

11 Baana baa ngu, a litatasana benu na benu ve. Woosi wu uli mu utata mwaana a ngu a nde, buuve utsundasa nde, li mu urokolo Mikele na utsundasa myo. Buuna, pasi nde wu utsundasa Mikele, nde a hali mu ubwesalila myo ve, ka nde amiibinuha mutsundisi. 12 Ni Nzambi siha li Musundi Mikele, na Mutsundisi. Nde utwala ufuuhasa, tso uduba byosi. Ka we, na we li, mu utsundasa muutu na we?

13 Bunuubu, yuhaani me, benu baa libaaleele: «Loloyi buuve ngwali, bisu lu uyene hu musyenge mo wunuuwu, bisu lu uvyoso ilima huuna. Bisu lu usa mumbungu a bisu, na bisu lu ubaha kaluha yindahi.» 14 Benu a liyabi ma mu uyiila benu ngwali ve. Mu taangu mo yiina, idiingu hya benu buni hyu uba? Benu lili we libungi, li libaamonehele mu mwaana taangu hole, na libaadimbala. 15 Monwaani buni benu laafwana uleele: «Tso Pfumu tondi, bisu lu uba moonyi na bisu lu usa hinihi, buuve hinihi.» 16 Ka mu mbuli, benu lili baduni na banga livama. Mbiili ya pila mo yiina, yili yimbi. 17 Ni mu buuna, tso muutu yabi uvanga lilibwe, na nde a havangi love, nde li mu usa lisumu.